លោក ស៊យ ហ្វ (Souy For) អាយុ ៥១ ឆ្នាំ ដែលជាឪពុកកូន ២ នាក់ បាននិយាយអំពីស្ថានីយថាមពលថ្មីមួយនេះថា៖ «ប្រសិនបើគ្មានគម្រោងនេះទេ នោះយើងនឹងនៅតែរស់នៅដោយលំបាក ដោយប្រើអាគុយ ឬចង្កៀងប្រេងកាត»។
«នៅភូមិថ្មី ដោយសារតែអគ្គិសនីមានតម្លៃថោកនិងមានស្ថិរភាព យើងអាចប្រើប្រាស់សម្ភារដែលយើងមិនធ្លាប់ប្រើពីមុននៅភូមិចាស់ដោយ សារតែខ្វះភ្លើងអគ្គិសនី ដូចជាម៉ាស៊ីនត្រជាក់ កង្ហារ ទូទឹកកក និងទូរទស្សន៍ ជាដើម»។
លោក ស៊យ ហ្វ ជាពលរដ្ឋម្នាក់ក្នុងចំណោមរាប់រយគ្រួសារទៀតដែលស្ម័គ្រចិត្តចាកចេញពីភូមិចាស់របស់ពួកគេ ដើម្បីផ្លាស់លំនៅទៅកន្លែងថ្មី ដើម្បីត្រួសត្រាយផ្លូវសម្រាប់ការអភិវឌ្ឍស្ថានីយវារីអគ្គិសនីសេសានក្រោម ២ ដែលមានកម្លាំង ៤០០ មេហ្គាវ៉ាត់នៅស្រុកសេសាន ខេត្តស្ទឹងត្រែង ភាគខាងជើងប្រទេសកម្ពុជា។
ស្ថានីយវារីអគ្គិសនីសេសានក្រោម ២ ត្រូវបានបញ្ចប់ក្នុងឆ្នាំ ២០១៨ គឺជាការបណ្តាក់ទុនរួមគ្នារវាងក្រុមហ៊ុនចិន Huaneng Hydrolancang International Energy ដែលកាន់កាប់ភាគហ៊ុនចំនួន ៥១% និងក្រុមហ៊ុនរ៉ូយ៉ាល់គ្រុបរបស់កម្ពុជាដែលមានភាគហ៊ុន ៣៩% និងក្រុមហ៊ុន វៀតណាម EVN International Joint Stock Company មានភាគហ៊ុន ១០%។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា គម្រោងនេះកំពុង ផ្តល់អំណាចដល់ការអភិវឌ្ឍសេដ្ឋកិច្ចសង្គមរបស់ប្រទេសអាស៊ីអាគ្នេយ៍មួយនេះ ដែលមានសមត្ថភាពផលិតថាមពលកកើតឡើងវិញបាន ៤០០ មេហ្គាវ៉ាត់។
លោកថ្លែងថា៖ «គម្រោងនេះមានសារៈសំខាន់ ដើម្បីធានាសន្តិសុខថាមពលរបស់កម្ពុជា ហើយវាបាន ផ្តល់នូវអត្ថប្រយោជន៍យ៉ាងធំធេងដល់ប្រទេសកម្ពុជា និងប្រជាជនរបស់ខ្លួនទាំងមូល»។
លោក ហ្វឿន ហេង (Foeun Heng) អាយុ ៦៣ ឆ្នាំ បានផ្លាស់ប្តូរ លំនៅនៅឆ្នាំ ២០១៦ ដោយចាប់ផ្តើមជីវិតថ្មីជាមួយផ្ទះឈើទំហំ ៨០ ម៉ែត្រការ៉េ និងដីស្រែ ៥ ហិកតា ដែលផ្តល់ដោយរដ្ឋាភិបាលក្នុងតំបន់ និងគម្រោងក្រុមហ៊ុន។ គាត់បានដាំដើមស្វាយចន្ទីនៅលើផ្ទៃដីទំហំ៥ហិកតារបស់គាត់ដែលអាចរកចំណូលបាន ជិត ៣ ០០០ ដុល្លារ ក្នុង ១ ឆ្នាំ ពីការប្រមូលផលគ្រាប់ស្វាយចន្ទី។
លោក ហេង បានប្រាប់ Xinhua កាលពីពេលថ្មីៗនេះថា៖ «នៅទីនេះជីវិតមានភាពងាយស្រួល ពីព្រោះយើងមានផ្លូវល្អ ប្រព័ន្ធលូបង្ហូរទឹកអណ្តូងទឹក តម្លៃអគ្គិសនីថោក មានសាលារៀន មានមណ្ឌលសុខភាព វត្តអារាម និងប៉ុស្តិ៍ប៉ូលិស»។
លោក ហ្វឿន ជឿន (Foeun Choeun) មេឃុំស្រែគរថ្មីបានឱ្យដឹងថា បច្ចុប្បន្នសហគមន៍ដែលផ្លាស់ប្តូរលំនៅ មានចំនួន ៩៩៦ គ្រួសារ ដែលមានប្រជាជនជិត ៣ ពាន់នាក់។
កាលពីខែមុន អគ្គិសនីកម្ពុជា (EDC) បានផ្តល់ពានរង្វាន់ «Excellent Power Generation Enterprise Award» ដល់រោងចក្រវារីអគ្គិសនីសេសានក្រោម ២ ដោយបានកោតសរសើរ ចំពោះការផ្គត់ផ្គង់ថាមពលស្អាត មានស្ថិរភាព និងអាចជឿទុកចិត្តបានមកកម្ពុជា។
លោក កែវ រតនៈ អគ្គនាយកអគ្គិសនីកម្ពុជាបានថ្លែងនៅក្នុងវិញ្ញាបនបត្រសរសើរនោះថា «ក្នុងរយៈពេលប្រតិបត្តិការ ២ ឆ្នាំចុងក្រោយនេះ គម្រោងទំនប់វារីអគ្គិសនីសេសានក្រោម ២ មានជំនាញវិជ្ជាជីវៈដោយផ្តល់ការផ្គត់ផ្គង់អគ្គិសនីដែលអាចជឿទុកចិត្តបានដល់ព្រះរាជាណាចក្រកម្ពុជា»។
អគ្គិសនីដែលផ្តល់ដោយគម្រោងនេះមានចំនួន ១៨,៦៩ % នៃថាមពលសរុបដែលបានបង្កើតនៅក្នុងប្រទេសអាស៊ីអាគ្នេយ៍មួយនេះ នៅឆ្នាំ ២០២០ គិតត្រឹមថ្ងៃទី ២ ខែ សីហា ឆ្នាំ ២០២១ អគ្គិសនីដែលបានផលិតនៅទីនេះមានលើសពី ៦០០ លានគីឡូវ៉ាត់ម៉ោងនៅឆ្នាំនេះ។
លោក ឆាយ ខៃម៉េង មន្ត្រីទំនាក់ទំនងសាធារណៈនៃស្ថានីយវារីអគ្គិសនីសេសានក្រោម ២ បានថ្លែងថា ៖«ទោះបីជាមានការរំខានដោយសារជំងឺកូវីដ ១៩ ក៏ដោយ ក៏វារីអគ្គិសនីនៅតែផ្គត់ផ្គង់អគ្គិសនីដល់បណ្តាញអគ្គិសនីជាតិយ៉ាងមានស្ថិរភាព ពីព្រោះកម្មកររបស់យើងបានធ្វើការគ្រប់ពេលវេលា ហើយពួកគេមិនបានទៅផ្ទះទេក្នុង អំឡុងពេលនេះ ដើម្បីទប់ស្កាត់ការរីករាលដាលនៃជំងឺកូវីដ ១៩»៕
(Xinhua)