.jpg)
សិស្សបានត្រឡប់ចូលរៀនវិញ បន្ទាប់់ពីឈប់សម្រាកយូរដោយសារការផ្ទុះឡើងជំងឺកូវីដ។
អនុវិទ្យាល័យ និងវិទ្យាល័យនៅកម្ពុជាបានបើកដំណើរការឡើងវិញ ជាបណ្តើរៗហើយនៅថ្ងៃពុធនេះ បន្ទាប់ពីប្រជាជនភាគច្រើននៅក្នុងប្រទេសអាស៊ីអាគ្នេយ៍មួយនេះបានចាក់វ៉ាក់សាំងការពារជំងឺកូវីដ ១៩។
នៅឯវិទ្យាល័យព្រះស៊ីសុវត្ថិក្នុងរាជធានីភ្នំពេញ សិស្សានុសិស្សបានពាក់ម៉ាស់ការពារយ៉ាងត្រឹមត្រូវ នៅពេលដើរចូលសាលារៀន និងបានត្រួតពិនិត្យសីតុណ្ហភាព និងលាងដៃជាមួយអាល់កុលនៅក្លោងទ្វារចូល។
លោក សម្យ កំសាន្ត នាយករងវិទ្យាល័យព្រះស៊ីសុវត្ថិបានប្រាប់ Xinhua ថា៖ «យើងបានគោរពយ៉ាងខ្ជាប់ខ្ជួននូវនីតិវិធីប្រតិបត្តិការស្តង់ដារ (SOPs) ហើយចំនួនសិស្សនៅក្នុងថ្នាក់រៀនត្រូវបានកំណត់ត្រឹមតែ ១៥នាក់ប៉ុណ្ណោះ»។
ក្នុងសម្លៀកបំពាក់ឯកសណ្ឋានសាលាអាវព៌ណស សំពត់ខៀវ និងមានពាក់ម៉ាស់ផង សិស្សថ្នាក់ទី៩ ឃុន សុភ័ក្រ រៀននៅវិទ្យាល័យព្រះស៊ីសុវត្ថិ បាននិយាយថា នាងរីករាយណាស់ដែលបានត្រឡប់មកសាលារៀនវិញ បន្ទាប់ពីបិទអស់រយៈពេលជិត ៧ ខែ ដោយសារជំងឺកូវីដ ១៩។
យុវតីវ័យ ១៥ ឆ្នាំ រូបនេះបានឱ្យ Xinhua ដឹងថា៖ «ឥឡូវនេះខ្ញុំមានអារម្មណ៍ធូរស្បើយ បន្ទាប់ពីបានវិលត្រឡប់មករៀនក្នុងថ្នាក់ដោយផ្ទាល់វិញ។ វាតានតឹងក្នុងការរៀនតាមអនឡាញនៅផ្ទះ ពីព្រោះបរិយាកាសរៀនសូត្រគឺមិនដូចការអង្គុយនៅក្នុងថ្នាក់ជាមួយគ្រូ និងមិត្តរួមថ្នាក់នោះទេ»។ សុភ័ក្ត្រ និយាយថា គាត់បានចាក់វ៉ាក់សាំង Sinovac របស់ចិនបានចំនួន ២ ដូសហើយ។ «ខ្ញុំពិតជាមានទំនុកចិត្តលើសុវត្ថិភាព គុណភាព និងប្រសិទ្ធភាពនៃវ៉ាក់សាំង Sinovac ក្នុងការការពារជីវិតខ្ញុំពីជំងឺកូវីដ ១៩»។
ជាមួយប្រជាជនសរុបចំនួន ១៦ លាននាក់ ប្រទេសកម្ពុជា បានចាប់ផ្តើមចាក់វ៉ាក់សាំងការពារជំងឺកូវីដ ១៩ សម្រាប់មនុស្សពេញវ័យចំនួន ១០ លាននាក់ នៅក្នុងខែកុម្ភៈ និងសម្រាប់ក្មេងជំទង់ជិត ២ លាននាក់ ដែលមានអាយុពី ១២ ទៅ ១៨ ឆ្នាំ នៅក្នុងខែសីហា។
រហូតមកដល់ពេលនេះ មនុស្សពេញវ័យចំនួន ៩,៧៧ លាននាក់ និងក្មេងជំទង់ចំនួន ១,៧១ លាននាក់ បានទទួលវ៉ាក់សាំងលើកដំបូងដែលស្មើនឹង ៧១,៨ ភាគរយនៃប្រជាជននៅក្នុងប្រទេស នេះបើយោងតាមក្រសួងសុខាភិបាល។
វ៉ាក់សាំងកូវីដ ១៩ ស្ទើរតែទាំងអស់ដែលត្រូវបានប្រើនៅក្នុងយុទ្ធនាការចាក់វ៉ាក់សាំងនេះ គឺជាវ៉ាក់សាំង Sinovac និង Sinopharm របស់ប្រទេសចិន។
លោកនាយករដ្ឋមន្ត្រី ហ៊ុន សែន កាលពីពេលថ្មីៗនេះបានថ្លែងថា៖ បើគ្មានការជួយពីប្រទេសចិនទេ ប្រាកដណាស់យើងនឹងមិនមានវ៉ាក់សាំងគ្រប់គ្រាន់សម្រាប់ប្រជាជនរបស់យើងទេ» និងបានបន្ថែមថា កម្ពុជាក៏សូមថ្លែងអំណរគុណដល់ជំនួយរបស់ប្រទេសចិន ក្នុងការជួយកម្ពុជា ដើម្បីប្រយុទ្ធប្រឆាំងនឹងជំងឺកូវីដ ១៩។
ឯកឧត្តម ហង់ជួន ណារ៉ុន រដ្ឋមន្ត្រី ក្រសួងអប់រំ បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា គ្រូបង្រៀន និងសិស្សត្រូវចាក់វ៉ាក់សាំង ហើយត្រូវបង្ហាញបណ្ណចាក់វ៉ាក់សាំងមុនពេលចូលសាលារៀន។
លោកស្រី Li Ailan តំណាងអង្គការសុខភាពពិភពលោកប្រចាំនៅកម្ពុជាបានស្វាគមន៍ចំពោះការបើកដំណើរការសាលារៀនឡើងវិញជាបណ្តើរៗ ដោយបានថ្លែងថា វាត្រូវបានធ្វើឡើងទាន់ពេលវេលា និងឆ្លាតវៃ។
លោកស្រីបានប្រាប់ Xinhua ថា៖ «ខណៈកុមារអាចឆ្លងវីរុសនេះ ប៉ុន្តែអាការជំងឺពួកគេហាក់មិនងាយវិវឌ្ឍទៅជាជំងឺធ្ងន់ធ្ងរ ឬស្លាប់ទេ បើធៀបជាមួយមនុស្សពេញវ័យ ជាពិសេសបើធៀបជាមួយមនុស្សចាស់»។
លោកស្រី Foroogh Foyouzat តំណាងអង្គការ UNICEF ប្រចាំនៅកម្ពុជាបានសន្មតពីការបើកសាលារៀនឡើងវិញថា ជាដំណើរវិវឌ្ឍន៍ដ៏អស្ទារ្យ ដែលរដ្ឋាភិបាលសម្រេចបានការចាក់វ៉ាក់សាំងការពារជំងឺកូវីដ ១៩។
លោកស្រី Foyouzat បានណែនាំថាសាលារៀននៅក្នុងតំបន់ដែលមានអត្រាឆ្លងទាបត្រូវបើកមុន ហើយត្រូវកំណត់ទំហំថ្នាក់រៀន និងផ្តោតខ្លាំងទៅលើវិធានការអនាម័យ និងសុវត្ថិភាព ដែលត្រូវបានបង្ហាញថាមានប្រសិទ្ធភាពក្នុងការការពារពីការឆ្លងឱ្យបានច្រើនបំផុត៕
Xinhua
