.jpg)
ពហុកីឡដ្ឋានជាតិមរតកតេជោបានត្រៀមខ្លួនរួចរាល់សម្រាប់ការរៀបចំព្រឹត្តិការណ៍កីឡាស៊ីហ្គេម ឆ្នាំ ២០២៣។ រូបថត Supplied
ធ្វើដំណើរតាមបណ្តោយផ្លូវជាតិលេខ ៥ នៅភាគខាងជើងនៃរាជធានីភ្នំពេញ ភ្ញៀវទេសចរ អាចមើលឃើញពហុកីឡដ្ឋានជាតិមរតកតេជោដ៏ធំ ស្កឹមស្កៃ មានរាងដូច «សំពៅ» ដែលជាជំនួយរបស់ប្រទេសចិន។
ពហុកីឡដ្ឋាននេះអាចផ្ទុកអ្នកទស្សនាបានចំនួន ៦ ម៉ឺននាក់នឹងក្លាយជាកន្លែងសំខាន់សម្រាប់ការប្រកួតកីឡាដ៏ធំ នៅពេលកម្ពុជាធ្វើជាម្ចាស់ផ្ទះព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ (ស៊ីហ្គេម) ជាលើកដំបូងនៅខែឧសភា ឆ្នាំ ២០២៣ ខាងមុខ។
កីឡដ្ឋាននេះត្រូវបានសាងសង់ដោយក្រុមហ៊ុនវិស្វកម្មសំណង់រដ្ឋចិន China State Construction Engineering Corporation (CSCEC) ក្រោមជំនួយហិរញ្ញប្បទានឥតសំណងរបស់ចិន ដោយគម្រោងនេះត្រូវបានចាប់ផ្តើមសាងសង់នៅខែសីហា ឆ្នាំ ២០១៧ ហើយត្រូវបានសាងសង់បញ្ចប់ទាំងស្រុងកាលពីខែមុន។
ពិធីប្រគល់ទទួលកីឡដ្ឋានជាតិមរតកតេជោនេះត្រូវបានធ្វើឡើងនៅថ្ងៃទី ១២ ខែកញ្ញា ក្រោមវត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន និងលោក វ៉ាង យី ទីប្រឹក្សារដ្ឋនិងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន។
ទំនើប និងទាន់សម័យហើយការរចនាប្រកបដោយភាពច្នៃប្រឌិត
ឯកឧត្តម ថោង ខុន រដ្ឋមន្ត្រីក្រសួង ទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាបានមាន ប្រសាសន៍ថា ពហុកីឡដ្ឋាននេះគឺជាសមិទ្ធផលដ៏ធំធេងនៅក្នុងវិស័យកីឡាកម្ពុជា និងជានិមិត្តសញ្ញាថ្មីនៃមិត្តភាពដែកថែបដែលមិនអាចបំបែកបានរវាងប្រទេសទាំង ២។
ពហុកីឡដ្ឋាននេះមានកម្ពស់ ៣៩.៩ ម៉ែត្រត្រូវបានសាងសង់ឡើងរាង «សំពៅ» និងប៉មទាំង ២ មានកម្ពស់ ៩៩ ម៉ែត្រ និងត្រូវបានហ៊ុមព័ទ្ធដោយរចនាបទ្មប្រាង្គប្រាសាទនាសម័យអង្គរ។
ឯកឧត្តម ថោង ខុន មានប្រសាសន៍ថា៖ «សំពៅគឺជានិមិត្តរូបនៃមិត្តភាពជាប្រពៃណីរវាងប្រទេសកម្ពុជា និងចិន តាំងពីយូរលង់មកហើយ ពីព្រោះប្រជាជនចិនធ្លាប់ធ្វើដំណើរតាមសំពៅមកកម្ពុជាកាលពីសម័យបុរាណ»។
ឯកឧត្តមបន្តថា ប៉មខ្ពស់នៃកីឡដ្ឋានរាងដូចសំពៅនេះគឺជានិមិត្តរូបដៃសំពះដែលមានក្នុងរចនាបទ្មសំណង់ស្ថាបត្យកម្មខ្មែរ ដែលពិតជាឆ្លុះបញ្ចាំងពីវប្បធម៌ និងប្រពៃណីខ្មែរ។
ឯកឧត្តមមានប្រសាសន៍ថា ពហុកីឡដ្ឋានជាតិមរតកតេជោគ្របដណ្តប់លើផ្ទៃដីទំហំ ១៦ ហិកតានៃទំហំបរិវេណពហុកីឡដ្ឋានសរុបមានទំហំ ៨៥ ហិកតា មានកម្ពស់ ៥ ជាន់ ដែលត្រូវបានសាងសង់ឡើងដោយបច្ចេកវិទ្យាទំនើប និងសម្ភារដែលមានគុណភាពខ្ពស់។
«ក្រុមហ៊ុន CSCEC មានទំនួលខុសត្រូវខ្ពស់ ហើយបានប្រើបច្ចេកវិទ្យាទំនើបសម្រាប់ការសាងសង់ពហុកីឡដ្ឋាននេះ ដោយគោរពតាមស្តង់ដារបច្ចេកទេសទាំងអស់។ ពហុកីឡដ្ឋាននេះអាចផ្ទុកមនុស្សបាន ៦ ម៉ឺននាក់ និងអាចជម្លៀសមនុស្សចេញអស់ដោយប្រើពេលតែ ៧ នាទីប៉ុណ្ណោះ ក្នុងករណីមានអាសន្ន»។ ឯកឧត្តមបន្ថែមថាលេខ QR កូដ ក៏ត្រូវបានដំឡើងនៅលើកៅអីនីមួយៗ ផងដែរ។
ឯកឧត្តមថ្លែងថា ស្ថិតនៅចម្ងាយប្រហែល ១៨ គីឡូម៉ែត្រនៅភាគខាងជើងទីក្រុង ពហុកីឡដ្ឋាននេះក៏មានសណ្ឋាគារ ហាងលក់សំលៀក បំពាក់កីឡា កន្លែងលក់អាហារ និងកន្លែងផ្សេងៗជាច្រើនទៀត។ ហើយវាមិនត្រឹមតែជួយដល់ការអភិវឌ្ឍកីឡាប៉ុណ្ណោះទេ ប៉ុន្តែវាក៏ជាមេដែកទាក់ទាញភ្ញៀវទេសចរ ជាពិសេសភ្ញៀវទេសចរចិន មកកាន់ប្រទេសកម្ពុជា ក្រោយជំងឺកូវីដ ១៩ ត្រូវបញ្ចប់។
កំណត់ត្រាថ្មីនៃមិត្តភាពដែកថែប
ពហុកីឡដ្ឋានជាតិមរតកតេជោអាចផ្ទុកអ្នកទស្សនាបាន ៦ ម៉ឺននាក់។ រូបថត Supplied
ពហុកីឡដ្ឋាននេះគឺជាគម្រោងដ៏សំខាន់មួយរវាងកម្ពុជា និងចិន នៅក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) ក្នុងគោលបំណងលើកស្ទួយកីឡាករ ផ្លាស់ប្តូរវប្បធម៌ និងទំនាក់ទំនងរវាងប្រជាជន និងប្រជាជន។
នៅក្នុងពិធីនោះ លោកនាយករដ្ឋមន្ត្រី ហ៊ុន សែន បានមានប្រសាសន៍ថាពហុកីឡដ្ឋាននេះ គឺជាផ្លែផ្កានៃកិច្ចសហប្រតិបត្តិការយ៉ាងជិតស្និទ្ធរវាងកម្ពុជានិងចិន ដោយលោកបានបញ្ជាក់ថា លោកមិនដែលគិតថាកម្ពុជានឹងមានកីឡដ្ឋានដ៏ស្រស់ស្អាតបែបនេះទេ។
លោកនាយករដ្ឋមន្ត្រី ហ៊ុន សែន បន្ថែមថា៖ «វាជាកំណត់ត្រាថ្មីនៃមិត្តភាពដែកថែបរវាងកម្ពុជា និងចិន។ បើគ្មានការគាំទ្រពីប្រទេសចិនទេ យើងប្រាកដជាគ្មានកីឡដ្ឋាននេះទេ។ ខ្ញុំអាចនិយាយបានថានេះគ្រាន់តែជាផ្លែឈើដែលប្រមូលនៅដើមរដូវប៉ុណ្ណោះ តាមរយៈមិត្តភាពដែកថែបរបស់យើង»។
ទន្ទឹមនឹងនេះដែរ ឯកឧត្តម Wang ថ្លែងថាពហុកីឡដ្ឋាននេះគឺជាពហុកីឡដ្ឋានដ៏ធំបំផុតដែលប្រទេសចិនបានផ្តល់ដល់មិត្តបរទេសរបស់ខ្លួន ជាមួយនឹងជំនួយឥតសំណង។
ឯកឧត្តមថ្លែងថា៖ «យើងសាងសង់ពហុកីឡដ្ឋានដ៏ធំមួយនេះនៅក្នុងប្រទេសកម្ពុជា ពីព្រោះមិត្តភាពរបស់ប្រជាជនយើងទាំងពីរគឺមានភាពស៊ីជម្រៅ។ ខ្ញុំសង្ឃឹមថាប្រជាជន និងអត្តពលិកកម្ពុជានឹងរីករាយជាមួយព្រឹត្តិការណ៍កីឡារបស់ពួកគេនៅពហុកីឡដ្ឋាននេះ ហើយសង្ឃឹមថាអត្តពលិកកម្ពុជានឹងសម្រេចបាននូវសមិទ្ធផលបន្ថែមទៀតនៅក្នុងព្រឹត្តិការណ៍ស៊ីហ្គេមនៅឆ្នាំ ២០២៣ ខាងមុខ»។
អ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន បានមានប្រសាសន៍ថាពហុកីឡដ្ឋាននេះបានបង្ហាញយ៉ាងច្បាស់ពីការយកចិត្តទុកដាក់ជាពិសេសរបស់ប្រទេសចិនក្នុងការគាំទ្រដល់ការអភិវឌ្ឍ វិស័យកីឡានៅកម្ពុជា។
«ពហុកីឡដ្ឋាននេះនឹងបម្រើជាស្ពានមួយទៀត ដើម្បីភ្ជាប់បេះដូងប្រជាជននៃប្រទេសយើងទាំងពីរ។ វាក៏នឹងជួយលើកកម្ពស់ការផ្សារភ្ជាប់រវាងប្រជាជន និងប្រជាជនរវាងប្រទេសកម្ពុជា និងពិភពលោកទាំងមូល ពីព្រោះពហុកីឡដ្ឋាននេះនឹងប្រមូលផ្តុំអត្តពលិក និងអ្នកទស្សនាមកពីជុំវិញពិភពលោក នៅពេលមានការប្រកួតធំៗ»។
លើកស្ទួយកេរ្តិ៍ឈ្មោះកម្ពុជានៅក្នុងព្រឹត្តិការណ៍កីឡាសកល
ពហុកីឡដា្ឋនរាងដូចសំពៅដ៏ស្រស់ស្អាតស្ថិតនៅភាគខាងជើងនៃរាជធានីភ្នំពេញ។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាមានប្រសាសន៍ថា ពហុកីឡដ្ឋាននេះមិនត្រឹមតែបានចាក់បញ្ចូលកម្លាំងថ្មីចូលទៅក្នុងទំនាក់ទំនងចិន-កម្ពុជាប៉ុណ្ណោះទេ ប៉ុន្តែថែមទាំងជួយលើកស្ទួយមុខមាត់កម្ពុជានៅលើឆាកអន្តរជាតិផងដែរ។
«យើងប្រាថ្នាចង់សាងសង់ពហុកីឡដ្ឋានទំនើប និងធំបែបនេះជាយូរមកហើយ រហូតមកដល់ពេលនេះដោយមានការគាំទ្រពីប្រទេសចិន ទើបក្តីសុបិន្តរបស់យើងបានក្លាយជាការពិត។ វានឹងជួយលើកកម្ពស់កិត្តិយស និងកិត្យានុភាពរបស់កម្ពុជានៅលើឆាកអន្តរជាតិ»។
កីឡាកររត់ល្បឿន ប៉ែន សុគង់ អាយុ ២៨ ឆ្នាំបានបង្ហាញពីក្តីរីករាយចំពោះប្រទេសចិនដែលបានផ្តល់ជំនួយសាងសង់កីឡដ្ឋានដ៏ស្រស់ស្អាតនេះ ដោយលោកបាននិយាយថាវានឹងក្លាយជាកំណប់ទ្រព្យដ៏ធំមួយសម្រាប់ប្រទេសកម្ពុជា។
លោក សុគង់ បានថ្លែងថា៖ «វាគឺជាមោទនភាពសម្រាប់ប្រទេសកម្ពុជា ពីព្រោះនៅក្នុងប្រវត្តិសាស្ត្ររបស់យើង យើងមិនដែលមានកីឡដ្ឋានដ៏អស្ចារ្យបែបនេះទេ»៕
By Mao Pengfei, Nguon Sovan
