.jpg)
ឯកឧត្តម Wang Wentian ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា។
ឯកឧត្តម លោកជំទាវ និងមិត្តភក្តិទាំងអស់ជាទីមេត្រី!
ក្នុងឱកាសខួបអនុស្សាវរីយ៍លើកទី ៧២ នៃការបង្កើតសាធារណរដ្ឋប្រជាមានិតចិន ខ្ញុំតាំងនាមឱ្យស្ថានទូតចិនប្រចាំកម្ពុជា សូមជូនពរដោយស្មោះដល់ជនរួមជាតិដែលកំពុងបម្រើការងារ សិក្សា និងរស់នៅក្នុងប្រទេសកម្ពុជា និងសូមថ្លែងអំណរគុណដោយស្មោះជូនចំពោះមិត្តគ្រប់មជ្ឈដ្ឋាននៃប្រទេសទាំង ២ ដែលតែងតែយកចិត្តទុកដាក់ និងគាំទ្រមិត្តភាពរវាងចិន និងកម្ពុជា!
រំឭកអតីតកាល: គណបក្សកុម្មុយនីស្តចិនបានបង្រួបបង្រួមដឹកនាំប្រជាជនចិន និងបន្តការតស៊ូបោះជំហានឆ្ពោះទៅមុខ។ ឆ្លងកាត់ការអភិវឌ្ឍ និងវិវឌ្ឍន៍ជាច្រើនលើកច្រើនសា ឆ្លងកាត់ការពុះពាររាល់ឧបសគ្គ និងការទទួលបាននូវសមិទ្ធផលផ្លែផ្កាដ៏ត្រចះត្រចង់ បង្កើតបានជាមាគ៌ាសង្គមនិយមដែលមានលក្ខណពិសេសនៃចិនដោយជោគជ័យ។ ចិនកំពុងអភិវឌ្ឍន៍ផ្លាស់ប្តូរមុខមាត់ថ្មី លើកកម្ពស់សមត្ថភាពចម្រុះនៃជាតិ សម្រេចបាននូវគោលដៅ ១០០ ឆ្នាំទី ១ បានកសាងសង្គម Xiaokang គឺជាសង្គមដែលជីវភាពរស់នៅរបស់ប្រជាជនមានកម្រិតល្អបង្គួរយ៉ាងពេញលេញនៅក្នុងប្រទេសចិន បានដោះស្រាយបញ្ហាក្រីក្រជាប្រវត្តិសាស្ត្រយ៉ាងដាច់ខាត និងកំពុងបោះជំហានយ៉ាងស្វាហាប់ឆ្ពោះទៅរកគោលដៅ ១០០ ឆ្នាំទី ២ ក្នុងការកសាងជាប្រទេសខ្លាំងក្លា ទំនើបកម្មតាមបែបសង្គមនិយមគ្រប់ជ្រុងជ្រោយ។ មាគ៌ាអភិវឌ្ឍន៍ ការច្នៃប្រឌិត និងការទទួលបានសមិទ្ធផលផ្លែផ្កាដ៏មហិមា ដែលបង្រួបបង្រួមដឹកនាំប្រជាជនចិនដោយគណបក្សកុម្មុយនីស្តចិន នឹងត្រូវបានកត់ត្រានៅក្នុងកំណត់ហេតុអភិវឌ្ឍន៍នៃប្រជាជាតិចិន និងកំណត់ហេតុអភិវឌ្ឍន៍អរិយធម៌មនុស្សជាតិ។
ក្រឡេកមើលបច្ចុប្បន្នកាល: ប្រឈមមុខជាមួយជំងឺវីរុសកូវីដ ១៩ ដែលផ្ទុះឡើងជាបន្ទាន់ រដ្ឋាភិបាលចិនតែងតែប្រកាន់ខ្ជាប់នូវការយកប្រជាជនជាធំ និងអាយុជីវិតជាចម្បង តែងតែប្រកាន់នូវអាកប្បកិរិយាប្រកបដោយការទទួលខុសត្រូវខ្ពស់ក្នុងការរៀបចំជំរុញកិច្ចទប់ស្កាត់ជំងឺវីរុស និងការអភិវឌ្ឍសេដ្ឋកិច្ចសង្គម។ ចំនួនវ៉ាក់សាំងកូវីដដែលបានចាក់នៅក្នុងប្រទេសចិនមានចំនួនសរុប ២១៧០ លានដូស និងមានប្រជាជនចំនួនជាង ១ ០០០ លាននាក់បានបញ្ចប់ការចាក់វ៉ាក់សាំងទាំងស្រុង ហើយវ៉ាក់សាំងដែលបានផ្តល់ទៅកាន់សកលលោក ជាពិសេសប្រទេសកំពុងអភិវឌ្ឍន៍មានចំនួន ១២៥០ លានដូស បានជួយកាត់បន្ថយការរីករាលដាលនៃជំងឺវីរុសមួយនេះ និងបានជួយសង្គ្រោះអាយុជីវិតយ៉ាងច្រើន។
នៅពាក់កណ្ដាលឆ្នាំ ២០២១ ផលិតផលក្នុងស្រុកសរុបរបស់ចិនមានចំនួនលើសពី ៨.២ ទ្រីលានដុល្លារអាមេរិក មានកំណើន ១២.៧% បើធៀបនឹងរយៈពេលដូចគ្នាកាលពីឆ្នាំ ២០២០។ សមិទ្ធផលជាផ្លែផ្កាសំខាន់ៗទទួលបានក្នុងវិស័យដូចជា យានអវកាស ការរុករកនៅសមុទ្រជ្រៅ និង វិស័យ Supercomputer ជាដើម។
ប្រសិទ្ធភាពនៃយុទ្ធសាស្ត្រកម្លាំងជំរុញច្នៃប្រឌិតអភិវឌ្ឍន៍ទទួលបានជាបន្តបន្ទាប់ បានផ្តល់ជាការគាំទ្រយ៉ាងខ្លាំងដល់ការសាងគំរូអភិវឌ្ឍន៍ថ្មីដែលយកដំណើរវដ្តនៅក្នុងប្រទេសចិនជាចម្បង និងការជំរុញទៅវិញទៅមកនៃវដ្តទ្វេក្នុង និងក្រៅប្រទេស។
ដើរតាមនិន្នាការពិភពលោក: ប្រឈមមុខជាមួយការផ្លាស់ប្តូរនៃពិភពលោកដែលពុំធ្លាប់មានក្នុងរយៈពេល ១០០ ឆ្នាំនេះ ចិនប្រកាន់ខ្ជាប់នូវសន្តិភាព ការអភិវឌ្ឍ កិច្ចសហប្រតិបត្តិការ និងជោគជ័យរួម។ ប្រកាន់ខ្ជាប់នូវការបោះជំហានលើមាគ៌ាអភិវឌ្ឍន៍សន្តិភាព ជំរុញកសាងទំនាក់ទំនងអន្តរជាតិប្រភេទថ្មី ជំរុញការកសាងសហគមន៍វាសនារួមសម្រាប់មនុស្សជាតិ ជំរុញការកសាង «ខ្សែក្រវាត់ និងផ្លូវ» ដែលមានគុណភាពខ្ពស់សម្រាប់ការអភិវឌ្ឍ យកការអភិវឌ្ឍថ្មីនៃចិនផ្តល់ជាឱកាសថ្មីសម្រាប់ពិភពលោក។ សហការជាមួយប្រទេស និងប្រជាជនដែលស្រឡាញ់សន្តិភាព ផ្សព្វផ្សាយគុណតម្លៃរួមនៃសន្តិភាព ការអភិវឌ្ឍ យុត្តិធម៌ សច្ចធម៌ ប្រជាធិបតេយ្យ និងសេរីភាពសម្រាប់មនុស្សជាតិទាំងឡាយ បន្តប្រកាន់ខ្ជាប់កិច្ចសហប្រតិបត្តិការ មិនប្រឈមមុខដាក់គ្នា បើកចំហ មិនបិទជិត ផ្តល់អត្ថប្រយោជន៍ និងជោគជ័យទៅវិញទៅមក មិនអនុវត្តគោលការណ៍ទទួលអត្ថប្រយោជន៍តែភាគីម្ខាង ប្រឆាំងនឹងលទ្ធិដែលប្រើអំណាច និងនយោបាយសិទ្ធិគាបសង្កត់ តែងឈរជាមួយប្រវត្តិសាស្ត្រដែលត្រឹមត្រូវ និងភាពរីកចម្រើននៃមនុស្សជាតិ។
ថែរក្សាការពារចំណងមិត្តភាពដ៏ជ្រាលជ្រៅ: ចំណងមិត្តភាពដែកថែបរវាងចិន និងកម្ពុជាទទួលបានការលើកកម្ពស់ឥតឈប់ឈរក្នុងកិច្ចសហប្រតិបត្តិការប្រយុទ្ធប្រឆាំងនឹងជំងឺវីរុសកូវីដ និងជំរុញការអភិវឌ្ឍរួម។ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល បានសព្វព្រះរាជហឫទ័យប្រោសព្រះរាជទានជំនួយដ៏ថ្លៃថ្លាដល់កិច្ចទប់ស្កាត់ជំងឺវីរុសក្នុងប្រទេសចិន។ សម្ដេចតេជោនាយករដ្ឋមន្ត្រី ហ៊ុន សែន បានបំពេញទស្សនកិច្ចជាបន្ទាន់ទៅកាន់ប្រទេសចិនក្នុង «ដំណើរបញ្ច្រាស»។ ភាគីចិនបានចាត់បញ្ជូនក្រុមអ្នកជំនាញទប់ស្កាត់ជំងឺវីរុស និងផ្តល់វ៉ាក់សាំងមកកាន់កម្ពុជាជាអាទិភាព។ កម្មវិធីចាក់វ៉ាក់សាំងនិទាឃរដូវ (Spring Vaccination) ត្រូវបានអនុវត្តស្ទើរតែគ្រប់ខេត្តនៅទូទាំងប្រទេសកម្ពុជា។ សកម្មភាពដ៏កក់ក្តៅនីមួយៗត្រូវបាន បង្ហាញយ៉ាងច្បាស់អំពីអត្ថន័យស្នូលនៃសហគមន៍វាសនារួមរវាងចិន និងកម្ពុជា។ កិច្ចសហប្រតិបត្តិការជាក់ស្តែងក្នុងវិស័យសេដ្ឋកិច្ច និង ពាណិជ្ជកម្មរវាងប្រទេសទាំង ២ មានកំណើន ទោះបីជារងផលប៉ះពាល់នៃជំងឺវីរុសក៏ដោយ។
គម្រោងសំខាន់ៗក្នុងកិច្ចសហប្រតិបត្តិការ «ខ្សែក្រវាត់ និងផ្លូវ» មានដូចជាតំបន់សេដ្ឋកិច្ចពិសេសខេត្តព្រះសីហនុ ផ្លូវល្បឿនលឿនភ្នំពេញ-ក្រុងព្រះសីហនុ អាកាសយានដ្ឋានអន្តរជាតិសៀមរាបអង្គរថ្មីជាដើម ត្រូវបានជំរុញយ៉ាងរលូន។ កសិផលកម្ពុជាដែលមានគុណភាពខ្ពស់ជាច្រើនត្រូវបាននាំចេញទៅកាន់ទីផ្សារប្រទេសចិនឥតឈប់ឈរមានដូចជាអង្ករ ផ្លែចេក ផ្លែស្វាយជាដើម។ ប្រទេសទាំងពីរបានសម្របសម្រួលយ៉ាងស្អិតល្មួត និងគាំទ្រគ្នាទៅវិញទៅមក បង្ហាញពីសំឡេងយុត្តិធម៌ និងសច្ចធម៌លើបញ្ហាដែលពាក់ព័ន្ធនឹងផលប្រយោជន៍ស្នូលរវាងគ្នា និងគ្នា និង ជាចំណាប់អារម្មណ៍រួម។
ចំណងមិត្តភាពចិន និងកម្ពុជាទទួលបានផលដើមរដូវ ក្លាយជាគំរូដែលមានការជឿទុកចិត្តគ្នាទៅវិញទៅមកខាងនយោបាយ ផ្តល់អត្ថប្រយោជន៍ទៅវិញទៅមក និងកិច្ចសហប្រតិបត្តិការ គោរពគ្នាទៅវិញទៅមក ការផ្សារភ្ជាប់គ្នារវាងបេះដូងប្រជាជន និងកិច្ចសហប្រតិបត្តិការសន្តិសុខជាដើម។
ឆ្លៀតឱកាសនេះ ខ្ញុំសូមថ្លែងអំណរគុណដល់ប្រព័ន្ធផ្សព្វផ្សាយ និងមិត្តអ្នកអានកម្ពុជា ដែលតែងយកចិត្តទុកដាក់ និងគាំទ្រការអភិវឌ្ឍទំនាក់ទំនងចិន-កម្ពុជា និងសូមជូនពរសិរីមង្គលបវរប្រសើរជូនដល់អ្នកទាំងអស់គ្នា។ ជឿជាក់ថា ក្រោមការដឹកនាំជាយុទ្ធសាស្ត្ររបស់ថ្នាក់ដឹកនាំនៃប្រទេសទាំង ២ និងក្រោមកិច្ចខិតខំប្រឹងប្រែងរួមគ្នារបស់ប្រជាជនទាំង ២ ភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងកិច្ចកសាងសហគមន៍វាសនារួមគ្នារវាងចិន-កម្ពុជា នឹងបន្តបោះសម្ទុះទៅកាន់ដំណាក់កាលថ្មីមួយទៀត៕
សូមគោរពជូនពរ ចិននិងកម្ពុជាមានការអភិវឌ្ឍរីកចម្រើន ប្រជាជនរស់នៅដោយសុខក្សេមក្សាន្ត!
សូមជូនពរ មិត្តភាពចិន និងកម្ពុជាបន្តពីមួយជំនាន់ទៅមួយជំនាន់ និង ឋិតថេរជាអមតៈ!
