ការដែលធនាគារ ABA បានប្រតិបត្តិតាមបទប្បញ្ញត្តិទាំង អស់របស់ព្រះរាជាណាចក្រកម្ពុជាស្តីពីការគ្រប់គ្រងធនាគារ និងគ្រឹះស្ថានហិរញ្ញវត្ថុ តើវាមានន័យដូចម្តេចចំពោះអតិថិជន?
អាជ្ញាធរនានារបស់កម្ពុជា រួមទាំងធនាគារជាតិនៃកម្ពុជា (NBC) ដែលជាអាជ្ញាធរត្រួតពិនិត្យរបស់ធនាគារ ABA បានបង្កើតសំណុំបទដ្ឋាន បទប្បញ្ញត្តិ និងសេចក្តីណែនាំ ដែលឆ្លើយតបនឹងតម្រូវការសេដ្ឋកិច្ចក្នុង ស្រុកនិងបរិបទច្បាប់។
ការប្រកាន់ខ្ជាប់នូវបទដ្ឋានក្នុងស្រុក បទប្បញ្ញត្តិ និងសេចក្ដីណែនាំនេះ បានផ្តល់នូវទំនុកចិត្តដល់អតិថិជនថា ប្រតិបត្តិការរបស់ ABA មានសុវត្ថិភាពខ្ពស់ និងបានចាក់ប្ញសនៅ ក្នុងបរិបទកម្ពុជា។
តើបទដ្ឋានអន្តរជាតិអ្វីខ្លះ ដែល ABA ប្រតិបត្តិតាម?
ABA អនុវត្តតាមបទដ្ឋានអន្តរជាតិជាច្រើនផ្សេងៗគ្នា ក្នុងគោលបំណងផ្តល់ជូនអតិថិជននូវទំនុកចិត្តនិងការជឿជាក់ថា ABA ការពារទិន្នន័យ និងឯកជនភាពរបស់អតិថិជន ហើយជា មួយគ្នានោះដែរ គឺផ្តល់នូវសេវាធនាគារដែលមានភាពងាយស្រួល។
ឧទាហរណ៍ដ៏ល្អមួយ គឺបទដ្ឋានសន្តិសុខទិន្នន័យក្នុងវិស័យកាតទូទាត់ (PCI DSS)។ វា គឺជាសំណុំបទដ្ឋានសុវត្ថិភាពដែលត្រូវបានបង្កើតឡើង ដើម្បីធានាថា ក្រុមហ៊ុនទាំងអស់ដែលទទួលយក ដំណើរការ រក្សាទុក ឬបញ្ជូនទិន្នន័យអ្នកប្រើប្រាស់កាតទូទាត់ គឺមានសុវត្ថិភាព។
ក្នុងនាមជាបុត្រសម្ពន្ធរបស់ធនាគារជាតិកាណាដា ធនាគារ ABA ក៏ប្រតិបត្តិតាមបទដ្ឋានឧត្តមានុវត្តន៍កាណាដាផងដែរ ដើម្បីធានាថា ប្រតិបត្តិការរបស់ ABA គឺមានកម្រិតស្មើគ្នានឹងដៃគូអន្តរជាតិ។
ខណៈបទដ្ឋានអន្តរជាតិក្លាយជាប្រភពនៃការយល់ដឹងជាប្រចាំសម្រាប់ ABA ក្នុងការប្រតិបត្តិតាមឧត្តមានុវត្តន៍អន្តរជាតិនានា គឺវាចាំបាច់ណាស់សម្រាប់ ABA ក្នុងនាមជាធនាគារមួយនៅកម្ពុជាត្រូវគោរពឱ្យខ្ជាប់ខ្ជួនតាមបទដ្ឋាន បទប្បញ្ញត្តិ និងសេចក្តីណែនាំក្នុងប្រទេសទាំងលិខិតស្នាម និងស្មារតី។
ធនាគារ ABA បានរក្សាចំណាត់ ថ្នាក់លទ្ធភាពសងរយៈពេលវែងកម្រិត B+ ជាមួយទស្សនវិស័យ «ស្ថិរភាព» ដែលវាយតម្លៃដោយ S&P។ តើចំណុចនេះបញ្ជាក់ពីនិរន្តរភាពនៃការគ្រប់គ្រងប្រាក់កម្ចី និងប្រាក់បញ្ញើ និងគន្លងនៃកំណើនរបស់ធនាគារយ៉ាងដូចម្តេច?
ចំណាត់ថ្នាក់លទ្ធភាពសងរយៈពេលវែងកម្រិត B+ ដែលត្រូវបានផ្តល់ជូនដោយភ្នាក់ងារវាយតម្លៃ S&P ជាការឆ្លុះបញ្ចាំងអំពីដំណើរការដ៏ល្អ ប្រសើររបស់ ABA និងបញ្ជាក់ពីជំហរដ៏រឹងមាំរបស់ ABA នៅក្នុងទីផ្សារ។
ការវាយតម្លៃនេះ គឺជាលទ្ធផលនៃការអនុវត្តយុទ្ធសាស្ត្រអាជីវកម្មដ៏ល្អរបស់ ABA ដែលផ្តល់អត្ថប្រយោជន៍ដល់អតិថិជន និងម្ចាស់ភាគហ៊ុន។ ABA រក្សាចំណាត់ថ្នាក់ B+ នេះគឺដោយសារចំណែកទីផ្សារនៃប្រាក់កម្ចី និងប្រាក់បញ្ញើកើនឡើង ជាមួយនឹងប្រាក់ចំណេញខ្ពស់ជាងមធ្យម។
ស្ថិរភាពនេះជាការឆ្លុះបញ្ចាំងអំពីទស្សនៈដែល ABA នឹងគ្រប់គ្រងប្រកបដោយនិរន្តរភាពនូវកំណើនប្រាក់កម្ចី និងប្រាក់បញ្ញើ ដែលកើន ឡើងយ៉ាងឆាប់រហ័ស ហើយនឹងបន្តរាយការណ៍អំពីគុណភាពទ្រព្យសកម្មដ៏ល្អនេះ ទោះបីជាក្នុងបរិបទដ៏លំបាកនៃការរីករាលដាលជាសកលនៃជំងឺកូវីដ ១៩ ក៏ដោយ។
តើ ABA បានបណ្ដុះវប្បធម៌ប្រតិបត្តិតាមនៅក្នុងប្រតិបត្តិការរបស់ខ្លួនតាមវិធីណាខ្លះ?
ABA ចាត់ទុកវប្បធម៌ប្រតិបត្តិតាមដ៏រឹងមាំ ជាអត្ថប្រយោជន៍មួយសម្រាប់អតិថិជន ABA ដែលការពារផលប្រយោជន៍របស់ពួកគេ។ សម្រាប់ ABA អាជីវកម្មដែលរឹងមាំត្រូវតែកសាងឡើងដោយផ្អែកលើក្រមសីលធម៌ខ្ពស់ និងប្រតិបត្តិការប្រកប ដោយសុចរិតភាព។ ការប្រតិបត្តិតាមច្បាប់ និងបទប្បញ្ញត្តិរបស់និយតករក្នុងប្រទេស ជាមួយបទដ្ឋានឧត្ដមានុវត្តន៍របស់យើងជាមូលដ្ឋានគ្រឹះដែលបង្ហាញថា ABA គឺជានរណា។ ធនាគារបានបន្តវិនិយោគឥតឈប់ឈរ ដើម្បីជួយនិយោជិតរបស់ខ្លួន ឱ្យយល់ដឹងអំពីសារៈសំខាន់នៃមុខងារប្រតិបត្តិតាម។ យើងក៏កំពុងពង្រឹងដំណើរការយកចិត្តទុកដាក់ស្គាល់ និងប្រតិបត្តិតាមរបស់ ABA ដើម្បីជំរុញការយល់ដឹងដូចគ្នានេះ ចំពោះភាគីពាក់ព័ន្ធទាំងអស់នៅតាមខ្សែចង្វាក់គុណតម្លៃស្នូលរបស់ ABA។
ដើម្បីបណ្តុះវប្បធម៌នៃគុណតម្លៃរួមនៅធនាគារ ABA ទាំងមូល ធនាគារប្រើបច្ចេកវិទ្យាទំនើប។ យើងគាំទ្រ និងចូលរួមយ៉ាងពេញទំហឹងនៅក្នុងវគ្គបណ្តុះបណ្តាលស្តីពីការប្រតិបត្តិតាម និងកម្មវិធីពង្រឹងវិជ្ជាជីវៈដែលផ្តល់ដោយវិទ្យាស្ថានធនាគារ និងហិរញ្ញវត្ថុ និងលើកទឹកចិត្តដោយសមាគម ធនាគារនៅកម្ពុជា។
ធនាគារ ABA អនុវត្តយ៉ាងតឹងរ៉ឹង លើការប្រតិបត្តិតាម ច្បាប់ប្រឆាំងការសម្អាតប្រាក់ (AML) និងការក្លែងបន្លំ។ ក្នុងនាមជា គ្រឺះស្ថានហិរញ្ញវត្ថុឈានមុខគេមួយនៅកម្ពុជា តើវាបានជួយកេរ្តិ៍ឈ្មោះរបស់កម្ពុជានៅលើឆាកអន្តរជាតិយ៉ាងដូចម្តេចខ្លះ?
ធនាគារ ABA គាំទ្រការទទួលស្គាល់ប្រាក់រៀលជារូបិយប័ណ្ណជាតិ និងបង្កើនការប្រើប្រាស់ ដែលត្រូវបានលើកកម្ពស់ដោយធនាគារជាតិនៃកម្ពុជា។ ទោះយ៉ាងណាក៏ដោយ សេដ្ឋកិច្ចក្នុងស្រុកនៅតែបន្តពឹងផ្អែកលើប្រាក់ដុល្លារ ជាពិសេសសម្រាប់ប្រតិបត្តិការឆ្លងប្រទេសទាក់ទងនឹងការនាំចេញ និងនាំចូល។
ការអនុវត្តយ៉ាងតឹងរ៉ឹង ទៅតាមតម្រូវការនៃការឆាំងនឹងការសម្អាតប្រាក់/ហិរញ្ញប្បទានភេរវកម្ម គឺស្របតាមគោលបំណងរបស់រាជរដ្ឋាភិបាលកម្ពុជា និងដើម្បីធានាឱ្យមានការបន្តដំណើរប្រតិបត្តិការជាប្រាក់ដុល្លារ ជាមួយដៃគូធនាគារអន្តរជាតិ។
តើធនាគារ ABA កំពុងប្រើឧបករណ៍តាមដានហានិភ័យឌីជីថល ដូចជាការគ្រប់គ្រងហានិភ័យសហគ្រាស (ERM) ដើម្បីគ្រប់គ្រងហានិភ័យឱ្យបានរឹងមាំនិងប្រយ័ត្នប្រយែងយ៉ាងដូម្តេច?
ធនាគារ ABA បានអនុវត្តដំណោះស្រាយឌីជីថលលំដាប់ពិភពលោកជាច្រើនសម្រាប់ការប្រតិបត្តិតាម គ្រប់គ្រងហានិភ័យ និងការក្លែងបន្លំ ដើម្បីគ្រប់គ្រងហានិភ័យរបស់ខ្លួនប្រកបដោយភាពប្រយត្ន័ប្រយែងបំផុត និងប្រកាន់យកវិធីសាស្ត្រផ្អែកលើហានិភ័យ។
ដំណោះស្រាយទាំងនេះ ត្រូវបានប្រើប្រាស់ដើម្បីស្វែងរកប្រតិបត្តិការក្លែងបន្លំដែលអាចកើតមាន និងអាច ជួយការពារទិន្នន័យ និងប្រាក់របស់អតិថិជន ABA។ ក្រៅពីដំណោះស្រាយទាំងនេះ ABA ក៏ប្រើប្រាស់បច្ចេកវិទ្យាបញ្ញានិម្មិត (Machine Learning and Artificial Intelligence) ដ៏ទំនើបដើម្បីគ្រប់គ្រងហានិភ័យឲ្យកាន់តែរឹងមាំផងដែរ។
ប្រអប់សំណុំកម្មវិធីរបស់ ABA (ABA’s toolbox) ក៏ជួយយើងក្នុង ការគ្រប់គ្រងហានិភ័យដោយប្រយ័ត្នប្រយែង ដើម្បីការពារអត្ថប្រយោជន៍អតិថិន និងភាគហ៊ុនិករបស់យើង ក៏ដូចជាគាំទ្រសេដ្ឋកិច្ចក្នុងស្រុក ដែល ABA ត្រូវអនុវត្តក្នុងនាមជាធនាគារឈានមុខគេមួយ។
តម្លាភាព គឺជាគុណតម្លៃស្នូលនៅធនាគារ ABA។ តើធនាគារបង្ហាញពីចំណុចនេះយ៉ាងដូចម្តេច ហើយតើវាមានអត្ថន័យយ៉ាងណាចំពោះទំនុកចិត្តរបស់វិនិយោគិន និងអតិថិជន?
ជាការពិត តម្លាភាព គឺជាចំណុចស្នូលនៃប្រតិបត្តិការរបស់ធនាគារ និងទំនាក់ទំនងជាមួយអតិថិជន។ ហើយយើងឆ្លងកាត់ការត្រួតពិនិត្យជាច្រើនដំណាក់កាល ដើម្បីរួមគ្នាធានានូវតម្លាភាពនៃប្រតិបត្តិការរបស់យើង។
ABA ធ្វើការរាយការណ៍ជាប្រចាំទៅធនាគារជាតិនៃកម្ពុជា។ របាយការណ៍ទាំងនោះរួមបញ្ចូលទាំងរបាយការណ៍ហិរញ្ញវត្ថុទាំងអស់ ក៏ដូចជារបាយការណ៍ហានិភ័យ និងរបាយការណ៍ស្តីពីអនុបាតប្រកបដោយការប្រុងប្រយ័ត្ន។ ពេលខ្លះធនគារជាតិនៃកម្ពុជាមកធ្វើការត្រួតពិនិត្យដោយផ្ទាល់នៅធនាគារ។
ម្ទាស់ភាគហ៊ុនរបស់យើង ដែលជាធនាគារជាតិកាណាដា ក៏អនុវត្តនូវអភិបាលកិច្ចសាជីវកម្ម និងការគ្រប់គ្រងហានិភ័យដ៏រឹងមាំនៅ ABA ជាមួយនឹងឧត្តមានុវត្តន៍ពិភពលោកផងដែរ។
ក្នុងនាមជាអ្នកបោះផ្សាយលក់សញ្ញាបណ្ណសាជីវកម្មចាប់តាំងពីឆ្នាំ ២០១៩ ធនាគារ ABA អនុវត្តតាមច្បាប់ និងបទប្បញ្ញត្តិរបស់និយ័តករមូលបត្រកម្ពុជា (SERC) ក្នុងការបង្ហាញព័ត៌មានសំខាន់ៗដើម្បីធានាដល់ប្រសិទ្ធភាព តម្លាភាព គណនេយ្យភាព និងការពារផលប្រយោជន៍របស់វិនិយោគិន។ ធនាគារបានធ្វើសវនកម្មឯករាជ្យប្រចាំត្រីមាស និងប្រចាំឆ្នាំតាមបទប្បញ្ញត្តិតម្រូវ ហើយបានបោះពុម្ពផ្សាយរបាយការណ៍សវនកម្មនោះនៅលើគេហទំព័ររបស់ខ្លួន និងបញ្ជូនទៅផ្សារមូលបត្រកម្ពុជា (CSX)។ តាមរយៈការធ្វើបែបនេះ យើងប្តេជ្ញាបង្ហាញនូវព័ត៌មានចាំបាច់ទាំងអស់ដែលនឹងជួយដល់វិនិយោគិនឱ្យសម្រេចចិត្តវិនិយោគនៅធនាគារ ABA និងប្រើប្រាស់សេវាធនាគាររបស់យើងក្នុងរយៈពេលវែង។
យើងជឿជាក់ថា ទាំងអស់នេះនឹងជួយបង្កើនទំនុកចិត្តបន្ថែមទៀតដល់វិនិយោគិន ដៃគូ និងអតិថិជនរបស់យើង៕