.jpg)
លោក Bibhu Pandey នាយកផ្នែកឥណទាន។ រូបថត Supplied
តើធនាគារ ABA ជាអ្នកផ្តល់ប្រាក់កម្ចីប្រកបដោយការទទួលខុសត្រូវដូចម្តេច? ហើយតើវាបានបង្កើតទំនុកចិត្តសម្រាប់ប្រជាជនកម្ពុជាមកលើធនាគារដោយរបៀបណា ក្នុងការបំពេញតម្រូវការសេវាធនាគារបុគ្គល និងអាជីវកម្ម?
ក្នុងនាមជាសហគ្រាសដែលមានទំនួលខុសត្រូវសង្គម ធនាគារ ABA ធានាថា អ្នកខ្ចីនឹងមិនមានបន្ទុកខ្លាំងក្នុងការសងប្រាក់កម្ចីដែលបានស្នើសុំនោះទេ ហើយប្រាក់កម្ចីនោះគឺត្រូវបានប្រើសម្រាប់គោលបំណងផលិតភាព ដែលស្របតាមផែនការអាជីវកម្ម។
ដើម្បីធានាបាននូវបញ្ហានេះ យើងធ្វើការវិភាគយ៉ាងយកចិត្តទុកដាក់លើសំណើឥណទានទាំងអស់ដែលបានដាក់ស្នើមកយើង។ យើងក៏ធានាផងដែរថាប្រាក់កម្ចីនឹងត្រូវបានផ្តល់ដល់អាជីវកម្មស្របច្បាប់ និងមិនប៉ះពាល់បរិស្ថាន។ អាជីវកម្មដែលស្ថិតនៅក្រោមបញ្ជីអាជីវកម្មមិនពាក់ព័ន្ធ ដូចជាការបូមខ្សាច់គ្មានអាជ្ញាប័ណ្ណ ការកាប់ព្រៃឈើជាដើម គឺមិនត្រូវបានផ្តល់កម្ចីពីធនាគារ ABA ឡើយ។
យើងតែងតែជូនដំណឹងគ្រប់ជ្រុងជ្រោយដល់អ្នកស្នើសុំកម្ចីអំពីលក្ខខណ្ឌនៃឥណទានក្នុងអំឡុងពេលដំណើរការផ្តល់ប្រាក់កម្ចី ដើម្បីរក្សាតម្លាភាពឱ្យបានពេញលេញ។ ក្រៅពីនេះ មន្ត្រីឥណទានរបស់យើងនឹងធ្វើការពន្យល់អ្នកខ្ចីខ្នាតតូច និងតូចបំផុត អំពីរបៀបរក្សាកំណត់ត្រាហិរញ្ញវត្ថុឱ្យបានល្អ ធ្វើប្រតិបត្តិការតាមរយៈធនាគារ។ល។
វានឹងជួយពួកគេឱ្យមានភាពងាយស្រួលក្នុងការទទួលបានហិរញ្ញប្បទាន ប្រសិនបើពួកគេមានបំណងចង់ពង្រីកអាជីវកម្មឱ្យកាន់តែធំនាពេលអនាគត។ ដោយមានការសហការពីមន្ត្រីឥណទានរបស់យើងប្រកបដោយវិជ្ជាជីវៈ ទើបបង្កើតបាននូវទំនុកចិត្តសម្រាប់ប្រជាជនកម្ពុជាចំពោះធនាគារ ABA ក្នុងការបំពេញតម្រូវការសេវាធនាគារបុគ្គល និងអាជីវកម្មរបស់ពួកគេ។
ក្នុងពេលថ្មីៗនេះ តើការស្នើសុំកម្ចីមានកំណើនយ៉ាងណាដែរ? តើលោកគ្រប់គ្រងដូចម្តេចដើម្បីសម្រេចឱ្យបានកំណើនប្រាក់កម្ចីរឹងមាំក្នុងរយៈពេលច្រើនឆ្នាំមកនេះ?
ឥណទានកម្ចីរបស់យើងបន្តកើនឡើងជាលំដាប់។ ជាការពិត កំណើនបានធ្លាក់ចុះអស់រយៈពេលជាច្រើនខែក្នុងអំឡុងពេលមានជំងឺរាតត្បាត ដោយសារតែមន្ត្រីឥណទានរបស់យើងមិនអាចធ្វើដំណើរទៅពិនិត្យ និងវិភាគអាជីវកម្មរបស់អ្នកស្នើសុំកម្ចីដែលមានសក្តានុពល។
វាពិតជាសំខាន់ណាស់សម្រាប់យើង ក្នុងនាមជាអ្នកផ្តល់ប្រាក់កម្ចីដែលមានទំនួលខុសត្រូវដើម្បីធានាថា ចំណូលអាជីវកម្មដែលបានប្រកាស នឹងអនុញ្ញាតឱ្យអ្នកខ្ចីអាចសងប្រាក់កម្ចីដែលបានស្នើសុំដោយមិនមានបន្ទុកធ្ងន់ពេក។
ធនាគារអាចសម្រេចបាននូវកំណើនប្រាក់កម្ចី ពីព្រោះការជឿទុកចិត្តរបស់ប្រជាជនមកលើធនាគារ ABA កើនឡើង ហើយដោយសារតែម្ចាស់ភាគហ៊ុនដ៏រឹងមាំរបស់យើង និងវត្តមានឌីជីថលដ៏សម្បូរបែប។ មូលហេតុចម្បងមួយចំពោះកំណើននេះ គឺវឌ្ឍនភាពបច្ចេកទេសដែល ABA មាន។
ដោយសារតែមានប្រព័ន្ធធនាគារឌីជីថល និងបណ្តាញស្វ័យសេវា ទើបធ្វើឱ្យពាណិជ្ជករ អតិថិជនមានទំនាក់ទំនងគ្នាទៅវិញទៅមក (អ្នកផ្គត់ផ្គង់ អ្នកទិញ ដៃគូអាជីវកម្ម) កាន់តែមានឆន្ទៈក្នុងការធ្វើប្រតិបត្តិការហិរញ្ញវត្ថុរបស់ពួកគេតាមប្រព័ន្ធឌីជីថលតាមរយៈ ABA។ អតិថិជនរបស់យើងយល់ថាវាងាយស្រួលក្នុងការចូលប្រើប្រាស់ផលិតផល និងសេវាកម្មធនាគារទាំងនោះ រួមទាំងតម្រូវការឥណទាន នៅក្នុងប្រព័ន្ធអេកូ ABA ផងដែរ។
តើលោកមើលឃើញកំណើនប្រាក់កម្ចីចេញមកពីវិស័យណា?
ជាប្រវត្តិសាស្ត្រ កំណើនប្រាក់កម្ចីដ៏សំខាន់ បំផុតនៅក្នុងធនាគារ ABA គឺមកពីវិស័យពាណិជ្ជកម្ម។ តើជំងឺរាតត្បាតបានប៉ះពាល់ដល់គុណភាពទ្រព្យសកម្មរបស់ធនាគារដែរ ឬទេ? ហើយតើចំនួន ប្រាក់កម្ចីមិនអាចសងត្រឡប់ (NPL) យ៉ាងដូចម្តេចដែរ?
ជំងឺរាតត្បាតបានប៉ះពាល់ដល់ប្រទេសជាតិទាំងមូលហើយធនាគារ ABA ក៏មិនខុសគ្នាដែរ។
ជាមួយគ្នានេះ គិតចាប់ពីខែមីនា ឆ្នាំ ២០២០ ធនាគារ ABA បានចាប់ផ្តើមវិធានការបន្ធូរបន្ថយបន្ទុកសម្រាប់អ្នកខ្ចីរបស់ខ្លួន ដែលអាជីវកម្មរបស់ពួកគេបានរងផលប៉ះពាល់ពីវិបត្តិសេដ្ឋកិច្ចធ្លាក់ចុះ ដោយសារជំងឺកូវីដ។
គិតត្រឹមចុងខែកញ្ញា ការរៀបចំរចនាសម្ព័ន្ធកម្ចីឡើងវិញមានរហូត ដល់ ១៤,៨ ភាគរយនៃកម្ចីសរុប។ NPL នៅតែមានស្ថិរភាព ០,៨ ភាគរយនៃផលបត្រ ដែលទាបជាងមធ្យមភាគទីផ្សារ។
តើ ABA មានកំពុងបន្តបង្កើតកម្មវិធីគាំទ្រហិរញ្ញវត្ថុពិសេសណាមួយ ដើម្បីជួយដល់អ្នកស្នើសុំកម្ចីអាជីវកម្មដែលងាយរងគ្រោះដែរឬទេ?
បាទ, ធនាគារ បន្តផ្តល់វិធានការបន្ធូរបន្ថយដល់អ្នកខ្ចី ដែលងាយរងគ្រោះ ជាមួយនឹងប្រាក់កម្ចីដែល មានស្រាប់ ខណៈអាជីវកម្មរបស់ពួកគេកំពុងរងផលប៉ះពាល់អំឡុង ពេលមានជំងឺរាតត្បាត។ វិធានការបន្ធូរបន្ថយនេះត្រូវបានផ្តល់តាមរយៈការកាត់បន្ថយចំនួនបង់រំលស់ប្រចាំខែ ដូចជាមានការពន្យារពេលការសងប្រាក់ដើមប្រចាំខែ ឬទាំងការសងប្រាក់ដើម និងការប្រាក់ ដើម្បីផ្តល់ពេលវេលាបណ្តោះអាសន្នឱ្យពួកគេបង្កើតប្រាក់ចំណូលអាជីវកម្មឡើងវិញ។
ធនាគារ ABA ក៏បានចូលរួមជាមួយគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ដែលដាក់ចេញដោយរដ្ឋាភិបាល ដើម្បីគាំទ្រដល់អាជីវកម្មក្នុងស្រុកបន្ថែមទៀត។ គម្រោងនេះអនុញ្ញាតឱ្យអ្នកមានសិទ្ធិស្នើសុំកម្ចី ឬអ្នកខ្ចីគ្មានវត្ថុបញ្ចាំត្រឹមត្រូវ ដូចជាអចលនទ្រព្យ អាចទទួលបានហិរញ្ញប្បទានក្នុងតម្លៃទាប។
តើអ្វីជាអនុសាសន៍របស់លោកចំពោះអ្នកខ្ចី ដើម្បីរក្សាភាពរឹងមាំផ្នែកហិរញ្ញវត្ថុ?
វាសំខាន់ណាស់ក្នុងការអនុវត្តតាមវិន័យហិរញ្ញវត្ថុ ដើម្បីរក្សាភាពរឹងមាំផ្នែកហិរញ្ញវត្ថុ។ វាមានន័យថា ការកសាងចំណេះដឹងឱ្យបានគ្រប់គ្រាន់អំពីរបៀបដំណើរការអាជីវកម្ម រៀបចំផែនការឱ្យបានត្រឹមត្រូវអំពីរបៀបចំណាយ សន្សំប្រាក់អាជីវកម្ម និងធ្វើតាមផែនការ។ តាមរយៈការសង្កេតទីផ្សាររបស់យើង អាជីវកម្មដែលបរាជ័យភាគច្រើន ដោយសារតែពួកគេមិនដឹងពីរបៀបអាជីវកម្មដំណើរការ ឬមិនមានផែនការត្រឹមត្រូវ ឬមិនចំណាយតាមផែនការអាជីវកម្មជាដើម៕
