.jpg)
លោក ម៉ី ប៉ូលីន: នាយកផ្នែកអភិវឌ្ឍន៍អាជីវកម្ម នៃធនាគារ ABA។ Supplied
តើទស្សនៈអាជីវកម្មរបស់ ABA បានរួមចំណែកយ៉ាង ដូចម្តេចចំពោះសហគមន៍មូលដ្ឋាន អាជីវកម្មឯកជន និងរូបវន្តបុគ្គល នៅក្នុងព្រះរាជាណាចក្រកម្ពុជា?
យើងជឿជាក់ថា អ្នកប្រើប្រាស់ដែលមកពីផ្នែកខុសៗគ្នាដូចជាអ្នកផលិត អ្នកលក់ដុំ អ្នកលក់រាយ និងអ្នកប្រើប្រាស់ នឹងទទួលបានអត្ថប្រយោជន៍ផ្នែកពាណិជ្ជកម្មពីប្រតិបត្តិការ និងការអនុវត្តចក្ខុវិស័យ និងបេសកកម្មរបស់យើង។ ដើម្បីក្លាយជាអ្នកផ្គត់ផ្គង់សេវាធនាគារលំដាប់លេខ ១ គួរជាទីពំនឹង ងាយស្រួលប្រើប្រាស់ និងអាចទទួលយកបាន គឺតម្រូវឱ្យមានការវិនិយោគដ៏សំខាន់ៗ និងការខិតខំប្រឹងប្រែងរបស់យើងឥតឈប់ឈរ។
ដូច្នេះយើងបន្តនាំមក និងប្រែក្លាយទស្សនៈអាជីវកម្មប្រកបដោយនវានុវត្តន៍ ទៅជាដំណោះស្រាយធនាគារឌីជីថល គំរូប្រតិបត្តិការដ៏រឹងមាំ និងការផ្តល់នូវដំណោះស្រាយ ដែលអាចទទួលយកបាន ងាយស្រួល មានសុវត្ថិភាព និងប្រសិទ្ធភាព ដើម្បីជួយអតិថិជននិងសហគមន៍របស់យើងឱ្យទទួលបានអត្ថប្រយោជន៍ពីបទពិសោធក្នុងការប្រើប្រាស់សេវាធនាគាររបស់ពួកគេ។
តើធនាគារ ABA ធ្វើយ៉ាងដូចម្តេច ដើម្បីឱ្យម៉ាកយីហោរបស់ខ្លួនមានភាពលេចធ្លោនៅក្នុងវិស័យធនាគារដែលប្រកបដោយភាពប្រកួតប្រជែងរបស់កម្ពុជា?
ទិដ្ឋភាពនៃការប្រកួតប្រជែងមានការវិវឌ្ឍយ៉ាងខ្លាំង ជាពិសេសការដាក់ឱ្យដំណើរការនូវដំណោះស្រាយឌីជីថល/និងសេវាកម្មធនាគារទំនើប ស្របតាមនិន្នាការ និងរសជាតិសកលនៃមនុស្សជំនាន់ Y និង Z។ ដូច្នេះយើងបានពង្រីក និងធ្វើទំនើបកម្មសាខារូបវន្តរបស់យើង និងណែនាំយ៉ាងសកម្មនូវដំណោះស្រាយធនាគារឌីជីថល ដើម្បីឆ្លើយតបទៅនឹងតម្រូវការទីផ្សារក្នុងស្រុក។
សកម្មភាពទីផ្សាររបស់យើងនៅក្នុងបណ្តាញឌីជីថល និងសេវាកម្មក្រោយការលក់ ដូចការចង្អុលបង្ហាញពី គំរូផ្តោតសំខាន់លើអតិថិជន (CCM) បានអនុញ្ញាតឱ្យយើងចាប់យកតំណែងជាអ្នកផ្គត់ផ្គង់ក្នុងជម្រើសលេខមួយ និងត្រូវបានទទួលស្គាល់ដោយទស្សនាវដ្តីហិរញ្ញវត្ថុល្បីៗ ដូចជា Banker, Euromoney, Global Finance និង Asiamoney ជាដើម។
តើធនាគារ ABA កំពុងធ្វើអ្វីខ្លះដើម្បីកែលម្អបរិយាកាសធុរកិច្ច សម្រាប់សហគ្រិនជាបុគ្គល សហគ្រាសធុនតូច និងមធ្យម និងសាជីវកម្ម?
យើងបានមើលឃើញថា ភាពងាយស្រួល អាចទទួលបាន លឿនរហ័ស និងភាពជាប់លាប់នៃសេវាកម្ម ទាំងអស់នេះ គឺជាតម្រូវការសេវាធនាគារជាមូលដ្ឋានរបស់អតិថិជនយើង មិនថាពួកគេជានរណានោះទេ។ ខណៈនៅក្នុងដំណាក់កាលអនុវត្តគំរូ CCM យើងនៅតែបន្តផ្តោតលើកត្តាជំរុញជាច្រើនដែលផ្គត់ផ្គង់ជាយុទ្ធសាស្ត្រតាមតម្រូវការ។ យើងបន្តចាប់យក និងណែនាំនូវដំណោះស្រាយធនាគារឌីជីថល ដោយប្រើប្រាស់បច្ចេកវិទ្យាកម្រិតខ្ពស់ សកម្មភាពស្រាវជ្រាវនិងអភិវឌ្ឍន៍ (R&D) និងការអភិវឌ្ឍធនធានមនុស្ស ដើម្បីបម្រើដល់កំណើនយ៉ាងឆាប់រហ័សរបស់អតិថិជន និងតម្រូវការកាន់តែច្រើនលើសេវាកម្មធនាគារ។
យើងកំពុងណែនាំ និងធ្វើឱ្យប្រសើរឡើងនូវដំណោះស្រាយស្វ័យសេវា និងកម្មវិធីទូទាត់ និងទទួលការទូទាត់ប្រាក់ ដើម្បីឆ្លើយតបទៅនឹងតម្រូវការអាជីវកម្មក្នុងស្រុក ដែល ៩៩ ភាគរយ ជាសហគ្រាសធុនតូចនិងមធ្យម។
យើងជឿជាក់ថា ភាគីពាក់ព័ន្ធទាំងអស់នៅក្នុងអាជីវកម្ម រួមទាំងសាជីវកម្ម ដែលស្ថិតនៅចំណុចកំពូលនៃខ្សែចង្វាក់ចែកចាយ នឹងទទួលបានផលប្រយោជន៍ផ្នែកសេដ្ឋកិច្ចពីប្រព័ន្ធអេកូរបស់យើង។
តើសេវាធនាគារតាមទូរស័ព្ទដៃ បានផ្លាស់ប្តូរទិដ្ឋភាពវិស័យធនាគារនៅកម្ពុជាដែរ ឬទេ? តើវាជួយ ABA ឱ្យបង្កើនមូលដ្ឋានចំណូលរបស់ខ្លួនយ៉ាងដូចម្តេច?
បាទ, ប្រាកដណាស់។ ការស្រាវជ្រាវរបស់យើងបង្ហាញថា មនុស្សកាន់តែពេញនិយមនឹងស្មាតហ្វូន ដើម្បីភ្ជាប់ទំនាក់ទំនងកាន់តែងាយស្រួល និងអាចចែករំលែកព័ត៌មានដោយមិនមានការរំខាន។ ទូរស័ព្ទស្មាតហ្វូនក្លាយជាសមាសធាតុដ៏សំខាន់នៃជីវិតរស់នៅរបស់មនុស្ស។ ជាមួយនឹងឱកាសបែបនេះ កម្មវិធីទូរស័ព្ទ ABA Mobile ត្រូវបានអភិវឌ្ឍឥតឈប់ឈរ ដើម្បីឆ្លើយតបទៅនឹងការផ្លាស់ប្តូរឥរិយាបថរបស់អ្នកប្រើប្រាស់។ យើងបានសង្កេតឃើញអត្រាកំណើនប្រចាំឆ្នាំរួម (CAGR) ចំនួន ៩៩.៣៣ ភាគរយនៃកំណើនរបស់អ្នកប្រើប្រាស់កម្មវិធីទូរស័ព្ទ ABA Mobile ក្នុងរយៈពេល ៧ ឆ្នាំចុងក្រោយនេះ។
គិតតែក្នុងឆ្នាំ ២០២១ អ្នកប្រើប្រាស់កម្មវិធីទូរស័ព្ទ ABA Mobile បានធ្វើប្រតិបត្តិការចំនួន ៨៨ ប៊ីលានដុល្លារ និង ១១ ទ្រីលានរៀល។ ចលនាទឹកប្រាក់នៅក្នុងប្រព័ន្ធអេកូរបស់យើងអនុញ្ញាតឱ្យយើងបង្កើនប្រយោជន៍ពីមូលនិធិ ឆ្លើយតបតម្រូវការប្រកបដោយប្រសិទ្ធភាព និងផ្តល់ជូនតាមតម្រូវការរបស់អតិថិជនយើង។
តើធនាគារ ABA នៅតែប្តេជ្ញាចិត្តចំពោះសាខារូបវន្តដែរ ឬទេ ខណៈខ្លួនកំពុងបង្កើនបណ្ដាញស្វ័យសេវា?
សាខាធនាគារនៅតែជាចំណុចដ៏សំខាន់នៅក្នុងការប្រតិបត្តិអតិថិជន (CCM)។ ដូច្នេះ យើងធ្វើការវិភាគនិងអភិវឌ្ឍបណ្តាញសាខាយ៉ាងហ្មត់ចត់ ទៅតាមតម្រូវការបច្ចុប្បន្ន និងអនាគត ស្របពេលដែលសេវាធនាគារពេញលេញនឹងត្រូវបង្កើតឡើង ដើម្បីបម្រើដោយផ្អែកលើសាខា។ ឧទាហរណ៍ ការផ្តល់ប្រាក់កម្ចី ដែលត្រូវការបណ្តាញរូបវន្ត ដើម្បីរៀបចំ និងគ្រប់គ្រងផលបត្រ។
ជាយុទ្ធសាស្ត្រ យើងកំពុងពង្រីកបណ្តាញរូបវន្ត-ឌីជីថល ដែលត្រូវបានគេស្គាល់ថាជាបណ្តាញ ABA 24/7 និងកម្មវិធីទូរស័ព្ទ ABA Mobile ជាមួយដំណោះស្រាយស្វ័យសេវា ដើម្បីធានាបាននូវតម្រូវការធនាគារ ជាមូលដ្ឋានរបស់អតិថិជន មានភាពងាយស្រួល អាចទទួលបាន ឆាប់រហ័ស និងមានស្ថិរភាព។
តើលោកយល់ថា អ្វីខ្លះជាកត្តាជំរុញដ៏សំខាន់សម្រាប់អាជីវកម្មធនាគារ ABA នាពេលអនាគត?
ស្របតាមចក្ខុវិស័យ បេសកកម្ម គុណតម្លៃ និងយុទ្ធសាស្ត្រសាជីវកម្មរបស់យើង យើងខិតខំធ្វើដំណើរឆ្ពោះទៅមុខដើម្បីបម្រើប្រជាជនកម្ពុជាទាំងអស់ដែលពេញលក្ខខណ្ឌ ក្នុងការបើកគណនីធនាគារ ធ្វើជាដៃគូ។ ដូច្នេះយើងនឹងបន្តវិនិយោគលើដំណោះស្រាយបច្ចេកវិទ្យាទំនើប សកម្មភាព R&D ការអភិវឌ្ឍធនធានមនុស្ស ជាកត្តាគន្លឹះនៃភាពជោគជ័យនាពេលអនាគតរបស់យើង។
តើលោកមានទស្សនវិជ្ជមានចំពោះវិស័យធនាគារនៅកម្ពុជាក្នុងឆ្នាំ ២០២២ ដែរ ឬទេ?
បាទខ្ញុំមាន! ទោះបីមានបញ្ហាប្រឈមដោយសារតែវិបត្តិជំងឺកូវីដអស់រយៈពេលជិត ២ ឆ្នាំក្តី ក៏វិស័យធនាគារនៅតែមានភាពរឹងមាំក្រោមការដឹកនាំរបស់ធនាគារជាតិនៃកម្ពុជា។
ក្នុងឆ្នាំ ២០២០ វិស័យធនាគារសម្រេចបាននូវអត្រាកំណើនប្រចាំឆ្នាំ ១៦,៩ ភាគរយ សម្រាប់ប្រាក់កម្ចី និង ១៥,៤ ភាគរយ សម្រាប់ប្រាក់បញ្ញើ។ ចក្ខុវិស័យនៃវិស័យធនាគារនៅតែមានស្ថិរភាព និងមានដំណើរការល្អ ដែលត្រូវបានគាំទ្រដោយទ្រនាប់ដើមទុន និងសន្ទនីយភាពដ៏រឹងមាំ នៅកម្រិតអនុបាតដែលខ្ពស់ជាងតម្រូវការកំណត់។
ជាមួយនឹងសមិទ្ធផលរបស់រដ្ឋាភិបាលក្នុងការទប់ស្កាត់ជំងឺកូវីដ កម្មវិធីចាក់វ៉ាក់សាំង និងផែនការជាក់លាក់ ដើម្បីចាប់ផ្តើមផែនការស្តារសេដ្ឋកិច្ចក្រោយជំងឺកូវីដ ត្រូវបានគាំទ្រដោយការព្យាករអំពីកំណើនផលិតផលក្នុងស្រុកសរុបក្នុងរង្វង់ ៥,៥ ភាគរយ នៅឆ្នាំ ២០២២ ដោយ ADB, ខ្ញុំមានសុទិដ្ឋិនិយមថា វិស័យធនាគារនឹងនៅតែមានភាពរឹងមាំ និងដើរតួយ៉ាងសំខាន់នៅក្នុងការគាំទ្រសកម្មភាពសេដ្ឋកិច្ច ដែលនឹងជួយឱ្យធនាគារពង្រីកអាជីវកម្មរបស់ខ្លួនបន្ថែមទៀត៕
