តាមរយៈការផ្តល់នូវសេវាកម្មហិរញ្ញវត្ថុដ៏សម្បូរបែប ធនាគារ កាណាឌីយ៉ា នៅតែបន្តគ្របដណ្តប់លើវិស័យធនាគារក្នុងស្រុកដ៏រឹងមាំ ដែលជាសញ្ញាមួយបញ្ជាក់ថា ធនាគារបានត្រៀមខ្លួនរួចជាស្រេចសម្រាប់ដំណើរដ៏វែងឆ្ងាយនៅក្នុងអាជីវកម្មហិរញ្ញវត្ថុ ដែលកំពុងមានការប្រកួតប្រជែង!
ធនាគារ កាណាឌីយ៉ា ប្រារព្ធខួបលើកទី៣០ ឆ្នាំរបស់ខ្លួន ដោយរក្សានូវភាពខ្លាំងរបស់ខ្លួនក្នុងនាមជាធនាគារដ៏រឹងមាំបំផុតនៅក្នុងព្រះរាជាណាចក្រកម្ពុជាផ្នែកតារាងតុល្យការរយៈពេល ៣ ឆ្នាំជាប់ៗគ្នា ជាមួយនឹងទ្រព្យសកម្មសរុបបានកើនឡើងដល់ ៧,៣ប៊ី លានដុល្លារអាមេរិក គិតត្រឹមថ្ងៃទី ៣០ ខែ កញ្ញា ឆ្នាំ ២០២១។
ក្នុងចំណោមធនាគារពាណិជ្ជដំបូងបង្អស់នៅក្នុងព្រះរាជាណាចក្រកម្ពុជា ធនាគារ កាណាឌីយ៉ា នៅតែបន្តភាពរឹងមាំនៅក្នុងវិស័យធនាគារក្នុងស្រុក ដែលមានធនាគារពាណិជ្ជចំនួន ៥៦ កំពុងប្រកួតប្រជែងនៅលើទីផ្សារដែលមានប្រជាជនប្រមាណជាង ១៦ លាននាក់។
ធនាគារ កាណាឌីយ៉ា បម្រើអតិថិជនជិតកន្លះលាននាក់ ដែលស្មើនឹង ១៨,១% នៃប្រាក់បញ្ញើសរុបរបស់អតិថិជនដែលមាននៅតាមបណ្តាធនាគារក្នុងព្រះរាជាណាចក្រកម្ពុជា។ ការនាំមុខនៃចំនួនប្រាក់បញ្ញើរបស់អតិថិជន មិនត្រឹមតែបង្ហាញពីការជឿទុកចិត្តរបស់អតិថិជនចំពោះធនាគារប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីសមត្ថភាពរបស់ធនាគារ ក្នុងការគ្រប់គ្រងហានិភ័យហិរញ្ញវត្ថុ និងហានិភ័យប្រតិបត្តិការប្រកបដោយភាពជោគជ័យផងដែរ។
ប្រាក់ចំណូលសរុបរបស់ធនាគារសម្រាប់រយៈពេល ៩ ខែ នៃឆ្នាំ ២០២១ បន្តកើនឡើង បើធៀបនឹងរយៈពេលដូចគ្នាកាលពីឆ្នាំមុន។ សមាមាត្រនៃការចំណាយលើប្រាក់ចំណូលមានចំនួន ២៨% ក្នុងនោះធនាគារក៏បានចូលរួមចំណែកបរិច្ចាគយ៉ាងច្រើនដល់រាជរដ្ឋាភិបាលកម្ពុជា ដើម្បីប្រយុទ្ធប្រឆាំងនឹងជំងឺរាតត្បាតកូវីដ ១៩ ដែលក្នុងន័យនេះ ឆ្លុះបញ្ចាំងឱ្យឃើញថា ធនាគារ កាណាឌីយ៉ា ជាធនាគារក្នុងស្រុកដែលមានការចូលរួមទទួលខុសត្រូវខ្ពស់ ដើម្បីសុខុមាលភាពសង្គម និងប្រទេសជាតិ។ ភាពរឹងមាំនៃអាជីវកម្មដ៏សម្បូបែបរបស់ខ្លួនបានធ្វើឱ្យធនាគារទទួលបានប្រាក់ចំណេញសុទ្ធមុនបង់ពន្ធចំនួន ១១៤ លានដុល្លារអាមេរិក។
ទោះបីមានការប្រកួតប្រជែងខ្លាំងក៏ដោយ ទ្រព្យសកម្មរបស់ធនាគារនៅតែបន្តកើនឡើងខ្លាំងពី ១ ឆ្នាំទៅ ១ ឆ្នាំ។ ឥណទានសរុបបានកើនឡើង ៥% ពោលគឺកើនដល់ ៤,៧ ប៊ីលានដុល្លារអាមេរិក ស្មើនឹង ១៣,២% នៃចំណែកទីផ្សារ។ ភាពរឹងមាំរបស់ ធនាគារ កាណាឌីយ៉ា ត្រូវបានឆ្លុះបញ្ចាំងតាមរយៈការគ្រប់គ្រង និងតាមដានយ៉ាងហ្មត់ចត់លើការទូទាត់សងបំណុល ស្របតាមសារាចរណែនាំរបស់ធនាគារជាតិនៃកម្ពុជា ក្នុងការរៀបចំឥណទានឡើងវិញ ដើម្បីជួយបន្ថយបន្ទុករបស់អ្នកខ្ចីដែលបានទទួលរងផលប៉ះពាល់ដោយការរីករាលដាលនៃជំងឺកូវីដ ១៩។
ប្រាក់បញ្ញើសរុបបានកើនឡើងដល់ ៥,៨០ ប៊ីលានដុល្លារអាមេរិក ដែលធ្វើឱ្យធនាគារ កាណាឌីយ៉ា ក្លាយជាធនាគារដែលទទួលបានប្រាក់បញ្ញើឈានមុខគេនៅក្នុងទីផ្សារ។ លើសពីនេះ ដើមទុន និងសន្ទនីយភាពរបស់យើងនៅរក្សាភាពរឹងមាំ។ អនុបាតដើមទុនគ្រប់គ្រាន់ថ្នាក់ទី១ (Capital Adequacy Ratio Tier 1) មានចំនួន ១៦,២% ដែលខ្ពស់ជាងតម្រូវការរបស់គណៈកម្មការ Basel ហើយអនុបាតសាធនភាពដ៏រឹងមាំរបស់យើងមានចំនួន ១៩,២%។ ជាមួយនឹងមូលដ្ឋានគ្រឹះដ៏រឹងមាំរបស់ខ្លួន ធនាគារ កាណាឌីយ៉ា ជឿជាក់ថា ធនាគារនៅតែបន្តផ្តល់នូវលទ្ធផលហិរញ្ញវត្ថុដ៏រឹងមាំ និងប្រកបដោយនិរន្តរភាពទាំងពេលបច្ចុប្បន្ន និងអនាគត៕