តំបន់វិស្សមកាលទេសចរណ៍ឆ្នេរមាសឆ្នេរប្រាក់ គឺជារមណីយដ្ឋានដ៏ស្រស់ស្អាត មានផ្ទៃក្រឡា ៣ ៣០០ ហិកតា ដែលស្ថិតនៅក្បែរឆ្នេរខ្សាច់សក្បុស ពោលគឺនៅមិនឆ្ងាយប៉ុន្មានពីក្រុងព្រះសីហនុ ដែលនឹងក្លាយជាគោលដៅវិស្សមកាលទេសចរណ៍ដ៏សំខាន់បំផុតមួយរបស់ព្រះរាជាណាចក្រកម្ពុជា។
រមណីយដ្ឋានដែលមានបន្ទប់ស្នាក់នៅចំនួន ៥២ បន្ទប់នេះ មានឆ្នេរលក្ខណៈឯកជន និងកោះ ព្រមទាំងស្ពានឈើដីសើម ហើយទន្ទឹមនឹងនេះតំបន់វិស្សមកាលទេសចរណ៍ឆ្នេរមាសឆ្នេរប្រាក់នេះ គ្រោងនឹងពង្រីកហេដ្ឋារចនាសម្ព័ន្ធរបស់ខ្លួន រួមមានសណ្ឋាគារលំដាប់ផ្កាយ ៥ លើទឹក និងទីលានវាយកូនហ្គោល ១៨ រន្ធផងដែរ។
លោក George Chao នាយកប្រតិបត្តិថ្មីនៃតំបន់វិស្សមកាលទេសចរណ៍ឆ្នេរមាសឆ្នេរប្រាក់បានឱ្យដឹងថា អ្វីដែលធ្វើឱ្យរមណីយដ្ឋាននេះពិសេសប្លែកពីកន្លែងដ៏ទៃទៀតនៅកម្ពុជា គឺសមត្ថភាពបម្រើភ្ញៀវទេសចរដ៏សម្បូរបែប ដែលស័ក្តិសមបំផុតសម្រាប់ភ្ញៀវទេសចរគ្រប់រូបមកពីគ្រប់តំបន់។
«រមណីយដ្ឋានរបស់យើងមានផ្ទះស្នាក់នៅជិតឆ្នេរដ៏ប្រណីត និងបាងហ្គាឡូ ដែលមានតម្លៃសមរម្យចំនួន ៥២ បន្ទប់ ជាមួយនឹងគម្រោងពង្រីកឱ្យកើនដល់ ៦០ បន្ទប់»។
«យើងក៏បានទិញកប៉ាល់ទេសចរណ៍ដែលមានចំនួន ២៥០ បន្ទប់ នឹងកំពុងកែលម្អ ដើម្បីប្រែក្លាយជាសណ្ឋាគារលំដាប់ផ្កាយ ៥ ខណៈដែលភោជនីយដ្ឋានប្រណីតថ្មីនៅលើកំពូលកោះរាជបុត្រ (កោះសំពោច) ក៏នឹងរំឭកឡើងវិញនូវរសជាតិនៃ
«យុគមាស» របស់កម្ពុជាក្នុងទសវត្សរ៍ឆ្នាំ ១៩៦០ ជាមួយនឹងរូបមន្តធ្វើម្ហូប (authentic recipes) ដែលត្រូវបានបង្កើតឡើងសម្រាប់ព្រះបាទនរោត្តម សីហនុ។
លោកបន្តថា៖ «យើងក៏មានគម្រោងសាងសង់ទីលានវាយកូនហ្គោល ១៨ រន្ធ ស្តង់ដារអន្តរជាតិផងដែរ ហើយយើងក៏កំពុងអភិវឌ្ឍបាងហ្គាឡូថ្មីចំនួន ២០ នៅក្បែរឆ្នេរកោះរាជបុត្រ ខណៈសណ្ឋាគារលក្ខណៈតង់ (Camp Hotels) ចំនួន ៥០ នឹងសាងសង់នៅជិតឆ្នេរឆាប់ៗ»។
បុរសជនជាតិអូស្ត្រាលីរូបនេះបានបន្ថែមថា មានកន្លែងទស្សនាជាច្រើននៅតំបន់វិស្សមកាលទេសចរណ៍ឆ្នេរមាសឆ្នេរប្រាក់ រួមមានកន្លែងទាក់ទាញបែបវប្បធម៌ និងប្រវត្តិសាស្ត្រ ដូចជាថ្មអណ្តើក ដើមឈើយក្ស និងកោះរាជបុត្រជាដើម។
លោក Chao ថ្លែងថា៖ «ជាមួយទីតាំងធំធេងបែបនេះ យើងអាចមានផ្នែកជាច្រើនទៀតដែលផ្គត់ផ្គង់ដល់វិស័យជាច្រើន ខណៈភាពស្ងប់ស្ងាត់នៃព្រៃឈើដែលនៅជុំវិញយើង និងឆ្នេរខ្សាច់ដ៏ស្រស់ស្អាត សក្បុស គឺច្បាស់ណាស់ថាវាគឺជាកន្លែងដ៏ទាក់
ទាញបំផុតមួយ»។
លោក Chao បន្តថាជាមួយនឹងធម្មជាតិដ៏ស្រស់ត្រកាល តំបន់វិស្សមកាលទេសចរណ៍ឆ្នេរមាសឆ្នេរប្រាក់ បាននឹងកំពុងខិតខំធ្វើឱ្យមានភាពសុខដុមរមនាជាមួយនឹងបរិស្ថាន។
«និរន្តរភាពគឺជាស្នូលនៃអ្វីៗគ្រប់យ៉ាងដែលយើងធ្វើ។ យើងតែងយកចិត្តទុកដាក់ខ្ពស់បំផុតចំពោះ បរិស្ថាននិងព្រៃឈើ ហើយយើងមិនដែលប៉ះពាល់ដើមឈើធំៗណាមួយទេ»។
កោះរាជបុត្រ ដែលត្រូវបានគេស្គាល់ថាជាកោះសំពោច គឺជាចំណុចទាក់ទាញដ៏សំខាន់មួយនៃរមណីយដ្ឋាន ដែលងាយស្រួលចូលទៅដល់ គ្រាន់តែដើរចេញពីឆ្នេរប្រាក់ តាមស្ពានឈើដ៏ស្រស់ស្អាត កោះនេះមានផ្ទាំងថ្ម និងសំណឹកថ្មធំៗគួរជាទីគយគន់មានរាងដូចរាជបុត្រ ដែលតំណាងឱ្យរាជបុត្រដូចនៅក្នុងរឿងព្រះថោងនាងនាគ។
បែរមុខទៅរក «រាជបុត្រ» ព្រះថោង គឺជារូបសំណាករបស់អគ្គមហេសីជាទីស្រឡាញ់របស់ព្រះអង្គ គឺនាងនាគ។ យោងទៅតាមរឿងនិទាន តំបន់វិស្សមកាលទេសចរណ៍ឆ្នេរមាសឆ្នេរប្រាក់ ក៏មានព្រែកលីវយី (Liu Yi) ដែលជាឈ្មោះចិនសម្រាប់នាងនាគ ដែលគេអាចជិះទូកគយគន់ព្រៃកោងកាងបានផងដែរ។
ឆ្លុះបញ្ចាំងពីទំនាក់ទំនងដ៏រឹងមាំនៃតំបន់វិស្សមកាលនេះ ទៅនឹងវប្បធម៌របស់កម្ពុជា លោក Chao ថ្លែងថារមណីយដ្ឋាន ដែលបានដំណើរការតាំងពីឆ្នាំ ២០១៥ នេះ ត្រូវបានបង្កើតឡើងជាមួយនឹងចក្ខុវិស័យ ដើម្បីក្លាយជាកន្លែកវិស្សមកាលទេសចរណ៍ដ៏ល្បីល្បាញសម្រាប់ប្រជាជនកម្ពុជា។
«មានប្រជាជនជាង ៣០០ នាក់ ត្រូវបានអនុញ្ញាតឱ្យរស់នៅដោយស្របច្បាប់លើរមណីយដ្ឋាននេះ ជាកន្លែងដែលយើងស្ថិតនៅ ដូច្នេះយើងមានការប្តេជ្ញាចិត្តខ្ពស់ចំពោះប្រជាជនក្នុងតំបន់ និងប្រពៃណី ខណៈ ៨០ ទៅ ៩០ ភាគរយនៃភ្ញៀវរបស់យើងគឺជាជនជាតិខ្មែរ»។ លោកបន្តថា៖ «មុនជំងឺកូវីដ យើងមានភ្ញៀវប្រមាណ ២ ទៅ ៣ រយនាក់ជារៀងរាល់ថ្ងៃ ហើយកោះរាជបុត្រគឺមានប្រជាប្រិយភាពយ៉ាងខ្លាំង ដោយសារតែទេសភាពដ៏ស្រស់ត្រកាល គួរជាទីមនោរម្យ»។
ដោយសារតែការប្តេជ្ញាចិត្តរបស់រមណីយដ្ឋាននេះចំពោះប្រជាជនកម្ពុជា ដូច្នេះគ្មានការសង្ស័យទេដែលលោក Chao បាននិយាយថា ពេលវេលាបានមកដល់ហើយ ដើម្បីបើកទទួលស្វាគមន៍ទេសចរឱ្យកាន់តែល្អ ដើម្បីជួយដល់វិស័យទេសចរណ៍របស់កម្ពុជា។
«ភ្ញៀវបរទេសជាច្រើនមិនទាន់ស្គាល់កន្លែងដ៏ស្រស់ស្អាតនិងគួរឱ្យចាប់អារម្មណ៍ដែលយើងមាននៅទីនេះទេ ហើយយើងកំពុងខិតខំប្រឹងប្រែងបង្កើតហេដ្ឋារចនាសម្ព័ន្ធផ្សេងៗ ដើម្បីបម្រើភ្ញៀវឱ្យកាន់តែល្អប្រសើរ។ យើងគ្រោងនឹងបើកបារ៍បែបបស្ចិមប្រទេស ជាមួយនឹងភោជនីយដ្ឋានបែបជប៉ុន និងបែបបស្ចិមប្រទេស ក្នុងពេលឆាប់ៗ»។
«ថ្មីៗនេះ យើងបានជួលមេចុងភៅថ្មីចំនួន ២ នាក់ មកពីបស្ចិមប្រទេស ដើម្បីបង្កើតមុខម្ហូបលោកខាងលិច ដែលនឹងជួយពួកគេឱ្យបាត់ការនឹករឭកផ្ទះ និងមានអារម្មណ៍ថាដូចនៅផ្ទះ។ ឥឡូវនេះយើងកំពុងផ្តល់ការបណ្តុះបណ្តាលសេវាកម្មម្ហូបអាហាររបស់យើង ដើម្បីធ្វើឱ្យប្រាកដថាយើងបានបំពេញតាមស្តង់ដាអន្តរជាតិសម្រាប់ភ្ញៀវទេសចរទាំងក្នុងស្រុកនិងអន្តរជាតិ»។
លោក Chao ថ្លែងថា៖ «អនាគតនៃតំបន់វិស្សមកាលទេសចរណ៍ឆ្នេរមាសឆ្នេរប្រាក់ គឺកំពុងបង្កើតវេទិកាដ៏ល្អបំផុតសម្រាប់បុគ្គលិកក្នុងស្រុករបស់យើង ដើម្បីឱ្យពួកគេរីកចម្រើន ផ្តល់អត្ថប្រយោជន៍ដល់សហគមន៍មូលដ្ឋាន និងផ្តល់សេវាកម្មដែលមានគុណភាព ដើម្បីគាំទ្រដល់ឧស្សាហកម្មទេសចរណ៍របស់កម្ពុជា»៕