អភិបាលរងខេត្តព្រះសីហនុ លោក ឡុង ឌីម៉ង់ បានមានប្រសាសន៍ថាជាមួយនឹង «ផែនការមេដើម្បីអភិវឌ្ឍនិងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង» ខេត្តឆ្នេរសមុទ្រមួយនេះត្រូវដើរតួជា
«នាវាសណ្តោង»សម្រាប់ព្រះរាជាណាចក្រកម្ពុជា ដែលជាប់គាំងដោយសារវិបត្តិកូវីដ ១៩ និងជំរុញសេដ្ឋកិច្ចកម្ពុជាឆ្ពោះទៅមុខនៅលើវិស័យជាច្រើន។
លោកបានមានប្រសាសន៍ថា ការអភិវឌ្ឍដែលកំពុងវិវឌ្ឍទៅមុខនិងទំនើបកម្មនៃទីក្រុងឆ្នេរសមុទ្រមួយនេះ នឹងជួយទាក់ទាញចំណាប់អារម្មណ៍របស់ពិភពលោក ខណៈខេត្តព្រះសីហនុនឹងធ្វើជាម្ចាស់ផ្ទះនៃព្រឹត្តិការណ៍ធំៗទាំងក្នុងតំបន់ និងអន្តរជាតិជាច្រើន។
លោក ឌីម៉ង់ ថ្លែងថា៖ «ការធ្វើជាម្ចាស់ផ្ទះរៀបចំមហាសន្និបាតសមុទ្រអាស៊ីបូព៌ាឆ្នាំ ២០២១ ក៏ដូចជាការធ្វើជាម្ចាស់ផ្ទះរៀបចំការប្រកួតកីឡាទូកក្តោងជើងឯកអាស៊ីអាគ្នេយ៍ចាប់ពីថ្ងៃទី ១២-១៧ ខែធ្នូ និងការធ្វើ ជាម្ទាស់ផ្ទះរៀបចំវេទិកាទេសចរណ៍អាស៊ាន ចាប់ពីថ្ងៃទី ១៦-២២ ខែមករា គឺតំណាងឱ្យឱកាសដ៏ល្អបំផុត ដើម្បីបង្ហាញខេត្តព្រះសីហនុទៅដល់តំបន់ និងពិភពលោក»។
លោកមានប្រសាសន៍ថា ផែនការមេដែលត្រូវបានធ្វើដោយរាជរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុរួមជាមួយនឹងក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីសាលាខេត្តព្រះសីហនុគឺត្រូវបានរចនាឡើងក្នុងគោលបំណងធានាដល់ការអភិវឌ្ឍខេត្តព្រះសីហនុ ទាំងផ្នែកសេដ្ឋកិច្ច បរិស្ថាន និងសង្គមប្រកបដោយ ចីរភាព និងនិរន្តរភាព ដើម្បីផ្តល់អត្ថប្រយោជន៍ដល់ខេត្ត ព្រះរាជាណាចក្រកម្ពុជា និងប្រជាជនកម្ពុជា។
«ផែនការមេសម្រាប់តំបន់សេដ្ឋកិច្ចពិសេសគំរូពហុបំណងនេះនឹងជំរុញខេត្តព្រះសីហនុឆ្ពោះទៅរកទិសដៅថ្មី ជាមួយនឹងការអភិវឌ្ឍប្រកបដោយចីរភាព ដែលជាចំណុចសំខាន់របស់ខ្លួន។ ទីក្រុងត្រូវការយុទ្ធសាស្ត្រដើម្បីពង្រឹងសមត្ថភាពរបស់យើង ដូច្នេះការចូលរួមពីគ្រប់ភាគីពាក់ព័ន្ធ រួមទាំងប្រជាជន គឺមានសារៈសំខាន់ណាស់»។ មួយវិញទៀតយើងក៏មានការជំរុញលើកទឹកចឹត្តឱ្យវិស័យឯកជនលើកកម្ពស់សមត្ថភាព ដើម្បីចូលរួមឱ្យកាន់តែក្លៀវក្លាក្នុងវិស័យសេវាកម្មទេសចរណ៍ និងការរៀបចំព្រឹត្តិការណ៍ធំៗផងដែរ។
លោក ឌីម៉ង់ បានបន្តថា៖ «គេនឹងឃើញខេត្តព្រះសីហនុចូលរួមជំរុញសេដ្ឋកិច្ចកម្ពុជាទាំងមូល។ ក្នុងចំណោមខេត្តទាំងអស់នៅក្នុងប្រទេសកម្ពុជា ខេត្តព្រះសីហនុគឺជាខេត្តមួយដែលមានសក្ដានុពល និងសមត្ថភាពខ្លាំងក្លាបំផុតក្នុងការជំរុញប្រទេសកម្ពុជាឆ្ពោះទៅរកយុគថ្មីមួយ ដូច្នេះគោលនយោបាយនឹងមើលឃើញទីក្រុងដើរតួជានាវាសណ្តោងទាញសេដ្ឋកិច្ចព្រះរាជាណាចក្រកម្ពុជាដែលកំពុងជាប់គាំងឆ្ពោះទៅរកយុគថ្មីមួយ»។
បន្ថែមពីលើការអភិវឌ្ឍទីក្រុងដែល មានស្រាប់ដ៏គួរឱ្យកត់សម្គាល់នេះ ផែនការមេមានគោលបំណងជំរុញខេត្តព្រះសីហនុឱ្យក្លាយជាទីក្រុងនៃច្រកចេញចូល និងប្រែក្លាយវាឱ្យទៅ ជាមជ្ឈមណ្ឌលសេដ្ឋកិច្ចជាតិ និងទីក្រុងឆ្លាតវៃប្រកបដោយចីរភាព។
ដើម្បីជួយសម្រួលដល់វិនិយោគិនបរទេសក្នុង និងក្រោយវិបត្តិកូវីដ ១៩ រាជរដ្ឋាភិបាលកម្ពុជាបានធ្វើវិសោធនកម្មច្បាប់ស្តីពីការវិនិយោគ។ ជាមួយគ្នានេះផងដែរ ក្រសួងការងារ និងបណ្តុះបណ្តាលវិជ្ជាជីវៈបានបង្កើតឱ្យមានកម្មវិធីបណ្តុះបណ្តាលធនធានមនុស្ស ដើម្បីជាការត្រៀមលក្ខណសម្បត្តិបន្ស៊ីគ្នាជាមួយនឹងគោលនយោបាយឧស្សាហកម្មថ្មី ដោយយើងយល់ឃើញថា ឧស្សាហកម្មនៅកម្ពុជាមួយភាគធំជាឧស្សាហកម្មប្រភេទអតិពលកម្ម ដូចនេះវាជាការត្រឹមត្រូវណាស់ដែលរាជរដ្ឋាភិបាលកម្ពុជាកំពុងបង្វែរទិសដៅងាកទៅរកឧស្សាហកម្មដែលមានតម្លៃបន្ថែមខ្ពស់ និងប្រើប្រាស់បច្ចេកវិជ្ជាទំនើបៗ។
«យើងមានផែនការរួចរាល់ហើយក្នុងការប្រែក្លាយទីក្រុងមួយនេះ ទៅជាមជ្ឈមណ្ឌលហិរញ្ញវត្ថុសម្រាប់ប្រទេស។ ព្រឹត្តិការណ៍កាលពីពេលថ្មីៗបានបង្ហាញថា យើងត្រូវធ្វើពិពិធកម្មយុទ្ធ សាស្ត្រសេដ្ឋកិច្ចរបស់ខេត្តព្រះសីហនុ និងបង្កើតបរិយាកាសថ្មី»។
«យើងកំពុងសម្លឹងទៅរកការពង្រីក និងទាក់ទាញរំហូរថ្មីនៃការវិនិយោគផ្ទាល់ពីបរទេស ហើយយើងកំពុងសម្លឹងមើលការធ្វើពិពិធកម្មជាតិសាសន៍របស់វិនិយោគិន ដែលធ្វើឱ្យខេត្តព្រះសីហនុក្លាយជាទីក្រុងអន្តរជាតិពិតប្រាកដ»។
លោកបានបន្ថែមថា៖ «រដ្ឋាភិបាលកំពុងរៀបចំគោលនយោបាយដើម្បីប្រែក្លាយទីក្រុងនេះទៅជាតំបន់សេដ្ឋកិច្ចពហុបំណង។ តាមរយៈផែនការមេដើម្បីអភិវឌ្ឍន៍ និងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង គេនឹងឃើញខេត្តព្រះសីហនុត្រូវបានបែងចែកជាតំបន់ផ្សេងៗគ្នា ដូចជាតំបន់សម្រាប់ទេសចរណ៍ ឧស្សាហកម្ម ហិរញ្ញវត្ថុ និងកសិឧស្សាហកម្ម នៅក្នុងចំណោមផ្នែកជាច្រើនផ្សេងទៀត»។ ដើម្បីឆ្លើយតបទៅនឹងតម្រូវការហេដ្ឋារចនាសម្ព័ន្ធ ដែលកំពុងកើនឡើង រដ្ឋាភិបាលនៅក្នុងខែវិច្ឆិកា ឆ្នាំ ២០១៩ បានផ្តល់ថវិកាជាង ៣០០ លានដុល្លារ ដើម្បីកែលម្អផ្លូវចំនួន ៣៤ ខ្សែឡើងវិញ ហើយកំពង់ផែស្វយ័តក្រុងព្រះសីហនុក៏កំពុងត្រូវបានពង្រីក ដើម្បីអាចឱ្យកប៉ាល់ខ្នាតធំ (Post-Panamax) អាចចូលចតបាន ជាមួយគ្នាអាកាសយានដ្ឋានអន្តរជាតិក៏កំពុងសាងសង់ស្ថានីយ (terminal) ថ្មីផងដែរ។
ខេត្តព្រះសីហនុក៏កំពុងអភិវឌ្ឍហេដ្ឋារចនាសម្ព័ន្ធបច្ចេកវិទ្យារបស់ខ្លួន ដើម្បីប្រែក្លាយទៅជាទីក្រុងឆ្លាតវៃ។ «មនុស្សតែងមានការយល់ឃើញថា «ទីក្រុងឆ្លាតវៃ»គឺជាកន្លែងដែលពោរពេញដោយមនុស្សយន្ត តាក់ស៊ីគ្មានអ្នកបើកបរ ឬអ្វីមួយដែលមិនទាន់មាននៅក្នុងប្រទេសកម្ពុជា ប៉ុន្តែវាមិនពិតនោះទេ»។
«ទីក្រុងឆ្លាតវៃប្រើប្រាស់បច្ចេកវិទ្យាដើម្បីប្រមូលទិន្នន័យ និងដើម្បីបង្កើនប្រសិទ្ធភាពនៃប្រតិបត្តិការ និងសេវាកម្ម គឺជាអ្វីដែលកំពុងកើតឡើងរួចហើយនៅក្នុងខេត្តព្រះសីហនុ»។
លោក ឌីម៉ង់ មានប្រសាសន៍ថា ការអភិវឌ្ឍទាំងអស់ត្រូវបានកំណត់ដើម្បីជំរុញខេត្តព្រះសីហនុ ដែលចាប់តាំងពីត្រូវបានបង្កើតឡើងក្នុងឆ្នាំ ១៩៥៧ ឱ្យរីកចម្រើនក្លាយជាមជ្ឈមណ្ឌលជាតិឈានមុខគេ លើវិស័យទេសចរណ៍ ជំនួញ ពាណិជ្ជកម្ម និងដឹកជញ្ជូន និងត្រៀមខ្លួនសម្រាប់ឱកាសនៅពេលអនាគត។
«ចាប់តាំងពីការអភិវឌ្ឍដ៏ចម្បង លើកដំបូងរបស់ខេត្តព្រះសីហនុ រួមជាមួយនឹងការសាងសង់កំពង់ផែទឹកជ្រៅក្នុងទសវត្សរ៍ឆ្នាំ ១៩៥០ ខេត្តព្រះសីហនុ គឺជាអ្នកជំរុញសេដ្ឋកិច្ចកម្ពុជាដ៏សំខាន់ ដែលអនុញ្ញាតឱ្យមានការធ្វើពាណិជ្ជកម្មតាមសមុទ្រអន្តរជាតិដោយផ្ទាល់ ដោយគ្មានការរឹតត្បិត និងបានដើរតួជាច្រកចេញ ចូលរបស់ព្រះរាជាណាចក្រកម្ពុជា»។
លោក ឌីម៉ង់ មានប្រសាសន៍បន្ថែមថា៖ «ជាមួយនឹងការអភិវឌ្ឍថ្មីៗ និងផែនការមេដើម្បីអភិវឌ្ឍន៍ និងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ខេត្តព្រះសីហនុនឹងបន្តរីកចម្រើនឆ្ពោះទៅ មុខនៅក្នុងសតវត្សរ៍ទី២១នេះ»៕