ខណៈពេលដែលធនាគារ អ៊ូរី កំពុងចូលទៅក្នុងទំព័រថ្មីនៅក្នុងវិស័យធនាគាររបស់ព្រះរាជាណាចក្រកម្ពុជា បេក្ខភាពអគ្គនាយកប្រតិបត្តិ លោក Hong Ju Kim ធានាថាគ្រឹះស្ថានហិរញ្ញវត្ថុមួយនេះ នឹងតែងតែប្រកាន់ខ្ជាប់ ចំពោះការផ្តល់នូវសេវាកម្មហិរញ្ញវត្ថុប្រកបដោយគុណភាព តាមរយៈបណ្តាញជាច្រើន និងប្រកាន់ខ្ជាប់នូវតម្លៃស្នូលរបស់ខ្លួនក្នុងការលើកកម្ពស់របៀបវារៈជាតិរបស់រាជរដ្ឋាភិបាល ចំពោះបរិយាប័ន្នហិរញ្ញវត្ថុ និងឈានទៅបម្រើប្រជាជននៅគ្រប់ទីកន្លែង!
តើដំណើរនៃការរីកចម្រើនរបស់ធនាគារ អ៊ូរី នៅកម្ពុជាយ៉ាងណាដែរ?
ប្រវត្តិនៃធនាគារ អ៊ូរី នៅកម្ពុជា គឺបានចាប់ផ្តើមនៅឆ្នាំ 2014 នៅពេលដែលធនាគារ អ៊ូរី នៅក្នុងប្រទេសកូរ៉េខាងត្បូងបានទិញយកគ្រឹះស្ថានមីក្រូហិរញ្ញវត្ថុ ម្លិះហ្វាយនែន ហើយប្តូរឈ្មោះទៅជា អ៊ូរី ហ្វាយនែន (ខេមបូឌា)។
បន្ទាប់ពីបានមើលឃើញការរីកចម្រើន ដែលមិនអាចប្រកែកបាននៅក្នុងវិស័យហិរញ្ញវត្ថុ ធនាគារ អ៊ូរី (កូរ៉េ) បានដឹងថាជំហានបន្ទាប់ក្នុង ការពង្រីកជាសកលរបស់យើងខ្ញុំ គឺការពង្រីកវត្តមានបន្ថែមទៀតនៅក្នុងប្រទេសកម្ពុជា។
ដើម្បីសម្រេចបានជោគជ័យនូវយុទ្ធសាស្ត្រនោះ វាច្បាស់ណាស់ថា ការទិញយកស្ថាប័នមួយដែលគួរជាទីទុកចិត្ត ដូចជាវីសិនហ្វាន់ គឺជាការចាំបាច់ណាស់។ នៅក្នុងឆ្នាំ 2018 ធនាគារ អ៊ូរី នៃប្រទេសកូរ៉េខាងត្បូង បានទិញយកភាគហ៊ុន 100 ភាគរយនៃស្ថាប័ននោះ ហើយប្តូរឈ្មោះទៅជា ដាប់ប៊ែលយូប៊ី ហ្វាយនែន។ នៅឆ្នាំ 2019 ការច្របាច់បញ្ចូលគ្នារវាងក្រុមហ៊ុនទាំង 2 (ដាប់ប៊ែលយូប៊ី ហ្វាយនែន និង អ៊ូរី ហ្វាយនែន (ខេមបូឌា) នៅក្នុងប្រទេសកម្ពុជាបានកើតឡើង និងបង្កើតបានជា (ដាប់ប៊ែលយូប៊ី ហ្វាយនែន) ថ្មី។ បន្ទាប់ពីការច្របាច់បញ្ចូលគ្នាដ៏ជោគជ័យ ធនាគារ អ៊ូរី (កូរ៉េ) បានបន្តបង្ហាញការ-គាំទ្រយ៉ាងពេញទំហឹង ដោយចាក់បញ្ជូលដើមទុនចំនួន100 លានដុល្លារបន្ថែមទៀត ដើម្បីបង្កើនល្បឿនដល់កំណើនរបស់យើងខ្ញុំ។
ការដាក់ដើមទុននេះ បានជួយយើងឱ្យពង្រីកជាយុទ្ធសាស្ត្រ ខណៈដែលយើងខ្ញុំសម្លឹងទៅរកការផ្តល់ជូននូវផលិតផល និងសេវាកម្មបន្ថែមទៀត ដើម្បីបង្កើនបទពិសោធឱ្យល្អបំផុតសម្រាប់អតិថិជនរបស់យើងខ្ញុំ។
ជំហានទាំងអស់នេះ បាននាំយើងខ្ញុំទៅកាន់ទំព័រថ្មីដ៏គួរឱ្យកត់សម្គាល់ ដែលបានក្លាយជាធនាគារ អ៊ូរី (ខេមបូឌា)។ ការដាក់ឱ្យដំណើរការប្រតិបត្តិការនេះ នាំឱ្យកាន់តែខិតជិតមួយជំហានទៀតឆ្ពោះទៅកាន់តែជិតបេសកកម្មរបស់យើងខ្ញុំ ក្នុងការជួយដល់ប្រជាជនកម្ពុជាទាំងអស់ តាមរយៈការផ្តល់ជូននូវសេវាហិរញ្ញវត្ថុកាន់តែប្រសើរ និងប្រកបដោយការច្នៃប្រឌិត។
តើធនាគាររបស់លោកអ្នកបានជម្នះជំងឺរាតត្បាតកូវីដ 19 យ៉ាងដូចម្តេច ខណៈពេលដែលអាជីវកម្ម និងសហគ្រាសធុនតូច និងមធ្យម ប្រឈមនឹងវិបត្តិឥណទាន?
ដើម្បីនិរន្តរភាពអតិថិជន ក៏ដូចជាអាជីវកម្មរបស់យើងខ្ញុំ ចំពេលដែលសេដ្ឋកិច្ចមិនអាចទាយទុកមុនបាន និងដោយមានការគាំទ្រពីធនាគារជាតិនៃកម្ពុជា ធនាគាររបស់យើងខ្ញុំបានរៀបចំឡើងវិញនូវការទូទាត់សងឥណទាន/កម្ចី សម្រាប់អតិថិជនដែលមានតម្រូវការ។ តាមរយៈការអនុវត្តនេះ វាបានជួយអតិថិជនរបស់យើងខ្ញុំឱ្យមានពេលវេលាដើម្បីស្តារ និងរៀបចំអាជីវកម្មរបស់ពួកគេឡើងវិញ។
ធនាគារ អ៊ូរី នៅទីនេះដើម្បីគាំទ្រប្រជាជនកម្ពុជា និងជម្នះរាល់ឧបសគ្គជាមួយប្រជាជនកម្ពុជា ហើយតែងតែនៅទីនោះសម្រាប់ប្រជាជនកម្ពុជា។ ដោយប្រកាន់ខ្ជាប់នូវទស្សនៈនេះ យើងជឿជាក់ថា យើងខ្ញុំនឹងតែងតែផ្តល់នូវដំណោះស្រាយដ៏ល្អបំផុត និងសមស្របបំផុតសម្រាប់អតិថិជនរបស់យើង។
កាលពីពេលថ្មីៗនេះ ធនាគារបានវិវឌ្ឍទៅជាធនាគារពាណិជ្ជពេញលេញ គឺធនាគារ អ៊ូរី (ខេមបូឌា)។ តើម្ចាស់ភាគហ៊ុន និងបុគ្គលិករបស់លោកអ្នក មានអារម្មណ៍យ៉ាងណា?
ភាពរីករាយរបស់បុគ្គលិក និងម្ចាស់ភាគហ៊ុនរបស់យើងខ្ញុំ ចំពោះការក្លាយជាធនាគារពាណិជ្ជនេះ គឺពិតជាមិនអាចប្រកែកបានទេ។ យើងខ្ញុំទាំងអស់គ្នាមានបេសកកម្មដូចគ្នា ក្នុងការផ្តល់នូវបទពិសោធធនាគារដ៏ទូលំទូលាយ និងងាយស្រួលបំផុត សម្រាប់អតិថិជនរបស់យើង ទាំងសម្រាប់ពេលបច្ចុប្បន្ន និងអនាគត។
ការវិវឌ្ឍដ៏ធំនៃប្រតិបត្តិការនេះ នឹងអនុញ្ញាតឱ្យយើងខ្ញុំផ្តល់ជូននូវផលិតផល និងសេវាកម្មកាន់តែច្រើន ខណៈដែលធ្វើឱ្យធនាគារមានភាពងាយស្រួល និងលឿនជាងពេលណាៗទាំងអស់។
ភាពរីករាយនេះ គេអាចមើលឃើញនៅតាមសាខាដ៏ស្រស់ស្អាតរបស់យើង ដែលមានផលិតផល និងសេវាកម្មធនាគារសាជីវកម្មថ្មីដ៏គួរឱ្យទាក់ទាញ ក៏ដូចជាធ្វើឱ្យប្រសើរឡើងនូវកម្មវិធីទូរស័ព្ទរបស់យើងខ្ញុំ និងមានជាច្រើនទៀត។
នៅក្នុងវិស័យធនាគារដែលកំពុងមានការប្រកួតប្រជែង តើលោកអ្នកនឹងដឹកនាំធនាគារយ៉ាងដូចម្តេច? តើអ្វីជាអាទិភាពចម្បងរបស់លោកអ្នកសម្រាប់ឆ្នាំក្រោយ ជាមួយនឹងអត្តសញ្ញាណធនាគារថ្មីរបស់លោកអ្នក?
នៅធនាគារ អ៊ូរី (ខេមបូឌា) យើងខ្ញុំផ្តោតលើការផ្តល់ជូននូវបទពិសោធធនាគារល្អបំផុតសម្រាប់អតិថិជនទាំងអស់។ ជាមួយនឹងការផ្តោតលើអតិថិជនជាស្នូលនៃយុទ្ធសាស្ត្ររបស់យើងខ្ញុំ ធនាគារ អ៊ូរី ផ្តោតលើការកែលម្អគ្រប់ជំហាននៃដំណើរធនាគារសម្រាប់អតិថិជន។
ទីមួយអ្នកប្រើប្រាស់នឹងទទួលបានភាពប្រសើរឡើងនូវសាខាទាំង 138 ទូទាំងប្រទេស។ ធនាគារ អ៊ូរី បានបង្កើតសាខាល្អបំផុត (premium branches) ទន្ទឹមនឹងនេះ ក៏ធ្វើឱ្យប្រសើរឡើងនូវសាខាដែលមានស្រាប់ ដើម្បីបម្រើអតិថិជនរបស់យើងឱ្យកាន់តែល្អ។
លើសពីនេះ ម៉ាស៊ីន ATM ជាង 100 នឹងត្រូវដាក់ឱ្យដំណើរការបន្ថែម ដើម្បីសម្រួលដល់អតិថិជនរបស់យើងខ្ញុំ។ ចំពោះផលិតផល និងសេវាធនាគារសម្រាប់សាជីវកម្ម ក៏នឹងត្រូវណែនាំដល់អតិថិជនដែលកំពុងស្វែងរកការគាំទ្រផ្នែកហិរញ្ញវត្ថុសម្រាប់អាជីវកម្ម ដែលកំពុងរីកចម្រើនរបស់ពួកគេ។
ផលិតផលពាណិជ្ជកម្មអន្តរជាតិ ក៏នឹងត្រូវបានដាក់ឱ្យដំណើរការផងដែរ ដើម្បីបំពេញតម្រូវការសម្រាប់ការផ្ទេរប្រាក់ទៅក្រៅប្រទេស។ ចំពោះកាតឥណទាន និងឥណពន្ធ ក៏នឹងត្រូវដាក់ឱ្យដំណើរការផងដែរ ដើម្បីគាំទ្រដល់សេដ្ឋកិច្ចឌីជីថល។
ទាំងនេះគ្រាន់តែជាចំណុចថ្មីៗ និងគួរឱ្យរំភើបមួយចំនួនប៉ុណ្ណោះ ដែលធនាគារ អ៊ូរី នឹងណែនាំនៅពេលដែលយើងខ្ញុំសម្លឹងទៅរកការសម្រេចឱ្យបាននូវគោលដៅរួមរបស់យើងខ្ញុំ ដើម្បីក្លាយជាគ្រឹះស្ថានហិរញ្ញវត្ថុ ដែលផ្តល់នូវភាពងាយស្រួល សេវាកម្មឆាប់រហ័ស និងគួរឱ្យទុកចិត្តសម្រាប់ប្រជាជនកម្ពុជា។
ការធ្វើឱ្យប្រសើរឡើងនូវសេវាធនាគារសម្រាប់សាជីវកម្មកំពុងត្រូវបានអនុវត្ត ក្នុងអំឡុងពេលវេលាដ៏លំបាក ខណៈការគំរាមកំហែងនៃជំងឺកូវីដ 19 នៅតែមាន ហើយទីផ្សារកំពុងព្យាយាមស្ទុះងើបឡើងវិញ។ តើលោកមានទំនុកចិត្តចំពោះចំណាត់ការដ៏សំខាន់នេះដែរឬទេ?
ធនាគារ អ៊ូរី នៅតែមានសុទិដ្ឋិនិយមយ៉ាងខ្លាំងចំពោះអនាគតរបស់ប្រទេសកម្ពុជា ហើយប្តេជ្ញាចិត្តគាំទ្រសម្រាប់អតិថិជនរបស់យើងខ្ញុំ។ ក្នុងរយៈពេលប៉ុន្មានឆ្នាំចុងក្រោយនេះ ធនាគារ អ៊ូរី បានរៀបចំឥតឈប់ឈរសម្រាប់ពេលវេលានេះ ហើយយើងខ្ញុំអាចនិយាយដោយទំនុកចិត្តថា យើងខ្ញុំបានត្រៀមខ្លួនរួចជាស្រេចដើម្បីទប់ទល់នឹងឧបសគ្គដែលអាចកើតមានឡើង។ យើងខ្ញុំសម្លឹងទៅលើការប្រើប្រាស់ទេពកោសល្យពិសេស និងការគាំទ្រដ៏រឹងមាំពីម្ចាស់ភាគហ៊ុនរបស់យើងខ្ញុំ ក៏ដូចជាយុទ្ធសាស្ត្រយ៉ាងល្អិតល្អន់ ដើម្បីដោះស្រាយជាមួយនឹងបញ្ហាប្រឈមណាមួយ ទន្ទឹមនឹងការចាប់យកឱកាស។
តើលោកអ្នកមានអ្វីផ្សេងទៀតចង់ចែករំលែកដែរឬទេ?
យើងខ្ញុំសូមថ្លែងអំណរគុណយ៉ាងជ្រាលជ្រៅ ចំពោះនិយតករ ម្ចាស់ភាគហ៊ុន ក្រុមប្រឹក្សាភិបាល បុគ្គលិក និងអតិថិជនទាំងអស់។ យើងខ្ញុំសូមអរគុណចំពោះការគាំទ្រដ៏ខ្លាំងក្លា និងការដឹកនាំប្រកបដោយគុណតម្លៃចំពោះនិយតករ។
យើងខ្ញុំសូមថ្លែងអំណរគុណចំពោះការជឿជាក់លើយុទ្ធសាស្ត្ររបស់យើងខ្ញុំ និងការគាំទ្រឥតឈប់ឈរពីសំណាក់ម្ចាស់ភាគហ៊ុន និងក្រុមប្រឹក្សាភិបាល។ យើងខ្ញុំសូមអរគុណអតិថិជន ចំពោះការជឿ ទុកចិត្តរបស់អ្នកទាំងអស់គ្នា ដែលធ្វើឱ្យធនាគារ អ៊ូរី ក្លាយជាជម្រើសនៃសេវាកម្មហិរញ្ញវត្ថុរបស់លោកអ្នក។
យើងខ្ញុំរង់ចាំស្វាគមន៍អ្នកទាំងអស់គ្នាមកកាន់ទំព័រថ្មីនៃធនាគារនៅកម្ពុជា សូមស្វាគមន៍មកកាន់ធនាគារ អ៊ូរី (ខេមបូឌា)៕