ការបង្កើតធនាគារ អ៊ូរី (ខេមបូឌា) ម.ក គឺជាព្រឹត្តិការណ៍ដ៏សំខាន់មួយ ទៀតនៅក្នុងវិស័យធនាគាររបស់ព្រះរាជាណាចក្រកម្ពុជា។ ការទទួលបានអាជ្ញាប័ណ្ណជាធនាគារពាណិជ្ជពេញលេញ នឹងប្រកាសជាផ្លូវការនៅថ្ងៃទី 3 ខែ មករា ឆ្នាំ 2022 នេះ បានធ្វើឱ្យធនាគារ អ៊ូរី (ខេមបូឌា) ម.ក ស្ថិតនៅលើកម្រិតស្មើជាមួយធនាគារក្នុងស្រុក និងបរទេសឈានមុខផ្សេងទៀត ដែលកំពុងប្រតិបត្តិការនៅក្នុងព្រះរាជាណាចក្រកម្ពុជា។
ធនាគារជាតិនៃកម្ពុជា និងក្រសួងពាណិជ្ជកម្ម បានអនុម័តឱ្យធនាគារ អ៊ូរី (ខេម បូឌា) ម.ក ដើម្បីធ្វើប្រតិបត្តិការជាធនាគារពាណិជ្ជ។
ជាមួយនឹងអត្តសញ្ញាណថ្មី និងការគាំទ្រពីម្ចាស់ភាគហ៊ុន គួបផ្សំជាមួយនឹងតារាងតុល្យការដ៏រឹងមាំ កេរ្តិ៍ឈ្មោះល្បីល្បាញជាសកល និងចក្ខុវិស័យដ៏មុតមាំ ក្នុងការពង្រឹងបរិយាប័ន្នហិរញ្ញវត្ថុសម្រាប់ប្រជាជនកម្ពុជាគ្រប់រូប ធនាគារ អ៊ូរី (ខេមបូឌា) ម.ក នឹងលើកកម្ពស់វិស័យធនាគារក្នុងស្រុកឱ្យកាន់តែរឹងមាំបន្ថែមទៀត។
«នៅពេលដែលយើងក្លាយជាធនាគារពាណិជ្ជពេញលេញ យើងខ្ញុំរីករាយ និងរង់ចាំការធ្វើដំណើរដ៏គួរឱ្យរំភើបនេះជាមួយអតិថិជន ដៃគូ និងម្ចាស់ភាគហ៊ុនរបស់យើងខ្ញុំ ដើម្បីផ្តល់នូវបទពិសោធធនាគារស្តង់ដាកូរ៉េ និងធានាឱ្យបាននូវភាពសមស្របសម្រាប់ប្រទេសកម្ពុជា»។
«ដោយប្រើប្រាស់ពាក្យស្លោកពីក្រុមហ៊ុន Woori Financial Group ដែលជាម្ចាស់ភាគហ៊ុនរបស់យើងខ្ញុំនៅប្រទេសកូរ៉េ គឺ «Digital First, Change Everything» “អាទិភាពលើឌីជីថល ផ្លាស់ប្តូរគ្រប់យ៉ាងឱ្យកាន់តែប្រសើរ” គណៈគ្រប់គ្រង និងបុគ្គលិករបស់ធនាគារ អ៊ូរី (ខេមបូឌា) ម.ក បានដាក់ចេញនូវមូលដ្ឋានគ្រឹះ និងយុទ្ធសាស្ត្រជាក់ស្តែងដ៏រឹងមាំ»។
លោក Hong Ju Kim បេក្ខភាពអគ្គនាយកប្រតិបត្តិធនាគារ អ៊ូរី (ខេមបូឌា) ម.ក បានមានប្រសាសន៍ថា ៖«ការផ្លាស់ប្តូរនេះនឹងផ្តល់នូវបទពិសោធនៃការប្រើប្រាស់សេវាធនាគារកាន់តែងាយស្រួល ឆាប់រហ័ស និងគួរឱ្យទុកចិត្ត ដើម្បីឱ្យជីវិតរស់នៅរបស់អតិថិជន និងប្រជាជនកម្ពុជាកាន់តែល្អប្រសើរ»។
ជាមួយនឹងការប្តេជ្ញាចិត្តយ៉ាងមុតមាំចំពោះអតិថិជនរបស់ខ្លួន ធនាគារ អ៊ូរី (ខេមបូឌា) ម.ក ដែលមានបណ្តាញសាខាចំនួន 138 ទូទាំងប្រទេស និងបុគ្គលិកជិត 4,000 នាក់ នឹងខិតខំប្រឹងប្រែងផ្តល់នូវសេវាហិរញ្ញវត្ថុប្រកបដោយគុណភាព។
«ខ្ញុំសូមថ្លែងអំណរគុណយ៉ាងជ្រាលជ្រៅដល់ និយតករ ម្ចាស់ភាគហ៊ុន និងក្រុមប្រឹក្សាភិបាលរបស់យើងខ្ញុំ ចំពោះការណែនាំដ៏មានតម្លៃ និងការគាំទ្រដែលគ្មានទីបញ្ចប់»។ ខ្ញុំសូមថ្លែងអំណរគុណចំពោះការប្តេជ្ញាចិត្ត និងការលះបង់ខ្ពស់ របស់បុគ្គលិក និងគណៈគ្រប់គ្រងរបស់យើងខ្ញុំ»។
«ជាចុងក្រោយ ខ្ញុំសូមអរគុណដល់អតិថិជនទាំងអស់ សម្រាប់ការបន្តគាំទ្រ និងជឿជាក់មកលើយើងខ្ញុំ។ យើងខ្ញុំរង់ចាំស្វាគមន៍អ្នកទាំងអស់គ្នាមកកាន់ទំព័រថ្មីជាមួយធនាគារ អ៊ូរី (ខេមបូឌា) ម.ក»៕