ខណៈរមណីយដ្ឋានឆ្នេរសុខា គឺជាទីតាំងសម្រាប់រៀបចំវេទិកាទេសចរណ៍អាស៊ាន លើកទី៤០ (ATF 2022) ចាប់ពីថ្ងៃទី ១៦-២២ ខែមករា គោលដៅវិស្សមកាលប្រណីតលំដាប់ផ្កាយ ៥ មួយនេះ នឹងជួយផ្សព្វផ្សាយខេត្តព្រះសីហនុទៅដល់ប្រទេសក្នុងតំបន់ និងពិភពលោក។
ប្រធានគ្រប់គ្រងទូទៅ លោក ថៃ តារា មានប្រសាសន៍ថា វាជាកិត្តិយសមួយសម្រាប់រមណីយដ្ឋានឆ្នេរសុខា ដែលត្រូវបានជ្រើសរើសជាទីកន្លែងសម្រាប់ព្រឹត្តិការណ៍ដ៏ធំប្រចាំតំបន់មួយនេះ។
«វាមានអត្ថន័យខ្លាំងណាស់សម្រាប់ខេត្តព្រះសីហនុ ដែលត្រូវបានជ្រើសរើសជាគោលដៅសម្រាប់វេទិកាទេសចរណ៍អាស៊ានឆ្នាំ ២០២២ ហើយវាជាកិត្តិយសសម្រាប់ពួកយើងផ្ទាល់ដែលបានធ្វើជាម្ចាស់ផ្ទះរៀបចំព្រឹត្តិការណ៍ដ៏ធំនេះ។ ការធ្វើជាម្ចាស់ផ្ទះនៃព្រឹត្តិការណ៍នេះ នឹងជួយឱ្យយើងផ្សព្វផ្សាយខេត្តព្រះសីហនុ និងប្រទេសកម្ពុជាទាំងមូល ជាគោលដៅទេសចរណ៍លំដាប់ពិភពលោក ក៏ដូចជារមណីយដ្ឋានឆ្នេរសុខាផងដែរ»។ «នៅពេលដែលពួកគេមកទីនេះសម្រាប់វេទិកា ATF ពួកគេនឹងទទួលបាននូវអារម្មណ៍ដូចភ្ញៀវរបស់យើងដែរ គឺវាពិតជាអស្ចារ្យណាស់! គ្មានកន្លែងណាអាចប្រៀបបានទេ»។
ATF បញ្ជាក់ថា ខ្លួនមានគោលបំណង «ផ្តល់វេទិកាមួយដើម្បីលើកទឹកចិត្តដល់កិច្ចសហការរវាងរដ្ឋជាសមាជិកអាស៊ាន និងដើម្បីលើកកម្ពស់តំបន់ជាទិសដៅតែមួយ ជាមួយនឹងវប្បធម៌ចម្រុះ»។
ប្រធានបទនៃវេទិកា ATF ឆ្នាំនេះគឺ «អាស៊ាន៖ សហគមន៍សន្តិភាព និងវាសនាតែមួយ» (ASEAN: A Community of Peace and Shared Future) ដែលនឹងបង្ហាញពីការប្តេជ្ញាចិត្តរបស់ព្រះរាជាណាចក្រកម្ពុជា ក្នុងនាមជាភាគីដ៏សំខាន់មួយនៅក្នុងប្រព័ន្ធអេកូទេសចរណ៍ក្នុងតំបន់។
ជាមួយនឹងស្ថាបត្យកម្មដ៏ប្រណីត ទីតាំងដ៏ស្រស់ត្រកាល បង្កើតបានបរិយាកាសសម្រាកលម្ហែ ដ៏ល្អឥតខ្ចោះ ហើយរមណីយដ្ឋានឆ្នេរសុខា គឺជាកន្លែងដ៏ល្អបំផុតសម្រាប់បង្ហាញអំពីឧស្សាហកម្មទេសចរណ៍របស់ព្រះរាជាណាចក្រកម្ពុជា។
«ជាមួយនឹងសួនច្បាររំលេចដោយដើមត្នោតជាជួរ និងឆ្នេរខ្សាច់សក្បុសដ៏ស្រស់ស្អាតប្រវែង ១,៥ គីឡូម៉ែត្រ រមណីយដ្ឋានឆ្នេរសុខា មានបរិស្ថានធម្មជាតិនិងសំណង់អគារដ៏ប្រណីត ដែលវាពិតជាកន្លែងដ៏អស្ចារ្យបំផុត»។
លោក តារា បានបន្ថែមថា៖ «យើងស្ថិតនៅលើផ្ទៃដីជាង ៣០ ហិកតា អមដោយឆ្នេរសមុទ្រដែលមានទេសភាពដ៏ស្រស់ស្អាត ក្នុងនោះមាន ៩៦៩ បន្ទប់ ដ៏ប្រណីត ជាប្រភេទ suites, chalets និងវីឡា ដែលត្រូវបានរចនាបែបខ្មែរ និងសម័យទំនើប ជាមួយនឹងភោជនីយដ្ឋានលំដាប់ខ្ពស់ចំនួន ៦ សម្រាប់ស្វាគមន៍ទាំងអតិថិជនខ្មែរ អាស៊ី និងបស្ចិមប្រទេស»។
រមណីយដ្ឋានឆ្នេរសុខា បានចាប់ផ្តើមក្នុងទសវត្សរ៍ឆ្នាំ ១៩៦០ ជាវីឡាឆ្នេរប្រណីតចំនួន ១០ ដែលនៅតែជាចំណុចកណ្តាលនៃរមណីយដ្ឋាននេះ ដោយម្ចាស់បច្ចុប្បន្នបានពង្រីកអចលនទ្រព្យមួយនេះ បន្ទាប់ពីបានទិញនៅឆ្នាំ ២០០៤។
«រឿងនេះបានចាប់ផ្តើមនៅក្នុងទសវត្សរ៍ឆ្នាំ ១៩៦០ «យុគមាស» ក្នុងរជ្ជកាលព្រះបាទនរោត្តមសីហនុ ជាមួយនឹងបាងហ្គាឡូដ៏ប្រណីតចំនួន ១០ ដែលត្រូវបានសាងសង់នៅលើឆ្នេរសុខា ជា «ម៉ូតែលសុខា» ( Motel Sokha) ដែលជាផ្នែកមួយនៃការអភិវឌ្ឍដំបូងនៃខេត្តព្រះសីហនុ និងឧស្សាហកម្មទេសចរណ៍របស់កម្ពុជា»។
«ក្នុងឆ្នាំ ២០០៤ ឧស្សាហកម្មទេសចរណ៍កម្ពុជានៅមានកម្រិតនៅឡើយ ហើយសណ្ឋាគារសុខាបានជ្រើសរើសកន្លែងដ៏ស្រស់ស្អាតនេះ ដើម្បីសាងសង់រមណីយដ្ឋានវិស្សមកាលស្តង់ដាអន្តរជាតិ ដែលជាផ្នែកមួយនៃការជំរុញឱ្យវារស់ឡើងវិញ ដើម្បីផ្សព្វផ្សាយព្រះរាជាណាចក្រកម្ពុជា ជាគោលដៅទេសចរណ៍កំពូល»។
លោក តារា ថ្លែងថា៖ «បច្ចុប្បន្នរមណីយដ្ឋានឆ្នេរសុខា បំពាក់ដោយគ្រឿងបរិក្ខារស្តង់ដាអន្តរជាតិ និងមានអ្វីៗគ្រប់យ៉ាងដែលអ្នកចង់បានពីរមណីយដ្ឋានលំដាប់ផ្កាយ ៥ មួយនេះ គួបផ្សំនឹងបទពិសោធនៃបដិសណ្ឋារកិច្ចរបស់ខ្មែរដ៏ពិសេស»។
លោកថ្លែងថា នេះជាការអនុលោមតាមបេសកកម្មរបស់សណ្ឋាគារសុខា ក្នុងការផ្តល់នូវបទពិសោធ បដិសណ្ឋារកិច្ចខ្មែរ ដែលមិនអាចបំភ្លេចបាន គឺតាមរយៈការបង្កើតនូវអារម្មណ៍មួយ ដែលបេះដូងរបស់ពួកគេចង់បាន។
«នៅរមណីយដ្ឋានឆ្នេរសុខា យើងខិតខំលើកកម្ពស់បដិសណ្ឋារកិច្ចខ្មែរ ដោយផ្តល់ការយកចិត្តទុកដាក់ និងស្នាមញញឹមដ៏កក់ក្តៅទៅកាន់ពិភពលោក»។
មានដើមកំណើតនៅខេត្តសៀមរាប និងមានបទពិសោធការងាររយៈពេល ១៦ ឆ្នាំនៅសណ្ឋាគារ សុខា លោកបន្តថា៖ «ទស្សនៈរបស់សណ្ឋាគារសុខា គឺចាត់ទុកបុគ្គលិកជាគ្រួសារតែមួយ។ ទាំងនេះគឺជាផ្នែកទាំងមូលនៃយុទ្ធសាស្ត្ររួម និងនិរន្តរភាពរបស់យើងចំពោះរមណីយដ្ឋាននេះ។ ការគោរពដែលយើងបង្ហាញដល់ភ្ញៀវ និងបុគ្គលិករបស់យើង គឺត្រូវបានឆ្លុះបញ្ចាំងនៅក្នុងការគោរពដែលយើងបង្ហាញចំពោះ បរិស្ថាន និងឆ្នេរ។
«បទពិសោធដ៏អស្ចារ្យនៃការស្នាក់នៅសណ្ឋាគារសុខា គឺត្រូវបានបង្ហាញតាមរយៈការត្រឡប់មកស្នាក់នៅវិញរបស់ភ្ញៀវ ដែលពួកគេចាត់ទុកពួកយើងដូចជាផ្ទះទី២»។
លោកតារាបន្ថែមថា៖ «ភ្ញៀវមួយចំនួនរបស់យើងមកទីនេះតាំងពីកុមារ ហើយម៉ាកយីហោរបស់យើង គឺរឹងមាំ ដែលឥឡូវនេះពួកគេក្លាយជាឪពុកម្តាយ ហើយពួកគេក៏នាំកូនរបស់ពួកគេមកទីនេះដែរ។ ប្រវត្តិសាស្ត្រត្រូវបានកសាងឡើងជាបន្តបន្ទាប់នៅរមណីយដ្ឋានឆ្នេរសុខាសម្រាប់គ្រប់ជំនាន់»។
«ដោយប្រកាន់ខ្ជាប់យ៉ាងម៉ឺងម៉ាត់នូវនីតិវិធីប្រតិបត្តិការស្តង់ដាកូវីដ ១៩ របស់រដ្ឋាភិបាល យើងកំពុងរង់ចាំស្វាគមន៍ភ្ញៀវ ទាំងភ្ញៀវជាតិ និងអន្តរជាតិ ប្រកបដោយសុវត្ថិភាព ជាមួយនឹងបដិសណ្ឋារកិច្ចខ្មែរ»។
«សុខា ប្រែថា «វិបុលភាព និងសុភមង្គល» ហើយយើងមានគោលបំណងផ្តល់ជូនចំណុចនេះ និងផ្តល់ការស្វាគមន៍ដ៏កក់ក្តៅបំផុតដល់ភ្ញៀវស្នាក់នៅ និងដើម្បីជាជម្រើសទី១ សម្រាប់ទេសចរនៅកម្ពុជា»៕