វិទ្យាស្ថាន ពាណិជ្ជសាស្ត្រ អេស៊ីលីដា (AIB) ត្រូវបានបង្កើតឡើង ជាមួយនឹងគោលបំណង ២ គឺបណ្តុះបណ្តាលអ្នកមានទេពកោសល្យប្រកបដោយគុណភាព សម្រាប់វិស័យហិរញ្ញវត្ថុក្នុងស្រុក និងបណ្តុះបណ្តាលបុគ្គលិករបស់ធនាគារ អេស៊ីលីដា ដើម្បីជំរុញដល់វិស័យហិរញ្ញវត្ថុដែលកំពុងរីកចម្រើនលឿនបំផុតនៅក្នុងព្រះរាជាណាចក្រកម្ពុជា។
ក្នុងនាមជាបុត្រសម្ព័ន្ធទាំងស្រុងរបស់ធនាគារ អេស៊ីលីដា វិទ្យាស្ថាននេះផ្តល់នូវការអប់រំផ្នែកធុរកិច្ច និងហិរញ្ញវត្ថុដ៏សម្បូរបែប តាមរយៈការសិក្សានៅក្នុងសាលាដោយផ្ទាល់ និងការសិក្សាតាមអនឡាញសម្រាប់សាធារណៈជន និងស្ថាប័ននានា។
វិទ្យាស្ថាន AIB ផ្តល់ការបណ្តុះបណ្តាលវិជ្ជាជីវៈក្នុងវិស័យហិរញ្ញវត្ថុ និងធនាគារសម្រាប់ទាំងនិស្សិតក្នុងស្រុកនិងអន្តរជាតិ និងនិស្សិតដែលបានបញ្ចប់ការសិក្សាមកពីស្ថាប័នផ្សេងៗ និងសាធារណៈជនទូទៅ ព្រមទាំងបុគ្គលិករបស់ធនាគារអេស៊ីលីដាផងដែរ។ «ចក្ខុវិស័យរបស់យើងគឺក្លាយជាថ្នាលអប់ររំធុរកិច្ចប្រកបដោយគុណភាពឈានមុខ ជាមួយនឹងស្តង់ដារគុណភាពខ្ពស់បំផុត សម្រាប់មនុស្សជំនាន់ក្រោយ ដើម្បីគាំទ្រដល់ការអភិវឌ្ឍសេដ្ឋកិច្ចសង្គមនៅកម្ពុជា និងក្នុងតំបន់»។
លោកបណ្ឌិត ផុន ណារិន នាយកវិទ្យាស្ថាន AIB មានប្រសាសន៍ថា៖ «យើងផ្តល់ការអប់រំប្រកបដោយគុណភាពខ្ពស់ តាមរយៈវគ្គសិក្សានៅក្នុងថ្នាក់ដោយផ្ទាល់ និងតាមរយៈឌីជីថល ដើម្បីកសាងចំណេះដឹង ជំនាញវិជ្ជាជីវៈ ប្រកបដោយការច្នៃប្រឌិត បទពិសោធន៍ និងក្រមសីលធម៌ និងបង្កើតបណ្តាញដើម្បីបង្កើនអាជីពនាពេលអនាគតរបស់ពួកគេ។ ហើយបាវចនារបស់យើងគឺ «វិទ្យាស្ថានដើម្បីភាពជោគជ័យក្នុងអាជីពនៅក្នុងឧស្សាហកម្មហិរញ្ញវត្ថុ»។
និស្សិតជាង 400 នាក់ បានបញ្ចប់ការសិក្សាពីវិទ្យាស្ថានបណ្តុះបណ្តាលពិសេសដែលបានបង្កើតឡើងក្នុងឆ្នាំ 2016 នេះ និងមានទីតាំងស្ថិតនៅមហាវិថីមិត្តភាពភ្នំពេញ ហាណូយ។ មានទីតាំងស្ថិតនៅលើផ្ទៃដី 75,750 ម៉ែត្រការ៉េ វិទ្យានស្ថានមានអាគារកម្ពស់ 5 ជាន់ ចំនួន 2 អាគារ រួមនឹងអាគាររដ្ឋបាល ថ្នាក់រៀន បណ្ណាល័យ បន្ទប់ប្រជុំ និងសាលបង្រៀន។ គិតត្រឹមខែតុលា វិទ្យាស្ថាន AIB បានផ្តល់វគ្គបណ្តុះបណ្តាលចំនួន 66,066 វគ្គ ដល់បុគ្គលិកធនាគារ អេស៊ីលីដាចំនួន 740, 679 នាក់។
វិទ្យាស្ថាន AIB បើកវគ្គបណ្តុះបណ្តាលគ្រូបង្គោល (ToT) ដល់សមាជិកគ្រួបង្គោលរបស់ធនាគារ អេស៊ីលីដា និងផ្តល់វគ្គបណ្តុះបណ្តាលជ្រើសរើសបុគ្គលិកថ្មី វគ្គបណ្តុះបណ្តាលណែនាំ វគ្គបណ្តុះបណ្តាលជំនាញ និងវគ្គបណ្តុះបណ្តាលសម្រាប់ថ្នាក់ដឹកនាំ និងបុគ្គលិករបស់ធនាគារ អេស៊ីលីដា ជាច្រើនទៀត។
ក្នុងឆ្នាំសិក្សានីមួយៗ វិទ្យាស្ថាន AIB ផ្តល់វិញ្ញាបនបត្រសរសើរ និងអាហារូបករណ៍រយៈពេលមួយឆ្នាំ សម្រាប់អ្នកដែលសម្រេចបានចំណាត់ថ្នាក់ខ្ពស់។
អាហារូបករណ៍មាន 3 ប្រភេទ ត្រូវបានផ្តល់ជូន គឺអាហារូបករណ៍ 100 ភាគរយ សម្រាប់ចំណាត់ថ្នាក់ទី1 អាហារូបករណ៍ 50 ភាគរយ សម្រាប់ចំណាត់ថ្នាក់ទី2 និងផ្តល់វិញ្ញាបនបត្រសរសើរសម្រាប់ចំណាក់ថ្នាក់បន្ទាប់។
វិទ្យាស្ថាន AIB ផ្តល់ការបណ្តុះបណ្តាលដើម្បីបំពេញតម្រូវការនិងចំណាប់អារម្មណ៍របស់ក្រុមហ៊ុនផ្សេងៗ ហើយបុគ្គលិក AIB ក៏ធ្វើការជាមួយអង្គការនានា ដើម្បីវាយតម្លៃតម្រូវការបណ្តុះបណ្តាល រៀបចំកម្មវិធីសិក្សា ផ្តល់ការកសាងសមត្ថភាព និងចូលរួមក្នុងព្រឹត្តិការណ៍សិក្សានានា។
វគ្គបណ្តុះបណ្តាលទាំងនេះត្រូវបានរចនាឡើងសម្រាប់ក្រុមនៃអង្គការ ដូចជាអង្គការក្រៅរដ្ឋាភិបាលអន្តរជាតិ អ្នកផ្តល់មូលនិធិ សមាគម បណ្តាញ ឬគម្រោងសហការ។ ការចុះទៅដល់ធនាគារដោយផ្ទាល់ ត្រូវបានដាក់បញ្ចូល ដើម្បីបង្ហាញដល់និស្សិតឱ្យមើលឃើញការអនុវត្តជាក់ស្តែង របស់ធនាគារ អេស៊ីលីដា ក្នុងផ្នែកជាច្រើនដូចជា ផ្នែកឥណទាន ឥណទានសន្សំ ឬផ្នែកគាំទ្រការិយាល័យ ដូចជាផ្នែក សវនកម្មផ្ទៃក្នុង និងការគ្រប់គ្រងរតនាគារជាដើម។
លើសពីនេះទៀត កម្មវិធីទស្សនកិច្ចសិក្សា សម្រាប់ភ្ញៀវជាតិ និងអន្តរជាតិ មកជួបជាមួយប្រធានគ្រប់គ្រង និងអ្នកជំនាញ របស់ធនាគារ អេស៊ីលីដា ដើម្បីសិក្សាស្វែងយល់អំពីប្រធានបទបច្ចេកទេស និងការគ្រប់គ្រងផ្សេងៗ ក៏ដូចជាផ្នែកនៃសកម្មភាពនានារបស់វិទ្យាស្ថាន AIB ផងដែរ។
ការផ្តោតសំខាន់មួយទៀតរបស់វិទ្យាស្ថាន AIB គឺកម្មវិធី Building Inclusive Financial Sector Programme ដែលត្រូវបានរៀបចំជាពិសេសសម្រាប់គ្រឹះស្ថានមីក្រូហិរញ្ញវត្ថុ ធនាគារកណ្តាល អ្នកបង្កើតគោលនយោបាយ និងមន្ត្រីរដ្ឋាភិបាលជាដើម។
លោកបណ្ឌិត ណារិន ថ្លែងថា៖ «បន្ទាប់ពីបានចូលរួមវគ្គបណ្តុះបណ្តាលជាមួយ វិទ្យាស្ថាន AIB សិក្ខាកាមនឹងទទួលបាននូវចំណេះដឹង និងជំនាញបន្ថែម ដោយផ្អែកលើបទពិសោធន៍ជោគជ័យ និងការអនុវត្តការងារល្អបំផុតរបស់ធនាគារ អេស៊ីលីដា។ វគ្គបណ្តុះបណ្តាលត្រូវបានរៀបចំឡើង ដែលផ្តោតសំខាន់លើអ្នកចូលរួម ផ្តោតលើរបៀបអនុវត្តការងារឱ្យបានល្អបំផុត ដើម្បីបង្កើនផលិតភាព និងប្រាក់ចំណេញ»៕