.jpg)
រមណីដ្ឋានទឹកធ្លាក់ក្បាលព្រះ ស្ថិតក្នុងខេត្តមណ្ឌលគិរី។ ហុង មិនា
ភ្នំពេញ : អស់រយៈពេលជាច្រើនឆ្នាំមកហើយ សារព័ត៌មាន ភ្នំពេញ ប៉ុស្ដិ៍ បានចុះរុករក និងផ្សព្វផ្សាយពីតំបន់ដ៏ស្រស់ស្អាតដ៏មានសក្ដានុពលនៅកម្ពុជា ដើម្បីលើកកម្ពស់វិស័យទេសចរណ៍ និងពលរដ្ឋសហគមន៍។
ទោះជាឆ្លងកាត់វិបត្តិជំងឺកូវីដ ១៩ ជាសកលក្ដី ក៏បេសកកម្មនេះនៅតែបន្តដោយសម្របតាមរបត់សកល និងវិធានការសុវត្ថិភាព ដូចជាការបង្វែរទិសដៅទៅរកបច្ចេកវិទ្យាទេសចរណ៍ពិភពនិម្មិត អំឡុងពេលបិទខ្ទប់ ការណែនាំតំបន់ទេសចរណ៍បែបផ្សងព្រេង ដោយមានការចូលរួមពីស្ត្រី និងការបំបែកឯតទគ្គកម្មស្ដារអេកូទេសចរណ៍នៅកម្ពុជា។
ពិភពនិម្មិតក្នុងវិស័យទេសចរណ៍
អំឡុងពេលផ្ទុះការឆ្លងក្នុងសហគមន៍នៅកម្ពុជា ប្រជាជនមិនត្រូវបានលើកទឹកចិត្ដឱ្យធ្វើដំណើរ ចៀសវាងការជួបជុំមនុស្សច្រើន ខណៈអាជីវកម្មកម្សាន្តជាច្រើនត្រូវបានបិទទ្វារ។យ៉ាងណាមិញ ក្នុងកាលៈទេសៈនេះ បច្ចេកវិទ្យា VR អាចជួយ និងនាំយកទិដ្ឋភាពទាំងនោះមកដល់ក្នុងបន្ទប់សម្រាប់អ្នកត្រូវសំងំក្នុងផ្ទះរយៈពេលច្រើនថ្ងៃ សប្ដាហ៍ ឬរហូតដល់ខែ។
លោក អៀ សារ៉ាបុត្រ ជាស្ថាបនិក Virtual Reality Cambodia និងជានាយកគ្រប់គ្រង Hiverlab Cambodia បានឱ្យដឹងថា៖«យើងអាចទៅលេងអង្គរវត្ដ យើងទៅសមុទ្រ ទៅកោះ ទៅស្រុកអីផ្សេងទៀត ដូចជា ក្រុងប៉ារីស អូស្ដ្រាលី និងគ្រប់កន្លែង រួមទាំងទិដ្ឋភាពបាតសមុទ្រនៅក្នុងកម្រិតរូប ៣៦០ដឺក្រេ»។
បទពិសោធបច្ចេកវិទ្យាទំនើបក្នុងវិស័យ ទេសចរណ៍នេះ ក៏ត្រូវបានប្រើប្រាស់ ដោយសារមន្ទីរអន្ដរជាតិនានា ដោយរំលេចពិព័រណ៍ដ៏រស់រវើក ទាក់ទាញអ្នកទស្សនាវិលទៅកាន់ពេលវេលាណាមួយ និងកន្លែងណាមួយស្ដែងៗនឹងភ្នែក។
អង្គររស់រវើក មានន័យថា ភ្ញៀវអាចធ្វើដំណើរទៅកាន់អតីតកាល ដើម្បីមើលពីការកសាងប្រាង្គប្រាសាទក្នុងរជ្ជកាលអាណាចក្រខ្មែរដ៏រុងរឿងផ្ទាល់នឹងភ្នែក ដោយគ្រាន់តែឈានជើងចូលក្នុងសាលបន្ទប់ធំមួយនោះ រូបភាពពីការកសាងប្រាង្គប្រាសាទបានផុសឡើងនៅគ្រប់ជ្រុងនៃជញ្ជាំងទាំង៨ទិស ពេញ៣៦០ដឺក្រេ។
លោក សូរស្មី កេ ប៊ីន ជាអគ្គនាយកក្រុមហ៊ុន Confluences ដែលរួមចំណែកក្នុងការបង្កើតសារមន្ទីររស់រវើកបាននិយាយថា៖ «ក្នុងការផ្ដល់បទពិសោធសម្រាប់ទាំងភ្ញៀវជាតិ និងអន្ដរជាតិ សារមន្ទីរអង្គររស់រវើក នឹងប្រើបច្ចេកវិទ្យាទំនើប ដែលអនុញ្ញាតឱ្យអ្នកទស្សនាបានឃើញនូវប្រាង្គប្រាសាទត្រូវបានកសាងឡើងវិញតាមរូបភាព 3D»។
ស្ត្រីកាន់តែច្រើន ហ៊ានផ្សងព្រេងនៅពេលរដ្ឋាភិបាលចាប់ផ្ដើមដកការរឹតបន្តឹងសន្សឹមៗ កញ្ញា ថូ ភារម្យ បានសម្រេចចិត្តសាកល្បងដំណើរបែបផ្សងព្រេងលើកដំបូង កាលពីខែកក្កដា ឆ្នាំ២០២១ ឡើងភ្នំខ្នងផ្សារ។
ក្រោយដំណើរថ្មើរជើង៥ម៉ោងតបស្នងដោយទេសភាពវាលស្មៅលើភ្នំរលករលេញបំពេញដោយពពកអ័ព្ទសក្បុស កញ្ញានិយាយថា៖«ខ្ញុំចង់សាកថ្មឱ្យជីវិត»។
ប៉ុន្មានឆ្នាំចុងក្រោយនេះ ស្ត្រីកាន់តែច្រើនហ៊ានផ្សងព្រេងធ្វើដំណើរកម្សាន្តផ្សារភ្ជាប់ខ្លួនជិតស្និទ្ធនឹងសហគមន៍ទេសចរណ៍ធម្មជាតិ។
ដូចជាកញ្ញា ផេង ស្រីស សកម្មជនបរិស្ថាន ១រូប ដែលបានធ្វើដំណើរជុំវិញប្រទេសកម្ពុជា ជាពិសេសតំបន់ព្រៃភ្នំ នារយៈពេល៥ឆ្នាំចុងក្រោយនេះ។
ក្រៅពីភ្នំខ្ពស់បំផុតទាំង៣ នៅកម្ពុជា ដូចជា ភ្នំឱរ៉ាល់ កម្ពស់ ១ ៨១៣ម៉ែត្រ ខេត្ដកំពង់ស្ពឺ ភ្នំសំកុស កម្ពស់ ១ ៧១៧ ម៉ែត្រ ខេត្ដពោធិ៍សាត់ និងភ្នំទំព័រ កម្ពស់ ១ ២៥០ម៉ែត្រក្នុងខេត្ដពោធិ៍សាត់ យុវតីខ្មែររូបនេះបានធ្វើដំណើរចូលព្រៃភ្នំជាច្រើនកន្លែង។ កញ្ញា ស្រីស បានចំណាយពេល ១០ថ្ងៃ ធ្វើដំណើរទៅកាន់ឆាយ១០០ ឬជ្រោះមរណៈ ស្ថិតនៅកណ្ដាលព្រៃជ្រៅនៃតំបន់ជួរភ្នំក្រវាញ ព្រំប្រទល់ខេត្ដកោះកុង និងពោធិ៍សាត់ ជាទីមានទឹកធ្លាក់ខ្ពស់ជាងគេ ទេសភាពជ្រលងភ្នំខ្ពស់ៗ និងស្ទឹងធំៗ។
កញ្ញាវ័យ២៦ឆ្នាំនេះបានប្រាប់ថា៖ «កម្លាំងយើងជាមនុស្សស្រីប្រហែលជាមិនខ្លាំងដូចបុរសទេ ប៉ុន្តែកម្លាំងចេញពីចិត្ត និងក្ដីស្រឡាញ់ធម្មជាតិអាចធ្វើឱ្យយើងជម្នះឧបសគ្គបាន»។
រមណីដ្ឋានទឹកធ្លាក់អូរស៊ីនល៊ែ ស្ថិតក្នុងខេត្តរតនគិរី។ហេង ជីវ័ន
ទំនោរទេសចរណ៍ធម្មជាតិ
បន្ថែមពីការផ្សព្វផ្សាយពីទំនោរកម្សាន្តបែបផ្សងព្រេង ភ្នំពេញ ប៉ុស្ដិ៍ ក៏ព្យាយាមរំលេចសក្ដានុពលសកម្មភាពកម្សាន្ត ប្រកបដោយសុវត្ថិភាព និងបណ្ដុះគ្រាប់ពូជអ្នកស្នេហាបរិស្ថាន។
កុមារី វ័យ ៤ឆ្នាំ ភិរម្យ រស្មីភាណុ ទើបបញ្ចប់ដំណើរទៅកាន់វាលខ្នងផ្សារ និងបងប្រុស វីលៀមស៍ អាយុ ៨ឆ្នាំ ក៏បានទទួលជោគជ័យក្នុងការឡើងភ្នំខ្ពស់បំផុតនៅកម្ពុជាផងដែរ។
កុមារទាំង២ជាកូនរបស់លោក ជួន ភិរម្យ បុគ្គលល្បីខាងពូកែលុកលុយព្រៃភ្នំ ស្វែងរកទីឋានធម្មជាតិស្រស់ត្រកាល ដោយរមែងចែករំលែកចំណេះដឹងស្ដីពីបទពិសោធដើរផ្សងព្រេង និងសម្អាតបរិស្ថាន។
លោកប្រាប់ថា៖ «ដំណើរកម្សាន្ដបែបផ្សងព្រេងនេះផ្ដល់អត្ថប្រយោជន៍ដល់ក្មេងៗក្នុងការបង្កើនទំនុកចិត្ដលើខ្លួនឯង និងជាឱកាសឱ្យគាត់ផ្សារភ្ជាប់ជាមួយធម្មជាតិ ហ្វឹកហ្វឺនរាងកាយបានយ៉ាងល្អ និងជាការអប់រំមួយបែបនៅពេលគាត់ឡើងភ្នំ គាត់អាចឮសំឡេង ក្លិន និងឃើញនូវអ្វីប្លែកៗ»។ លោកបន្តថា៖ «អំឡុងពេលដើរនោះ យើងអាចពន្យល់គាត់ពី
សារៈសំខាន់នៃបរិស្ថាន និងអាចបង្រៀនគាត់អំពីចំណេះដឹងមូលដ្ឋាននៃការរស់នៅក្នុងព្រៃ ព្រមទាំងអនុវត្ដគោលការណ៍«ដើរមិនទុកដាន» ផងដែរ»។
កំណត់ត្រាស្ដារអេកូទេសចរណ៍
ក្នុងគោលបំណងស្ដារអេកូទេសចរណ៍ឱ្យរស់ឡើងវិញ ក្រោយញាំញីដោយកូវីដ អង្គការក្រៅរដ្ឋាភិបាលវ័យសាមប្លាយជាជនជាតិអាមេរិក លោក Jacob Sims និងអូស្ត្រាលី Julien Brewster បានបំបែកកំណត់ត្រាឡើងភ្នំឱរ៉ាល់ ក្នុងថិរវេលា ២ ម៉ោង ២៦នាទី និង ៣៦វិនាទី នៅថ្ងៃទី៣ ខែមេសា ឆ្នាំ២០២២ ហើយលោកបានលើកទឹកចិត្តឱ្យអត្ដពលិកខ្មែរចូលរួមបំបែកកំណត់ត្រារបស់លោក។
រោយពីបានឃើញព័ត៌មាននេះលើកាសែត ភ្នំពេញ ប៉ុស្តិ៍ ពីលោក គីម សារឿន ហៅ គីម កុក អាយុ ៥៣ឆ្នាំរូបនេះ បានឡើងដល់កំពូលភ្នំឱរ៉ាល់ដោយប្រើប្រាស់ថិរវេលាចំនួន ២ម៉ោង ២៦នាទី និង ៨វិនាទី កាលពីថ្ងៃសៅរ៍ទី៤ មិថុនា២០២២។
លោកបញ្ជាក់ថា៖ «នេះមិនមែនជាការអំពាវនាវឱ្យមានការប្រកួតប្រជែងគ្នាឡើយ ប៉ុន្តែជាការលើកទឹកចិត្តឱ្យមកបំបែកកំណត់ត្រារបស់ខ្លួនឯង និងលើកកម្ពស់វិស័យទេសចរណ៍ បង្កើនជីវភាពសហគមន៍ឱ្យកាន់តែរីកចម្រើន»៕
