ស្ថានទូតចិនប្រចាំរាជធានីភ្នំពេញ កាលពីថ្ងៃទី ២២ ខែកញ្ញា បានរៀបចំពិធីជួបសំណេះសំណាលជាមួយនិស្សិតកម្ពុជាមុនពេលធ្វើដំណើរត្រឡប់ទៅសិក្សានៅប្រទេសចិនវិញ ក្រោមអធិបតីភាពឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា និងឯកឧត្តម ពិត ចំណាន រដ្ឋលេខាធិការក្រសួងអប់រំ យុវជននិងកីឡា ព្រមទាំងមន្ត្រីស្ថានទូត និងនិស្សិតជាច្រើនរូបទៀត។
និស្សិត និងមន្ត្រីរាជការកម្ពុជាប្រមាណ ៣៥០ នាក់ មកពីទូទាំងប្រទេសនឹងធ្វើដំណើរទៅសិក្សានៅប្រទេសចិននៅចុងខែកញ្ញានេះ ដែលតបតាមការឆ្លើយតបនឹងសំណើរបស់លោកនាយករដ្ឋមន្ត្រី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះឯកឧត្តម ស៊ី ជីន ភីង ប្រធានាធិបតីនៃសាធារណរដ្ឋប្រជាមានិតចិន ដើម្បីអនុញ្ញាតឱ្យនិស្សិតទៅបន្តការសិក្សា ក្រោយបញ្ហាកូវីដ១៩ ហាក់បានធូរស្រាល។
ឯកឧត្តម Wang Wentian មានប្រសាសន៍ថា ៖ «ប៉ុន្មានឆ្នាំមកនេះ សិស្សនិស្សិតកម្ពុជាជាច្រើនដែលបានបញ្ចប់ការសិក្សានៅប្រទេសចិនបានចូលរួមយ៉ាងសកម្មក្នុងកិច្ចការកសាងប្រទេសជាតិ ខិតខំធ្វើជាអ្នកបន្តមរតកនៃចំណងមិត្តភាពរវាងចិននិងកម្ពុជា។ រដ្ឋាភិបាលចិននិងកម្ពុជាតែងយកចិត្តទុកដាក់ខ្ពស់ចំពោះ ការវិលត្រឡប់ទៅកាន់ប្រទេសចិន វិញដើម្បីបន្តការសិក្សា»។
យុវជន ហ៊ុន ប៊ុនរ័ត្ន អាយុ ១៩ ឆ្នាំមកពីខេត្តកំពតបាននិយាយថា គាត់សប្បាយរីករាយណាស់ដែលទទួលបានអាហារូបករណ៍ទៅសិក្សានៅប្រទេសចិន ដែលនឹងទទួលបានការអប់រំស្តង់ដាអន្តរជាតិ ហើយគាត់សិក្សាផ្នែកវេជ្ជសាស្ត្រ រយៈពេល ៦ ឆ្នាំ នៅទីក្រុងប៉េកាំង។
យុវជន ហ៊ុន ប៊ុនរ័ត្ន និយាយថា៖ «ខ្ញុំសូមថ្លែងអំណរគុណចំពោះរដ្ឋាភិបាលកម្ពុជា និងរដ្ឋាភិបាលចិន ក៏ដូចក្រសួងអប់រំ ដែលបានជួយជ្រោមជ្រែង និងជួយសម្រួលដល់ការរៀបចំឯកសារពាក់ព័ន្ធផ្សេងៗ» ។
កញ្ញា ចាន់ ស៊ីវលី អាយុ ១៩ ឆ្នាំ មក ពីរាជធានីភ្នំពេញ បានឱ្យដឹងថា គាត់រីករាយដែលបានទទួលអាហារូបករណ៍ ទៅសិក្សានៅប្រទេសចិន ថ្នាក់បរិញ្ញាបត្រហិរញ្ញវត្ថុ រយៈពេល ៤ ឆ្នាំ។
កញ្ញា ស៊ីវលី ថ្លែងថា៖ «ខ្ញុំសូមអរគុណដល់រដ្ឋាភិបាលចិន រដ្ឋាភិបាលកម្ពុជា ក្រសួងអប់រំ ក្រសួងសុខាភិបាល និងសមាគមនិស្សិតកម្ពុជាប្រចាំសាធារណរដ្ឋប្រជាមានិត-ចិន ដែលពួកគាត់បានជួយសម្របសម្រួលទាំងការធ្វើទិដ្ឋការ ក៏ដូចជាសម្រូលការរៀបចំឯកសារផ្សេងៗ។
ឯកឧត្តម ពិត ចំណាន រដ្ឋលេខាធិការ ក្រសួងអប់រំ យុវជន និងកីឡា បានមានប្រសាសន៍ថា ចាប់តាំងពីប្រទេសទាំង២បានបង្កើតទំនាក់ទំនងការទូតជាផ្លូវការនៅឆ្នាំ ១៩៥៨ មក ទំនាក់ទំនងទ្វេភាគីបានអភិវឌ្ឍជាបន្តបន្ទាប់ បានក្លាយជាដៃគូយុទ្ធសាស្ត្រគ្រប់ជ្រុងជ្រោយ និងជាបងប្អូនដែកថែបដែលមិនអាចបំបែកបាន។
ឯកឧត្តម ពិត ចំណាន មានប្រសាសន៍ថា៖ «ចាប់តាំងពីឆ្នាំ ១៩៩៨ មកដល់ឆ្នាំ ២០២១ មានសិស្ស និស្សិត និងមន្ត្រីរាជការកម្ពុជា ចំនួន ១ ៩១៣ នាក់ ស្រី ៤៩២ នាក់ បានទទួលអាហារូបករណ៍ទៅបន្តការសិក្សារយៈពេលវែង និងរយៈពេលខ្លី» ។
សូមបញ្ជាក់ថា គិតចាប់តាំងពីដើមខែសីហាមក ស្ថានទូតចិនបានជួយសម្រួលដល់សិស្សនិស្សិតកម្ពុជាជាង ៤០០ នាក់ដើម្បីអាចវិលត្រឡប់ទៅកាន់ប្រទេសចិនវិញបន្តការសិក្សា ទទួលបានការកោតសរសើរពីគ្រប់មជ្ឈដ្ឋានក្នុងប្រទេសកម្ពុជា ជាពិសេសសិស្សនិស្សិតកម្ពុជា៕