.jpg)
ផល សោភ័ណ្ឌ បើកឱកាសឱ្យ ឡុង សំណាង ប្រកួតសងសឹក។ សហការី
ភ្នំពេញ៖ អ្នកប្រដាល់ជំនាញប្រើកណ្តាប់ដៃ ផល សោភ័ណ្ឌ របស់ក្លិបតាឡីដំរីមានរិទ្ធ បានបើកឱកាសឱ្យជើងខ្លាំងលំដាប់ឆ្នើមជាអ្នកជំនាន់ក្រោយ ឡុង សំណាង ដែលមានជំនាញក្បាច់ជង្គង់មកពីក្លិបសាលវ័ន្តកីឡា បានឡើងប្រកួតសងសឹកក្នុងកម្មវិធីប្រដាល់ភេសជ្ជៈប៉ូវកម្លាំងវើក នៅលើសង្វៀនបាយ័នស្ទឹងមានជ័យយប់ថ្ងៃសៅរ៍នេះ ក្នុងប្រភេទទម្ងន់ ៦៣,៥ គីឡូក្រាម។
អ្នកប្រដាល់ទាំង ២ នេះ ធ្លាប់ជួបប្រកួតគ្នាម្តង រយៈពេលយូរមកហើយ ដោយកាលនោះ ឡុង សំណាង ចាញ់ ផល សោភ័ណ្ឌ ដោយពិន្ទុ ខណៈអ្នកទាំង ២ នេះ សុទ្ធតែជាកីឡាករជើងខ្លាំងលំដាប់ជួរមុខ ធ្លាប់បានប្រកួតជាមួយកីឡាករបរទេសញឹកញាប់ ហើយក្នុងនោះ សុទ្ធតែជាកីឡាករ ធ្លាប់ឈ្នះបានខ្សែក្រវាត់ យកមកគ្រប់គ្រងរៀងៗខ្លួន។
បន្ថែមលើនេះ ពួកគេ ក៏ធ្លាប់ជាកីឡាករជម្រើសជាតិផងដែរ គឺ ឡុង សំណាង ជាប់ជម្រើសជាតិគុនខ្មែរ បាន ៣ ឆ្នាំ ហើយ ផល សោភ័ណ្ឌ ជាប់ជម្រើសជាតិប្រដាល់សកលបាន ៦ ឆ្នាំ។
សម្រាប់ការជួបគ្នា ជាលើកទី២ នេះ លោក ឡុង សាលវ័ន្ត គ្រូបង្វឹក ឡុង សំណាង បានអះអាងថា ការហ្វឹកហាត់របស់ សំណាង បានគ្រប់គ្រាន់ និងរំពឹងសងសឹកបានឈ្នះវិញ។
លោកនិយាយថា៖ «ឥឡូវ សំណាង ល្អជាងមុន និងត្រៀមបានល្អ ហើយគេទើបតែឈ្នះជើងខ្លាំង ឃីម បូរ៉ា កាលពីសប្តាហ៍មុន។ យុទ្ធសាស្ត្រប្រកួតលើកនេះ យើងមានប្រៀបផ្នែកចាប់ឱបឡើងជង្គង់ ប៉ុន្តែសម្រាប់ឧបសគ្គរបស់យើង ត្រូវការពារ និងគេចពីក្បាច់កណ្តាប់ដៃរបស់ ផល សោភ័ណ្ឌ ទើបបាន។ តែទោះបីជាយ៉ាងណា ខ្ញុំមានទំនុកចិត្តឈ្នះ ៧០ ភាគរយ»។
ចំណែកលោក ម៉ាក់ សាខន គ្រូបង្វឹករបស់ ផល សោភ័ណ្ឌ បាននិយាយថា៖ «គូនេះវាល្អដូចគ្នា ប៉ុន្តែចំណុចខ្សោយរបស់ ឡុង សំណាង អាចចាញ់ប្រៀបផ្នែកកណ្តាប់ដៃវាយចេញលឿន និងធ្ងន់របស់ ផល សោភ័ណ្ឌ កូនសិស្សខ្ញុំ»។
លោកបានបន្ថែមថា៖ «និយាយទៅ កុំថាខ្ញុំអួត តាមខ្ញុំគិត ឡុង សំណាង មិនអាចគេចផុតពីក្បាច់កណ្តាប់ដៃឆ្វេងស្តាំរបស់ ផល សោភ័ណ្ឌ បានទេ ហើយ ផល សោភ័ណ្ឌ ក៏មិនងាយនឹងឱ្យ ឡុង សំណាង ចូលចាប់ឡើងក្បាច់ជង្គង់បានដែរ។ ទោះយ៉ាងណា ការប្រកួតនេះ គឺការចាញ់ឈ្នះលំបាក មិនមែនស៊ីផុយឡើយ តែខ្ញុំមានទំនុកចិត្តលើ ផល សោភ័ណ្ឌ ដោយសង្ឃឹមឈ្នះ ៩០ ភាគរយ»។
ចំណែក ផល សោភ័ណ្ឌ បាននិយាយ ដោយគ្មានភាពមិនអំនួតថា៖ «ខ្ញុំធានាវ៉ៃឱ្យអស់ពីសមត្ថភាព ចំណែករឿងលទ្ធផលលំបាកនិយាយណាស់ គឺវាស៊ីសងទៅលើការប្រកួតជាក់ស្តែងនៅលើសង្វៀន»។
បើតាមគ្រូបង្វឹក ដែលមានបទពិសោធក្នុងការផ្គូផ្គងកីឡាករបាននិយាយថា ជំនួបរវាង ផល សោភ័ណ្ឌ និង ឡុង សំណាង លើកនេះ ទស្សន៍ទាយមិនត្រូវទេ ព្រោះពួកគេមានក្បាច់ និងសមត្ថភាពជំនាញផ្សេងពីគ្នា។
បើ ឡុង សំណាង ចាប់បាន គឺមានប្រៀប ប៉ុន្តែបើវាយកណ្តាប់ដៃវិញ គឺមិនអាចឈ្នះ ផល សោភ័ណ្ឌ ទេ ព្រោះ សោភ័ណ្ឌ រហ័ស និងធ្ងន់ ដែលធ្លាប់ជាប់ជម្រើសជាតិកន្លងមកច្រើនឆ្នាំមកហើយ៕
