ភ្នំពេញ៖ អតីតកីឡាការិនីហែលទឹកជម្រើសជាតិកម្ពុជា ហែម ថុនវិទីនី ត្រូវបានគណៈកម្មាធិការជាតិប៉ារ៉ាឡាំពិកកម្ពុជា ឬកីឡាជនពិការកម្ពុជា សម្រេចផ្តល់ឱ្យជាប់ជាគ្រូជម្រើសជាតិក្នុងឆ្នាំ ២០២១ ហើយតួនាទីដ៏មានសារសំខាន់នេះ វាស័ក្តិសមទៅនឹងចំណេះ និងជំនាញរបស់ វិទីនី ដែលមានបទពិសោធជាមួយក្រុមជម្រើសជាតិចំនួន ១៥ ឆ្នាំ និងក្រោយមកទៀត បានក្លាយជាមន្ត្រីរបស់សហព័ន្ធខ្មែរកីឡាហែលទឹក តាំងពីឆ្នាំ ២០១៨។
នៅក្នុងរយៈពេលដែល ហែម ថុនវិទីនី បានឈប់សម្រាកពីក្រុមជម្រើសជាតិកីឡាហែលទឹកកម្ពុជា រួចមក កញ្ញា តែងតែស្ម័គ្រចិត្ត ចូលរួមធ្វើជាគ្រូបង្វឹកឱ្យវិស័យឯកជន និងអង្គការកីឡាជនពិការ នៅក្រៅម៉ោងការងារ ជាប្រចាំ រហូតទទួលបានជាគ្រូបង្វឹក នៅឆ្នាំ ២០២១ នេះ។
លោក ម៉ៅ សុខជា នាយករដ្ឋបាល នៃអង្គការជនពិការ បានប្រាប់ថា៖ «អតីតកីឡាការិនីហែលទឹកជម្រើសជាតិ ហែម ថុនវិទីនី ត្រូវបានគណៈកម្មាធិការជាតិប៉ារ៉ាឡាំពិកកម្ពុជា ដែលមានឯកឧត្តម យី វាសនា ជាអគ្គលេខាធិការ បានសម្រេចផ្តល់ជូននូវតួនាទី ជាគ្រូបង្វឹកក្រុមជម្រើសជាតិ សម្រាប់ឆ្នាំ ២០២១ នេះ ដើម្បីបង្វឹកដល់អត្តពលិកជនពិការកម្ពុជា ដែលត្រៀមទៅចូលរួមការប្រកួតអាស៊ានប៉ារ៉ាហ្គេម នៅប្រទេសវៀតណាម ចុងឆ្នាំ ២០២១ នេះ»។
លោក ម៉ៅ សុខជា បានបន្ថែមថា៖ «សមត្ថភាពរបស់អតីតកីឡាការិនី ហែម ថុនវិទីនី គឺមិនត្រឹមតែមានទេព្យកោសល្យល្អ ក្នុងការបង្វឹកប៉ុណ្ណោះទេ ប៉ុន្តែកញ្ញា ថែមទាំងមានចំណេះដឹងទូទៅ ទាក់ទងទៅនឹងការងាររៀបចំខ្លួនរបស់កីឡាករ កីឡាការិនី ក្នុងការត្រៀម ទៅចូលរួមការព្រឹត្តិការណ៍ប្រកួតថ្នាក់ជាតិ និងអន្តរជាតិ នានា ផងដែរ»។
ហែម ថុនវិទីនី ជាចៅបង្កើតរបស់លោកព្រឹទ្ធាចារ្យ ហែម ថុន ដែលជាកូនទោល កំព្រាឪពុក និងមានម្តាយពិការ ផងដែរ ប៉ុន្តែដោយមានការយកចិត្តទុកដាក់ពីលោកតា ហែម ថុន គឺបានជំរុញឱ្យក្មេងស្រីដ៏ស្រស់សោភាម្នាក់នេះ មានការហ្វឹកហាត់តាំងពីកុមារភាព និងបានជាប់ជាកីឡាការិនីហែលទឹកជម្រើសជាតិ តាំងពីឆ្នាំ ២០០៣ ដល់ឆ្នាំ២០១៨ និងមានបទពិសោធចូលរួមប្រកួតព្រឹត្តិការណ៍អន្តរជាតិធំៗជាច្រើន ហើយការប្រកួតកីឡាអូឡាំពិក នៅប្រទេសប្រេស៊ីល ឆ្នាំ ២០១៦ ជាការចូលរួមចុងក្រោយរបស់ វិទីនី មុនពេលកញ្ញា ចូលនិវត្តន៍។
ហែម ថុនវិទីនី ដែលកំពុងចាប់យកជំនាញជាពិធីការិនីកីឡាទៀតនោះ បាននិយាយថា៖ «សម្រាប់ការប្រកួតជើងឯកជាតិប្រចាំឆ្នាំ ក្នុងប្រទេស ឬព្រឹត្តិការណ៍ប្រកួតផ្សេងៗ នៅក្នុងស្រុក ខ្ញុំតែងដណ្តើមបានចំណាត់ថ្នាក់លេខ ១ សឹងគ្រប់កម្មវិធី។ ចំណែកលទ្ធផលការប្រកួតនៅលើឆាកអន្តរជាតិ វិញ ពិតជាលំបាកស្វែងរកណាស់ ពោលគឺលទ្ធផល មិនបានល្អទេ ព្រោះកីឡាប្រភេទនេះ នៅអន្តរជាតិ គេល្អជាងយើងដាច់តែម្តង»។
នៅក្នុងទស្សនៈជាគ្រូបង្វឹក ហែម ថុនវិទីនី បានអះអាងថា៖ «ជំនាន់ខ្ញុំ មិនទាន់អាចដណ្តើមបានជយលាភីល្អ លំដាប់អន្តរជាតិធំៗ ជូនជាតិមាតុភូមិនៅឡើយ ប៉ុន្តែដោយខ្ញុំបានជាប់ជាគ្រូបង្វឹក ខ្ញុំមានទឹកចិត្ត ព្រមទាំងមានគោលបំណង ចង់បង្វឹកអត្តពលិកជំនាន់ក្រោយ ទោះជាកីឡាករជនពិការ ឬអត្តពលិកធម្មតា ឱ្យដណ្តើមបានលទ្ធផលល្អ ជាងជំនាន់ខ្ញុំ កាលនៅជាអត្តពលិក»។
គ្រូបង្វឹកវ័យក្មេង ដែលមានឈាមជ័រ ជាអ្នកហែលទឹក ហែម ថុនវិទីនី បានបន្ថែមថា៖ «ខ្ញុំទទួលបានការលើកទឹកចិត្តពីឯកឧត្តម យី វាសនា អគ្គលេខាធិការកីឡាជនពិការ ឱ្យធ្វើជាគ្រូបង្វឹកក្រុមជម្រើសជាតិកីឡាហែលទឹកជនពិការ ឆ្នាំ ២០២១ នេះ ហើយឯកឧត្តមទេសរដ្ឋមន្ត្រីក្រសួងសាធារណការ និងដឹកជញ្ជូន ស៊ុន ចាន់ថុល ដែលជាប្រធានសហព័ន្ធខ្មែរកីឡាហែលទឹក ក៏បានឯកភាព និងជំរុញលើកទឹកចិត្តដល់ខ្ញុំ ផងដែរ»៕