The Phnom Penh Post Search

Search form

Logo of Phnom Penh Post newspaper Phnom Penh Post - វៀត ប៊ុនឌឿន និង អេលីត មករា សុទ្ធ​តែ​មិន​អស់​ចិត្ត ខណៈ​ ឯម​ ដារ៉ូ ​ឈ្នះ​បាន​ប្រាក់​លាន​




វៀត ប៊ុនឌឿន និង អេលីត មករា សុទ្ធ​តែ​មិន​អស់​ចិត្ត ខណៈ​ ឯម​ ដារ៉ូ ​ឈ្នះ​បាន​ប្រាក់​លាន​

Content image - Phnom Penh Post
ម៉ន សាម៉េត បាន​ព្យាយាម​បិទការ​ទាត់របស់ វៀត ប៊ុនឌឿន ក្នុងការ​ប្រកួត​ពី​ថ្ងៃអាទិត្យ។ សហ​ការី

វៀត ប៊ុនឌឿន និង អេលីត មករា សុទ្ធ​តែ​មិន​អស់​ចិត្ត ខណៈ​ ឯម​ ដារ៉ូ ​ឈ្នះ​បាន​ប្រាក់​លាន​

ភ្នំពេញ៖ ​កីឡាករ វៀត ប៊ុនឌឿន នៅ​តែ​មិន​អស់​​ចិត្ត និង​ចង់​សុំ​ឡើង​ប្រកួត​សងសឹក​ជាមួយ​​អ្នក​ប្រដាល់​ជើង​ចាស់ ម៉ន សាម៉ត ជា​ថ្មី​ម្តង​ទៀត ខណៈ​ការ​ជួប​គ្នា​ជា​លើក​ទី​៦ រូប​គេ​នៅ​តែ​មិន​អាច​រក​ឃើញ​ការ​ឈ្នះ​លើ សាម៉េត បាន​នោះ គឺ​អ្នក​ទាំង​ ២ នេះ បាន​ត្រឹម​ស្មើ​ពិន្ទុ​គ្នា តាម​ច្បាប់​របស់ Mas Fight របស់​សង្វៀន​ថោន គឺ​បើ​គ្មាន​អ្នក​សន្លប់ ក្រោយ​ប្រកួត​ ៩ នាទី​ពេញ ត្រូវ​កំណត់​ឱ្យ​ស្មើ​គ្នា។

យ៉ាង​ណា​ក៏​ដោយ នៅ​ក្រោយ​ការ​​ប្រកាស​លទ្ធផល​ក្នុង​ការ​ប្រកួត​យ៉ាង​ស្វិតស្វាញ កាល​ពី​ថ្ងៃ​អាទិត្យ​នោះ ​វៀត ​ប៊ុនឌឿន​ នៅ​តែ​​ប្រតិកម្ម​ចំពោះ​លទ្ធផល​របស់​ខ្លួន ​ដែល​មិន​ទាន់​ស្គាល់​ឈ្នះ​បាន​ម្តង​សោះ ​​ព្រោះ​នៅ​ក្នុង​ជំនួប​ ៦ ​លើក​ ជាមួយ ម៉ន សាម៉ត គេ​បាន​ចាញ់​ ៥​ និង​​ស្មើ​ ១ ​ដង លើក​នេះ ហេតុ​នេះ ប៊ុនឌឿន នៅ​តែ​មិន​អស់​ចិត្ត ចំពោះ​លទ្ធផល​ស្មើ​នេះ ដោយ​រូប​គេ​បាន​ស្នើសុំ​សងសឹក​ ម៉ន ​សាម៉េត ជាថ្មី​ម្តង​ទៀត ខណៈ​ការ​ជួប​គ្នា​លើក​នេះ ក៏​កើត​ចេញ​ពី​ការ​ស្នើសុំ​របស់ វៀត ប៊ុនឌឿន ផង​ដែរ ក្រោយ​ពេល​រូប​គេ​ឡាំប៉ា មិន​សុខ​ចិត្ត​ចំពោះ​ការ​សម្រេច​ឱ្យ​ចាញ់ ម៉ន សាម៉េត នៅ​សង្វៀន​បាយ័ន​នោះ។​

វៀត​ ប៊ុនឌឿន​ បាន​​ប្រាប់​​ក្រោយ​ការ​​ប្រកួត​ថា​៖ «​ខ្ញុំ​នៅ​តែ​ចង់​សងសឹក​ជាមួយ ​ម៉ន ​សាម៉េត​ លើក​ក្រោយ​ទៀត​ ​ព្រោះ​ខ្ញុំ​ចាញ់​នៅ​តែ​មិន​អស់​ចិត្ត​ទេ​»។​ ​ប៊ុន​ឌឿន បន្ថែម​ថា៖ ​«​អ្នក​គាំទ្រ​ខ្ញុំ​ភាគ​ច្រើន ​​នៅ​តែ​​មិន​អស់​ចិត្ត​ទេ ហើយ​ពួក​គាត់​បាន​​លើក​ទឹក​ចិត្ត​ខ្ញុំ​ឱ្យ​​សុំ​សងសឹក ជាមួយ ម៉ន សាម៉េត ម្តង​​ទៀត»​។​

ចំណែក ​ម៉ន ​សាម៉េត​ បាន​និយាយ​ថា​៖ «វៀត​ ប៊ុនឌឿន ​ធ្លាប់​ប្រកួត​ចាញ់​ខ្ញុំ​ចំនួន​ ៥ ​លើក តែ​គាត់​មិន​ព្រម​អស់​ចិត្ត​ ​ព្រោះ​សមត្ថភាព​វា​ប្រហាក់​ប្រហែល​គ្នា​។ ​ខ្ញុំ​នៅ​តែ​ផ្តល់​ឱកាស​ឱ្យ​គាត់​មក​សងសឹក​ គឺ​មិន​ញញើត​ទេ ​ប៉ុន្តែ​ខ្ញុំ​មាន​លក្ខខណ្ឌ​មួយ​ គឺ​​ត្រូវ​​សម្រក​ទម្ងន់​ឱ្យ​​ស្មើ​គ្នា​មក ​កុំ​ឱ្យ​​លើស​ទម្ងន់​គ្នា ​ហើយ​បើ​ធ្វើ​បាន ខ្ញុំ​ធានា​វ៉ៃ​ជូន​តាម​សំណើ»​។​

ម៉ន ​សាម៉េត ​បាន​ចំអក​ទៅ​ឱ្យ​​អ្នក​គាំទ្រ​របស់ ​ប៊ុនឌឿន​ ថា​៖ «​ប៊ុនឌឿន​ មិន​សូវ​ប៉ុន្មាន​ទេ​ ប៉ុន្តែ​អ្នក​គាំទ្រ​គាត់​មួយ​ចំនួន​និយាយ​មិន​សមរម្យ ​គឺ​ពេល​ចាញ់​ក៏​ជេរ ​ពេល​ស្មើ​ ក៏​ជេរ​ តែ​ខ្ញុំ​ជា​អ្នក​ប្រកួត​​មិន​មែន​ខ្ញុំ​ដាក់​​ពិន្ទុ​ខ្លួន​ឯង​ទេ​​! គាត់​មាន​ជំនាញ​កែង ​និង​ទាត់​ល្អ​ អាច​ធ្វើ​ឱ្យ​​គេ​​ចុះ​ចាញ់​ និង​សន្លប់​បាន​សម្រាប់​តែ​​អ្នក​​ទន់ជ្រាយ​ប៉ុណ្ណោះ​ ​ប៉ុន្តែ​សម្រាប់​ខ្ញុំ​គឺ ​បើ​ធ្វើ​ទម្ងន់​ស្មើ​គ្នា​វិញ ​វ៉ៃ​ប៉ុន្មាន​ដង​ទៀត​ ក៏​មិន​អាច​ឈ្នះ​ខ្ញុំ​បាន​ដែរ​»​។​

ដោយ​ឡែក សម្រាប់​ការ​ប្រកួត​ដណ្តើម​ប្រាក់​លាន កាល​ពី​ថ្ងៃ​អាទិត្យ នោះ​ដែរ​កីឡាករ ​អេលីត ​មករា ​ដែល​​រំពឹង​​ឈ្នះ​ដៃ​គូ​​នោះ​ បាន​ត្រឹម​​លេខ ​២ ​ដោយសារ​ជ័យជម្នះ​បាន​ទៅ​លើ​ជើង​ថ្មី​ខ្ចី​វស្សា​ជាង​គេ ​​ឯម ​ដារ៉ូ ​​ដោយ​ការ​សម្រេច​ឱ្យ​ឈ្នះ​មិន​ឯកច្ឆន្ទ ៣​-២​ ខណៈ​​​ជើង​ខ្លាំង​ថ្មី​ ស៊ឹម ​ប៊ុន​ និង​ជើង​ចាស់ ​ផាន ​រះ បាន​​ដោយ​សន្លប់​ក្នុង​​ទឹក​ ២​ ​​វគ្គ​ជម្រុះ​ដូច​គ្នា​។

តែ​ទោះ​យ៉ាង​ណា អេលីត​ មករា ហាក់​មិន​ពេញ​ចិត្ត​ជាមួយការ​សម្រេច​នេះ​ទេ ដោយ​រូប​គេ​បាន​​និយាយ​ក្រោយ​ប្រកួត​ថា៖ ​«​​ខ្ញុំ​ចាញ់​មិន​អស់​ចិត្ត​ ​ព្រោះ​ពិន្ទុ​នេះ​ គឺ​ប្រ​ហាក់​ប្រហែល​គ្នា​ ប៉ុន្តែ​ចៅ​ក្រម​បាន​ផ្តល់​ឱ្យ​អ៊ីចឹង តែ​​ខ្ញុំ​មិន​តវ៉ា​អ្វី​ទេ​។​ ​មុន​ប្រកាស​លទ្ធផល ​ខ្ញុំ​មាន​ជំនឿ​ចិត្ត​ឈ្នះ​ ប៉ុន្តែ​ពេល​ប្រកាស​​ខ្ញុំ​ខក​ចិត្ត»​។​

ចំណែក​​កីឡាករ ឯម ​ដារ៉ូ​ និយាយ​ថា​៖​ «ខ្ញុំ​សប្បាយ​ចិត្ត​ខ្លាំង​ណាស់ ព្រោះ​មុន​ប្រកាស​លទ្ធផល​ ខ្ញុំ​នៅ​មិន​ទាន់​ប្រាកដ​ថា ​ឈ្នះ​នៅ​ឡើយ​ ដ្បិត​អី​ការ​ប្រកួត​វ៉ៃ​ទៅ​វ៉ៃ​មក ​ដូច​ជា​ប្រហាក់ប្រហែល​គ្នា​។ ​ខ្ញុំ​ប៉ះ​គាត់​ជា​លើក​ទី​១ ​បាន​ឈ្នះ​ ចំណែក​ ផាន ​រះ​ និង​ ស៊ឹម​ ប៊ុន ខ្ញុំ​ធ្លាប់​ឈ្នះ​អស់​ហើយ»​៕

អត្ថបទគួរចាប់អារម្មណ៍