.jpg)
ការប្រកួតវាយកូនឃ្លីលើតុរវាងកីឡាករកម្ពុជា និងកីឡាករវៀតណាម នៅស៊ីហ្គេម ឆ្នាំ ២០១៧។ រូប ភ្នំពេញ ប៉ុស្តិ៍
ភ្នំពេញ៖ ប្រទេសវៀតណាម ដែលត្រូវធ្វើជាម្ចាស់ផ្ទះ ការប្រកួតស៊ីហ្គេមលើកទី៣១ ឆ្នាំ ២០២១ នេះ បានផ្ញើលិខិតផ្លូវការទៅកាន់គណៈកម្មាធិការជាតិអូឡាំពិក របស់ប្រទេសទាំងអស់នៅក្នុងតំបន់អាស៊ាន ដើម្បីប្រាប់ពីបំណងរបស់ខ្លួនដែលចង់ពន្យារពេល ឬលើកពេលការប្រកួតនេះ ទៅធ្វើនៅឆ្នាំ ២០២២ វិញ។ នេះបើតាមមន្រ្តីជំនាញរបស់ NOCC បានប្រាប់កាលពីថ្ងៃអង្គារ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានប្រាប់ថា៖ «លោក Nguyen Ngoc Thien រដ្ឋមន្ត្រីក្រសួងវប្បធម៌កីឡា និងទេសចរណ៍ប្រទេសវៀតណាម បានប្រកាសមិនដកថយនៃការរៀបចំ ប៉ុន្តែបានផ្ញើលិខិតជាផ្លូវការទៅបណ្ដាប្រទេសសមាជិកនៅអាស៊ានស្ដីពីការត្រៀមពន្យារពេលការប្រកួតកីឡាស៊ីហ្គេមលើកទី៣១ នៅក្នុងរដ្ឋធានីហាណូយ ចុងឆ្នាំ ២០២១ ទៅធ្វើនៅពេលក្រោយតាមលទ្ធភាពជាក់ស្តែងនៅពេលស្ថានភាពជំងឺកូវីដ ១៩ បានធូរស្រាល»។
គួររំឭកថា កាលពីចុងខែឧសភា ឆ្នាំ ២០២១ ម្ចាស់ផ្ទះវៀតណាមបានបញ្ជាក់ពីជំហររបស់ខ្លួន និងប្តេជ្ញាចិត្តខ្ពស់ថា នឹងព្យាយាមរៀបចំការប្រកួតស៊ីហ្គេមលើកទី៣១ ឆ្នាំ ២០២១ ទៅតាមកាលបរិច្ឆេទ ដែលគ្រោងធ្វើឡើងពីថ្ងៃទី ២១ ខែវិច្ឆិកា ដល់ថ្ងៃទី ២ ខែ ធ្នូ ឆ្នាំ ២០២១ ប៉ុន្តែពេលនេះ អ្វីៗអាចនឹងប្រែប្រួល។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ ផងនោះ បានបន្ថែមថា៖ «គណៈកម្មាធិការជាតិអូឡាំពិកវៀតណាមបានបង្ហាញពីការប្ដេជ្ញាចិត្តថា នឹងរៀបចំការប្រកួតកីឡាស៊ីហ្គេមលើកទី៣១ នៅទីក្រុងហាណូយ ឱ្យបានដាច់ខាត ប៉ុន្តែពេលនេះអ្វីៗ ទំនងត្រូវផ្លាស់ប្ដូរ និងពន្យារពេលដោយបញ្ហាកូវីដ ១៩ ឆ្លងផ្ទុះឡើងយ៉ាងគំហុក»។
យ៉ាងណាក៏ដោយ ប្រធានបទនៃការសុំពន្យារពេលប្រកួតកីឡាស៊ីហ្គេម ឆ្នាំ ២០២១ នេះ នឹងត្រូវលើកយកមកពិភាក្សានៅថ្ងៃពុធនេះ។ លោក វ៉ាត់ ចំរើន បានបញ្ជាក់ថា៖ «គណៈកម្មាធិការអូឡាំពិកវៀតណាម មានបំណងចង់ពន្យារពេលការប្រកួតស៊ីហ្គេម ឆ្នាំ ២០២៣ នេះ រហូតដល់ខែកក្កដា ឆ្នាំ ២០២២ ប៉ុន្តែត្រូវដាក់បញ្ហានេះ ទៅក្នុងអង្គប្រជុំគណៈអចិន្ត្រៃយ៍សហព័ន្ធកីឡាអាស៊ីអាគ្នេយ៍ ដើម្បីសួរយោបល់សិន មុននឹងសម្រេច ហើយការប្រជុំបន្ទាន់នេះនឹងត្រូវធ្វើឡើងនៅរសៀលម៉ោង ១ ថ្ងៃពុធនេះ តាមប្រព័ន្ធ Zoom»។
គួរបញ្ជាក់ថា តាមគម្រោងចាស់ ការប្រកួតស៊ីហ្គេមលើកទី៣១ ចុងឆ្នាំ ២០២១ នេះ នឹងត្រូវធ្វើនៅពហុកីឡដ្ឋាន MY DINH National Stadium ដោយចាប់ផ្តើមពីថ្ងៃទី ២១ ខែវិច្ឆិកា និងបិទការប្រកួតនៅថ្ងៃទី ២ ខែ ធ្នូ ឆ្នាំ ២០២១ ហើយព្រឹត្តិការណ៍នេះម្ចាស់ផ្ទះវៀតណាមបានដាក់ប្រភេទកីឡាចំនួន ៤០ សរុបមាន ៥២៦ វិញ្ញាសា ដើម្បីឱ្យប្រតិភូកីឡាទាំង ១១ ប្រទេស នៅក្នុងតំបន់អាស៊ីអាគ្នេយ៍ធ្វើការប្រកួតប្រជែងគ្នា។
ជាមួយគ្នានេះ កម្ពុជាគ្រោងបញ្ជូនប្រភេទកីឡារហូតដល់ ៣២ ដើម្បីទៅចូលរួមប្រកួតនៅស៊ីហ្គេមលើកទី៣១ នេះ ហើយប្រភេទកីឡាទាំង ៣២ រួមមានកីឡាប៉េតង់ តេក្វាន់ដូ (WT) ប្រដាល់គុនខ្មែរ (Muay) ជឺជិតស៊ូ កីឡាចំបាប់ វ៉ូវីណាម ប្រដាល់សកល ប្រដាល់ឃីកប៊ុកស៊ីង កាយវប្បកម្ម វាយកូនបាល់ អត្តពលកម្ម ហែលទឹក កីឡា Finswimming បាល់ទាត់ (លេង ១១ នាក់ និងហ្វុតសាល) បាល់ទះ បាល់បោះ ទូកកានូ-កាយ៉ាក វ៉ូស៊ូ ទោចក្រយាន កីឡារាំ គុនដាវ វាយកូនគោល កាយសម្ព័ន្ធ យូដូ ការ៉ាតេ សីប៉ាក់តាក្រ កីឡាលើកទម្ងន់ បាញ់កាំភ្លើង វាយកូនឃ្លីលើតុ ទ្រីយ៉ាត្លុង កីឡាអេឡិចត្រូនិក និងប្រភេទកីឡាអុកចត្រង្គ៕
