.jpg)
ពហុកីឡដ្ឋានជាតិអូឡាំពិក នឹងត្រូវប្រគល់ឱ្យទៅក្រសួងសុខាភិបាល ដើម្បីរៀបចំជាកន្លែងព្យាបាលជំងឺកូវីដ ១៩។ ហុង មិនា
ភ្នំពេញ៖ ចំណាត់ការថ្មីរបស់រាជរដ្ឋាភិបាលកម្ពុជា បានតម្រូវឱ្យគ្រប់សហព័ន្ធកីឡាជាតិ រួមទាំងការិយាល័យ នាយកដ្ឋាន អគ្គនាយកដ្ឋាន មជ្ឈមណ្ឌលជាតិហ្វឹកហ្វឺនកីឡា និងទីតាំងអង្គភាពកីឡាក្រសួងមហាផ្ទៃ ដែលមានមូលដ្ឋាននៅក្នុងពហុកីឡដ្ឋានជាតិអូឡាំពិកកម្ពុជា ត្រូវបានអនុញ្ញាតឱ្យរើចេញទាំងអស់ ដើម្បីរើទៅស្តាតថ្មី ឬពហុកីឡដ្ឋានជាតិមរតកតេជោនៅឯសង្កាត់ព្រែកតាសេក ខណ្ឌឫស្សីកែវ រាជធានីភ្នំពេញ។
ចំណាត់ការនេះ ត្រូវបានអនុវត្តឱ្យអស់ក្នុងសប្តាហ៍នេះ ដើម្បីរៀបចំដាក់គ្រែសម្រាប់ព្យាបាលអ្នកមានផ្ទុកជំងឺកូវីដ ១៩ ខណៈដែលក្រសួងអប់រំ យុវជន និងកីឡា បានផ្តល់ពហុកីឡដ្ឋានជាតិនេះ ជូនទៅក្រសួងសុខាភិបាល។ កាលពីមុនផ្ទុះជំងឺកូវីដ ១៩ នៃព្រឹត្តិការណ៍ ២០ កុម្ភៈ គឺមានសហព័ន្ធកីឡាជាតិមួយចំនួនអាចនៅប្រើប្រាស់បានជាមួយការិយាល័យ និងនាយកដ្ឋានខ្លះ ប៉ុន្តែលើកនេះ ប្រកាសឱ្យគ្រប់ស្ថាប័ន និងភាគីពាក់ព័ន្ធក្នុងសកម្មភាពកីឡា នៅក្នុងពហុកីឡដ្ឋានជាតិទាំងមូល ត្រូវរើចេញទៅស្តាតថ្មីទាំងអស់។
លោក ហ៊ុន សាមុត ប្រធាននាយកដ្ឋានអប់រំកាយ និងកិឡា ដែលជាអង្គភាពគ្រប់គ្រងពហុកីឡដ្ឋានជាតិបានប្រាប់ថា៖ «កាលពីលើកមុន នៅក្នុងពហុកីឡដ្ឋានជាតិនេះ ត្រូវបានក្រសួងសុខាភិបាលយកសម្រាប់ប្រើប្រាស់ ដើម្បីព្យាបាលអ្នកផ្ទុកជំងឺកូវីដ ១៩ មិនទាំងស្រុងទេ គឺនៅមានការិយាល័យ, នាយកដ្ឋាន និងទីតាំងសហព័ន្ធកីឡាជាតិខ្លះ នៅធ្វើសកម្មភាពបាន»។
លោកបានបន្ថែមថា៖ «ប៉ុន្តែពេលនេះ ជាចំណាត់ការថ្នាក់លើ ដែលបានសម្រេចឱ្យស្ថាប័នកីឡា ដែលធ្លាប់មានទីតាំងនៅក្នុងពហុកីឡដ្ឋានជាតិទាំងអស់ ត្រូវបានអនុញ្ញាតឱ្យចេញទាំងអស់ ដោយប្រគល់បរិវេណពហុកីឡដ្ឋានជាតិទាំងមូល ជូនទៅក្រសួងសុខាភិបាលគ្រប់គ្រង ដែលនេះជាគោលនយោបាយថ្នាក់លើ។ តែទោះបីយ៉ាងណា ខ្ញុំក៏នៅអាចស្នើសុំ ដើម្បីអនុញ្ញាតមានការិយាល័យមួយ ដើម្បីសម្រាប់មើលថែទាំស្តាតដែរ»។
ចំណែកលោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានប្រាប់ថា៖ «ទីតាំងបរិវេណហែលទឹក និងស្នាក់ការរបស់សហព័ន្ធ ត្រូវបានឱ្យរើចេញទៅស្តាតថ្មីមរតកតេជោទាំងអស់ គឺគ្មានប្រភេទកីឡាណា អាចបន្តសកម្មភាពនៅក្នុងស្តាតអូឡាំពិកនេះទៀតទេ សូម្បីតែមជ្ឈមណ្ឌលជាតិហ្វឹកហ្វឺនកីឡា និងអគារអង្គភាពកីឡាក្រសួងមហាផ្ទៃក៏ត្រូវតែចេញទាំងអស់ដែរ»។
ប្រភពពីមន្ត្រីសហព័ន្ធកីឡាជាតិមួយចំនួនបានប្រាប់ដោយសុំមិនឱ្យបញ្ចេញឈ្មោះថា ការឱ្យចេញគ្រប់សហព័ន្ធកីឡាជាតិទាំងអស់អ៊ីចឹងក៏ល្អម៉្យាងដែរ ព្រោះកន្លងមកនៅក្នុងពហុកីឡដ្ឋានជាតិនេះ ការប្រើប្រាស់កន្លែងខ្លះ មិនចំប្រយោជន៍កីឡានោះទេ។ កន្លែងខ្លះយកលេសធ្វើសកម្មភាពកីឡា ប៉ុន្តែបែរជាយកកន្លែងនោះ សម្រាប់លក់ដូរ ឬធ្វើអាជីវកម្មយកលុយដាក់ហោប៉ៅរៀងៗខ្លួនមានទាំងប្រពន្ធកូន និងចៅ មករស់នៅប្រើប្រាស់ទឹកភ្លើងយ៉ាងខ្ជះខ្ជាយ ហើយក្រសួងជាអ្នកចេញលុយទាំងអស់។
ប្រភពដដែលបញ្ជាក់ថា៖ «នៅក្នុងសម័យកូវីដ ១៩ នាអំឡុងពាក់កណ្តាលឆ្នាំ ២០២០ ដែលសកម្មភាពកីឡាសឹងតែគ្មានសោះនោះ ប៉ុន្តែទំហំប្រើប្រាស់ទឹកភ្លើង ឡើងដល់កំពូល ខណៈដែលម៉ាស៊ីនត្រជាក់កន្លែងខ្លះបើក ២៤ ម៉ោង ដូចជាគ្មានអាសូរលុយរដ្ឋអីបន្តិចសោះ»៕
