.jpg)
ទូច ដេវីដ ត្រូវប្រកួតជាមួយ ម៉ន សាម៉េត នៅថ្ងៃសៅរ៍។ សហការី
ភ្នំពេញ៖ កីឡាករជើងចាស់ ម៉ន សាម៉េត ដែលបានសាងកំណត់ត្រាយ៉ាងល្អនៅក្នុងការប្រកួតកំពូលអ្នកប្រដាល់គុនខ្មែរ ដណ្តើមប្រាក់រង្វាន់ជើងឯកលេខ ១ ក្នុងប្រភេទទម្ងន់ ៦០ គីឡូក្រាម នៅលើសង្វៀនហង្សមាសនោះ មិនហ៊ានមើលស្រាលទម្ងន់ដៃរបស់ ទូច ដេវីដ នោះទេ ខណៈអ្នកទាំង ២ ត្រូវឡើងមកជួបគ្នា នៅវគ្គ ៨ នាក់ចុងក្រោយ នៅព្រលប់ថ្ងៃសៅរ៍ ខណៈជើងខ្លាំងវ័យក្មេង អេ អាំម៉ារីនភូថង អាចនឹងឆ្លងផុតវគ្គនេះ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។
តាមរយៈការបង្ហាញខ្លួននៅលើសង្វៀនថ្មីរបស់ស្ថានីយទូរទស្សន៍ហង្សមាសនេះ ម៉ន សាម៉េត នៅមិនទាន់បានស្គាល់ការចាញ់ម្តងណាឡើយ តាំងពីការប្រកួតជម្រុះជុំដំបូង ៣២ នាក់ មកដល់វគ្គ ៨ នាក់ចុងក្រោយនេះ ប៉ុន្តែ សាម៉េត ហាក់មានការបារម្ភសម្រាប់ការជួប ទូច ដេវីដ នៅវគ្គនេះ។
ម៉ន សាម៉េត បាននិយាយថា៖ «ការប៉ះ ទូច ដេវីដ លើកនេះ ខ្ញុំក៏មានការព្រួយបារម្ភខ្លាំងដែរ ព្រោះខ្ញុំទើបប្រកួតជាមួយ វៀត ប៊ុនឌឿន កាលពីសប្តាហ៍មុន គឺមិនទាន់បាត់ឈឺខ្លួននៅឡើយទេ ហើយម៉្យាងទៀត ទូច ដេវីដ ជាអ្នកជំនាញវាយកណ្តាប់ដៃធ្ងន់ គឺបើបិទមិនជាប់អាចភ្លាត់ស្នៀត ចាញ់ក៏ថាបាន ហេតុនេះជំនួបនេះ ខ្ញុំរំពឹងឈ្នះត្រឹម ៦០ ភាគរយសិនបានហើយ»។
ចំណែកកីឡាករ ទូច ដេវីដ មិនអាចទំនាក់ទំនងបានទេ ប៉ុន្តែលោក អាត់ សំរិទ្ធ ជាគ្រូបង្វឹកបាននិយាយថា៖ «ទូច ដេវីដ ពិតជាលំបាកឈ្នះ ម៉ន សាម៉េត មែន ប៉ុន្តែវាស៊ីសងជាក់ស្តែង ពីព្រោះបើក្បាច់កណ្តាប់ដៃវាយ ចូលគោលដៅបានល្អវិញ ស៊ីផុយដូចគ្នា។ ទោះយ៉ាងណា ម៉ន សាម៉េត គេជើងចាស់មានបទពិសោធល្អ និងអាចវាយចេញបានគ្រប់ស្នៀត ដូច្នេះកូនសិស្សខ្ញុំមិនរំពឹងឈ្នះច្រើនទេ គឺនិយាយឱ្យស្មោះ សង្ឃឹមត្រឹម ៥០ ភាគរយ មិនចង់ហ៊ាននិយាយផង»។
សម្រាប់ការប្រកួតនៅថ្ងៃសៅរ៍នោះដែរ កីឡាករ ភួង ពិសិដ្ឋ ដែលទើបប្រកួតចាញ់ ថា សារុន ក្នុងការប្រកួតតាមពូលវគ្គ ១៦ នាក់ចុងក្រោយ កាលពីសប្តាហ៍មុននោះ នឹងត្រូវប្រឈមជាមួយជើងខ្លាំង អេ អាំម៉ារីនភូថង ហើយជំនួបនេះ ត្រូវបានគេមើលឃើញថា អេ អាំម៉ារីនភូថង អាចនឹងឈ្នះ ព្រោះជើងខ្លាំងវ័យក្មេងរូបនេះ មិនទាន់ស្គាល់ការចាញ់នៅឡើយទេ ហើយកាលពីសប្តាហ៍មុន គេបានឈ្នះ ទូច ដេវីដ។
ចំណែក បាង កាយ៉ាក ត្រូវជួប ថា សារុន ហើយ លាភ រដ្ឋា ត្រូវជួបជាមួយ លាភ សំណាង ហើយការវិលមកជួបគ្នាលើកនេះ លាភ រដ្ឋា ដែលបានចាញ់តែ ម៉ន សាម៉េត ម្នាក់នៅក្នុងការប្រកួតតាមវគ្គជម្រុះកន្លងមកនោះ ក៏មានការបារម្ភទៅនឹងសមត្ថភាពរបស់ លាភ សំណាង ផងដែរ៕
