.jpg)
ប្រធានសហព័ន្ធថ្មី លោក អ៊ូ រតនា (ពាក់វ៉ែនតាខាងស្តាំ) បានបង្ហាញអាវយឺត NT Sport រួមគ្នា ជាមួយដៃគូឧបត្ថម្ភ នៅក្នុងមហាសន្និបាត។ រូបថត សហការី
ភ្នំពេញ៖ អង្គមហាសន្និបាតរបស់សហព័ន្ធកីឡាវ៉ូវីណាមកម្ពុជា បានសម្រេច និងឯកភាពជ្រើសរើសលោក អ៊ូ រតនា ឱ្យឡើងធ្វើជាប្រធានសហព័ន្ធ សម្រាប់អាណត្តិថ្មី ទី ៤ ពីឆ្នាំ ២០២១ ដល់ឆ្នាំ ២០២៤ ជំនួសប្រធានចាស់លោក ស៊ូម សារឿន ហើយជាមួយគ្នានេះ ក្រុមហ៊ុនផលិតសម្ភារកីឡា NT Sport ក៏បានចុះកិច្ចសន្យាគាំទ្រសហព័ន្ធមួយនេះ រយៈពេលចំនួន ៥ ឆ្នាំ ផងដែរ។
នៅក្នុងមហាសន្និបាតបញ្ចប់អាណត្តិទី៣ និងបោះឆ្នោតជ្រើសរើសគណៈកម្មាធិការប្រតិបត្តិថ្មីទី ៤ ដែលត្រូវបានធ្វើឡើង កាលពីថ្ងៃទី ១២ ខែមិថុនា ដោយមានតំណាងក្រសួងអប់រំយុវជន និងកីឡា និងតំណាងគណៈកម្មាធិការជាតិអូឡាំពិកកម្ពុជា (NOCC) ចូលរួមនោះ គឺសហព័ន្ធកីឡាវ៉ូវីណាមកម្ពុជា មានសមាជិកប្រតិបត្តិថ្មីចំនួន ១៩ រូប គឺមានចំនួនច្រើនជាងអាណត្តិមុន ដើម្បីកំណែទម្រង់ឱ្យបានល្អ។
សមាសសភាពថ្មីទាំងនោះ រួមមានលោក អ៊ូ រតនា ជាប្រធានថ្មី លោក សុខ មុនី លោករស់ មុនិន្ទៈ លោក គិន ឆេងលី លោក លី សុធា លោក ឡុង សុផាត លោក សំ សុខយី និងលោក ជា ហុងរី ជាអនុប្រធាន ចំណែកលោក យ៉ាំ ថៃសាន ជាអគ្គលេខាធិការ ខណៈលោក លាង ណារិទ្ធ លោក អាំ សុផល លោក ម៉ិច សីហា ជាអគ្គលេខាធិការរង រីឯលោកស្រី ញឹម ម៉ីជាអគ្គហេរញ្ញិក លោកស្រី ប៉ុក ករុណា ជាអគ្គហេរញ្ញិករង ហើយលោក ប៊ូ វិរៈ លោក គង់ ហួនលោក កៅ មករា លោក ទេព ជីវសុខុម និងលោក ម៉េង សៅណេង ជាសមាជិក។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC ដែលបានចូលរួមជាអធិបតីភាព ក្នុងមហាសន្និបាតនោះ បានជំរុញលើកទឹកចិត្ត ដល់ថ្នាក់ដឹកនាំសហព័ន្ធថ្មីរបស់កីឡាវ៉ូវីណាមកម្ពុជា ទាំងអស់ ឱ្យយកចិត្តទុកដាក់ រួបរួមគ្នា ដើម្បីគុណភាពសមត្ថភាពអត្តពលិក ចេញទៅប្រកួតអន្តរជាតិនានា ទទួលបានលទ្ធផលល្អ ជូនជាតិមាតុភូមិយើង។
សមាសភាពគណៈកម្មាធិការប្រតិបត្តិថ្មីរបស់សហព័ន្ធកិឡាវ៉ូវីណាមកម្ពុជា អាណត្តទី ៥។
លោកបានបញ្ជាក់ថា៖ «សកម្មភាពកីឡា ដែលឈានទៅរកការទទួលលទ្ធផលល្អបាន គឺផ្តើមចេញពីសាមគ្គីភាព មិត្តភាព រួបរួម សហការគ្នាបានល្អ ហើយបន្ទាប់មកត្រូវចេះស្វែងរកការគាំទ្របន្ថែមពីដៃគូ ឬវិស័យឯកជន ក្នុងការធ្វើសកម្មភាពហ្វឹកហាត់ និងសកម្មភាពប្រកួតនានាទាំងថ្នាក់ជាតិ និងអន្តរជាតិ»។
ចំណែកលោក ស៊ូម សារឿន ជាប្រធានសហព័ន្ធកីឡាវ៉ូវីណាមកម្ពុជា អាណត្តិទី ៣ ចាស់ បានថ្លែងថា៖ «ខ្ញុំគាំទ្រវត្តមានប្រធានថ្មី លោក អ៊ូ រតនា និងថ្នាក់ដឹកនាំទាំងអស់ ដើម្បីជំរុញឱ្យកីឡាវ៉ូវីណាមយើង មានការរីកចម្រើនបន្ថែមទៀត ទៅលើការហ្វឹកហាត់ និងចេញប្រកួតដណ្តើមបានជយលាភីលើឆាកអន្តរជាតិជូនជាតិ»។
លោកបានបន្ថែមថា៖ «ខ្ញុំបានចូលរួមក្នុងសកម្មភាពកីឡាវ៉ូវីណាមនេះ ក្នុងឋានៈជាប្រធានសហព័ន្ធ បានតែប៉ុណ្ណឹង ព្រោះខ្ញុំជាប់កាតព្វកិច្ចជាច្រើន ក្នុងការងាររាជការ ហេតុនេះសូមជូនពរដល់បងប្អូនឱ្យទទួលបានលទ្ធផលល្អ ក្នុងភារកិច្ចកីឡាវ៉ូវីណាមនេះ ឆ្ពោះទៅព្រឹត្តិការណ៍ស៊ីហ្គេម លើកទី៣២ ដែលកម្ពុជាធ្វើម្ចាស់ផ្ទះ ឆ្នាំ២០២៣»។
ជាមួយគ្នានោះ លោក អ៊ូ រតនា ជាប្រធានសហព័ន្ធថ្មី បាននិយាយថា៖ «ខ្ញុំសូមអរគុណចំពោះបងប្អូន និងអស់លោក ដែលមានទំនុកចិត្តគាំទ្ររូបខ្ញុំ ឱ្យជាប់ជាប្រធានសហព័ន្ធកីឡាវ៉ូវីវីណាមកម្ពុជា ក្នុងអាណត្តិថ្មីទី ៤នេះ ហើយខ្ញុំក៏សូមអរគុណដល់បងប្រធានសហព័ន្ធចាស់អាណត្តិទី ៣ ដែលបានគាំទ្រលើកទឹកចិត្ត ព្រមទាំងតំណាងមកពីក្រសួងអប់រំ យុវជន និងកីឡាព្រមទាំងឯកឧត្តម វ៉ាត់ ចំរើន ដែលជួយលើកទឹកចិត្តខ្ញុំជានិច្ច ទើបមានដល់ថ្ងៃនេះ»។
លោក បានបន្ថែមថា សហព័ន្ធកីឡាវ៉ូវីណាមកម្ពុជាយើង ទទួលបានការគាំទ្របន្ថែមទៀតពីវិស័យឯកជន។ ជាមួយគ្នានេះ យើងបានចុះកិច្ចសន្យាជាមួយក្រុមហ៊ុនផលិតសម្លៀកបំពាក់សម្ភារកីឡា របស់កូនខ្មែរ ១០០ ភាគរយ គឺ NT Sport ដែលគាំទ្ររយៈពេល ៥ ឆ្នាំ ដល់សហព័ន្ធកីឡាវ៉ូវីណាមយើង៕
