ភ្នំពេញ៖ ម្ចាស់ក្លិបគុនចម្រុះ Cambodia Top Team លោក ហ៊ុន ចាន់រាជ ដែលជាអ្នករៀបចំ និងរកទីផ្សារប្រកួតឱ្យកីឡាករកម្ពុជាបានទៅចូលរួមប្រកួតគុនចម្រុះ MMA នៅក្រៅប្រទេសនោះ បានចាប់ផ្តើមប្រមែប្រមូលអត្តពលិកឆ្នើមៗមួយចំនួន ដែលធ្លាប់ប្រកួតគុនចម្រុះ ពិសេសជើងខ្លាំង រិន សារ័ត្ន ឱ្យវិលមកកាន់ទីលានហ្វឹកហាត់ជាថ្មី ដើម្បីពង្រឹងសមត្ថភាពឡើងវិញ ត្រៀមចេញទៅប្រកួតនៅក្រៅប្រទេសក្នុងឆ្នាំ ២០២១ នេះ។
បុរសសញ្ជាតិខ្មែរ-អាមេរិក មានម្តាយជាជនជាតិខ្មែររស់នៅសហរដ្ឋអាមេរិក លោក ហ៊ុន ចាន់រាជ បានចំណាយពេលវេលាច្រើនជាង ១០ ឆ្នាំ នៅក្នុងប្រទេសកម្ពុជា ដើម្បីធ្វើសកម្មភាពកីឡាប្រយុទ្ធគុនចម្រុះ MMA នេះ ឱ្យមានភាពកក្រើកឡើង ហើយថ្មីៗនេះ លោកបានចុះកិច្ចសន្យារួចហើយឱ្យអ្នកលេងគុនខ្មែរ រិន សារ័ត្ន ចូលរួមជាមួយកម្មវិធី ឈ្មោះ SOW ដើម្បីទៅចូលរួមប្រកួត MMA ជាផ្លូវការនៅប្រទេសឥណ្ឌា អំឡុងខែតុលា ឆ្នាំ ២០២១ នេះ។
លោក ហ៊ុន ចាន់រាជ ដែលគេស្គាល់ថា ជាអ្នកនិយមចូលចិត្តកីឡាប្រយុទ្ធប្រភេទនេះ បាននាំអត្តពលិកកម្ពុជាជាច្រើនរូប ដើម្បីចេញទៅប្រកួតក្នុងទីផ្សារឯកជនតាមរយៈការចរចាផ្ទាល់ជាមួយកីឡាករ និងម្ចាស់កម្មវិធីនៅក្រៅប្រទេសដោយមិនឆ្លងកាត់ស្ថាប័នកីឡានៅក្នុងស្រុកនោះទេ (មិនចំណាយថវិការដ្ឋ) ប៉ុន្តែ លោក ចាន់រាជ នៅតែមានឈ្មោះបោះសំឡេងខ្លាំងនៅក្នុងប្រទេស និងនៅលើឆាកអន្តរជាតិ ហើយត្រូវបានជ្រើសរើសឱ្យធ្វើជាអគ្គលេខាសហព័ន្ធកីឡាគុនចម្រុះកម្ពុជា នៅក្នុងរយៈពេល ៣ ឆ្នាំចុងក្រោយនេះ ផងដែរ។
លោក ហ៊ុន ចាន់រាជ បានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា៖ «រិន សារ័ត្ន ជាកូនសិស្សរបស់ខ្ញុំ ហើយគាត់នឹងវិលចូលសង្វៀនគុនចម្រុះ ដើម្បីប្រកួត MMA នៅខែតុលា ឆ្នាំ ២០២១ នៅឯប្រទេសឥណ្ឌា ព្រោះខ្ញុំបានរកទីផ្សារឱ្យគាត់ប្រកួតបានហើយ ហើយ រិន សារ័ត្ន នឹងចាប់ផ្តើមហាត់ជាបណ្តើរៗក្នុងទម្ងន់ ៦៥ គីឡូក្រាម ដើម្បីធ្វើឱ្យការប្រកួតនេះ ទទួលបានលទ្ធផលល្អសម្រាប់តំណាងឱ្យកម្ពុជា ចំណែកតម្លៃខ្លួនវិញ គឺប្រហាក់ប្រហែលនឹងសង្វៀន ONE Champion ដែរ។ និយាយទៅ គេមិនចង់ទម្លាយពីតម្លៃខ្លួនប្រកួតទេ ប៉ុន្តែមិនតិចជាង ១ ៥០០ ដុល្លារទេ ក្នុង១ ប្រកួតនោះ»។
លោកបញ្ជាក់ថា៖ «ខ្ញុំសប្បាយចិត្តជាខ្លាំង ដែលកម្មវិធីប្រកួតនៅឥណ្ឌាខាងលើបានចាប់អារម្មណ៍ និងស្គាល់សមត្ថភាពកីឡាករកម្ពុជា ក៏ដូចជាក្លិប Cambodia Top Team របស់ខ្ញុំហើយសមត្ថភាព និងបទពិសោធរបស់ រិន សារ័ត្ន នេះ នៅលើឆាកអន្តរជាតិ គឺគាត់ធ្លាប់ប្រកួតច្រើន មាននៅសិង្ហបុរី ម៉ាឡេស៊ី ថៃ ម៉ាកាវ ហ្វីលីពីន និងមីយ៉ាន់ម៉ា គឺនិយាយទៅមិនតិចជាង ១៥ លើកនោះទេ ហើយភាគច្រើនទទួលបានលទ្ធផលឈ្នះច្រើនជាង»។
ចំណែក រិន សារ័ត្ន បាននិយាយថា៖ «ខ្ញុំកំពុងតែចូលហ្វឹកហាត់ត្រៀមជាបណ្តើរៗ ដើម្បីចេញទៅប្រកួត តាមការរៀបចំរបស់លោកគ្រូ ហ៊ុន ចាន់រាជ ហើយក្នុងពេលដែលគ្មានទីផ្សារប្រកួត MMA នេះ ខ្ញុំក៏បានហាត់ប្រកួតគុនខ្មែរក្នុងស្រុកយើងដែរ ចំណែកការហាត់ត្រៀមប្រកួតក្នុងព្រឹត្តិការណ៍ថ្មី SOW នេះ ខ្ញុំដឹងថា ដូចគ្នាទៅនឹងការប្រកួត One Champion ក្នុងគុនចម្រុះ MMA ដែរ»។
គួររំឭកថា កីឡាករ រិន សារ័ត្ន ជាអតីតអ្នកប្រដាល់ល្បីឈ្មោះនៅលើវិស័យប្រដាល់គុនខ្មែរ និងគុនចម្រុះ MMA ប៉ុន្តែដោយសារការប្រកួតនៅលើឆាកអន្តរជាតិបានផ្អាក ព្រោះវិបត្តិជំងឺកូវីដ ១៩ នោះ រិន សារ័ត្ន បានត្រឹមប្រកួតគុនខ្មែរនៅតាមសង្វៀននានាប៉ុណ្ណោះ រហូតដល់បច្ចុប្បន្ន ហើយគេឈ្នះជើងឯកពានរង្វាន់ទឹកប្រាក់ចំនួន ៤ ០០០ ដុល្លារ នៅសង្វៀនប៉ុស្តិ៍លេខ ៥ ផងដែរ៕