ភ្នំពេញៈ កីឡាករលំដាប់ល្បីជំនាន់ក្រោយ ឡុង បេនលឿន របស់ក្លិបសាលវ័ន្តកីឡា បានយកឈ្នះជើងខ្លាំង សួន ចាន់នី ដោយពិន្ទុយ៉ាងតឹងតែង និងបន្តទៅផ្តួលជើងខ្លាំង ថៃ រ៉េត ឱ្យសន្លប់ធំ ដើម្បីក្លាយជាម្ចាស់ជើងឯក ដែលត្រូវទទួលបានប្រាក់រង្វាន់ចំនួន ៣,៤ លានរៀល ពីការប្រកួតម៉ារ៉ាតុង ដណ្តើមប្រាក់លាន នៅលើសង្វៀនថោន។
ជ័យជម្នះរបស់ ឡុង បេនលឿន បានធ្វើឱ្យអ្នកមហាជន និងអ្នកទស្សនា មានការភ្ញាក់ផ្អើលខ្លាំង ខណៈដែលការទស្សន៍ទាយ នឹងការព្យាករ ព្រមទាំងក្តីរំពឹងរបស់មហាជន ក៏ដូចសាមីខ្លួនជាកីឡាករ សួន ចាន់នី និង ថៃ រ៉េត សុទ្ធតែរំពឹងឈ្នះបានប្រាក់លាន ប៉ុន្តែបែរជាទទួលបានលទ្ធផលចាញ់ យ៉ាងខកចិត្ត។
តាមរយៈការប្រកួត កាលពីថ្ងៃអាទិត្យនោះ ឡុង បេនលឿន បានចាប់ឆ្នោតប៉ះជើងខ្លាំង សួន ចាន់នី ដែលរូបគេធ្លាប់បានចាញ់ចំនួន៣ដងកន្លងមក ប៉ុន្តែតាមរយៈការប្រកួតយ៉ាងតានតឹងនោះ បេនលឿន បានវ៉ៃ ចាន់នី ឡើងចង់សន្លប់ឈរ នៅទឹកទី៣ចុងក្រោយ ដើម្បីយកឈ្នះដោយពិន្ទុ មិនឯកច្ឆន្ទ ៤-១ ហើយរឿងដែលកាន់តែអស្ចារ្យនោះ គឺនៅវគ្គផ្តាច់ព្រ័ត្រ គេបានផ្តួលជើងខ្លាំងជំនាន់ថ្មីដូចគ្នា ថៃ រ៉េត ឱ្យសន្លប់ធំនៅទឹកទី២ ដោយក្បាច់ជង្គង់ស្តាំចូលពោះ បណ្តាលឱ្យងើបលែងរួច។
ឡុង បេនលឿន បាននិយាយក្រោយការប្រកួតថា៖ «ពេលចាប់ឆ្នោតប៉ះ សួន ចាន់នី ខ្ញុំមានអារម្មណ៍ថា មិនអាចឈ្នះគាត់បានទេ គឺសង្ឃឹមតិចមែនទែន ប៉ុន្តែការប្រកួតជាក់ស្តែង ដែលខ្ញុំតាំងចិត្តមិនញញើតនោះ នាំឱ្យខ្ញុំប្រើកណ្តាប់ដៃ នៅចុងទឹកទី៣ វ៉ៃចូលគោលដៅ បានល្អពិសេសខ្ញុំទាត់ និងវាយបកទៅវិញ បានធ្វើឱ្យគាត់ដួលជាច្រើនលើកច្រើនសារ»។
ម្ចាស់ប្រាក់លានរូបនេះ បានបន្ថែមថា៖ «ចំណែកវគ្គផ្តាច់ព្រ័ត្រ ដែលត្រូវជួប ថៃ រ៉េត នោះក៏ខ្ញុំរំពឹងឈ្នះតិចដែរ ប៉ុន្តែពេលប្រកួតជាក់ស្តែង ខ្ញុំវ៉ៃចូលគោលដៅល្អ និងទប់ទល់ពីការវាយលុកខ្លាំងៗ នូវក្បាច់កណ្តាប់ដៃរបស់គាត់ ដោយខ្ញុំប្តូរមកប្រើក្បាច់ជង្គង់វិញ ទទួលបានផលល្អ ទើបផ្តួលគាត់បានសម្រេច។ ខ្ញុំមិនគិតថា គាត់ទាំង២នាក់នេះ ខ្សោយនោះទេ ប៉ុន្តែជ័យជម្នះនេះ ខ្ញុំបាន ដោយសារខំហាត់បំប៉នកម្លាំងល្អ និងត្រៀមសុខភាពបានល្អ គឺឈ្នះដោយការតាំងចិត្តបានល្អ សម្រេចចូលវ៉ៃលុកចំគោលដៅល្អ»។
ចំណែក សួន ចាន់នី បាននិយាយពីមូលហេតុចាញ់របស់ខ្លួនថា៖ «ខ្ញុំចាញ់ប្រៀបតែចុងទឹកទី៣ប៉ុណ្ណោះ ក្នុងការវាយប្តូរកណ្តាប់ដៃគ្នា ព្រោះកម្លាំងដៃវាយចេញរបស់គេ មានកម្លាំងធ្ងន់ល្អជាង កម្លាំងដៃរបស់ខ្ញុំ។ ម៉្យាងវិញទៀត ខ្ញុំមានបញ្ហាចុកឈឺឆ្អឹងជំនីរ តាំងពីទឹកទី២ ដែលបានដួលទៅលើក្តារសង្វៀននៅពីក្រោមគាត់ ហេតុនេះខ្ញុំគ្មានកម្លាំង សម្រុកឱ្យខ្លាំងតាមចិត្ត ចង់ឈ្នះបានឡើយ»។
ប៉ុន្តែលោក សួន ប៊ុនសូត្រ ជាឪពុក និងជាគ្រូបង្វឹក បាននិយាយថា៖ «វាចាញ់នោះ សោកស្តាយណាស់ ព្រោះវាមិនស្តាប់ពីការប្រើបច្ចេកទេស គឺវាមិនស្តាប់ខ្ញុំប្រាប់។ និយាយទៅវាវ៉ៃល្ងង់ណាស់ គឺមានប្រៀបលើដៃគូ តាំងពីទឹកទី១ ដោយទាត់ បោះជង្គង់ និងវាយឆ្ងាយ ប៉ុន្តែវាភ្លើពេក នៅទឹកទី៣ ទៅប្តូរកណ្តាប់ដៃជាមួយគេ អ៊ីចឹងវាចាញ់គេនេះ សមមុខវាហើយ ព្រោះមិនប្រើបញ្ញា និងបច្ចេកទេសវ៉ៃ គឺយកកម្លាំងដៃ ទៅវ៉ៃប្តូរជាមួយគេ ដែលជំនាញប្រើកណ្តាប់ដៃ»។
ចំពោះការចាញ់របស់កីឡាករ ថៃ រ៉េត វិញ ត្រូវបានគេមើលឃើញថា បានធ្លាក់ចុះនូវកម្លាំង ដែលបញ្ចេញជាមួយកីឡាករ គង់ សំបូរ នៅវគ្គជម្រុះ សឹងតែអស់ទៅហើយ ទើបទទួលបានឈ្នះពិន្ទុឡើងទៅប៉ះ ឡុង បេនលឿន នោះ ហើយនៅទឹកទី១ ថៃ រ៉េត ក៏ត្រូវបានអាជ្ញាកណ្តាលរាប់ផងដែរ នៅពេល ឡុង បេនលឿន ទាត់ឱ្យដួលទាំងជំហរ ធ្វើឱ្យជាប់គាំងសរសៃ និងជើងក្រោមនោះ។
ថៃ រ៉េត បាននិយាយថា៖ «ខ្ញុំចាញ់ដោយសារចូលជង្គង់របស់គេច្រើនផង និងខូចជើងផង។ ខ្ញុំមិននឹកស្មានថា ចាញ់ដោយសន្លប់បែបនេះសោះ ប៉ុន្តែខ្ញុំខ្សោយកម្លាំង តាំងពីវគ្គជម្រុះជាមួយ គង់ សំបូរ។ ចូលមកដល់វគ្គផ្តាច់ព្រ័ត្រ ខ្ញុំគិតថា បើខ្ញុំមានឱកាសវាយគេឱ្យសន្លប់ ទើបឈ្នះតែបើផ្តួលគេមិនបាន គឺប្រឈមនឹងសន្លប់ដូចគ្នា»៕