.jpg)
អ្នកស្ម័គ្រចិត្ត ជាក្រុមអត្តពលិក ដែលធ្លាប់បានចូលរួម នៅក្នុងការប្រកួតកីឡាជាតិ កន្លងមក ខណៈព្រឹត្តិការណ៍នេះ ធ្វើឡើង ដើម្បីជាគំរូប សម្រាប់កម្ពុជា ឆ្ពោះទៅធ្វើម្ចាស់ផ្ទះស៊ីហ្គេម ឆ្នាំ២០២៣។ រូបថត ភ្នំពេញប៉ុស្តិ៍
ភ្នំពេញៈ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) បានធ្វើការសម្រេចជាគោលការណ៍ នៅក្នុងកិច្ចប្រជុំ កាលពីព្រឹកថ្ងៃអង្គារថា ការប្រកួតស៊ីហ្គេម លើកទី៣២ ដែលកម្ពុជា ត្រូវធ្វើជាម្ចាស់ផ្ទះ គឺត្រូវការអ្នកស្ម័គ្រចិត្តចំនួន ១ ម៉ឺននាក់ សម្រាប់ការរៀបចំ ចំណែកការប្រកួតអាស៊ានប៉ារ៉ាហ្គេម លើក១១ ដែលធ្វើបន្ទាប់ពីស៊ីហ្គេមនោះ យើងត្រូវការអ្នកស្ម័គ្រចិត្ត ៤ ០០០ នាក់ ហើយអ្នកស្ម័គ្រចិត្តទាំងនោះ យ៉ាងហោចណាស់ ក៏ត្រូវបានបណ្តុះបណ្តាលហាត់ការឱ្យបានមុន ចាប់ពីឆ្នាំ ២០២២ និងរហូតដល់ ៦ខែ មុនការប្រកួតមកដល់។
លោកបណ្ឌិត ថោង ខុន អនុប្រធានអចិន្ត្រៃយ៍ CAMSOC ដែលជាប្រធានអង្គប្រជុំ កាលពីព្រឹកថ្ងៃអង្គារនោះ បានថ្លែងថា៖ «ការវៀបចំផែនការសកម្មភាព នៃគណៈកម្មការអ្នកស្ម័គ្រចិត្ត ជារឿងសំខាន់ និងត្រូវការចំនួនដល់ទៅ ១ ម៉ឺននាក់។ ចំនួននេះ ត្រូវបានចុះឈ្មោះ ដោយគណៈកម្មការស្ម័គ្រនៃ CAMSOC និងត្រូវការឆ្លងវគ្គអប់រំបណ្តុះបណ្តាលជំនាញ ទៅតាមផ្នែកជាច្រើន នៅគ្រប់ទីកន្លែងទាំងអស់ នៅក្នុងពេលប្រកួតស៊ីហ្គេម ឆ្នាំ២០២៣ នៅកម្ពុជា»។
លោកបានបន្តថា៖ «ការធ្វើឱ្យអ្នកស្ម័គ្រចិត្ត មានសមត្ថភាពខ្ពស់ គឺយើងត្រូវធ្វើឱ្យពួកគាត់ មានការយល់ដឹង គ្រប់ជ្រុងជ្រោយ ក្នុងការធ្វើព្រឹត្តិការណ៍ទាំងមូល ព្រោះជោគជ័យ ឬមិនជោគជ័យ មិនអាចមើលរំលងអ្នកស្ម័គ្រចិត្តបាននោះទេ ហើយអ្នកស្ម័គ្រចិត្តនេះ មានបណ្តុះបណ្តាលជាជំនាញ និងបណ្តុះបណ្តាលវគ្គធម្មតា»។
ចំណែកលោក វ៉ាត់ ចំរើន អគ្គលេខាធិការ CAMSOC បានប្រាប់ថា៖ «អ្វីដែលជ្រើសរើសនៃការរៀបចំរបៀបរបប គឺមាននៅក្នុងបទបង្ហាញ ដោយមានភាពលម្អិតល្អ និងមានយុទ្ធសាស្ត្រច្បាស់លាស់ ហើយបានដាក់ចេញនូវយន្ដការប្រទាក់ក្រឡាគ្នាបានយ៉ាងល្អ ទាំងការបណ្ដុះបណ្ដាល និងប្រភពនៃការរៀបចំជ្រើសរើស ហើយយន្តការទាំងនេះ ត្រូវការបណ្ដុះបណ្ដាលអ្នកនិយមចូលចិត្ត អ្នកមានបទពិសោធ មកពីក្រៅប្រទេស និងក្នុងប្រទេស មកពីសិស្សនិស្សិត និងមន្ត្រីតាមស្ថាប័នមួយចំនួន ឬអ្នកស្រាវជ្រាវ ផងដែរ»។
លោក វ៉ាត់ ចំរើន (ពីឆ្វេង) លោកបណ្ឌិត ថោង ខុន និងលោក សុខ សប្បាយណា នៅក្នុងអង្គប្រជុំរបស់គណៈអចិន្រ្តៃយ៍ CAMSOC កាលពីព្រឹកថ្ងៃអង្គារ។ រូបថត សហការី
លោកបន្ថែមថា ចំពោះឯកសារយុទ្ធសាស្ត្រនយោបាយ និងផែនការសកម្មភាពការងារអ្នកស្ម័គ្រចិត្តនេះ ត្រូវឆ្លងពីមួយដំណាក់កាល ទៅមួយដំណាក់កាល រហូតដល់ឆ្នាំ ២០២៣ ដែលយើងត្រូវការប្រមាណ ១ ម៉ឺននាក់ សម្រាប់ស៊ីហ្គេម លើកទី៣២ និងចំនួន ៤ ០០០ នាក់ សម្រាប់អាស៊ានប៉ារ៉ាហ្គេម លើកទី១១ ឆ្នាំ ២០២៣ ដែលយើងត្រូវធ្វើបន្ទាប់នោះ។
ជាមួយគ្នានេះ លោក វ៉ាត់ ចំរើន បានលម្អិតពីតួនាទី អ្នកស្ម័គ្រចិត្តថា ត្រូវយល់ដឹងព័ត៌មានឱ្យបានទូលំទូលាយ និងទទួលខុសត្រូវ តាមផ្នែក ឬប្រភេទកីឡានីមួយៗ ក្នុងនោះក្រុមអ្នកស្ម័គ្រចិត្ត មានគ្រប់វ័យ គ្រប់មជ្ឈដ្ឋាន គឺជាគ្រូបង្វឹក មន្ត្រីកីឡាករចាស់ៗ ដែលគាត់ចង់ឃើញ និងចង់ចូលរួម ពោលគឺយើងបើកចំហឱ្យគ្រប់មជ្ឈដ្ឋានទាំងអស់។
ជាទូទៅការរៀបចំឱ្យមានអ្នកស្ម័គ្រចិត្ត គឺការរៀបចំកម្លាំងមនុស្សឱ្យពេញលក្ខណៈ ព្រោះក្រៅពីកម្លាំងជំនាញ និងកម្លាំងបច្ចេកទេស គឺជាកម្លាំងអ្នកស្ម័គ្រចិត្តនេះហើយ ដែលជាមនុស្សជំនួយការបន្ថែម មានតម្លៃមិនអាចខ្វះបានគ្រប់ព្រឹត្តិការណ៍ស៊ីហ្គេម ដែលគេធ្លាប់ធ្វើកន្លងមក។គណៈកម្មការនេះ បានចាប់ផ្តើមចុះឈ្មោះពីឆ្នាំ ២០២១ នេះ ដោយបំពេញឯកសារយុទ្ធសាស្ត្រឱ្យរួចរាល់ទាំងអស់ នៅឆ្នាំ ២០២២ គឺយើងធ្វើការតាមផែនការ ដែលបានរៀបចំ ក្នុងគម្រោងមានហើយ។
អ្នកជំនាញផ្នែកកីឡា លោក វ៉ាត់ ចំរើន បានបន្ថែមថា នៅក្នុងជំហានដំបូង យើងមានសៀវភៅការងារ ឬសៀវភៅគ្រប់គ្រងព្រឹត្ដិការណ៍កីឡាស៊ីហ្គេម ដើម្បីតម្រង់ទិសការងាររបស់ខ្លួន ឆ្ពោះទៅរកគោលដៅច្បាស់លាស់។ យើងចាប់ផ្តើមចែកជូននូវមេរៀន ឬរៀនតាមប្រព័ន្ធអនឡាញជាបណ្តើរៗ ដើម្បីឱ្យអ្នកស្ម័គ្រចិត្តទាំងអស់យល់ដឹង ពីតួនាទី ភារកិច្ច និងចាប់យកផ្នែកណាមួយ៕
