.jpg)
សំ ថារ័ត្ន (ខៀវ) ពេលប្រកួតជាមួយជើងខ្លាំងរបស់វៀតណាម សម្រាប់ស៊ីហ្គេម ឆ្នាំ ២០១៩។ រូប សហការី
ភ្នំពេញ៖ សហព័ន្ធកីឡាប្រដាល់គុនខ្មែរនឹងត្រូវធ្វើការសម្រិតសម្រាំងជ្រើសរើសយកបេក្ខភាពជាកីឡាការិនីចំនួន ៤ នាក់ ដើម្បីហ្វឹកហាត់ពង្រឹងសមត្ថភាពបន្ថែម ត្រៀមដាក់ឱ្យទៅប្រកួតស៊ីហ្គេម លើកទី៣១ ឆ្នាំ ២០២១ នៅប្រទេសវៀតណាម ហើយនៅព្រឹកថ្ងៃពុធនេះ សហព័ន្ធក៏នឹងបើកកិច្ចប្រជុំគណៈកម្មាធិការប្រតិបត្តិនៅមជ្ឈមណ្ឌលកីឡាកងយោធពលខេរភូមិន្ទ (ស្តាតចាស់) ដើម្បីបែងចែកការងារតួនាទី គណៈកម្មការចំពោះកិច្ចមួយសម្រាប់ដឹកនាំ និងគ្រប់គ្រងក្រុមអត្តពលិកជម្រើសជាតិនេះផងដែរ។
ការឈានទៅរកការជ្រើសរើសបេក្ខភាពជើងខ្លាំងផ្នែកនារីនេះ ក៏ព្រោះម្ចាស់ផ្ទះប្រទេសវៀតណាម បានសម្រេចបន្ថែមឱ្យមានការប្រកួតប្រដាល់ Muay ផ្នែកនារីនៅលើប្រភេទទម្ងន់ចំនួន ៤ ទៀត បន្ថែមទៅលើប្រភេទទម្ងន់បុរសចំនួន ៩ ប្រភេទទម្ងន់ ហេតុនេះសហព័ន្ធកីឡាប្រដាល់គុនខ្មែរចំបាច់ត្រូវធ្វើការជ្រើសរើសបេក្ខភាពជានារី ព្រោះនៅក្នុងបញ្ជីឈ្មោះប្រមូលផ្តុំ ឆ្នាំ ២០២១ នេះ ក្រុមជម្រើសជាតិប្រដាល់គុនខ្មែរ គឺមានសុទ្ធតែកីឡាករគ្មានកីឡាការិនីសូម្បី ១ នាក់។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ និងជាអគ្គលេខាធិការរង NOCC បានប្រាប់ថា ផ្នែកកីឡាករយើងទទួលបាន និងត្រៀមខ្លួនរួចហើយ ក្នុងនោះមានប្រភេទទម្ងន់ ៨១ គីឡូក្រាម ទម្ងន់ ៦៣,៥ គ.ក្រ ទម្ងន់ ៦០ គ.ក្រ ទម្ងន់ ៥៧ គ.ក្រ និងទម្ងន់ ៥៤ គ.ក្រ ប៉ុន្តែយើងគ្មានប្រភេទទម្ងន់ ៦៧ គីឡូក្រាមរបស់កីឡាករ ឡៅ ចិត្ត្រា និង លន បញ្ញា ទម្ងន់ ៧១ គីឡូក្រាមរបស់ ឡៅ ចន្ទ្រា និងទម្ងន់ ៥១ គីឡូក្រាម របស់ជើងខ្លាំង ខាំ ខ្លានាង នោះទេ ដោយសារម្ចាស់ផ្ទះវៀតណាមគេមិនមាន ហើយឥឡូវនេះ យើងទើបតែទទួលបានបន្ថែមផ្នែកនារីចំនួន ៤ ប្រភេទទម្ងន់ទៀត មានក្នុងទម្ងន់ ៦៣,៥ គ.ក្រ ទម្ងន់ ៦០ គ.ក្រ ទម្ងន់ ៥៧ គីឡូក្រាម និងទម្ងន់ ៥៤ គីឡូក្រាម។
ប្រធានសហព័ន្ធរូបនេះ បានបញ្ជាក់ថា៖ «កាលពីស៊ីហ្គេម នៅហ្វីលីពីន ឆ្នាំ ២០១៩ យើងបញ្ជូនអ្នកប្រដាល់ស្ត្រីម្នាក់ គឺកីឡាការិនី សំ ថារ័ត្ន ទៅប្រកួតក្នុងទម្ងន់ ៥៤ គីឡូក្រាម ប៉ុន្តែបានចាញ់នៅក្នុងវគ្គជម្រុះដំបូង ព្រោះ សំ ថារ័ត្ន បានប៉ះជាមួយកីឡាការិនីរបស់វៀតណាម ដែលជាម្ចាស់មេដាយមាស ៣ ជំនាន់។ ចំណែកស៊ីហ្គេមនៅវៀតណាម ឆ្នាំ ២០២១ នេះ សហព័ន្ធកំពុងពិចារណា និងស្វែងរកកីឡាការិនីឆ្នើមចំនួន ៤ ប្រភេទទម្ងន់នេះ ដើម្បីធ្វើការហ្វឹកហាត់ត្រៀមឱ្យល្អសម្រាប់ព្រឹត្តិការណ៍នេះ»។
ជាមួយគ្នានេះ លោក តែម ម៉ឺន មានការជឿជាក់ថា ក្រុមប្រដាល់គុនខ្មែរ នឹងដណ្តើមបានមេដាយពីការប្រកួតស៊ីហ្គេម លើកនេះជាមិនខាន ដោយលោកបានបញ្ជាក់ថា៖ «កីឡាគុនខ្មែររបស់យើង នៅតែជាប្រភេទកីឡា ដែលរំពឹងខ្ពស់ក្នុងការដណ្តើមបានមេដាយពីព្រឹត្តិការណ៍ស៊ីហ្គេម ហើយដើម្បីទទួលបានលទ្ធផលល្អ សហព័ន្ធមានកំណែទម្រង់ឱ្យកាន់តែប្រសើរ ដែលជ្រើសរើសគ្រូបង្វឹកល្អៗ ពិសេសពង្រឹងផ្នែកបញ្ហាវិន័យ និងហ្វឹកហាត់ ដែលមានគណៈកម្មការចំពោះកិច្ច ចាំត្រួតពិនិត្យជាប្រចាំក្នុងគោលបំណងដណ្តើមឱ្យបានមេដាយជូនប្រទេសជាតិ»។
ចំពោះគណៈកម្មករចំពោះកិច្ចនេះ លោក រាជ សុផែន ប្រធានគណកម្មការព័ត៌មានផ្សព្វផ្សាយរបស់សហព័ន្ធកីឡាប្រដាល់គុនខ្មែរ បានប្រាប់ថា៖ «នៅថ្ងៃស្អែក (ថ្ងៃពុធ) សហព័ន្ធនឹងប្រជុំឆ្លងយោបល់ និងបែងចែកតួនាទីគណៈកម្មការចំពោះកិច្ច និងពិនិត្យ ទៅលើសមាសភាពកីឡាការិនីក្នុងប្រភេទទម្ងន់ ដែលគ្រោងបញ្ជូនទៅចូលរួមប្រកួតនៅស៊ីហ្គេមប្រទេសវៀតណាម ចុងឆ្នាំនេះ»៕
