ភ្នំពេញ៖ សហព័ន្ធខ្មែរកីឡាហែលទឹក បានបញ្ចេញឈ្មោះកីឡាករ និងកីឡាការិនីទាំង ២ រូប ដែលត្រូវចេញទៅចូលរួមប្រកួតកីឡាអូឡាំពិករដូវក្ដៅនៅទីក្រុងតូក្យូ ប្រទេសជប៉ុន ឆ្នាំ ២០២០ ដោយត្រូវបានលើកមកធ្វើនៅឆ្នាំ ២០២១ ជាផ្លូវការហើយ បន្ទាប់ពីសម្រិតសម្រាំង និងធ្វើតេស្តសមត្ថភាព ដោយអ្នកទាំង ២ នេះ មានសមត្ថភាពឆ្នើមជាងដៃគូប្រជែងដទៃទាំងអ្នកនៅក្នុងស្រុក និងក្រៅប្រទេស។
បេក្ខភាពដែលត្រៀមសម្រាប់ព្រឹត្តិការណ៍ដ៏ធំនេះ គឺកីឡាករជម្រើសជាតិកម្ពុជា ហែម ប៉ុច រស់នៅកម្ពុជា និងកីឡាការិនី ម៉ីលិតាន មីននិក មកពីអាមេរិក ដែលជាកូនកាត់ខ្មែរ-អាមេរិក មានម្តាយដើមកំណើតខ្មែរ។ អ្នកទាំង ២ នេះ ត្រូវបានសហព័ន្ធខ្មែរកីឡាហែលទឹក សម្រេចជ្រើសរើសរួចហើយ ដើម្បីត្រៀមប្រកួតហែលរបៀបសេរី ចម្ងាយ ៥០ ម៉ែត្រ ក្នុងព្រឹត្តិការណ៍អូឡាំពិក។
លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានប្រាប់ថា៖ «ការចូលរួមប្រកួតកីឡាអូឡាំពិកនេះ កម្ពុជាពុំមានសមត្ថភាព ឬលទ្ធភាពភាពប្រកួតជម្រុះដណ្តើមបានកៅអីពេញសិទ្ធិនោះទេ គឺកម្ពុជាទទួលបានសិទ្ធិអនុគ្រោះ (Wild Card) នូវកីឡាករ ១ នាក់ និងកីឡាការិនី១នាក់ ដែលមានតម្រូវឱ្យលេងតែមួយវិញ្ញាសគឺ ហែលសេរី ៥០ ម៉ែត្រ»។
លោកបានបន្តថា ការចូលរួមប្រកួត ដោយភាពអនុគ្រោះបែបនេះ សហព័ន្ធកីឡាហែលទឹកអន្តរជាតិ (FINA) បានអនុញ្ញាតិឱ្យលេងតែមួយវិញ្ញាសាប៉ុណ្ណោះ គឺហែលសេរីចម្ងាយ ៥០ ម៉ែត្រនេះ ដែលជាច្បាប់អនុគ្រោះដល់ប្រទេសជាសមាជិករបស់គណៈកម្មាធិការជាតិអូឡាំពិកអន្តរជាតិ (IOC)។
ប្រសិនបើកម្ពុជាទទួលបានកៅអីចូលរួមប្រកួតដោយពេញសិទ្ធិ ឬឈ្នះនៅក្នុងការប្រកួតជម្រុះវិញនោះ គឺយើងអាចចូលលេងបានច្រើនវិញ្ញាសាទៀត ប៉ុន្តែយើងមិនធ្លាប់ធ្វើបាននោះទេ។ យ៉ាងណាក្តី សហព័ន្ធខ្មែរកីឡាហែលទឹក នៅតែសម្រិតសម្រាំងកីឡាករម្នាក់ និងកីឡាការីម្នាក់ តាមការប្រកួតប្រជែងធ្វើតេស្តដោយតម្លាភាព ព្រមទាំងមានសមត្ថភាពល្អជាងគេ របស់ប្រទេសយើងទៅចូលរួម។
ទាក់ទងទៅនឹងប្រវត្តិប្រកួត និងកម្រិតបច្ចេកទេសនៃថិរវេលាប្រកួតកន្លងមក លោក ហែម គីរី បានប្រាប់ថា កីឡាករ ហែម ប៉ុច កើតក្នុងឆ្នាំ ១៩៩៩ ជាកីឡាករជម្រើសជាតិ ដែលមានសមត្ថភាពល្អជាងគេ ក្នុងប្រភេទហែលទឹកសេរី ចម្ងាយ ៥០ ម៉ែត្រ ដោយកម្រិតបច្ចេកទេសជាកំណត់ត្រាផ្លូវការរបស់ ហែម ប៉ុច គឺធ្វើបានក្នុងថិរវេលា ២៤ វិនាទី ៩៩។ ចំណែកកីឡាការិនី ម៉ីលិតាន មីននិកវិញ មានថិវេលា ២៨ វិនាទី ៩៩។
លោកអគ្គលេខាធិការរូបនេះ បានបញ្ជាក់ថា៖ «កីឡាករ ហែម ប៉ុច ធ្លាប់ឆ្លងកាត់ការប្រកួតអន្តរជាតិជាច្រើន ហើយកីឡាការិនី ម៉ីលិតាន មីននិក ធ្លាប់ឈ្នះជើងឯក នៅសកលវិទ្យាល័យនៅសហរដ្ឋអាមេរិក ប៉ុន្តែសម្រាប់ការប្រកួតនេះ យើងមិនអាចរំពឹងបានលទ្ធផលល្អទេ ព្រោះកម្រិតអូឡាំពិកពិភភពលោក គឺគ្រាន់តែមានឱកាសបានចូលរួម ជាកិត្តិយសឱ្យគេស្គាល់ វាប្រសើរណាស់ទៅហើយ»។
លោក ហែម គីរី បានបញ្ជាក់ថា កីឡាការិនី ម៉ីលិតាន មីននិក រស់នៅប្រទេសអាមេរិកមែន តែសហព័ន្ធខ្មែរកីឡាហែលទឹក បានធ្វើតេស្តលើសមត្ថភាពរបស់គាត់ តាមអនឡាញ គឺគាត់ពិតជាកីឡាការិនីមួយរូប ដែលមានជំនាញហែលចម្ងាយ ៥០ ម៉ែត្ររបៀបសេរីនេះតែម្ដង។
កូនប្រុសរបស់ព្រឹទ្ធាចារ្យ ថែម ថុន រូបនេះ បានប្រាប់ទៀតថា ចំពោះការប្រកួតហែលសេរី ចម្ងាយ ៥០ ម៉ែត្រ របស់កីឡាករ ហែម ប៉ុច វិញ គឺយើងបានធ្វើតេស្តក្រុមអត្តពលិកជាច្រើននាក់ តែ ហែម ប៉ុច នៅតែមានចំណាត់ថ្នាក់លើគេរហូត ហើយមិនតែប៉ុណ្ណោះកីឡាកររូបនេះ មានចិត្តអំណត់ក្នុងការហ្វឹកហាត់ណាស់ គឺទោះបីស្ថិតក្នុងស្ថានភាពជំងឺកូវីដ១៩ ក៏ដោយ ក៏គេមិនលះបង់ការហ្វឹកហាត់នោះដែរ។
ចំពោះគ្រូបង្វឹក ដែលត្រូវដឹកនាំអត្តពលិកទាំង ២ នេះ ទៅចូលរួមការប្រកួតកីឡាអូឡាំពិកលើកនេះ គឺជាអតីតកីឡាករជម្រើសជាតិកម្ពុជា ដែលធ្លាប់បានចូលរួមប្រកួតកីឡាអូឡាំពិក នេះ កន្លងមក ប៉ុន្តែសហព័ន្ធខ្មែរកីឡាហែលទឹក នៅមិនទាន់បង្ហាញឈ្មោះ នៅឡើយទេ៕