ភ្នំពេញ៖ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) បានបើកកិច្ចប្រជុំប្រចាំសប្តាហ៍ កាលពីព្រឹកថ្ងៃអង្គារ ធ្វើការពិនិត្យ និងសម្រេចទៅលើពិធីទទួលទង់ស៊ីហ្គេមពីម្ចាស់ផ្ទះវៀតណាមនៅពេលបិទកម្មវិធីប្រកួតជាផ្លូវការ ស៊ីហ្គេមលើកទី៣១ ប៉ុន្តែក្នុងករណីប្រទេសវៀតណាម ពន្យារពេល ឬបោះបង់ការធ្វើម្ចាស់ផ្ទះស៊ីហ្គេម ឆ្នាំ ២០២១ នេះ កម្ពុជានឹងធ្វើពិធីទទួលទង់នេះ ពីអតីតម្ចាស់ផ្ទះស៊ីហ្គេម គឺប្រទេសហ្វីលីពីន វិញ។
តែទោះជាយ៉ាងណា អ្នកជំនាញផ្នែកកីឡារបស់ CAMSOC បានបង្ហើបថា គម្រោងធ្វើម្ចាស់ផ្ទះរបស់ប្រទេសវៀតណាម មិនទាន់ដាច់ស្រេច ក្នុងការពន្យារពេល ឬបោះបង់សិទ្ធិធ្វើម្ចាស់ផ្ទះ ដោយសារបញ្ហាជំងឺកូវីដ ១៩ នៅឡើយទេ គឺនឹងត្រូវឆ្លងកិច្ចប្រជុំសមាជិកគណៈកម្មាធិការជាតិអូឡាំពិករបស់ប្រទេសក្នុងតំបន់អាស៊ីអាគ្នេយ៍ នៅថ្ងៃទី ២៤ ខែមិថុនា ឆ្នាំ ២០២១ នេះសិន។
នៅក្រោយកិច្ចប្រជុំបានបញ្ចប់ លោក វ៉ាត់ ចំរើន អគ្គលេខាធិការ CAMSOC បានថ្លែងប្រាប់អ្នកយកព័ត៌មានថា៖ «កិច្ចប្រជុំ ក្រោមវត្តមានរបស់ឯកឧត្តមបណ្ឌិត ថោង ខុន អនុប្រធានអចិន្ត្រៃយ៍ CAMSOC នៅថ្ងៃនេះ គឺបានពន្លឿនកិច្ចការ ដោយផ្តោតលើការរៀបចំបង្ហាញទស្សនីយភាពជាង ១០ នាទី»។
លោក វ៉ាត់ ចំរើន បានបន្តថា នៅក្នុងជាង ១០ នាទីនេះ ទី១ យើងផ្តោតទៅលើការបង្ហាញពីសក្តានុពលកីឡាលក្ខណៈបុរាណដ៏ចំណាស់របស់កម្ពុជា និងបច្ចុប្បន្ន ទី២ ទស្សនីយភាពវប្បធម៌ ដែលរំលេចដោយភ័ស្តុតាងគុនល្បុក្កតោ និងប្រភេទកីឡាមួយចំនួនទៀត ដែលបានបន្សល់ទុកនៅប្រាសាទបុរាណខ្មែរ និងទី៣ បង្ហាញពីទស្សនីយភាពសកម្មភាពទេសចរណ៍ក្នុងនោះមានទេសចរណ៍ធម្មជាតិ ទេសចរណ៍ប្រវត្តិសាស្ត្រ និងផលិតផលសកម្មភាពកីឡានាំឱ្យទាក់ទាញទេសចរ។
អ្នកជំនាញកីឡារូបនេះ បានបន្ថែមថា៖ «ទស្សនីយភាពទាំងនេះ គណៈកម្មាធិការជាតិអូឡាំពិកកម្ពុជា (NOCC) និង CAMSOC សហការជាមួយក្រសួងអប់រំ យុវជន និងកីឡា ព្រមទាំងក្រសួងវប្បធម៌ និងវិចិត្រសិល្បៈ ដើម្បីរៀបចំកសាងឯកសារជាប្រវត្តិសាស្ត្រក្នុងលក្ខណៈសម្រិតសម្រាំងមានខ្លឹមសារល្អ ដោយមិនទាន់គិតដល់បញ្ហាប្រទេសវៀតណាម ពន្យារពេល ឬបោះបង់ការធ្វើម្ចាស់ផ្ទះស៊ីហ្គេម លើកទី៣១ នោះឡើយ»។
អគ្គលេខាធិការ NOCC លោក វ៉ាត់ ចំរើន បានបន្ថែមទៀតថា ការធ្វើម្ចាស់ផ្ទះស៊ីហ្គេម មិនមែនផ្តោតតែលើកីឡាមួយមុខប៉ុណ្ណោះទេ ប៉ុន្តែអ្វីដែលមានផលចំណេញ គឺបង្ហាញពីសក្តានុពល ដែលប្រទេសយើងមាន ដូចជាមរតកវប្បធម៌ អរិយធម៌ កីឡា ដែលមានលក្ខណៈចំណាស់ និងបង្ហាញពីភាពរីកចម្រើនរបស់ប្រទេសជាតិ ដែលនាំឱ្យពិភពលោកស្គាល់ក្នុងគោលបំណងស្រូបទាញភ្ញៀវទេសចរ ដើម្បីបានចំណូលតាមរយៈកីឡា និងទេសចរណ៍ក្នុងទិសដៅឧស្សាហកម្មគ្មានផ្សែង គឺកីឡា និងទេសចរណ៍។
លោក វ៉ាត់ ចំរើន បានបញ្ជាក់ថា៖ «គម្រោងកម្មវិធីសកម្មភាពរបស់ CAMSOC នៅតែជំរុញ និងពន្លឿនជានិច្ច ទោះបីពេលវេលា ស៊ីហ្គេមលើកទី៣១ នៅវៀតណាម ចុងឆ្នាំ ២០២១ នេះ ត្រូវបានពន្យារពេល ឬវៀតណាមបោះបង់់ធ្វើម្ចាស់ផ្ទះ ដោយហេតុផលកូវីដ ១៩ ក៏ដោយ គឺកម្ពុជានៅតែបន្តបំពេញការងារនេះ ឱ្យទាន់ពេលវេលាដែរ ហើយបើករណីមានអ្វីប្រែប្រួលនោះ តាមគោលការណ៍កម្ពុជា អាចនឹងធ្វើពិធីទទួលទង់ស៊ីហ្គេមពីម្ចាស់ផ្ទះប្រទេសហ្វីលីពីន ដែលជាអតីតម្ចាស់ផ្ទះស៊ីហ្គេម លើកទី៣០ កាលពីឆ្នាំ ២០១៩ វិញ»៕