ភ្នំពេញ៖ កីឡាប្រដាល់សកលជម្រើសជាតិ អ៊ូច ធារិទ្ធ ដែលជាបេក្ខភាពទម្ងន់ ៥៧ គីឡូក្រាម ត្រៀមទៅប្រកួតស៊ីហ្គេម នៅវៀតណាម ឆ្នាំ ២០២១ នេះ បានបើកឱកាសឱ្យជើងខ្លាំង វ៉ាន់ វឿន ឡើងមកប្រកួតសងសឹក ក្នុងកម្មវិធីប្រកួតប្រដាល់គុនខ្មែរ នៅលើសង្វៀនបាយ័ន នាល្ងាចថ្ងៃសៅរ៍ ចុងសប្តាហ៍នេះ។
តាមប្រវត្តិប្រកួត កីឡាករ វ៉ាន់ វឿន មានឈ្មោះល្បីល្បាញខ្លាំងជាង អ៊ូច ធារិទ្ធ ព្រោះ វ៉ាន់ វឿន បានជាប់ជាកីឡាករជម្រើសជាតិគុនខ្មែរ ជាច្រើនឆ្នាំ ហើយក៏ធ្លាប់បានឈ្នះមេដាយសំរឹទ្ធ ពីស៊ីហ្គេម ជូនជាតិ ផងដែរ ប៉ុន្តែ វ៉ាន់ វឿន ធ្លាប់បានប្រកួតចាញ់ពិន្ទុ អ៊ូច ធារិទ្ធ ក្នុងការដណ្តើមប្រាក់លាន នៅសង្វៀនថោន។
សម្រាប់ជំនួបសងសឹកលើកនេះ វ៉ាន់ វឿន មកពីក្លិបឃ្លាំងមឿងកីឡា និង អ៊ូច ធារិទ្ធ របស់ក្លិបអាណាចក្រគុនខ្មែរ សុទ្ធតែបានតាំងចិត្តប្រកួតឱ្យល្អ និងអស់ពីសមត្ថភាព ប៉ុន្តែអ្នកទាំង ២ សុទ្ធតែខ្លាចគ្នាទៅវិញទៅមក ពោលគឺមិនហ៊ានអួត ពីការឈ្នះនោះឡើយ ខណៈពួកគេមានឈ្មោះល្បីល្បាញ ដោយធ្លាប់ឈ្នះខ្សែក្រវាត់ និងឈ្នះពានរង្វាន់រៀងៗខ្លួន ហើយជាកីឡាករលំដាប់ជួរមុខរបស់កម្ពុជាដូចគ្នា។
អ៊ូច ធារិទ្ធ បាននិយាយថា៖ «ខ្ញុំកំពុងហ្វឹកហាត់ ដើម្បីត្រៀមប្រកួតឱ្យល្អ ព្រោះកីឡាករ វ៉ាន់ វឿន មិនមែនស្រួលទប់ទល់នោះទេ។ ក្នុងប្រភេទទម្ងន់ ៥៧ គីឡូក្រាមនេះ ខ្ញុំធ្លាប់ឈ្នះ វ៉ាន់ វឿន ម្តងមែន ប៉ុន្តែក្នុងលក្ខណៈលំបាកលំបិនណាស់ ហើយលើកនេះ ខ្ញុំត្រៀមទប់ទល់ច្រើនជាងវាយលុក ដើម្បីរក្សាជ័យជម្នះឱ្យបាន»។
កីឡាករមានជំនាញទាំងប្រដាល់សកល និងគុនខ្មែរ អ៊ូច ធារិទ្ធ បានបន្ថែមថា៖ «ខ្ញុំមិនហ៊ានធានាថា ឈ្នះទៀតនោះទេ ពោលគឺនៅលើស្ថានភាពប្រកួតជាក់ស្តែងតែម្តង ថាតើ យើងត្រូវប្រើយុទ្ធសាស្ត្របែបណា ឬផ្លាស់ប្តូរវិធីសាស្រ្តប្រកួតដូចម្តេច។ សម្រាប់ការប្រកួតនេះ ខ្ញុំសង្ឃឹម៥០ភាគរយ ទេ ព្រោះការចាញ់ ឬឈ្នះពិតជាមិនអាចស៊ីគ្នាផុយឡើយ»។
ចំណែកកីឡាករ វ៉ាន់ វឿន បាននិយាយថា៖ «ខ្ញុំហ្វឹកហាត់បានល្អ សម្រាប់ការប្រកួតសងសឹកជាមួយ អ៊ូច ធារិទ្ធ នៅសប្តាហ៍នេះ។ តែទោះបីជាយ៉ាងណា ខ្ញុំរំពឹងឈ្នះ៦០ភាគរយទេ ព្រោះគេក៏ជាកីឡាករលំដាប់ខ្លាំងមួយរូប ដែលលំបាកប្រកួត ដោយក្បាច់កណ្តាប់ដៃ និងជង្គង់របស់កីឡាករ អ៊ូច ធារិទ្ធ មិនស្រួលទប់ទល់នោះឡើយ»។
កីឡាករជាក្មេងកំព្រា វ៉ាន់ វឿន បានប្រាប់បន្ថែមថា៖ «ខ្ញុំធានាប្រកួតឱ្យអស់ពីសមត្ថភាពដើម្បីដណ្តើមជ័យជម្នះមកវិញ ប៉ុន្តែពិតជាលំបាកអះអាងណាស់ គឺវាយសម្រកដូចគ្នា។ អ្វីដែលមានប្រៀប គឺការរក្សាកម្លាំងឱ្យបានល្អ ហើយបើខ្ញុំធ្វើបាន នឹងមានសង្ឃឹមឈ្នះ អ៊ូច ធារិទ្ធ»។
ចំពោះ លោក ធន់ សុភា អ្នកផ្គូផ្គងប្រចាំសង្វៀនបាយ័ន បាននិយាយថា៖ «រវាង វ៉ាន់ វឿន និង អ៊ូច ធារិទ្ធ ជាគូប្រដាល់កម្រជួបគ្នាណាស់ ហើយសមត្ថភាពរបស់ពួកគេទាំង ២ នេះ ពិតជាកក្រើតសង្វៀន ព្រោះមហាជនចង់ឃើញ ការប្រកួតសងសឹកគ្នានេះណាស់ ខណៈ វ៉ាន់ វឿន ធ្លាប់ចាញ់ គឺមិនអស់ចិត្តនៅឡើយ ទើបសុំសងសឹក»។
លោកបានបញ្ជាក់ថា៖ «កម្មវិធីនេះ មានតែ ៣ គូទេ ហេតុនេះយើងសម្រិតសម្រាំងយកកីឡាករល្អៗបំផុត ហើយជើងខ្លាំងជំនាន់ថ្មី ឃួន ឡាំងកូស៊ីន ត្រូវប៉ះ អេ ណារ័ត្ន ក្នុងទម្ងន់ ៥៧គីឡូក្រាមដូចគ្នា ខណៈកម្មវិធីនេះ មានលក្ខណៈពិសេស ដោយមានប្រាក់រង្វាន់បន្ថែមពីភេសជ្ជៈប៉ូវកម្លាំង WURKZ ប្រចាំសប្តាហ៍ ចំនួន ៦០ ម៉ឺនរៀល បន្ថែមពីលើតម្លៃខ្លួន។ ចំណែកគូដណ្តើមប្រាក់លាន គឺជាការប៉ះគ្នារវាងជើងថ្មី សែត សារិទ្ធ និង សូដា កូម៉ាន់ ក្នុងទម្ងន់ ៦៥ គីឡូក្រាម ដោយអ្នកឈ្នះ នឹងទទួលបាន ១ លានរៀល បន្ថែមពីលើតម្លៃខ្លួនប្រកួត»៕