ក្រុងឡុងដ៍៖ ខ្សែប្រយុទ្ធ Raheem Sterling បាននិយាយថា ក្រុមអង់គ្លេសត្រៀមប្រឈមជាមួយគ្រប់ក្រុមខ្លាំងៗទាំងអស់ក្នុងវគ្គ ១៦ ក្រុមចុងក្រោយ នៅ Euro 2020 បន្ទាប់ពីក្រុមតោកំណាចបញ្ចប់យុទ្ធនាការការប្រកួតក្នុងវគ្គសន្សំពិន្ទុតាមពូលក្នុងនាមជាក្រុមលេខ ១ ក្នុងពូល D ដោយសារឈ្នះក្រុមសា.ឆែក ១-០ កាលពីថ្ងៃអង្គារ។
ជ័យជម្នះក្នុងការប្រកួតនៅពហុកីឡដ្ឋាន Wembley នេះ មានន័យថា ក្រុមអង់គ្លេសអាចនឹងត្រូវប្រឈមជាមួយក្រុមខ្លាំងៗ ដែលមានទាំងក្រុមជើងឯកពិភពលោកបារាំង ក្រុមជើងឯកចាស់នៃកម្មវិធីនេះ ព័រទុយហ្គាល់ ឬក៏ក្រុមអាល្លឺម៉ង់ក្នុងវគ្គចាញ់ធ្លាក់។
មុននេះ ក្រុមអង់គ្លេសត្រូវបានរិះគន់យ៉ាងធ្ងន់ធ្ងរពីការលេងមិនបានល្អអំឡុងការប្រកួត ដែលស្មើជាមួយក្រុមស្កុតឡេន ០-០ តែឃើញមានភាពមុតស្រួចជាងមុន ក្នុងហ្គេមចុងក្រោយនៃពូលរបស់ខ្លួននេះ។
«ខ្ញុំគិតថា មានភាពវិជ្ជមានជាច្រើនពីហ្គេមនេះ»។ នេះជាសម្ដីរបស់ Sterling ដែលក៏ជាអ្នកស៊ុតបញ្ចូលទីផងដែរ ក្នុងជ័យជម្នះ ១-០ របស់ក្រុមអង់គ្លេសលើក្រុមក្រូអាស៊ី កាលពីប្រកួតបើកឆាក។
Sterling បន្តថា៖ «យើងគ្រប់គ្រងបានល្អជាងមុន នៅថ្ងៃនេះ។ វាបានផ្ដល់ឱ្យយើងនូវឱកាសនៅតំបន់ប្រយុទ្ធច្រើនជាងមុន។ យើងលេងបានល្អ ហើយរកបាននូវគ្រាប់បាល់ ដែលយើងត្រូវការ»។
ជាមួយគ្នានេះ ខ្សែបម្រើ Jack Grealish និងខ្សែបម្រើប្រយុទ្ធ Bukayo Saka ដែលជាប់ឈ្មោះជាកីឡាករល្អបំផុតប្រចាំការប្រកួតនេះ ក៏ត្រូវបាន Sterling សរសើរថា ទាំង ២ នាក់ នាំឱ្យមានភាពខុសប្លែកជាងមុននៅតំបន់ប្រយុទ្ធ។
Sterling បានបន្ថែមថា៖ «វាជាការល្អណាស់ក្នុងការមានកីឡាករដូចនេះ លេងនៅជុំវិញខ្លួនរបស់អ្នក ដែលមានសមត្ថភាពបង្កើតឱកាស ដើម្បីស៊ុតបញ្ចូលទី។ កីឡាករ ដែលមានភាពខុសប្លែក ត្រូវការជាចាំបាច់សម្រាប់ហ្គេម ដែលមានភាពខុសប្លែក។ ទាំង ២ នាក់ បានធ្វើឱ្យក្រុមមានការផ្លាស់ប្ដូរយ៉ាងខ្លាំង ហើយធ្វើអ្វី ដែលពួកគេចាំបាច់ត្រូវធ្វើ»។
ខ្សែប្រយុទ្ធរបស់ក្រុម Manchester City បានបន្តទៀតថា៖ «ប្រសិនបើអ្នកមិនបានប្លាតឱ្យរបូតគ្រាប់បាល់ នោះអ្នកនឹងឈ្នះការប្រកួតបាល់ទាត់។ អ្នកគ្រាន់តែស៊ុតបញ្ចូលទី នៅចុងបញ្ចប់ប៉ុណ្ណោះ។ មនុស្សជាច្រើនមានការខកចិត្ត ក្នុងហ្គេមទល់នឹងក្រុមស្កុតឡេន កាលពី ២-៣ ថ្ងៃមុន តែរឿងសំខាន់ យើងមិនត្រូវបានគេស៊ុតបញ្ចូលទីឡើយ»។
កីឡាករវ័យ ២៦ ឆ្នាំ មិនមានការព្រួយបារម្ភចំពោះការ ដែលអាចនឹងកើតឡើង ក្នុងការប្រឈមនឹងតេស្តសាកល្បងដ៏តឹងតែងមួយក្នុងវគ្គ ១៦ ក្រុម នៅពហុកីឡដ្ឋាន Wembley នាសប្ដាហ៍ក្រោយ។
Sterling បន្ថែមថា៖ «ត្រង់ចំនុចខ្លះ អ្នកត្រូវតែហ៊ានប្រឈមនឹងក្រុមល្អបំផុត។ វាគឺជាការផ្ដល់នូវការប្រកួតប្រជែងដល់ខ្លួនអ្នកផ្ទាល់»។
ដូច្នេះ ១ គ្រាប់ ពីការតែតរបស់ Sterling នេះ បានន័យថា ក្រុមអង់គ្លេសរបស់លោក Gareth Southgate បញ្ចប់យុទ្ធនាការក្នុងវគ្គ Group Stage នេះ ក្នុងនាមជាក្រុមលេខ ១ ក្នុងពូល D ដោយមាន ៧ ពិន្ទុ ខណៈដែលក្រុមក្រូអាស៊ី ដែលយកឈ្នះក្រុមបាតពូលស្កុតឡេន ៣-១ ឈរលេខ ២ ជាមួយនឹង ៤ ពិន្ទុ។ ក្រុមសា.ឆែក ក៏បានឆ្លងទៅវគ្គបន្តដែរ ដោយសារជាប់ឈ្មោះជាក្រុម ១ ក្នុងចំណោមក្រុមលេខ ៣ ល្អបំផុតទាំង ៤។
ពាក់ព័ន្ធនឹងការដែលអាចជួបក្រុម ១ ក្នុងចំណោមក្រុមយក្សរបស់អឺរ៉ុបទាំង ៣ បារាំង ព័រទុយហ្គាល់ ឬក៏អាល្លឺម៉ង់នោះ លោក Southgate បានប្រាប់ទូរទស្សន៍នៅអង់គ្លេស ITV ថា៖ «យើងមិនមែនជាក្រុមមានឥទ្ធិពលទេ តែយើងមានពេលវេលា ដែលមើលទៅយើងជាក្រុមល្អមួយ»។
អ្នកចាត់ការរូបនេះ បានបន្ថែមថា៖ «មានតេស្តសាកល្បងប្រភេទផ្សេងៗជាច្រើន។ គ្រប់ក្រុមគូបដិបក្ខនាពេលបន្ទាប់របស់យើង នឹងធ្វើឱ្យហ្គេមមានភាពប្លែកៗពីគ្នា។ មានកិច្ចការល្អៗជាច្រើន ដែលយើងកំពុងបានធ្វើ។ យើងកំពុងមានពេលវេលាជាច្រើននាទី សម្រាប់ឱ្យកីឡាករជាច្រើនរូបបានលេង។ ៩០ នាទី សម្រាប់ Harry Maguire។ ៤៥ នាទី សម្រាប់ Jordan Henderson ដូច្នេះ គ្រប់យ៉ាងកំពុងតែបោះជំហានទៅមុខដោយវិជ្ជមាន»៕ AFP/VN