.jpg)
Lewandowski ស៊ុតបាល់បញ្ចូលទីឱ្យប៉ូឡូញតាមពីក្រោយស៊ុយអែត ២-១ អំឡុងការប្រកួត ប្រចាំពូល E នៅ Euro 2020 កាលពីថ្ងៃពុធ។
ក្រុងភេតធើរប៊ើក: ខ្សែប្រយុទ្ធ Robert Lewandowski បាននិយាយថា វាជារឿងពិបាកទទួលយកណាស់ ដែលក្រុមជម្រើសជាតិប៉ូឡូញរបស់ខ្លួនធ្លាក់ចេញពីព្រឹត្តិការណ៍ Euro 2020 ត្រឹមវគ្គសន្សំពិន្ទុតាមពូល ក្រោយប្រកួតចាញ់ក្រុមស៊ុយអែត ៣-២ ក្នុងហ្គេមចុងក្រោយ កាលពីថ្ងៃពុធ។
ដោយត្រូវការជ័យជម្នះជាចាំបាច់ ដើម្បីបានឆ្លងទៅវគ្គ ១៦ ក្រុមចុងក្រោយនោះ ក្រុមប៉ូឡូញ បែរជាត្រូវក្រុមគូបដិបក្ខស៊ុយអែត នាំមុខដល់ទៅ ២ គ្រាប់មុន តែកីឡាករ Lewandowski បានជួយឱ្យក្រុមមានសង្ឃឹមឡើងវិញ ដោយការស៊ុត ២ គ្រាប់ ឱ្យក្រុមតាមស្មើ សម្រាប់ការប្រកួត ក្នុងពូល E នាក្រុងភេតធើរប៊ើក នៅប្រទេសរុស្ស៊ីនេះ។
តែគ្រាប់បាល់នៅនាទីទី៩០+៤ របស់ខ្សែបម្រើ Viktor Claesson ធ្វើឱ្យក្ដីសង្ឃឹមរបស់ក្រុមប៉ូឡូញរលាយបាត់អស់ ហើយដាក់ទណ្ឌកម្មក្រុមរបស់លោក Paulo Sousa ឱ្យហាលអាវត្រឹមវគ្គនេះ ពោលគឺជាជោគវាសនាតែ ១ ដែលពួកគេបានជួបប្រទះ កាលពី World Cup 2018។
កីឡាករ Lewandowski របស់ក្រុមនៅអាល្លឺម៉ង់ Bayern Munich បាននិយាយទៅកាន់ទូរទស្សន៍រដ្ឋប៉ូឡូញ TVP ថា៖ «ពិតមែនហើយ វាជារឿងឈឺចាប់ណាស់។ ការធ្លាក់ចេញពីព្រឹត្តិការណ៍ប្រកួតប្រជែងនេះ គឺជាបរាជ័យដ៏ធំសម្រាប់ពួកយើង។ វាពិបាកទទួលយកណាស់»។
កីឡាករវ័យ ៣២ ឆ្នាំ បានបន្ថែមថា៖ «អ្នកមិនអាចនិយាយបានថា ពួកយើងគ្មានចិត្តវិញ្ញាណ ក្នុងការតស៊ូប្រយុទ្ធ គ្មានមហិច្ឆតា ឬក៏គ្មានការប្ដេជ្ញាចិត្តនោះទេ។ តែវាមានការបាត់បង់ចំណុចខ្លះៗ ពោលគឺសមត្ថភាព ក្នុងការឈ្នះការប្រកួតនេះ ដើម្បីបានបន្តការប្រកួតប្រជែងទៅមុខទៀត។ សូមអបអរចំពោះកីឡាករទាំងអស់ចំពោះការប្រឹងប្រែងប្រយុទ្ធ ប៉ុន្តែគ្រាន់តែវានៅមិនទាន់គ្រប់គ្រាន់ប៉ុណ្ណោះ»។
សម្រាប់ពូល E នេះ ក្រោយបញ្ចប់ការប្រកួតចុងក្រោយ ឃើញថា ក្រុមស៊ុយអែត ឈរលេខ ១ ក្នុងពូល ដោយមាន ៧ ពិន្ទុ ហើយត្រូវឡើងទៅជួបអ៊ុយក្រែន ក្នុងវគ្គ ១៦ ក្រុម។ ក្រុមអេស្ប៉ាញ ដែលនៅលេខ ២ ដោយមាន ៥ ពិន្ទុ ត្រូវទៅប្រឈមជាមួយក្រុមក្រូអាស៊ី។ ចំណែកក្រុមលេខ ៣ ស្លូវ៉ាគី និងក្រុមលេខ ៤ ប៉ូឡូញ មិនអាចបន្តដំណើរទៅមុខទៀតទេ៕ AFP/VN
