.jpg)
Benzema ស៊ុតបាល់ពិន័យ ១១ ម៉ែត្រ បានសម្រេច ជួយឱ្យបារាំងតាមស្មើព័រទុយហ្គាល់ ១-១ ក្នុងការប្រកួត នៅ Euro 2020 ប្រចាំពូល F កាលពីថ្ងៃពុធ។
ក្រុងប៊ុយដាប៉ែស: កីឡាករ Karim Benzema បាននិយាយថា ខ្លួនមានអារម្មណ៍រីករាយ ដែលមានលទ្ធភាពស៊ុតបញ្ចូលទីគ្រាប់ដំបូងឱ្យក្រុមជម្រើសជាតិបារាំង គិតតាំងពីឆ្នាំ ២០១៥ មក ពេលលេងទល់នឹងក្រុមព័រទុយហ្គាល់ កាលពីថ្ងៃពុធ ស្រមពេលដែលមានការដាក់សម្ពាធតិចតួចមកលើរូបគេ នៅទូទាំងប្រទេស។
ខ្សែប្រយុទ្ធរបស់ក្រុមអធិរាជស Real Madrid ត្រូវបាននាំត្រឡប់មកចូលក្រុមជម្រើសជាតិវិញ សម្រាប់ព្រឹត្តិការណ៍ Euro 2020 នេះ ដោយគ្រូបង្វឹកលោក Didier Deschampsក្រោយស្ថិតនៅក្រៅបញ្ជីឈ្មោះរយៈពេល ៥ ឆ្នាំ កន្លះ បន្ទាប់ពីមានការចោទប្រកាន់ថា មានពាក់ព័ន្ធនឹងការរៀបគម្រោងជំរិតទារប្រាក់មួយ។
Benzema រកគ្រាប់បាល់មិនបានឡើយ ក្នុងចំណោមការចូលលេង ៤ ហ្គេមដំបូង គិតតាំងពីត្រឡប់ចូលមកលេងឱ្យក្រុមមាន់គកបារាំង ដែលឈ្នះពាន World Cup 2018 ដោយមិនមានវត្តមានរបស់កីឡាករវ័យ ៣៣ ឆ្នាំ។
តែរូបគេបានស៊ុតបាល់ពិន័យ ១១ម៉ែត្រទម្លុះសំណាញ់ទី នៅវគ្គទី១ អំឡុងការប្រកួតចុងក្រោយ ក្នុងពូល F ទល់នឹងក្រុមព័រទុយហ្គាល់ ហើយបន្ទាប់មក មានឱកាសបន្ថែម ១ គ្រាប់ទៀត ត្រឹមតែ ១ នាទី នៅវគ្គទី២ ដើម្បីបញ្ចប់ការទន្ទង់រង់ចាំដ៏យូរអង្វែងរបស់ខ្លួន។
Benzema បានប្រាប់ទូរទស្សន៍ BeIN ថា៖ «ពោរពេញដោយភាពរីករាយ ពោរពេញដោយមោនទភាព។ ខ្ញុំយល់ថា គ្រប់គ្នាកំពុងរង់ចាំវា (គ្រាប់បាល់)។ មានសម្ពាធតិចតួចមកលើរូបខ្ញុំ នៅទូទាំងប្រទេស តែខ្ញុំគឺជាកីឡាករបាល់ទាត់ម្នាក់ ប្រកបដោយវិជ្ជាជីវៈ ពោលគឺខ្ញុំត្រូវាករការដាក់សម្ពាធនោះ»។
លទ្ធផលស្មើ ២-២ ដែលឃើញផងដែរនូវការស៊ុត ២គ្រាប់របស់កីឡាករ Cristiano Ronaldo តាមស្មើកំណត់ត្រាគ្រាប់បាល់ក្រុមបាល់ ក្នុងក្រុមជម្រើសជាតិនោះ គ្រប់គ្រាន់ ក្នុងការបញ្ជូនក្រុមបារាំងឱ្យធ្វើដំណើរទៅវគ្គ ១៦ក្រុមចុងក្រោយ ក្នុងនាមជាប្រធានពូល ដោយត្រូវឡើងទៅប៉ះក្រុមស្វីស នៅឯក្រុងប៊ុយដាប៉ែស នាថ្ងៃចន្ទ។
គ្រូបង្វឹករបស់បារាំង លោក Deschamps បានប្រាប់ប្រព័ន្ធផ្សព្វផ្សាយ TF1 ថា៖ «រូបគេ (Benzema) កំពុងរង់ចាំគ្រាប់បាល់នោះ។ គេមិនបានបាត់បង់ទំនុកចិត្តនោះឡើយ ហើយខ្ញុំក៏ដូចគ្នា។ យើងនឹងប្រសើរឡើងវិញ ហើយបន្ទាប់មក យើងនឹងត្រៀមខ្លួនសម្រាប់ហ្គេមទល់នឹងក្រុមស្វីស ឱ្យបានល្អបំផុតតាមដែលយើងអាចធ្វើបាន»៕ AFP/VN
