.jpg)
Busqets របស់អេស្ប៉ាញ ទះដៃក្រោយចប់ការប្រកួតទល់នឹងស្លូវ៉ាគី កាលពីថ្ងៃពុធ។ AFP
ក្រុងសេវីល៖ ខ្សែបម្រើ Sergio Busquets ដែលពោរពេញដោយអារម្មណ៍រំជួលចិត្តមានជំនឿថា ជ័យជម្នះភ្លូកទឹកភ្លូកដី ៥-០ លើក្រុមស្លូវ៉ាគី កាលពីថ្ងៃពុធ នឹងផ្ដល់ឱ្យក្រុមទាំងមូលនូវកម្លាំងជំរុញចិត្តដ៏ធំមហាសាលសម្រាប់ការប្រកួតក្នុងវគ្គចាញ់ធ្លាក់ក្នុងព្រឹត្តិការណ៍ Euro 2020។
ក្រុមអេស្ប៉ាញ ដែលមានរហស្សនាមថា «គោជល់» នឹងត្រូវតស៊ូជាមួយក្រុមក្រូអាស៊ីនៅឯក្រុងកូប៉ិនហាក ក្នុងប្រទេសដាណឺម៉ាក នាថ្ងៃចន្ទ បន្ទាប់ពីបានសិទ្ធិឆ្លងទៅជុំបន្ទាប់ក្នុងនាមជាក្រុមលេខ ២ ក្នុងពូល E។
កីឡាករ Busquets បានត្រឡប់មកមានវត្តមានក្នុងជម្រើស ១១ នាក់ដំបូងវិញ សម្រាប់ការប្រកួតរបស់ក្រុមអេស្ប៉ាញទល់នឹងស្លូវ៉ាគីនេះ ក្រោយពីខកខាន ២ ហ្គេមដំបូង ដោយសារទទួលបានលទ្ធផលតេស្តវិជ្ជមានជំងឺកូវីដ ១៩។
កីឡាករវ័យ ៣២ ឆ្នាំ របស់ក្រុមអ្នកមានបុណ្យ Barcelona រូបនេះ បានអង្គុយមើលការប្រកួត ដែលក្រុមរបស់ខ្លួនលេងស្មើប៉ូឡូញ ១-១ ដោយលទ្ធផលនោះ បានធ្វើឱ្យអេស្ប៉ាញស្ថិតក្នុងភាពមិនប្រាកដប្រជាក្នុងការឆ្លងផុតពីវគ្គសន្សំពិន្ទុតាមពូលនេះ។
«វាពិតជាតឹងតែងណាស់។ លទ្ធផល នៅក្នុងថ្ងៃនេះ គឺជាកម្លាំងជំរុញ ១ សម្រាប់គ្រប់គ្នា សម្រាប់ពួកយើងសម្រាប់អ្នកគាំទ្រ។ នេះជាផ្លូវដែលពួកយើងត្រូវធ្វើដំណើរទៅ»។ នេះជាសម្ដីរបស់កីឡាករ Busquets ដែលស្រាប់តែចាប់ផ្ដើមស្រក់ទឹកភ្នែកក្នុងពេលកំពុងនិយាយ។
កីឡាករ Busquets បានបន្តថា៖ «ពួកយើងមានក្ដីរីករាយ។ យើងមិនអាចឈរទី១ ព្រោះវាមិនស្ថិតនៅក្នុងដៃរបស់ពួកយើងទេ តែវាពិតជាបានផ្តល់ឱ្យពួកយើងនូវទំនុកចិត្តយ៉ាងច្រើននូវអ្វីដែលកំពុងកើតមានឡើង»។
«យើងមាននូវពេលវេលារាងលំបាកបន្តិច។ ខ្ញុំត្រូវនៅផ្ទះ ១០ ថ្ងៃ ដោយមិនអាចចេញទៅណា តែក្រុមរឹងមាំណាស់។ បញ្ហាទាំងអស់នេះ បានធ្វើឱ្យពួកយើងកាន់តែធំធាត់ឡើង ហើយវាបង្ហាញនូវឥរិយាបថរបស់ពួកយើង»។ នេះការបន្ថែមរបស់ Busquets។
ខ្សែប្រយុទ្ធ Alvaro Morata របស់អេស្ប៉ាញ ស៊ុតបាល់ពិន័យ ១១ ម៉ែត្រ អត់ចូល នៅដើមវគ្គទី១ តែគ្រាប់បាល់ពីការធ្វើឱ្យចូលទីខ្លួនឯងរបស់អ្នកចាំទីនៃក្រុមស្លូវេគី គឺ Martin Dubravka បានធ្វើឱ្យភាពតានតឹងធូរស្រាល មុនពេលមានគ្រាប់បាល់បន្តបន្ទាប់គ្នាពី Aymeric Laporte, Ferran Torres និង Pablo Sarabia ព្រមទាំងការធ្វើឱ្យចូលទីខ្លួនឯង ១ គ្រាប់ផ្សេងទៀតរបស់ Juraj Kucka បង្កើតបាននូវជ័យជម្នះយ៉ាងត្រចះត្រចង់ឱ្យក្រុមគោជល់សម្រាប់ការប្រកួតនៅក្រុងសេវីលនេះ។
Busquets បាននិយាយបន្ថែមទៀតថា៖ «ការស៊ុតបាល់ប៉េណាល់ទីនោះ គឺជារឿងគួរឱ្យអាម៉ាស់ តែក្រុមបានព្យាយាមយ៉ាងខ្លាំង ហើយយើងបានជួបនូវសំណាងល្អ ដែលមានគ្រាប់បាល់ដំបូង ដោយសារកំហុសរបស់អ្នកចាំទីនៃក្រុមរបស់ពួកគេ។ យើងទទួលយកការរិះគន់នៅពេលយើងធ្វើមិនបានល្អ តែនេះ គឺជាការប្រកួតប្រជែងជើងឯកអឺរ៉ុប ដូច្នេះយើងដឹងថា តើវាពិបាកកម្រិតណា?»។
ក្រុមអេស្ប៉ាញ ឥឡូវនេះ នឹងត្រូវឡើងជួបក្រុមក្រូអាស៊ី ដែលយកឈ្នះក្រុមស្កុតឡេន កាលពីថ្ងៃអង្គារ ហើយបានឆ្លងទៅជុំបន្តក្នុងនាមជាក្រុមលេខ ២ ប្រចាំពូល D ដោយប្រធានក្រុម Luka Modric គឺជាកីឡាករដ៏សំខាន់ក្នុងការរួមចំណែកជួយជំរុញក្រុមឱ្យមាននូវជ័យជម្នះនោះ ជាមួយនឹងការស៊ុតគ្រាប់បាល់ទី ២ យ៉ាងស្អាតអស្ចារ្យ។
ពាក់ព័ន្ធនឹងការឡើងទៅជួបក្រូអាស៊ីនេះ Busquets បានប្រាប់ថា៖ «ក្រូអាស៊ី គឺជាក្រុមឡើងដល់វគ្គផ្ដាច់ព្រ័ត្រ នៅ World Cup វានឹងកា្លយជាការប្រកួតដ៏លំបាក ហើយយើងដឹងថា ប្រធានក្រុម (Modric) របស់គេ គឺល្អណាស់។ តែយើងត្រូវមើលពីខ្លួនយើង ហើយបន្តកិច្ចការ ដូចថ្ងៃនេះអ៊ីចឹង»។
សម្រាប់ពូល E ក្រុមស៊ុយអែត គឺជាប្រធានពូល ដោយមាន ៧ ពិន្ទុ ក្រោយពីគ្រាប់បាល់នៅនាទីទី៩០+៤ របស់ខ្សែបម្រើ Viktor Claesson ជួយឱ្យឈ្នះប៉ូឡូញ ៣-២។ ស៊ុយអែត ត្រូវទៅប្រកួតជាមួយអ៊ុយក្រែន ក្នុងវគ្គ ១៦ ក្រុមចុងក្រោយ៕ AFP/VN
