The Phnom Penh Post Search

Search form

Logo of Phnom Penh Post newspaper Phnom Penh Post - Ganzberg ​One Strike ជា​កម្មវិធី​របស់​សង្វៀន PNN ​ជាមួយ​រូបមន្ត​ប្លែក​ថ្មី




Ganzberg ​One Strike ជា​កម្មវិធី​របស់​សង្វៀន PNN ​ជាមួយ​រូបមន្ត​ប្លែក​ថ្មី

Content image - Phnom Penh Post
រូបថតកីឡាករប្រដាល់​ ដែល​ត្រៀម​សម្រាប់​កម្មវិធី Ganzberg ​One Strike របស់ PNN​​។ រូបថត សហ​ការី

Ganzberg ​One Strike ជា​កម្មវិធី​របស់​សង្វៀន PNN ​ជាមួយ​រូបមន្ត​ប្លែក​ថ្មី

ភ្នំពេញ៖ ស្ថានីយ​ទូរទស្សន៍ PNN បាន​បង្កើត​កម្មវិធី​គុន​ខ្មែរ​​ឡើង​វិញ ​ជាមួយ​ដៃគូ​ឧបត្ថម្ភ​ថ្មី ​ដោយ​​ឱ្យ​ឈ្មោះ​ថា «​Ganzberg One Strike» ​ដែល​​ប្រមូល​ផ្តុំ​ទៅ​ដោយ​កីឡាករ​ឆ្នើមៗ​ប្រកួត​គ្នា​ក្នុង​​លក្ខណៈ​ប្រដាល់​គុន​ខ្មែរ​ ៣ ​ទម្រង់​ដែល​ជា​រូបមន្ត​ប្រកួត​ប្លែក​ជាង​គេ​។​

លោក ​សំណព្វ ដែល​ជា​​អ្នក​ចាត់​ការ​ទូទៅ​ផ្នែក​កីឡា​នៅ​ស្ថានីយ​ទូរទស្សន៍ PNN ​ឱ្យ​ដឹង​ថា​៖ «​កម្មវិធី​ប្រកួត​នេះ នឹង​បើក​ការ​ប្រកួត​នៅ​ថ្ងៃ​អាទិត្យ​ ទី​ ៤ ខែ​កកដ្កា​ ឆ្នាំ​ ២០២១​ នេះ ចាប់​​ពី​​​​ម៉ោង ១​ រសៀល​តទៅ​ ជាមួយ​រូបមន្ត​ថ្មី​ប្លែក​អស្ចារ្យ​ ដែល​ប្រជុំ​ដោយ​កីឡាករ​លំដាប់​ខ្លាំងៗ ក្នុង​នោះ​មាន​ទាំង​គូ​ដណ្តើម​ខ្សែ​ក្រវាត់​ប្រភេទ​ទម្ងន់ ៥៧ គ.ម​ ចំនួន ១៦ ​នាក់ គឺ​ប្រកួត​ចាញ់​ធ្លាក់​ចំនួន ១ ​គូ​ ហើយ​បន្ថែម​គូ​លក្ខណៈ​គុន​ខ្មែរ​ម៉ារ៉ាតុង​​ចំនួន ២ ​គូ ​និង​ទម្រង់​ទី​៣ ​គូ​ប្រដាល់​ពិសេស ​ដែល​មិន​ធ្លាប់​មាន​ ប្រកួត​គ្នា​ចំនួន ២ ទឹក​ ក្នុង ​១ ​ទឹក​រយៈ​ពេល ៧ ​នាទី ​បើ​មិន​សន្លប់​ទុក​ជា​មោឃៈ ​ដោយ​គ្មាន​ស្មើ​នោះ​ឡើយ​»​​។​

លោក ​សំណព្វ ​បាន​បន្ថែម​ទៀត​​ថា​៖ «​សង្វៀន​របស់​​យើង ទទួល​​បាន​ការ​គាំទ្រ​ពី​ស្រាបៀរ Ganzberg ​ដោយ​ដាក់​ឈ្មោះ​ថា កម្មវិធី ​​Ganzberg One Strike ​ចំណាយ​រយៈពេល ៦ ​ខែ ហើយ​នៅ​វគ្គ​ផ្តាច់​ព្រ័ត្រ ​កីឡាករ​ឈ្នះ​ខ្សែ​ក្រវាត់ ឬ​ចំណាត់​ថ្នាក់​លេខ​ ១ ​នឹង​ទទួល​បាន​ប្រាក់​ ៤០ ​លាន​រៀល ខណៈ​ដែល​ចំណាត់​ថ្នាក់​លេខ​ ២ ទទួល​បាន​ចំនួន ​៨ ​លាន​រៀល ដោយ​គ្មាន​ចំណាត់​ថ្នាក់​លេខ​ ៣ និង​លេខ ៤ នោះ​ឡើយ​»​។

តាម​ខ្លឹមសារ​ពី​អ្នក​រៀបចំ​ព្រឹត្តិការណ៍​នេះ​ ឱ្យ​ដឹង​ថា​ ​កម្ម​វិធី​ប្រ​ដាល់​គុន​ខ្មែរ​ ដែល​ផ្សាយ​​ផ្ទាល់​តាម​កញ្ចក់​ទូរទស្សន៍ជា​កម្ម​វិធី​កីឡា​ពេញ​និយម​ក្នុង​ព្រះរាជាណាចក្រ​កម្ពុជា​ ហើយ​ផ្តល់​ការងារ​ដល់​កីឡាករ ​គ្រូ​បង្វឹក ​និង​គណៈកម្មការ​ដើម្បី​ទទួល​បាន​កម្រៃ​ពលកម្ម ​និង​តម្លៃ​ខ្លួន​សម្រាប់​ទ្រទ្រង់​ជីវភាព​។​ បន្ថែម​ពី​លើ​នេះ​ ​ដើម្បី​រួម​ចំណែក​ផ្សព្វផ្សាយ​គុន​ខ្មែរ​ឱ្យ​កាន់​តែ​ល្បី​សុសសាយ ក៏​ដូចជា​អភិវឌ្ឍ​ធនធាន​កីឡាករ​ជំនាន់​ក្រោយ​ឱ្យ​កាន់​តែមាន​សមត្ថភាព​ ព្រម​ទាំង​​មាន​ឱកាស​បញ្ចេញ​ស្នៀត​ប្រយុទ្ធ​លើ​សង្វៀន​ផង​ដែរ​។​

លោក តែម ម៉ឺន ​ប្រធាន​សហព័ន្ធ​ប្រដាល់​គុន​ខ្មែរ​បាន​មាន​ប្រសាសន៍​ថា​៖ «​អរគុណ ដែល​សង្វៀន​ស្ថានីយ​ទូរទស្សន៍ PNN បើក​ឡើង​វិញ ព្រោះ​វា​នឹង​ផ្តល់​ការងារ និង​ចំណូល​ជូន​កីឡាករ និង​គណៈ​កម្មការ​របស់​យើង​។ ​​​អរគុណ​ដល់​ដៃគូ​ឧបត្ថម្ភ​ក្រុមហ៊ុន​ Ganzberg ដែល​​សហការ​ជាមួយ​ស្ថានីយ​ទូរទស្សន៍ PNN រៀបចំ​កម្មវិធី​ប្រដាល់​ប្រចាំ​សប្តាហ៍​​ថ្មី​សន្លាង និង​ប្លែក​គេ​តែ ១ ​គត់ គឺ​កម្មវិធី Ganzberg One Strike ដែល​ជា​ទី​ចាប់​អារម្មណ៍ និង​ពេញ​និយម​របស់​មហាជន»​។​

ព្រឹត្តិការណ៍​ថ្មី​នេះ នឹង​ប្រមូល​ផ្ដុំ​ជើង​ខ្លាំង​គុន​ខាង​ខ្មែរ​មក​ពី​បណ្តា​ក្លិប​នានា គ្រប់​ទិសទី ដើម្បី​ត្រៀម​ប្រយុទ្ធ​ឱ្យ​កក្រើក ហើយ​អ្នក​គាំទ្រ ដែល​កំពុង​ទន្ទឹង​រង់ចាំ​ការ​វិល​ត្រឡប់​នៃ​សង្វៀន PNN ជាមួយ​នឹង​កម្មវិធី Ganzberg One Strike នេះ ដែល​ថ្មី និង​ប្លែក​ជាង​គេ​។​

សម្រាប់​សប្តាហ៍​នេះ​​ PNN បាន​រៀបចំ​គូ​សុទ្ធតែ​ខ្លាំង​ៗ និង​មាន​ប្រជាប្រិយ ​ដូចជា ​សូត្រ សុឃីម ប្រកួត​ជាមួយ ប៊ន ពន្លឹក ក្នុង​ទម្ងន់ ៥៤ ​គីឡូគ្រាម, នូវ សុខ​ទី ប៉ះ​ សេក សារ៉ាន់, ប៊ុន សុធា ត​ទល់​នឹង យ៉ន ពិសី និង​កីឡាករ ឃន កឹម​ហេង ប្រឈម​ជាមួយ ពុទ្ធ ម៉ាណូយ​៕

អត្ថបទគួរចាប់អារម្មណ៍