ភ្នំពេញ៖ កីឡាករ សោម វិឆ័យ បានរកឃើញជ័យជម្នះយ៉ាងសំខាន់របស់ខ្លួនហើយ គឺការក្លាយជាម្ចាស់ជើងឯក ក្នុងការប្រកួតដណ្តើមប្រាក់លានជាលើកដំបូង នៅលើសង្វៀនថោន កាលីថ្ងៃអាទិត្យ ហើយការក្រសោបបានប្រាក់រង្វាន់ចំនួន ៣,៤ លានរៀល ត្រូវបាន សោម វិឆ័យ អះអាងថា វាកើតចេញពីការគិតត្រឹមត្រូវ ទាំងការយកឈ្នះ គង់ សំបូរ នៅក្នុងវគ្គជម្រុះ និងការយកឈ្នះ ឯម ដារ៉ូ នៅវគ្គផ្តាច់ព្រ័ត្រ។
សោម វិឆ័យ បាននិយាយក្រោយការប្រកួតថា៖ «ខ្ញុំគិតច្បាស់ពីបច្ចេកទេសប្រកួត ព្រោះថាក្បាច់គុនខ្មែរនេះ មិនអាចមើលរំលងបានទេ ដោយសារបច្ចេកទេសប្រកួតប្រែប្រួលទៅតាមយើងគិត និងប្រើប្រាស់ ហើយមានលទ្ធផលទៅតាមអ្វី ដែលយើងគិតសម្រេចធ្វើទៅត្រូវ»។
កីឡាកររូបនេះ បាននិយាយពីបច្ចេទេស យកឈ្នះ គង់ សំបូរ ដូច្នេះថា៖ «មានគេឱ្យតម្លៃខ្ញុំទាបណាស់ ក្នុងការប្រកួតជាមួយ គង់ សំបូរ ព្រោះកន្លងមកខ្ញុំប្រកួតគ្នាប្រហែលជិត ១០ លើក ខ្ញុំឈ្នះគាត់តែ ១ លើកប៉ុណ្ណោះ។ ខ្ញុំដឹងថា ក្បាច់របស់គាត់ ល្អតែមួយច្រកទេ គឺទាត់ធ្ងន់ ហេតុនេះខ្ញុំត្រៀមក្បាច់ទប់ទល់បានល្អ ដោយជង្គង់ និងកណ្តាប់ដៃ ហើយចូលកៀកមែនទែន ទើបបានផលល្អ ខណៈពេលនេះខ្ញុំធ្វើបានសម្រេច»។
ចំពោះការយកឈ្នះលើ ឯម ដារ៉ូ នៅក្នុងវគ្គផ្តាច់ព្រ័ត្រ សោម វិឆ័យ បានបញ្ជាក់ថា៖ «ចំណែកការយកឈ្នះលើ ឯម ដារ៉ូ ខ្ញុំបានគិតថា គាត់ល្អតែផ្នែកកណ្តាប់ដៃធ្ងន់មួយច្រក ហេតុនេះខ្ញុំវ៉ៃឆ្ងាយ ទាត់ឆ្ងាយ និងគេចពីការប្តូរកណ្តាប់ដៃមកវ៉ៃតាមលក្ខណៈបច្ចេកទេស ដោយដកថយស្រង់យកពិន្ទុវិញ។ ការសម្រេចត្រូវបែបនេះ នាំឱ្យខ្ញុំទទួលបានលទ្ធផលឈ្នះ លើកនេះគួរឱ្យពេញចិត្តណាស់»។
សម្រាប់ការដណ្តើមបានតំណែងជើងឯក របស់ សោម វិឆ័យ នេះ គឺខុសពីក្តីរំពឹងទុក ហើយការទស្សន៍ទាយរបស់មហាជន ពិតជាខុសឆ្ងាយស្រឡះ ព្រោះវត្តមានរបស់ សោម វិឆ័យ មុនការប្រកួត គឺមានភាគរយទស្សន៍ទាយពីមហាជនថាឈ្នះនោះ តិចបំផុត ដោយសារតែមហាជនភាគច្រើន បានសម្លឹង និងផ្តោតទៅលើកីឡាករ អេលីត ភក្តី និង គង់ សំបូរ ប៉ុន្តែលទ្ធផលជាក់ស្តែងវិញ គឺអ្នកទាំង២នេះ បានចាញ់ធ្លាក់តាំងពីវគ្គជម្រុះជុំទី១។
លោក ឡុង វិបុល គ្រូបង្វឹក សោម វិឆ័យ បាននិយាយថា៖ «សោម វិឆ័យ ជើងចាស់មានបទពិសោធល្អ ប៉ុន្តែវាប្រកួតពេលខ្លះល្អ ពេលខ្លះខ្សោយពេក ដោយសារតែការហ្វឹកហាត់មិនបានជាប់លាប់។ ប្រសិនវាហាត់បានល្អ គោរពវិន័យល្អវិញ ពិតជាលំបាករកដៃគូមែន គឺនិយាយទៅវាល្អឱបឡើងជង្គង់ក្នុងការផ្តួលដៃគូប្រកួត ចំណែក ឯម ដារ៉ូ មួយរយៈនេះក៏លេចមុខល្បីគួរសម ក្នុងការប្រកួតមានប្រជាប្រិយ»។
ចំពោះកីឡាករ ឯម ដារ៉ូ បានបង្ហាញការរីករាយ ទោះបានត្រឹមចំណាត់ថ្នាក់លេខ ២ ជាមួយប្រាក់រង្វាន់ចំនួន ១,៨ លានរៀល។ «ខ្ញុំសប្បាយចិត្ត បានត្រឹមលេខ ២ ហើយការចាញ់នេះ ខ្ញុំទទួលស្គាល់ថា ចាញ់ ប៉ុន្តែបច្ចេកទេសវ៉ៃ ខ្ញុំគិតខុស ដោយខ្ញុំគិតតែប្រើក្បាច់កណ្តាប់ដៃ ហេតុនេះគេដឹង គេការពារបិទជិត ខ្ញុំវ៉ៃមិនចូលគោលដៅល្អ»។
ឯម ដារ៉ូ បានប្រាប់បន្ថែមថា៖ «ខ្ញុំគិតខុស និងសម្រេចចិត្តប្រើកណ្តាប់ដៃខុស។ ប្រសិនខ្ញុំប្តូរមកទាត់ជើងវិញ ខ្ញុំនឹងទទួលបានលទ្ធផលល្អ ហើយខ្ញុំលំបាកប្រកួត ដោយសារដៃគូវ៉ៃរបៀបដកថយនេះ គឺពិតជាលំបាកឈ្នះណាស់ ហេតុនេះ អ្វីដែលខ្ញុំចង់បាន គឺការចូលវាយសម្រុកដូចគ្នា ធានាថា ចាញ់ឬឈ្នះ ល្អមើលតែម្តង»។
ចំណែកលោក ជួប វុត្ថា អ្នកផ្គូផ្គងប្រចាំសង្វៀនថោន បាននិយាយថា៖«សម្រាប់ជ័យជម្នះរបស់ សោម វិឆ័យ បានលេខ ១ នេះ អ្នកទស្សន៍ទាយខុសឆ្ងាយណាស់ ដោយសារពួកគាត់ភាគច្រើនសម្លឹងឃើញថា សោម វិឆ័យ នៅក្រោម ឯម ដារ៉ូ, អេលីត ភក្តី និង គង់ សំបូរ ពិសេសធ្លាប់ចាញ់ញឹកញ៉យផង ប៉ុន្តែការពិតជាក់ស្តែង ក្បាច់បុរាណខ្មែរទស្សន៍ទាយមុន មិនអាចត្រូវនោះឡើយ»៕