The Phnom Penh Post Search

Search form




Logo of Phnom Penh Post newspaper Phnom Penh Post - គណៈ​អចិន្ត្រៃយ៍ ​CAMSOC អនុម័ត​លើ​បទ​បញ្ញតិ​ និង​គុណ​ផល​កីឡា​




គណៈ​អចិន្ត្រៃយ៍ ​CAMSOC អនុម័ត​លើ​បទ​បញ្ញតិ​ និង​គុណ​ផល​កីឡា​

Content image - Phnom Penh Post
លោក វ៉ាត់ ចំរើន ពេល​ថ្លែង នៅ​ក្នុងកិច្ច​ប្រជុំ កាលពី​ព្រឹក​ថ្ងៃអង្គារ។ រូប​ភាព សហការី

គណៈ​អចិន្ត្រៃយ៍ ​CAMSOC អនុម័ត​លើ​បទ​បញ្ញតិ​ និង​គុណ​ផល​កីឡា​

ភ្នំពេញ៖ គណៈអចិន្ត្រៃយ៍​​ របស់គណៈកម្មាធិការជាតិរៀបចំការ​ប្រកួតកីឡា​អាស៊ីអាគ្នេយ៍ លើកទី​៣២ ឆ្នាំ​២០២៣ (CAMSOC) បាន​បើក​កិច្ច​ប្រជុំ​ប្រចាំ​សប្តាហ៍​កាល​ពី​ព្រឹក​ថ្ងៃ​អង្គារ​ដើម្បី​ឆ្លង​ផែន​ការ​មេ​នៃ​ដំណើរ​​ឆ្ពោះ​​ទៅធ្វើ​ជាម្ចាស់​ផ្ទះ ហ្គេម លើក​ទី​៣២ ឆ្នាំ ​២០២៣ នេះ។

​តាម​រយៈ​កិច្ច​ប្រជុំនោះ អង្គប្រជុំបាន​លើក​ឡើង​យក​​របៀប​វិរៈ​ចំនួន​ពីរ​ដើម្បី​អនុម័ត​ជា​មួយ​ភាគី​ពាក់​ព័ន្ធ ដោយ​​ផ្តោត​ទៅ​លើ​បទ​បញ្ញតិ​ផ្សេងៗ​និង​គុណ​ផល​​កីឡា​ខណៈ​ដែល​ប្រធាន​បទ​ទាំង​ ២ ​​នេះ ​បាន​ផ្តោត​ឆ្ពោះ​លើ​ការ​កសាង​ធន​ធាន​សមត្ថភាព​អត្តពលិក​ការ​ស្វែង​រកការ​​ហ្វឹក​ហាត់​ និង​ការ​ប្រ​កួត​ឱ្យ​​មាន​លទ្ធផល​ល្អ​ទៅ​តាម​បទ​បញ្ជា​នៃ​ការ​ប្រកួត​គោរព​បទ​បញ្ញត្តិ​ជា​ធរមាន​។

លោក ​វ៉ាត់ ​ចំរើន ​អគ្គ​លេខាធិការ ​CAMSOC ​​បាន​ថ្លែង​​ប្រាប់​ក្រុម​អ្នក​រាយ​ការណ៍​ព័ត៌មាន ក្រោយ​កិច្ច​ប្រជុំ​​ថា​៖ «​អ្វី​ដែល​សំខាន់​ក្នុង​សេចក្តី​អនុម័ត​ព្រឹក​នេះ​គឺ​ការប្រ​មូល​ផ្តុំធន​ធាន​អត្តពលិក​ដែល​ក្នុង​នោះ​ការ​ហ្វឹក​ហាត់​ទាំង​ក្នុង​និង​ក្រៅ​ប្រទស​ជា​កត្តា​សំខាន់​បំផុត​​ព្រោះ​ការ​ហាត់​ក្រៅ​ប្រទេស​ គឺ​ទទួល​ផល​ល្អ​ហេតុ​នេះ​រាជ​រដ្ឋាភិបាល​កម្ពុជា​ និង​រដ្ឋាភិបាល​ប្រ​ទេស​ចិន​ មាន​កិច្ច​ព្រម​ព្រៀង​ពិសេស​ក្នុងការ​ត្រៀម​បញ្ជូន​កីឡា ​១២ ​ប្រ​ភេទ ​ដែល​មាន​ចំនួន​ ១៣៥​ នាក់​ ទៅ​ហ្វឹក​ហាត់​ ហើយ​​ភា​គី​ចិន​កំពុង​ពិចារណា​គិត​គូ​ពី​កន្លែង​ហ្វឹក​ហាត់​កន្លែង​ហូប​និង​ស្នាក់​នៅ​ឱ្យ​​មាន​សុវត្ថិភាព​ការពារ​ជំងឺ​​ឆ្លង​កូវីដ ១៩»​។

លោក​បន្ត​ថា ​យើង​សាទរ​ចំពោះ​សហព័ន្ធ​កីឡាជាតិ​មួយ​ចំនួន​ដែល​បាន​ស្វែង​រក​ដៃ​គូ​ក្រៅ​ប្រទេស​ ដើម្បី​បាន​ហ្វឹក​ហាត់​ក្រៅ​ពី​គម្រោង​នៅ​ប្រទេស​ប្រទេស​ចិន​ មាន​ដូច​ជា​ប្រដាល់​សកល​គុនដាវ​​ប្រណាំង​កង់​ប្រណាំង​សេះ​ និងការ៉ាតេ​​ជា​ដើម​ដែល​សហព័ន្ធ​ទាំង​នេះ ​មាន​លទ្ធភាព​រក​បាន​ដៃ​គូ​ជួយ​ឧបត្ថម្ភ​តាម​ខ្សែ​បណ្តោយ​។

​ជា​មួយ​គ្នា​នេះ​យើង​បាន​អបអរ​សាទរ​វត្ត​មាន​ក្រុម​អត្តពលិក​កូន​ខ្មែរ​នៅ​ក្រៅ​ប្រ​ទេស​ដែល​សរុប​ជាង​ ៣០​ នាក់​ កំពុង​ស្ម័គ្រ​ចិត្ត​ហ្វឹក​ហាត់​ដោយ​ខ្លួន​ឯង​ក្រោម​ការ​លើក​ទឹក​ចិត្ត និង​​ត្រួត​ពិនិត្យ​ពី​គ្រូ​បង្វឹក​​របស់​សហព័ន្ធ​ ព្រម​ទាំង​គណៈ​កម្មាធិការ​ជាតិ​អូឡាំ​ពិក​កម្ពុជា​ និង​​មជ្ឈមណ្ឌល​ជាតិ​ហ្វឹក​ហ្វឺន​កីឡា​ ដើម្បី​ឱ្យ​​ពួក​គាត់​សម្រួច​ជំនាញ​ឱ្យ​ល្អ​។​

Content image - Phnom Penh Post
លោក វ៉ាត់ ចំរើន ពេល​ថ្លែង នៅ​ក្នុងកិច្ច​ប្រជុំ កាលពី​ព្រឹក​ថ្ងៃអង្គារ។ រូប​ភាព សហការី

លោក ​វ៉ាត់​ ចំរើន បាន​​បន្ថែម​ថា​៖ «​គោល​ដៅ​របស់​យើង ​បាញ់​ឆ្ពោះ​ទៅ​លើ​កីឡា​ជំនាញ​កម្រិត​ខ្ពស់​ ដើម្បី​គោរព​បទ​បញ្ញត្តិ​ដែល​រួម​គ្នា​ដោះ​ស្រាយ​លើ​កត្តា​ប្រឈម​។​​ចំ​ពោះ​ការ​ហ្វឹក​ហាត់​ យើង​​ចាប់​ផ្តើម​ជំរុញ​​ឱ្យ​​បាន​ខ្លាំង​ក្លា​ចាប់​ពី​ឆមាស​ទី២ ​ឆ្នាំ​ ២០២១​ នេះ​ទៅ»​។

​អ្នកជំនាញ​កីឡា​រូបនេះ បាន​បញ្ជាក់​ថា៖​ «​បើ​តាម​ការ​ចង្អុល​បង្ហាញ​ពី​ឯកឧត្តម​ថោង​ខុន​អនុ​ប្រធាន​អចិន្ត្រៃ​យ៍ CAMSOC ​បាន​ជំរុញ​ឱ្យ​​មាន​ការ​ហ្វឹក​ហាត់​បោះ​ជំរំ​ និង​មាន​វិធាន​ការ​បិទ​ខ្ទប់​ក្នុង​កន្លែង​ហ្វឹក​ហាត់​ដោយ​សហ​ការ​ជាមួយ​មជ្ឈមណ្ឌល​ជាតិ​ហ្វឹក​ហ្វឺន​ធានា​ឱ្យ​បាន​នូវ​ការ​ចម្លង​​ជំងឺ​​កូវីដ ១៩ ​ក្នុង​កំឡុង​ហ្វឹក​ហាត់​ ដើម្បី​បង្កើន​គុណ​ផល​របស់​អត្តពលិក​យើង​​ព្រោះ​បើ​បណ្តែត​បណ្តោយ​ឱ្យ​ហាត់​តាម​ប្រពន្ធ័​អន​ឡាញ​មិន​អាច​ធានា​បាននូវ​​សិទ្ធិផល​ល្អ​នោះ​ទេ គឺ​​បាន​ត្រឹម​រក្សា​សិទ្ធិ​ផល​ចាស់​ប៉ុណ្ណោះ»​៕

អត្ថបទគួរចាប់អារម្មណ៍