ភ្នំពេញ៖ ការចាប់គូប្រកួតរបស់កីឡាករមានសមត្ថភាពកម្រិតមធ្យម ឬក្រោមមធ្យមពិតជាលំបាកស្វែងរកការប្រកួតណាស់ ប៉ុន្តែសម្រាប់កីឡាករឆ្នើមៗ លំដាប់ជួរមុខ មិនលំបាកស្វែងរកការប្រកួតនោះទេ ទោះបីសម័យកូវីដ ១៩ រាតត្បាតក៏ដោយ។ បន្ថែមពីលើនេះ ការចាប់គូ ត្រូវបានគេសង្កេតឃើញថា មិនទាន់ផ្តាច់ចេញពីការនិយមបក្ខពួកទាំងស្រុងនៅឡើយទេ ដែលធ្វើឱ្យកីឡាករមិនសូវល្បីពិតជាលំបាករកការប្រកួតមែន។
ជាក់ស្តែង អ្នកប្រដាល់ឆ្នើមកម្រិតមធ្យម លី តឿន ដែលមានមុខរបរបន្ថែមជាកម្មករសំណង់នោះ កំពុងតែជួបបញ្ហាជីវភាពធ្ងន់ធ្ងរ ព្រោះការជាប់គាំង ដោយសារកូវីដ ១៩ នេះ រូបគេគ្មានការងារធ្វើ ហើយរយៈពេល ៦ ខែមកនេះ គេបានឡើងប្រកួតតែ ២ ដងប៉ុណ្ណោះ។ បន្ថែមពីលើនេះ លី តឿន បានប្រសូត្រកូនភ្លោះម្តង ២ ធ្វើឱ្យស្ថានភាពជីវភាព កាន់តែលំបាក រកអាហារឱ្យកូន និងប្រពន្ធ ហូបមិនបាន។
ជាមួយភាពទីទល់នេះ លី តឿន បានដាច់ចិត្ត សរសេរលិខិតមួយច្បាប់ រៀបរាប់ពីទុក្ខលំបាករបស់ខ្លួន ហើយបានផ្ញើតាមរយៈមិត្តភ័ក្តិជាកីឡាករដូចគ្នាដើម្បីឱ្យបណ្តាញសារព័ត៌មាន ជួយផ្សព្វផ្សាយ ដោយសង្ឃឹមថា ដំណឹងនេះ នឹងលេចឮទៅដល់អ្នកមានចិត្តធម៌ និងសប្បុរសជនជិតឆ្ងាយ ក្រែនមានអ្នកជួយឧបត្ថម្ភ ដើម្បីបានអាហាចិញ្ចឹមកូនខ្ចី និងគ្រួសាររបស់ខ្លួន ដែលគ្មានលទ្ធភាព។
នៅក្នុងលិខិតត្អូញត្អែរនោះ លី តឿន ដែលគ្មានទាំងទូរស័ព្ទតម្លៃថោកៗប្រើផងនោះ បានសរសេររៀបរាប់ថា៖ «ខ្ញុំបាទឈ្មោះ លី តឿន និងប្រពន្ធឈ្មោះ សួន តូច បច្ចុប្បន្នរស់នៅភូមិអង្គជ័យ ឃុំអង្គជ័យ ស្រុកអង្គជ័យ ខេត្តកំពត។ ខ្ញុំបាទ ជួបប្រទះនូវជីវភាពលំបាកខ្លាំង រកអាហារឱ្យប្រពន្ធ និងកូនហូបមិនបានទេព្រោះការងារធ្វើកម្មករសំណង់ ត្រូវបានផ្អាក»។
កីឡាករជួបភាពទីទល់ក្រ លី តឿន បានបន្ថែមថា៖ «ចំណែកការហ្វឹកហាត់ឡើងប្រកួត ចាប់គូមិនបាន ដោយក្នុងពេលជំងឺកូវីដ ១៩ រាតត្បាតរយៈពេលជាង ៦ ខែនេះ ខ្ញុំបានប្រកួតតែ ២ លើកទេ ដោយប្រកួតម្តងៗ ឈ្នះបានតែ ៤០ ម៉ឺនរៀល។ ខ្ញុំបាទ និងប្រពន្ធ មានកូនភ្លោះចំនួន ២ ហូបមិនគ្រប់គ្រាន់ ធ្លាក់ខ្លួនឈឺ ហេតុនេះ ខ្ញុំសូមគោរព និងស្នើសុំបងប្អូន ដែលមានចិត្តអាណិតអាសូរ មេត្តាជួយដល់ពួកខ្ញុំផង។ ខ្ញុំអាណិតកូនៗណាស់ ដែលកើតមក គ្មានទឹកដោះបំបៅឡើយ»។
កាលពីសប្តាហ៍មុន លី តឿន ទទួលបានឱកាសឡើងប្រកួត នៅសង្វៀនបាយ័ន ដោយប្រកួតជាមួយកីឡាករ ថាន់ បំរ៉ុង ហើយទទួលបានលទ្ធផលចាញ់ពិន្ទុយ៉ាងគ្រាំគ្រាខ្លួន ទទួលបានតម្លៃខ្លួនប្រកួតចំនួន ៣៥ ម៉ឺនរៀល ប៉ុន្តែមានកីឡាករជាមិត្តភ័ក្តិមួយចំនួន គេអាណិត ក៏បានជួយឧបត្ថម្ភប្រាក់ខ្លះទៀត ដើម្បីជួយទិញអង្គរ និងថ្នាំឱ្យកូនខ្ចីភ្លោះទាំងពីរ នៅឯស្រុក។
លី តឿន ជាកីឡាករធ្លាប់នៅក្លិបមិត្តប៉ូលិស មុនប្តូរមកក្លិបមកុដរាជសីហ៍ដែលមានលោកគ្រូ គង់ ចាន់ធីណា ជាអ្នកគ្រប់គ្រង។ កីឡាករ លី តឿន បានសារភាពដោយចិត្តស្ម័គ្រថា៖ «ខ្ញុំពិតជាទីទាល់ក្រមែន ហើយប្រហែល៣ខែ បានប្រកួតម្តង គឺមិនអាចរស់បានទេ»។
អ្នកប្រដាល់ដ៏កម្សត់ លី តឿន បានបញ្ជាក់ថា៖ «មុនកូវីដ ១៩ ទោះខ្ញុំ មិនសូវបានប្រកួត ក៏មានការងារធ្វើជាកម្មករសំណង់ដែរ ហើយប្រពន្ធគាត់ រែកនំបញ្ចុកលក់ គឺអាចទប់ទល់ជីវភាពបាន ប៉ុន្តែពេលនេះកូនខ្វីភ្លោះពីរ ហើយមិនបានលក់ដូ ថែមទាំងគ្មានការងារទៀត។ មុនសម័យកូវីដ ១៩ ទោះជាគ្មានប្រាក់ ក៏ខ្ញុំមិនដែលចេះត្អូញត្អែរពីក្រលំបាកដែរ ដោយនៅតែស្វែងរកការងារបានធ្វើ និងបានប្រកួតញឹកញាប់ផងដែរ ប៉ុន្តែឥឡូវដាច់ចិត្តសុំ ដើម្បីរស់ប៉ុណ្ណោះ»។
ចំណែកលោក គង់ ចាន់ធីណា បាននិយាយថា៖ «កីឡាករ លី តឿន នេះ គ្នាលំបាកក្រីក្រណាស់! និយាយទៅទាល់ក្រតែម្តង ព្រោះប្រពន្ធមានកូនខ្ចី កូនភ្លោះ ២ គ្មានម្តាយឪពុក រស់នៅជាមួយទេ។ ខាងក្លិបក៏គ្មានលទ្ធភាពជួយដែរ ព្រោះនៅក្នុងពេលកូវីដ ១៩ នេះ លំបាកដូចគ្នា»។
ប្រធានក្លិបមកុដរាជសីហ៍ លោក ចាន់ធីណា បានបន្ថែមថា៖«ចំណែកកីឡាករនៅក្នុងក្លិបមួយចំនួនទៀត ក៏លំបាក គឺការរស់នៅដំណើរការបាន ដោយសារមិត្តភ័ក្តិជួយបានខ្លះតែប៉ុណ្ណោះ។ ឥឡូវ លី តឿន មកហាត់នៅក្លិបដើម្បីស្វែករកការប្រកួតឱ្យបានញឹកញាប់ ហើយខ្ញុំក៏ស្នើឱ្យព័ត៌មាន ជួយផ្សាយឱ្យគ្នាផង ដើម្បីបានអាហារជួយប្រពន្ធ និងកូនតូចៗ»។
គួរបញ្ជាក់ថា កីឡាករ លី តឿន មានស្រុកកំណើត នៅភូមិត្រពាំង ព្រៃឃុំគ្រាំងដេវ៉ាយ ស្រុកភ្នំស្រួច ខេត្តកំពង់ស្ពឺ ហើយបានទៅរស់នៅខាងប្រពន្ធ ស្ថិតនៅភូមិអង្គជ័យ ឃុំអង្គជ័យ ស្រុកអង្គជ័យ ខេត្តកំពត មានមុខរបរបន្ថែមធ្វើកម្មករសំណង់ និងរែកនំបញ្ចុកលក់។
បច្ចុប្បន្ន លី តឿន មានអាយុ ២៩ ឆ្នាំ ជាកីឡាករលំដាប់កម្រិតមធ្យម វ៉ៃក្នុងទម្ងន់ ៦០ គីឡូក្រាម តែធ្លាប់ដណ្តើមបានជើងឯករង ការប្រកួតថ្នាក់ជាតិម្តង។ចំណែកបទពិសោធឡើងប្រកួត នៅលើសង្វៀនវិញ លី តឿន មានប្រវត្តិប្រកួតបាន ៧៦ ដង ឈ្នះ ៥៣ ចាញ់ ២២ និងស្មើ ១ ដង ក្នុងនោះធ្លាប់ផ្តួលដៃគូឱ្យសន្លប់បាន ៥ ដង៕