The Phnom Penh Post Search

Search form




Logo of Phnom Penh Post newspaper Phnom Penh Post - កីឡាករ ឯម​ សុធី​ ផ្តួល​ ឡុង ​រ៉ាមី ​ត្រឹម​ទឹកទី២ ​ប៉ុន្តែ​​គ្មានឱកាសបានឡើង​​ទៅ​ប្រកួត​វគ្គ​បន្ត




កីឡាករ ឯម​ សុធី​ ផ្តួល​ ឡុង ​រ៉ាមី ​ត្រឹម​ទឹកទី២ ​ប៉ុន្តែ​​គ្មានឱកាសបានឡើង​​ទៅ​ប្រកួត​វគ្គ​បន្ត

Content image - Phnom Penh Post
កីឡាករ ឯម សុធី បាន​ម៉ាត់​ទៅ​លើ ឡុង រ៉ាមី សម្រាប់ការ​ប្រកួតជម្រុះ​ដណ្តើមខ្សែ​ក្រវាត់ នៅ​លើ​សង្វៀន PNN។ រូប​ថត សហការី

កីឡាករ ឯម​ សុធី​ ផ្តួល​ ឡុង ​រ៉ាមី ​ត្រឹម​ទឹកទី២ ​ប៉ុន្តែ​​គ្មានឱកាសបានឡើង​​ទៅ​ប្រកួត​វគ្គ​បន្ត

ភ្នំពេញ៖ អ្នក​ប្រដាល់​ជើង​ចាស់ ឯម ​សុធី​ បាន​ប្រើ​បច្ចេក​ទេស​យ៉ាង​ល្អ ក្នុង​ការ​​ផ្តួល​កីឡាករ​ជើង​ថ្មី​ ឡុង ​រ៉ាមី ​ឱ្យ​​សន្លប់ នៅ​ត្រឹម​ទឹកទី​២​ ប៉ុន្តែ ឯម សុធី មិនទទួល​បាន​ផល​ពី​ជ័យជម្នះ​នេះ ដើម្បី​ទទួល​បាន​កៅអីឡើង​ទៅ​ប្រកួត​នៅ​វគ្គ ​៨ នាក់​ចុង​ក្រោយ នៃ​ការ​ប្រកួតដណ្តើម​ខ្សែ​ក្រវាត់នៅ​លើ​សង្វៀន PNN នោះ​ទេ។

ការ​មិនទទួលបាន​ផល​ពីការ​ប្រកួតនេះ កាលពី​ថ្ងៃអាទិត្យ​នោះ ក៏​ព្រោះ​តែ ឯម សុធី ​ត្រូវ​បាន​​​ពិន័យ​ឱ្យ​​ចាញ់ ដោយសារ​​រក្សា​ទម្ងន់​មិន​បាន​ តាម​លក្ខខណ្ឌ​កំណត់​នៃ​កិច្ច​សន្យា​ប្រ​កួត ​ក្នុងវគ្គ​​ជម្រុះ​ខ្សែ​ក្រវាត់​ត្រឹម ​៥៧ ​គីឡូក្រាម​ អ៊ីចឹង​ការ​ប្រកួត​រវាង ឯម សុធី និង ឡុង រ៉ាមី ត្រូវ​បាន​គណៈ​កម្មការ​ប្រ​កួត​ ប្តូរមក​ជាការ​ប្រកួត​​គូ​មិត្ត​ភាព​វិញ ​ហើយ​លទ្ធផល​កីឡាករ​បាន​ឡើង​ទៅ​វគ្គ​បន្ត ​ត្រូវ​បាន​ប្រគល់​ទៅ​ឱ្យ ​ឡុង ​​រ៉ាមី ​ដោយ​ស្វ័យប្រ​វត្តិ ​តាំង​ពី​ការ​ថ្លឹងទម្ងន់ ​មុនការ​​ប្រ​កួត ​ដែល ​ឯម ​សុធី ​លើស​ទម្ងន់​រហូត​ដល់ ​២ ​គីឡូក្រាម។​

អ្នក​គ្រប់​គ្រង​កម្ម​វិធី​ប្រ​ដាល់ នៅ​សង្វៀន PNN ​លោក ​ស្រ៊ឺ ស្រេង បាន​​ប្រាប់​​ថា​ ទម្រង់​នៃ​ការ​ប្រ​កួត​របស់​សង្វៀន​ PNN ​សហការ​ជា​មួយ​សហព័ន្ធកីឡា​​ប្រ​ដាល់​គុន​ខ្មែរ​នេះ​ ត្រូវ​បាន​លោក​ តែម ​ម៉ឺន ជា​ប្រធាន​សហព័ន្ធ ​​សម្រេច​ដាក់​ឱ្យ​​មាន​ការ​ប្រ​កួត ​ដោយ​អនុវត្ត​យ៉ាង​ម៉ឺង​មាត់ ​មាន​តម្លាភាព​ ក្នុង​ការ​គោរព​លក្ខខណ្ឌ​ប្រ​កួត​ គឺ​គ្មានការ​​យោគ​យល់​ ឬ​និយម​បក្ខ​ពួក​ដាច់​ខាត ​ហើយ​ទាំង​ពេល​កន្លង​មក ​ក៏​ដូច​ពេល​កំពុង​អនុវត្ត​នៃ​ច្បាប់​ប្រ​កួត​នេះ គឺធានា​បាន​ថា ​គ្មានការ​​ស៊ី​សំណូក​ណា​មួយ ​ដោយ​ផ្តល់​ពិន្ទុ​ពី​សំណាក់​ចៅ​ក្រម​ មិន​ត្រឹម​ត្រូវ ​ព្រម​ទាំង​គ្មាន​កីឡាករ​ណា​ ហ៊ាន​ប្រព្រឹត្ត​បទ​ល្មើស​ដូច​ជា​ប្រ​កួត​ធ្វើ​ពុត​ចាញ់​នោះ​ឡើយ​។​

លោក​ ស្រ៊ឺ ស្រេង ហៅ សំណព្វ បាន​បន្ថែម​ថា​៖ «​​តាម​ន័យ​នេះ​ កីឡាករ ​ឡុង ​រ៉ាមី ​ទោះ​បាន​ត្រូវ​ចាញ់ ​ដោយ​សន្លប់ ​ដោយ​សមត្ថភាព​ពិត​របស់​កីឡាករ ​ឯម ​សុធី ​វាយ​សន្ធាប់​ ប៉ុន្តែ​ ឯម សុធី គ្មាន​ឱកាស​បាន​ឡើង​ទៅ​វគ្គ​បន្ត​​ទេ​ គឺ​តាម​ច្បាប់​ប្រ​កួត ​ដែល​រក្សា​ទម្ងន់​តាម​កិច្ច​សន្យា​មិន​បាន​ត្រឹម​ ៥៧​ គីឡូក្រាម​នោះ​ គឺ​បានកំណត់​ឱ្យ​​ចាញ់​ជា​ស្វ័យ​ប្រ​វត្តិ ​តាំង​ពី​មុន​ការ​ប្រ​កួត​មក​ម៉្លេះ​ហើយ​លទ្ធផល​នៃ​ការ​ប្រកួត​រវាង​ ឯម ​សុធី​ និង​ ឡុង ​រ៉ាមី ​នេះ​ ត្រូវ​បាន​កំណត់​ឱ្យ​​ជា​គូ​មិត្តភាព​វិញ​ជំនួស​កម្ម​វិធី​គូ​ដណ្តើម​ខ្សែ​ក្រវាត់​»។​

Content image - Phnom Penh Post

ដោយឡែក ​ការ​ប្រកួត​ម៉ារ៉ាតុង​រវាង​គូ​ប្រដាល់​ពន្លក​ថ្មី ​ទម្ងន់​ស្រាល​ ៤៨​ គី​ឡូក្រាម ដណ្តើម​ប្រាក់​ចំនួន​ ១,​២ លាន​រៀល​ បាន​ទៅ​លើ​កីឡាករ ​ឡុង ​ពិសិដ្ឋ​ មក​ពី​ក្លិប​ខ្លារខិន​មាន​រិទ្ធ​ បន្ទាប់​ពី​រូបគេ​បាន​ឈ្នះ​កីឡាករ ​ឌឿន ​សុខ​លីម​ នៅ​ក្នុងវគ្គជម្រុះ ហើយបាន​​បន្ត​ទៅ​ឈ្នះ​កីឡាករ ​ឡៅ​ សៃ​ណេត ​មក​ពី​ក្លិប​បញ្ជា​ការ​ដ្ឋាន​ទ័ព​ពិសេស​ នៅវគ្គ​ផ្តាច់​ព្រ័ត្រ នោះ។

យ៉ាង​ណាមិញ សម្រាប់​ការ​ប្រ​កួត​ Onestrike ដែល​​មានត្រឹម​​ ២ ​ទឹក​ ហើយ​ក្នុង​ ១ ​ទឹក​​មាន​ ​៧ ​នាទី​ នោះ ​កីឡាករ ​ជ័រ ​ពៅ​ មក​ពី​ក្លិប​ថ្ម​គោល​ បាន​ផ្តួល​កីឡាករ ​ភិន ​សុចាន់ទី​ របស់​​ក្លិប​នាគ​រាជ​ចតុមុខ ក្នុងការ​ប្រកួត​​ប្រ​ភេទ​ទម្ងន់​ ៦០ ​គីឡូក្រាម ​ដើម្បី​យក​ប្រាក់​រង្វាន់​បន្ថែម​ចំនួន ១ លានរៀល៕

អត្ថបទគួរចាប់អារម្មណ៍