ភ្នំពេញ៖ គ្រូបង្វឹកក្រុមណាហ្គាវើលដ៍ លោក មាស ចាន់ណា បានចាត់ទុកការប្រកួតជាមួយក្រុមម្ចាស់ផ្ទះអង្គរថាយហ្គឺរ នៅរសៀលម៉ោង ៣:៣០ នាទី ថ្ងៃអង្គារនេះថា ជាការប្រកួតដ៏តានតឹង ដោយលោកបានសារភាពថា ក្រុមណាហ្គាវើលដ៍ មិនធ្លាប់ឈ្នះអង្គរថាយហ្គឺរនៅលើទឹកដីខេត្តសៀមរាបនេះ ម្តងណាទេ គឺមានតែចាញ់ហើយ និងស្មើ។
ជាមួយគ្នានេះ ក្រុមណាហ្គាវើលក៏បានអវត្តមានកីឡាករបរទេសសំខាន់ ២ នាក់ផងដែរ គឺខ្សែប្រយុទ្ធមានធំ LeucaPetru ជាពិសេសខ្សែបម្រើជនជាតិជប៉ុន Fumiya Kogure ដែលគេម្នាក់នេះ តែងតែស្ថិតនៅក្នុងជម្រើសដំបូងហើយកាលប្រកួតជាមួយក្រុមអាស៊ីអឺរ៉ុបកាលពីថ្ងៃទី ១៤ ខែកក្កដា Fumiya Kogure រកបាន ២ គ្រាប់ ក្នុងជ័យជម្នះ ៥-៣ មុនពេលរូបគេត្រូវបានប្តូរចេញ ដោយមានរបួស។
លោក មាស ចាន់ណា បានប្រាប់កាលពីថ្ងៃចន្ទថា៖ «ការត្រៀមរបស់យើងថា ល្អក៏មិនល្អថា អាក្រក់ក៏មិនអាក្រក់ ព្រោះយើងត្រៀមធម្មតាដូចការប្រកួតសព្វដងដែរ គ្រាន់តែលើកនេះ យើងមានបញ្ហាកីឡាករឈឺច្រើន គឺកីឡាករបរទេសរបស់យើង ២ នាក់បានឈឺ ខណៈការប្រកួតកន្លងមក យើងដាក់កីឡាករបរទេសឱ្យចូលលេងយ៉ាងច្រើនបានត្រឹម ៣ នាក់ទេ គឺមិនដែលដាក់ ៤ នាក់ឡើយ អ៊ីចឹងដល់ពេលអ្នកត្រូវដាក់ឱ្យលេងបានឈឺបែបនេះ វាអាចនឹងមានការប៉ះពាល់ដល់ការប្រកួតនេះផងដែរ»។
លោក មាស ចាន់ណា បន្ថែមថា៖ «ការប្រកួតនេះ វាអាចនឹងមានភាពតានតឹងសម្រាប់ខ្ញុំហើយ ព្រោះខ្ញុំមកប្រកួតនៅទីនេះ (សៀមរាប) មិនដែលបានឈ្នះក្រុមអង្គរថាយហ្គឺរ ទេ គឺមានតែចាញ់ និងស្មើ តែអង្គរថាយហ្គឺរ ពេលទៅលេងនៅភ្នំពេញមានតែចាញ់ខាងខ្ញុំមិនដែលឈ្នះឡើយ គឺវាប្រៀបដូចជាការចែកទឹកដីគ្នាអ៊ីចឹងដែរ»។
គួររំឭកថា សម្រាប់ការជួបគ្នា ត្រឹម ១ លើក កាលពីរដូវកាលឆ្នាំ ២០២០ ក្រុមរបស់លោក មាស ចាន់ណា បានចាញ់ក្រុមម្ចាស់ផ្ទះអង្គរថាយហ្គឺរ ២-០ ចំណែកពេលនេះ អង្គរថាយហ្គឺរ មានទម្រង់លេងកាន់តែល្អ និងកំពុងឈរនៅលើកំពូលតារាង ដោយមាន ១៩ ពិន្ទុ ជាមួយការឈ្នះ ៦ ស្មើ ១ និងទើបតែចាញ់ក្រុមវិសាខា ៣-១ កាលពីពេលថ្មីៗនេះ ខណៈក្រុមណាហ្គាវើលដ៍ កំពុងឈរនៅលេខ ៦ ដោយ ៧ ប្រកួតមកនេះ ពួកគេឈ្នះ ៤ ស្មើ ២ និងចាញ់ ១ ប្រកួត។
ជាមួយគ្នានេះ លោក មាស ចាន់ណា បានគិតរួចទៅហើយថា អង្គរថាយហ្គឺរ ពិតជាចង់ឈ្នះក្រុមណាហ្គាវើលខ្លាំង ដើម្បីអាចបន្តមហិច្ឆតាឆ្ពោះទៅរកការប្រជែងយកពានក្នុងរដូវកាលនេះ ខណៈប្រធានក្លិបអង្គរថាយហ្គឺរលោក Akihiro Kato ក៏កំពុងជំរុញក្រុមលោកឱ្យបង្កើនការខំប្រឹង ដើម្បីសម្រេចក្តីសុបិននេះផងដែរ ប៉ុន្តែលោក មាស ចាន់ណា បានបង្ហើបថា អង្គរថាយហ្គឺរ ក៏អាចជួបការបរាជ័យដោយសារតែការចង់ឈ្នះណាហ្គាវើលខ្លាំងពេកនេះផងដែរ។
គ្រូបង្គោលក្រុមណាហ្គាវើលដ៍រូបនេះបានបញ្ជាក់ថា៖ «ចំពោះការវិលមកជួបគ្នាជាថ្មីនេះ យើងមិនទាន់អាចនិយាយបានទេ ព្រោះអង្គរថាយហ្គឺរ ពេលនេះ ល្អជាងពីឆ្នាំមុនៗ ហើយខ្ញុំដឹងថា ពួកគាត់ពិតជាចង់ឈ្នះក្រុមខ្ញុំខ្លាំងណាស់ ព្រោះបើមិនអាចឈ្នះក្រុមខ្ញុំទេ គឺអង្គរថាយហ្គឺរ វេទនាឈានទៅដណ្តើមតំណែងជើងឯកហើយ»។
លោក មាស ចាន់ណា បានបញ្ជាក់បន្ថែមថា៖ «ទោះយ៉ាងណា បើគេកាន់តែចង់ឈ្នះ ខ្ញុំកាន់តែចង់ស្មើ ហើយបើគេចង់ឈ្នះ ខ្ញុំចង់ស្មើ គឺខាងខ្ញុំអាចមានឱកាសឈ្នះវិញ ប៉ុន្តែបើយើងចង់យកឈ្នះគេតែម្តង គឺវាពិបាកនឹងឈ្នះទៅវិញ»៕