ភ្នំពេញ៖ ប្រតិភូ និងក្រុមអត្តពលិកកម្ពុជា បានធ្វើដំណើរចាកចេញពីមាតុប្រទេស កាលពីព្រឹកថ្ងៃអង្គារនេះ ដោយហោះបោះពួយ តាមយន្តហោះ ទៅកាន់ទឹកដីប្រទេសជប៉ុន ដើម្បីចូលរួមការប្រកួតកីឡាអូឡាំពិក ទីក្រុងតូក្យូ ឆ្នាំ ២០២០ នេះ ដែលត្រូវបានលើកមកធ្វើ ចាប់ពីថ្ងៃទី ២៣ ខែកក្កដា ដល់ថ្ងៃទី ៨ ខែ សីហា ឆ្នាំ២០២១។
អ្នកជំនាញកីឡាករ លោក វ៉ាត់ ចំរើន ដែលជានាយកបេសកកម្មដឹកនាំប្រតិភូកម្ពុជា ទៅចូលរួមព្រឹត្តិការណ៍នេះ បានដឹងរួចទៅហើយថា កីឡាករ កីឡាការិនីទាំង៣នាក់របស់កម្ពុជា ដែលទទួលបានសិទ្ធិអនុគ្រោះ ទៅចូលរួមប្រកួតកីឡាំពិកនេះ មានសមត្ថភាព នៅឆ្ងាយពីកម្រិតអូឡាំពិក គឺមិនអាចនឹងឈានដល់ការដណ្តើមបានជយលាភីល្អទេ។ តែទោះបីជាយ៉ាងណា លោកបានអះអាងថា ការប្រកួតកីឡា យើងត្រូវតែមានសង្ឃឹមជានិច្ច។
លោក វ៉ាត់ ចំរើន បានថ្លែងថា៖ «ទ្រឹស្តីក្នុងកីឡា គឺមុះមុត ព្យាយាម និងមានទំនុកចិត្ត ព្រមទាំងសង្ឃឹមជឿជាក់ ដោយឡែកក្នុងអូឡាំពិក ជាការប្រកួតប្រជែងកម្រិតខ្ពស់ណាស់ សូម្បីតែបេក្ខភាព ក្នុងគ្រប់ប្រភេទកីឡានីមួយៗ មុនបានឈ្មោះចូលរួមប្រកួត ត្រូវឆ្លងកាត់ការប្រកួតជម្រុះតាមតំបន់ តាមទ្វីបជាមុនសិន»។
លោកបន្ថែមថា៖ «ប៉ុន្តែនយោបាយរបស់អូឡាំពិកអន្តរជាតិ បានផ្តល់ភាពអនុគ្រោះ ជូនដល់អត្តពលិកនៃប្រទេសជាសមាជិកអូឡាំពិករបស់ខ្លួន ហើយកម្ពុជា ទទួលបានសិទ្ធិអនុគ្រោះ ទៅលើប្រភេទកីឡាហែលទឹក និងកីឡាអត្តពលកម្ម អ៊ីចឹងជាកាត្វកិច្ច យើងត្រូវចូលរួម ដោយខានមិនបានឡើយ ចំណែកលទ្ធផលយើងមិនអាចនិយាយថា នឹងទទួលបានកម្រិតណានោះទេ ព្រោះវាផ្ទុយពីទ្រឹស្តីកីឡា ដែលត្រូវមានសង្ឃឹមជានិច្ច តែបើយើងនិយាយថា គ្មានសង្ឃឹម នោះកីឡាករ នឹងបាក់ទឹកចិត្ត»។
សម្រាប់ការប្រកួតកីឡាអូឡាំពិកនេះ កីឡាករហែលទឹក ហែម ប៊ុច និងកីឡាការិនី ឃឿន ប៊ុនពេជ្រមរកត នឹងត្រូវចូលរួមប្រកួតលើវិញ្ញាសាហែលសេរី ចម្ងាយ ៥០ ម៉ែត្រដូចគ្នា ចំណែកកីឡាករអត្តពកម្ម ប៉ែន សុគង់ នឹងត្រូវប្រកួតរត់ល្បឿន ១០០ ម៉ែត្រ ខណៈការប្រកួតនេះ លោក វ៉ាត់ ចំរើន រំពឹងថា ពួកគេ អាចនឹងអាចបំបែកឯតទគ្គកម្មខ្លួនឯង។
អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានបញ្ជាក់ថា៖ «ចំពោះរឿងដណ្តើមយកមេដាយ ឬក៏យកជយលាភី យើងឃើញថា សម្រាប់ក្រុមអត្តពលិកយើង នៅឆ្ងាយពីកម្រិតអូឡាំពិកពិភពលោកនេះ តែយើងសង្ឃឹមថា ក្រុមកីឡាករ កីឡាការិនីជម្រើសជាតិកម្ពុជាយើង នឹងអាចបំបែកឯតទគ្គកម្មខ្លួនឯង»។
នៅមុនការចេញដំណើរ ទៅចូលរួមការប្រកួតអូឡាំពិក នៅជប៉ុននេះ លោកបណ្ឌិត ថោង ខុន បានរៀបចំកម្មវិធីជួបសំណេះសំណាល និងលើកទឹកចិត្ត ដល់ប្រតិភូកីឡាកម្ពុជា កាលពីថ្ងៃចន្ទ ហើយក្នុងនាមជាប្រធាន NOCC លោក ថោន ខុន បានឧបត្ថម្ភថវិកា ដល់ប្រតិភូ និងអត្តពលិក ក្នុងម្នាក់ៗចំនួន ៦០០ ដុល្លារ៕