.jpg)
សកម្មភាពជិះម៉ូតូធំ ឆ្លងកាត់ទីជនបទ ក្នុងប្រទេសកម្ពុជា របស់ក្រុមអ្នកជិះម៉ូតូមកពីប្រទេសចិន ដែលទើបបានបញ្ចប់ កាលពីថ្ងៃន្ទ។ រូបថត សហការី
ភ្នំពេញ៖ ក្រុមអ្នកជិះកីឡាម៉ូតូធំ មិនមែនអាជីព មកពីប្រទេសចិន បានបញ្ចប់បេសកកម្ម ការជិះតូម៉ូធំ ក្នុងប្រទេសកម្ពុជា នៅខេត្តរតនគិរី ក្រោយពីពួកគេបានជិះម៉ូតូធំ ឆ្លងកាត់ខេត្តកណ្តាល កំពង់ចាម ត្បូងឃ្មុំ សៀមរាប ក្រចេះ និងខេត្តស្ទឹងត្រែង។
ជាមួយនឹងការជិះម៉ូតូធំលក្ខណៈកម្សាន្តតាមតំបន់ទេសចរណ៍ និងទស្សនាទេសភាព នៅជនបទរបស់ក្រុមម៉ូតូធំមកពីប្រទេសចិននេះ ក៏បានផ្តោតផងដែរទៅដល់ការងារមនុស្សធម៌ ជនជាតិក្រីក្រ នៅខេត្តរតនគិរី ដែលបានបិទបញ្ចប់កាលពីព្រលប់ថ្ងៃចន្ទ នៅក្រុងបានលុង។
លោក យុគ គន្ធរ ជាអ្នកនិយមចូលចិត្តជិះម៉ូតូធំ បានប្រាប់ឱ្យដឹងថា ក្រុមម៉ូតូធំនេះ បានចេញដំណើរពីភ្នំពេញ កាលពីថ្ងៃទី ១៥ ខែ កកដ្កា ឆ្នាំ ២០២១ ក្នុងនោះមានម៉ូតូ ៩ គ្រឿង និងរថយន្តចំនួន ៤ សម្រាប់ដឹកស្បៀងអាហារ និងគ្រឿងបរិភោគ មានអង្ករ មី ត្រីខ ទឹកត្រី ជាដើមដើម្បីផ្តល់ជូនជនក្រីក្រ នៅជនបទ នាខេត្តឆ្ងាយៗ។
លោកបានបន្តថា៖ «នេះជាបេសកកម្មជិះម៉ូតូមនុស្សធម៌ គ្មានពាក់ព័ន្ធបញ្ហានយោបាយ ជំនួញសេដ្ឋកិច្ច ឬស្វែងរកប្រាក់ចំណេញអ្វីនោះទេ ដោយអ្នកជិះមកពីប្រទេសចិនទាំងនេះ បានជិះក្នុងលក្ខណៈកម្សាន្តស្វែងយល់ពីជីវភាពរស់នៅរបស់ពលរដ្ឋខ្មែរ និងជនជាតិភាគតិច ក្នុងប្រធានបទ Long Live Biker Friendship ដោយបានជិះឆ្លងកាត់ខេត្តជាច្រើន លើចម្ងាយផ្លូវសរុប ៣០ ០០០ គីឡូម៉ែត្រ»។
តំណាងឱ្យអ្នកជិះកម្ពុជា លោក យុគ គន្ធរ បានប្រាប់បន្ថែមថា៖ «ខ្ញុំមានដើមកំណើតបារាំង តែបានមករស់នៅកម្ពុជា តាំងពីឆ្នាំ ១៩៩២។ ខ្ញុំនិយមជិះម៉ូតូរាល់ចុងសប្តាហ៍ ជាពិសេសកូនៗខ្ញុំទាំង ៣ នាក់ គាត់ហ្វឹកហាត់ជាលក្ខណៈកីឡាករកីឡារិនីពាក់កណ្តាលអាជីព»។
លោកបានបញ្ជាក់ថា៖«សម្រាប់ការជិះម៉ូតូលើកនេះ គឺជាឱកាសមិត្តភាពយូរអង្វែង ដើម្បីជ័យជម្នះ ដោយយើងប្រើប្រធានបទ Long Live Biker Friendship ហើយខ្លឹមសារមួយទៀត នៃការជិះម៉ូតូនេះ គឺសប្បាយ សុខភាពល្អ មានអារម្មណ៍ជ្រះថ្លា ជាមួយធម្មជាតិ និងមានឱកាសធ្វើការងារមនុស្សធម៌ ព្រោះអ្នកជិះទាំងនេះ មិនមែនអាជីពទេ គឺភាគច្រើនអ្នកជំនួញពាណិជ្ជកម្ម និងក្រុមហ៊ុនប៉ុន្តែពួកគាត់ស្រឡាញ់កីឡាជិះម៉ូតូឆ្លងកាត់ឧបសគ្គលក្ខណៈកម្សាន្ត និងទេសចរណ៍នេះ»។
ចំណែកលោកស្រី ហឿង ឃឿង មន្ត្រីសាលាខេត្តរតនគីរី ដែលបានស្ម័គ្រចិត្តសម្របសម្រួលក្រុមអ្នកជិះម៉ូតូ មិនមែនអាជីពនេះ បានប្រាប់ថា៖ «ខ្ញុំចំណាយពេលច្រើន ក្នុងការជូនដំណើរពួកគាត់ជិះទៅតំបន់ជាច្រើន ក្នុងក្រុងបានលុង និងស្រុកមួយចំនួន មានស្រុកលំផាត់ ស្រុកកូនមុំ រយៈពេល ៣ ថ្ងៃ នៅក្នុងខេត្តរតនគិរី ឱ្យទទួលបានលទ្ធផលល្អ»។
លោកស្រីបានបន្ថែមថា៖ «ខ្ញុំសូមសរសើរទឹកចិត្តរបស់ក្រុមកីឡាម៉ូតូធំនេះដែលមានចិត្តមនុស្សធម៌ ដូចជាអ្នកកាន់ពុទ្ធសាសនា គឺបានជិះដល់មូលដ្ឋានផ្ទាល់ ឆ្លងកាត់ឧបសគ្គ មានផ្លូវលំបាកជាច្រើន និងបានចែកម៉ាស អាកុល លាងដៃ ព្រមទាំងផ្តល់អង្ករ មី ត្រីខ ជាគ្រឿងហូប ដោយសហការជាមួយអាជ្ញាធរមូលដ្ឋាន សម្របសម្រួលបានល្អ គឺជាកាយវិការមនុស្សធម៌ សុទ្ធសាធ។ កម្មវិធីបែបនេះប្រជាពលរដ្ឋ និងរដ្ឋអំណាចពេញចិត្ត ព្រោះជាកីឡាទេសចរណ៍ និងមនុស្សធម៌ ជួយសង្គមជាតិ»។
លោក CHARLE GAN តំណាងអ្នកជិះម៉ូតូធំនេះ បាននិយាយថា៖ «ក្រុមជិះម៉ូតូខ្ញុំនេះ មិនមែនប្រណាំងអាជីពទេ តែជាលក្ខណៈនិយមចូលចិត្ត ដោយជិះជាលក្ខណៈមនុស្សធម៌ និងចង់បង្ហាញថា ជនជាតិចិន គឺមានមនុស្សល្អច្រើន និងគោរពស្រឡាញ់កម្ពុជា»។
លោកបានបន្ថែមថា៖ «ខ្ញុំបានមកដល់កម្ពុជា និងស្គាល់ប្រទេសកម្ពុជា ព្រមទាំងចេះនិយាយភាសាខ្មែរបាន ហើយបានជិះម៉ូតូក្នុងតំបន់នានា នៅកម្ពុជា បានរយៈសម្ងាយជាង ៣ ម៉ឺនគីឡូម៉ែត្រហើយ។ នៅពេលបញ្ហាកូវីដ ១៩ ធូរស្រាលក្រុមកីឡាម៉ូតូធំ មិនមែនអាជីពរបស់យើងខ្ញុំ នឹងជិះទៅខេត្តណា ដែលមានប្រជាពលរដ្ឋក្រីក្រ បើសិនអាជ្ញាធរ រដ្ឋអំណាច សហការ និងបង្ករលក្ខណៈឱ្យល្អបន្តទៀត»៕
