.jpg)
ភ្នំពេញ៖ នាយបេសកកម្មកីឡាអូឡាំពិកតំណាងឱ្យកម្ពុជាលោក វ៉ាត់ ចំរើន បានអះអាងថា ការបញ្ជូនប្រតិភូ និងក្រុមអត្តពលិកកម្ពុជាទៅចូលរួមការប្រកួតកីឡាអូឡាំពិកទីក្រុងតូក្យូឆ្នាំ ២០២០ ដែលបានលើកមកធ្វើនៅឆ្នាំ ២០២១ នេះថា ជាកាតព្វកិច្ចមិនអាចខកបាន គឺយើងទៅចូលរួមដើម្បីសន្ដិភាពទៅដើម្បីលើកទឹកចិត្តម្ចាស់ផ្ទះ ទៅដើម្បីបំពេញកាតព្វកិច្ចជាសមាជិកចលនាអូឡាំពិកពិភពលោក។
លោក វ៉ាត់ ចំរើន បានថ្លែងថា៖ «អ្វីដែលយើងទាំងអស់គ្នាមានមោទនភាព គឺបេសកកម្មលើកនេះ វាខុសពីបេសកកម្មលើកមុនៗ ហេតុនេះទោះបីជាមានការបារម្ភពីគ្រួសារ ឬមិត្តភក្តិតែប្រតិភូកីឡាយើងទាំងអស់នៅតែមានឆន្ទៈមោះមុតក្នុងការចូលរួមហើយត្រូវចូលរួមឱ្យបាន ដើម្បីតំណាងកម្ពុជា តំណាងទង់ជាតិកម្ពុជាក្នុងពិធីបើកកីឡាអូឡាំពិក ៤ ឆ្នាំម្ដងក្នុងនាមកម្ពុជាជាសមាជិកចលនាអូឡាំពិកអន្ដរជាតិដែលមិនអាចលះបង់ការចូលរួមនេះបានឡើយ»។
«កម្ពុជាបានចូលជាសមាជិកគណៈកម្មាធិការអូឡាំពិកអន្ដរជាតិឡើងវិញ បន្ទាប់ពីថ្ងៃរំដោះ ៧ មករា គឺនៅឆ្នាំ ១៩៩៤ ហើយយើងបានចូលរួមការប្រកួតកីឡាអូឡាំពិក ក្រោយពីសង្គ្រាមស៊ីវិល គឺនៅឆ្នាំ ១៩៩៦ អ៊ីចឹងតាំងឆ្នាំ ១៩៧២ រហូតដល់ឆ្នាំ ១៩៩៦ ក្នុងរង្វង់នៃប្រទេសមានសង្គ្រាមយើងមិនបានចូលរួមទេ»។
លោក វ៉ាត់ ចំរើន បានបន្តថា៖ «ប៉ុន្តែឥឡូវនេះ គឺប្រទេសមានសុខសន្ដិភាពពេញលេញហើយប្រទេសជាតិក៏មានការរីកចម្រើន អ៊ីចឹងយើងទាំងអស់គ្នាត្រូវតែថែរក្សាការចូលរួមក្នុងនាមសមាជិក និងជាកាតព្វកិច្ចឱ្យបានជារៀងរាល់ឆ្នាំ បើទោះបីមានបញ្ហាកើតឡើងក្នុងការរៀបចំអូឡាំពិកក៏ដោយ ក៏យើងត្រូវតែចូលរួមដែរ ព្រោះយើងទាំងអស់គ្នា មានស្មារតីអូឡាំពិកនៅក្នុងបេះដូងយើងទាំងអស់គ្នា»។
ការលើកឡើងបែបនេះរបស់លោក វ៉ាត់ ចំរើន ត្រូវបានធ្វើឡើង នៅឯព្រលានយន្តហោះអន្តរជាតិភ្នំពេញ កាលពីថ្ងៃអង្គារ គឺមុនពេលលោកត្រូវដឹកនាំប្រតិភូ និងក្រុមអត្តពលិកកម្ពុជា សរុប ៨ នាក់ (អត្តពលិក ៣ នាក់) ហោះបោះពួយទៅកាន់ប្រទេសជប៉ុន ដើម្បីចូលរួមការប្រកួតកីឡាអូឡាំពិក ឆ្នាំ ២០២០ នេះ ដែលត្រូវធ្វើចាប់ពីថ្ងៃទី ២៣ ខែកក្កដា ដល់ថ្ងៃទី ០៨ ខែ សីហា ឆ្នាំ ២០២១ ខាងមុខ។
អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បន្ថែមថា៖ «ការប្រកួតឈ្នះចាញ់ គឺជារឿងមួយ ចំណែកការចូលរួមប្រកួតកីឡាអូឡាំពិក លោក Pierre De Coubertin បានថ្លែងហើយថា កីឡាអូឡាំពិកសំខាន់ជាងគេ គឺការចូលរួម ព្រោះជាការដែលធ្វើឱ្យពិភពលោកមានមិត្តភាព សាមគ្គីភាព និងសន្ដិភាពដោយកម្ពុជាយើងបានដាក់ទ្រឹស្ដីក្នុងបាវចនានៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ ២០២៣ ថា កីឡារស់ក្នុងសន្ដិភាព អ៊ីចឹងយើងទៅនេះ ទៅដើម្បីសន្ដិភាពទៅដើម្បីលើកទឹកចិត្តម្ចាស់ផ្ទះ ទៅដើម្បីបំពេញកាតព្វកិច្ចជាសមាជិកចលនាអូឡាំពិកពិភពលោក»។
អ្នកជំនាញកីឡារូបនេះ បានបញ្ជាក់ថា៖ «អ្វីដែលយើងចង់បានត្រឡប់មកវិញ គឺកិត្តិយសសេចក្ដីថ្លៃថ្នូរដែលកីឡាករកីឡាការិនីរបស់យើងខិតខំប្រឹងក្នុងការប្រកួត ហើយប្រកួតដោយមោទនភាពគោរពគោលការណ៍ FairPlay គោរពបទបញ្ជាការប្រកួត និងប្រកួតដោយក្រមសីលធម៌ល្អ»។
លោកបន្តថា៖ «ទោះបីកីឡាករ-កីឡាការិនីរបស់យើងមានចំនួនតិចមែន ប៉ុន្ដែយើងនឹងនាំត្រឡប់មកវិញនូវកិត្ដិយសមិនឱ្យយើងពាក់ព័ន្ធទៅនឹងសារធាតុដូប៉ា ឬរំលោភបទបញ្ជាការប្រកួតទេ។នេះហើយជាការអបអរសាទរមួយ ដែលប្រមុខរាជរដ្ឋាភិបាលសម្ដេចតេជោ នាយករដ្ឋមន្ដ្រីបានយកចិត្តទុកដាក់ណាស់ ចំពោះវិស័យកីឡា»៕
