ភ្នំពេញ៖ ក្រុមអ្នកជំនាញរបស់សហព័ន្ធកីឡាបាល់ទាត់កម្ពុជា បាននឹងកំពុងធ្វើការពិនិត្យទៅលើខ្សែវីដេអូ ទាក់ទងទៅនឹងការកាត់សេចក្តីរបស់លោកអាជ្ញាកណ្តាល ឃិន ឧសីហា ក្នុងការប្រកួតរវាងក្រុមណាហ្គាវើលដ៍ និងក្រុមម្ចាស់ផ្ទះ អង្គរថាយហ្គឺរ កាលពីថ្ងៃអង្គារ មុននឹងឈានទៅដល់ការវាយតម្លៃ និងប្រកាសជាផ្លូវការ ពីការពិត ថាតើការសម្រេចរបស់អាជ្ញាកណ្តាលរូបនេះ ពិតជាខុសឆ្គង បង្កើតឱ្យមានភាពចម្រូងចម្រាស ឬយ៉ាងណា?។
ការឈានទៅដល់ការពិនិត្យឡើងវិញ នៅខ្សែវីដេអូនៃការប្រកួតនេះ ក៏ព្រោះតែជំនួបរវាងក្រុមទាំង ២ បានបញ្ចប់ដោយភាពចម្រូងចម្រាស ព្រោះការប្រកួតនេះ សមាជិករបស់ក្រុមម្ចាស់ផ្ទះ អង្គរថាយហ្គឺរ ២ រូប គឺខ្សែការពារ ស្រាំង ទិត្យឈី និង ឈង់ ប៊ុនណាត សុទ្ធតែត្រូវបានបណ្តេញចេញពីទីលាន ដោយការពិន័យកាតក្រហម ពីលោកអាជ្ញាកណ្តាល ឃិន ឧសីហា ស្របពេលក្រុមណាហ្គាវើលដ៍ បានយកឈ្នះក្រុមនេះ ២-១ ជាលើកដំបូង នៅលើទឹកដីខេត្តសៀមរាបនេះ។
ជាមួយគ្នានេះ លោក Akihiro Kato ប្រធានក្លិបអង្គរថាយហ្គឺរ បានសម្តែងការមិនសប្បាយចិត្ត ចំពោះលទ្ធផលនេះទេ ហើយអ្វីដែលលោកមានការខកចិត្តខ្លាំង និងចង់ដឹងពីចម្លើយពិតនោះ គឺការសម្រេចរបស់អាជ្ញាកណ្តាល ចំពោះការមិនផ្តល់គ្រាប់បាល់ ពីការតែតបាល់បញ្ចូលទីរបស់ខ្សែប្រយុទ្ធក្រុមអង្គរថាយហ្គឺរ Da Crus នៅនាទីទី៥៤។
ដោយភ្ជាប់ជាមួយវីដេអូខ្លី ជុំវិញការតែតបាល់បញ្ចូលទីរបស់ Da Crus នេះ បុរសជនជាតិជប៉ុន លោក Akihiro Kato បានបង្ហោះនៅលើផេចហ្វេសប៊ុកផ្ទាល់ខ្លួន ដោយអារម្មណ៍ខកចិត្តខ្លាំងថា៖ «រហូតមកដល់ពេលនេះ ខ្ញុំបានលះបង់របស់របរផ្សេងៗ។ តើ foul នេះ នៅឯណា? តើនេះពិតជាល្អ សម្រាប់បាល់ទាត់កម្ពុជាមែនទេ? ព្រោះយើងជាក្លិបជប៉ុន?»។
បន្ទាប់ពីមើលឃើញពីការប្រកួត និងការបង្ហាញពីការបាក់ទឹកចិត្តរបស់ប្រធានក្លិបអង្គរថាយហ្គឺរ លោក Akihiro Kato នេះ រដ្ឋលេខាធិការក្រសួងអប់រំ យុវជន និងកីឡា លោក ស សុខា ក៏បានប្រតិកម្ម ទៅលើភាពអសកម្ម នៃការសម្រេចសេចក្តីរបស់លោកអាជ្ញាកណ្តាល ផងដែរ ហើយលោកបានជំរុញឱ្យភាគីពាក់ព័ន្ធ គួរវាយតម្លៃទៅលើអាជ្ញាកណ្តាល (លោក ឃិន ឧសីហា) ឡើងវិញ។
លោក ស សុខា បានសរសេរបង្ហោះ នៅលើផេចហ្វេសប៊ុករបស់លោក ទាំងកណ្តាលយប់ កាលពីថ្ងៃអង្គានោះថា៖ «ខ្ញុំសូមចូលរួមជាមួយលោក អាគីហ៊ីរ៉ូ កាតូ ( Akihiro Kato )ប្រធានក្លិបបាល់ទាត់អង្គរថាយហ្គឺរ! ១ រឿងនេះកើតឡើងដដែលៗ ច្រើនលើកច្រើនសារពេកហើយ។ ២ ចំពោះការសម្រេចចិត្តរបស់អាជ្ញាកណ្តាល លើទីលាន យល់ថា មានការលំបាក ក៏ប៉ុន្តែយើងត្រូវតែមើលមួយចំហៀងទៀត ការដាក់ទុនរបស់ក្លិបនីមួយៗសព្វថ្ងៃ ដោយក្នុង ១ ឆ្នាំៗចំណាយមិនក្រោមជាង ៦០ ម៉ឺន ទៅ ១ លានដុល្លារទេ»។
ស្ថាបនិកក្លិបបាល់ទាត់វិសាខា ស សុខា បានបន្ថែមថា៖ «ដូច្នេះ ទទូចឱ្យភាគីពាក់ព័ន្ធទាំងអស់ មេត្តាជួយពិនិត្យមើលការងារនេះ និងធ្វើការវាយតម្លៃ ទៅលើអាជ្ញាកណ្តាលឡើងវិញ។ ក្នុងនាមជាកូនខ្មែរមួយរូប ខ្ញុំសូមអរគុណចំពោះលោក Akihiro Kato ដែលបានលះបង់អ្វីៗទាំងអស់ ដើម្បីវិស័យកីឡាបាល់ទាត់នៅកម្ពុជាអស់ជាច្រើនឆ្នាំមកនេះ»។
នៅក្រោយទទួលបានដំណឹងពីការរិះគន់ទាំងម្ចាស់ក្លិបអង្គរថាយហ្គឺរ និងមន្រ្តីជំនាញរបស់ក្រសួងអប់រំ យុវជន និងកីឡា ព្រមទាំងអ្នកគាំទ្រយ៉ាងច្រើនទៀតនោះ សហព័ន្ធកីឡាបាល់ទាត់កម្ពុជា កាលពីព្រឹកថ្ងៃពុធនេះ បានចាត់ក្រុមអ្នកជំនាញរបស់ខ្លួន ធ្វើការពិនិត្យឡើងវិញ ទៅលើខ្សែវីដេអូ នៃការប្រកួតនេះ ដើម្បីកំណត់ពីដើមហេតុឱ្យបានច្បាស់លាស់ មុននឹងឈានទៅដល់ការអនុវត្តតាមច្បាប់ និងសម្រេចជាផ្លូវការ ដើម្បីបញ្ចបបញ្ហាដ៏ចម្រូងចម្រាសនេះ។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់ភ្នំពេញប៉ុស្តិ៍ នៅថ្ងៃពុធនេះថា៖ «រឿងនេះ យើងត្រូវការពិនិត្យមើលទៅលើវីដេអូ និងអ្វីៗផ្សេងៗទៀត ដើម្បីមានប្រតិកម្ម តប ប៉ុន្តែពេលនេះ យើងអត់ទាន់មានប្រតិកម្មអ្វីទាំងអស់ ដោយសារខាងជំនាញកំពុងតាមដានលើការងារនេះ អ៊ីចឹងយើងគួរទុកពេលឱ្យក្រុមជំនាញ ធ្វើការងារសិនថា តើកំហុសនេះ វាកើតឡើងដោយអាជ្ញាកណ្តាលមែន ឬក៏កីឡាកររូបនោះ បានបង្កើតកំហុស ដូចការសម្រេចរបស់អាជ្ញាកណ្តាលមែន ហេតុនេះយើងត្រូវរង់ចាំការវាយតម្លៃរបស់ក្រុមជំនាញសិន ទើបយើង អាចសម្រេចជារួមបាន»។
គួរបញ្ជាក់ថា កីឡាករ ស្រាំង ទិត្យឈី របស់អង្គរថាយហ្គឺរ ត្រូវបានពិន័យកាតក្រហម នៅនាទីទី ៧៩ គឺបន្ទាប់ពីរូបគេ បានបង្កើតកំហុស ដោយយកដៃទៅប៉ះបាល់ នៅក្នុងតំបន់គ្រោះថ្នាក់ ធ្វើឱ្យក្រុមណាហ្គាវើលដ៍ ទទួលបានបាល់ពិន័យ ១១ ម៉ែត្រ ហើយខ្សែប្រយុទ្ធ Marcio ជាអ្នកធ្វើបានសម្រេច នៅនាទីទី៧៣ តែត្រូវបានកីឡាករ ថន សីហា តាមស្មើឱ្យក្រុមអង្គរថាយហ្គឺរ វិញ នៅនាទីទី ៨៣។
បន្ទាប់មកខ្សែការពារ ឈង់ ប៊ុនណាត ត្រូវបានពិន័យកាតក្រហមម្នាក់ទៀត នៅនាទីទី៨៦ ពីបទចាប់ទាញខ្សែបម្រើរបស់ណាហ្គាវើលដ៏ សុះ ស៊ូហាណា ហើយនៅក្នុងពេលក្រុមអង្គរថាយហ្គឺរ នៅសល់សមាជិក លើទីលានត្រឹម ៩ នាក់នេះ ខ្សែប្រុទ្ធ នុប តុលា ក៏រកបានគ្រាប់បាលជ័យជម្នះដ៏រំភើបឱ្យក្រុមរបស់ខ្លួន នៅនាទីទី ៩០+៥ ហើយវាក៏ជាជ័យជម្នះលើកដំបូង ដែលក្រុមណាហ្គាវើលដ៍ រកបាននៅលើទឹកដីខេត្តសៀមរាប ផងដែរ ខណៈជំនួបនៅទីនេះកន្លងមក ត្រូវបានគ្រូបង្វឹកក្រុមណាហ្គាវើលដ៍ លោក មាស ចាន់ណា បានប្រាប់មុនការប្រកួតថា បានត្រឹមចាញ់ និងស្មើ អង្គរថាយហ្គឺរ ប៉ុណ្ណោះ៕