ភ្នំពេញ៖ អ្នកប្រដាល់មានសមត្ថភាពឆ្នើមជួរមុខ ក្នុងប្រភេទទម្ងន់ ៥៧ គីឡូក្រាម បឺត សង្ឃឹម និងគ្រូបង្វឹករបស់គេ បានអះអាងថា បានត្រឹមខ្លួនរួចរាល់ ហើយ បឺត សង្ឃឹម នឹងប្រើក្បាច់ជង្គង់ ដើម្បីយកឈ្នះលើ អេ ណារ័ត្ន ក្នុងការប្រកួតជម្រុះដណ្តើមខ្សែក្រវាត់ នៅលើសង្វៀន PNN នារសៀលថ្ងៃអាទិត្យនេះ។
សម្រាប់ការប្រកួតរបស់ បឺត សង្ឃឹម និង អេ ណារ័ត្ន នេះ លោក តាំង លីហួរ មន្ត្រីសម្របសម្រួលព័ត៌មាន នៃសង្វៀន PNN បានឱ្យដឹងថា ប្រវត្តិប្រកួតរបស់អ្នកទាំងពីរនេះ មិនធ្លាប់ជួបគ្នាកន្លងមកទេ ហើយបទពិសោធឡើងសង្វៀនវិញ បឺត សង្ឃឹម ឡើងប្រកួតបានច្រើនជាង អេ ណារ័ត្ន ជាង ៣០ ដង ខណៈការប្រកួត ៣ សប្តាហ៍ មកនេះ កីឡាករ ប៊ុន សុធា និង ឡុង រ៉ាមី ដែលបានឆ្លងផុតវគ្គនេះ ត្រៀមជួបគ្នា នៅជុំទី ២ ហើយ សេក គឹមសាន្ត កំពុងរង់ចាំលទ្ធផលប្រកួតរវាង បឺត សង្ឃឹម និង អេ ណារ័ត្ន នេះ។
លោក បឺត សំខាន់ ជាគ្រូបង្វឹក បឺត សង្ឃឹម បាននិយាយថា៖ «ស្នៀតប្រកួត យើងត្រៀមវ៉ៃយកឈ្នះ ហើយរំពឹងថា នឹងឈ្នះបានឆ្លងចូលជុំទី ២។ កម្លាំង និងសមត្ថភាពក្បាច់គុនរបស់ បឺត សង្ឃឹម ធានាថា ល្អ ប៉ុន្តែពេលចូលប្រកួតដណ្តើមពាន ឬ ខ្សែក្រវាត់ កន្លងមក បឺត សង្ឃឹម ដូចជាធ្វើមិនសូវបានល្អ ជាពិសេស ពេលចូលដល់វគ្គពាក់កណ្តាលផ្តាច់ព្រ័ត្រ គឺចាញ់ និងធ្លាក់តែម្តង»។
ចំណែកកីឡាករ បឺត សង្ឃឹម បាននិយាយថា៖ «ខ្ញុំហ្វឹកហាត់ត្រៀមបានល្អ ដោយមានទំនុកចិត្តឈ្នះ តែវាតឹងតែង និងលំបាកដែរ មិនមែនស៊ីផុយទេ។ ទោះ អេ ណារ័ត្ន ជាអ្នកប្រដាល់ជំនាន់ក្រោយខ្ញុំមែន ប៉ុន្តែគាត់មានស្នៀតកែងល្អ ហេតុនេះខ្ញុំបិតកែងឱ្យជាប់ និងមានឱកាសលេងក្បាច់ជង្គង់ គឺរំពឹងឈ្នះ ៨០ ភាគរយ»។
ចំពោះកីឡាករ អេ ណារ័ត្ន វិញ បានប្រាប់ថា៖ «ខ្ញុំមានសង្ឃឹមឈ្នះត្រឹម ៥០ ភាគរយប៉ុណ្ណោះ ពីព្រោះកីឡាករ បឺត សង្ឃឹម គេចាស់វស្សាជាង និងល្អជង្គង់ខ្លាំង ហេតុនេះខ្ញុំគិតថាលំបាកប្រកួតណាស់»។
តាមប្រវត្តិប្រកួត ដែលទទួលបានពីគណៈកម្មការផ្គូផ្គង គឺ បឺត សង្ឃឹម មានអាយុ ២៨ ឆ្នាំកម្ពស់ ១,៦៦ ម៉ែត្រ ហើយធ្លាប់ប្រកួតឈ្នះចំនួន ៨០ ដង ចាញ់ ២០ ស្មើ ២ ដង ក្នុងនោះ បានផ្តួលដៃគូឱ្យសន្លប់ចំនួន ២៨ ដង។ ចំណែក អេ ណារ័ត្ន មានអាយុ ២៣ ឆ្នាំ កម្ពស់ ១,៦៥ ម៉ែត្រធ្លាប់ប្រកួតឈ្នះ ៤៧ ចាញ់ ១៤ និងស្មើ ២ ដង ក្នុងនោះបានផ្តួលដៃគូឱ្យសន្លប់បាន ១១ ដង៕