.jpg)
ខ្សែប្រយុទ្ធ Ajayi របស់វិសាខា ស៊ុតបាល់ គេចពីការតាមបិទរបស់ក្រុមភ្នំពេញក្រោន។ រូបថត CNCC
ភ្នំពេញ៖ ក្រុមមិនទាន់ស្គាល់ការចាញ់ដូចគ្នា គឺភ្នំពេញក្រោន និងវិសាខា នឹងត្រូវប្រកួតគ្នា នៅថ្ងៃសៅរ៍នេះ ហើយការវិលមកជួបគ្នារវាងក្រុមសម្បូរធនធានកីឡាករទាំង ២ នេះ ត្រូវបានគេមើលឃើញថា នឹងអាចផ្តល់ផលចំណេញទៅលើដល់ក្រុមអង្គរថាយហ្គឺរ ណាហ្គាវើល និងព្រះខ័នរាជស្វាយរៀង ដែលកំពុងឈរនៅក្នុងតំបន់កំពូលតារាងទាំង ៥ ជាមួយគ្នា។
តាមរយៈការបង្ហាញខ្លួននៅលីគកំពូលកម្ពុជា រដូវកាលឆ្នាំ ២០២១ នេះ ទាំងក្រុមវិសាខា និងភ្នំពេញក្រោន សុទ្ធតែធ្វើបានល្អ ព្រោះធនធានកីឡាករបរទេស និងកីឡាករក្នុងស្រុករបស់ក្រុមទាំង ២ នេះ សុទ្ធតែមានគុណភាពលេងបានល្អដូចគ្នា ហើយអ្វីដែលគួរឱ្យកត់សម្គាល់នោះ គឺគិតត្រឹមពេលនេះ មានតែ វិសាខា និងភ្នំពេញក្រោន នេះទេ ដែលមិនទាន់ស្គាល់ការចាញ់ ខណៈក្រុមធំៗផ្សេងទៀត បានជួបការបរាជ័យអស់ហើយ។
គិតមកដល់ពេលនេះ ក្រុមវិសាខា ដែលកំពុងឈរនៅលេខ ២ បានបញ្ចប់ការប្រកួត ៨ លើកហើយ ដោយឈ្នះ ៥ និងស្មើ ៣ មាន ១៨ ពិន្ទុ គឺតិចជាងក្រុមលេខ ១ អង្គរថាយហ្គឺរ ១ ពិន្ទុប៉ុណ្ណោះ ចំណែក ភ្នំពេញក្រោន ទើបប្រកួតបាន ៦ ដង ទេ ដោយឈ្នះ ៥ និងស្មើ ១ មាន ១៦ ពិន្ទុ និងកំពុងឈរនៅលេខ ៤។
សម្រាប់ការជួបគ្នាទាំង ២ លើក កាលពីឆ្នាំ ២០២០ ក្រុមវិសាខា និងភ្នំពេញក្រោន បានបញ្ចប់ការប្រកួតដោយលទ្ធផលស្មើ ២-២ នៅជើងទី ១ និង បន្តស្មើគ្នា ០-០ នៅជើងទី ២ ចំណែកការជួបគ្នាជាថ្មី នៅកីឡដ្ឋានរបស់ភ្នំពេញក្រោន លើកនេះ លោក ហុក សុចិត្រា បានមើលឃើញថា អាចនឹងមានភាពតានតឹងខ្លាំង ហើយភាគរយនៃការឈ្នះរបស់ក្រុមទាំង ២ គឺមានដូចគ្នា។
អគ្គលេខាធិការក្លិបបាល់ទាត់វិសាខាលោក ហុក សុចិត្រា បានប្រាប់ ភ្នំពេញ ប៉ុស្តិ៍ថា៖ «សម្រាប់ការរៀបចំក្រុម គឺយើងបានត្រៀមបានល្អទាំងកីឡាករបានជុំគ្នាល្អ ហើយគោលដៅរបស់យើងវិញ យើងត្រូវការឈ្នះ គឺមិនថា ជួបក្រុមណា ជាក្រុមណាទេ ដើម្បីរក្សាភាពមិនដែលចាញ់របស់យើង។ តែទោះបីជាយ៉ាងណា ការប្រកួតនេះ ពិតជាមានភាពតានតឹងមែន ព្រោះក្រុមទាំង ២ កំពុងតែមានសម្ទុះល្អ និងមានការរៀបចំក្រុមល្អដូចគ្នា អ៊ីចឹងលទ្ធភាពនៃការឈ្នះ គឺមាន ៥០ ទល់ ៥០ ភាគរយដូចគ្នា»។
យ៉ាងណាមិញ ក្រុមកំពុងឈរនៅលេខ ១ មាន ១៩ ពិន្ទុ អង្គរថាយហ្គឺរ ក្រុមឈរនៅលេខ ៣ មាន ១៧ ពិន្ទុ ណាហ្គាវើលដ៍ និងក្រុមឈរនៅលេខ ៥ មាន ១៦ ពិន្ទុ ព្រះខ័នរាជស្វាយរៀង អាចនឹងទទួលបានផលចំណេញពីការប្រឈមមុខដាក់គ្នារវាងក្រុមម្ចាស់ផ្ទះ ភ្នំពេញក្រោន និងវិសាខា លើកនេះ ព្រោះនៅថ្ងៃសៅរ៍ និងថ្ងៃអាទិត្យនេះ ក្រុមទាំង ៣ នេះ សុទ្ធតែត្រូវជួបក្រុមមានកម្រិតលេងទាបជាងខ្លួន ដែលពួកគេមានភាគរយខ្ពស់ក្នុងការដណ្តើមបាន ៣ ពិន្ទុបន្ថែម តែក្រុមស្វាយរៀង ក៏មិនអាចមើលរំលងក្រុមម្ចាស់ផ្ទះគិរីវង់សុខសែនជ័យបាននោះដែរ៕
កម្មវិធីប្រកួតនៅថ្ងៃសៅរ៍
-សូលទីឡូអង្គរ vs ណាហ្គាវើលដ៍ កីឡដ្ឋាន SRU ៣:៣០
-គិរីវង់ vs ព្រះខ័នរាជស្វាយរៀង កីឡដ្ឋានគិរីវង់ ៣:៣០
-ភ្នំពេញក្រោន vs វិសាខា កីឡដ្ឋាន Smart RSN ៦:៣០
២ ប្រកួត នៅថ្ងៃអាទិត្យ
-អាស៊ីអឺរ៉ុប vs អង្គរថាយហ្គឺរ កីឡដ្ឋាន AEU ៣:៣០
-អគ្គិសនីកម្ពុជា vs ខេត្តព្រៃវែង កីឡដ្ឋាន EDC ៣:៣០
