.jpg)
កីឡាករ អ៊ូច ធារិទ្ធ (ក្រហម) ទាត់ទៅលើគូប្រកួតកន្លងមក ខណៈពេលនេះ រូបគេកំពុងជួបរឿងដ៏អាក្រក់ សុំឱ្យសប្បុរសជន មេត្តជួយ ដល់គ្រួសាររបស់គេ។ រូបថត PNN
ភ្នំពេញ៖ អ្នកប្រដាល់ជើងខ្លាំងមានជំនាញទាំងប្រដាល់សកល និងគុនខ្មែរ អ៊ូច ធារិទ្ធ របស់ក្លិបអាណាចក្រគុនខ្មែរ កំពុងទទួលរងនូវបញ្ហាលំបាកធ្ងន់ធ្ងរ ដោយសារតែម្តាយបង្កើត និងប្អូនស្រីបានឆ្លងជំងឺកូវីដ ១៩ ហើយកំពុងសម្រាកព្យាបាល នៅពហុកីឡាដ្ឋានជាតិអូឡាំពិក។ មិនតែប៉ុណ្ណោះ ប្អូនស្រីឈ្មោះ អ៊ូច រាជនី ត្រូវបានជនដៃដល់ ចាប់អារក ក្នុងបន្ទប់អ្នកជំងឺ បណ្តាលឱ្យរងរបួសធ្ងន់ធ្ងរ ប៉ុន្តែមិនប៉ះពាល់ដល់អាយុជីវិតឡើយ។
អ៊ូច ធារិទ្ធ និយាយថា៖ «នេះជាទុក្ខជាន់លើទុក្ខ ដោយសារជនល្មើសម្នាក់នេះ មិនដឹងថាមានបញ្ហាខួរក្បាល ឬបែកថ្នាំអ្វីនោះទេ ព្រោះជាអ្នកជងឺកូវីដ ១៩ ដូចគ្នា ហើយស្ថិតនៅក្នុងបន្ទប់តែមួយ បានចាប់ប្អូនស្រីរបស់ខ្ញុំ សង្កត់អារក តែម្ដង។ ចំណែកម្ដាយរបស់ខ្ញុំ ដែលបានឃើញហេតុការណ៍ គឺភ្លាមៗនោះ គាត់ខំស្ទុះងើបមកជួយកូន ប៉ុន្តែងើបមិនរួច ហើយត្រូវធ្លាក់ពីលើគ្រែពេទ្យសន្លប់ថែមទៀត»។
តាមព័ត៌មានច្បាស់ការណ៍ បានឱ្យដឹងថា ជនរងគ្រោះ អ៊ូច រាជនី បានរបួសដៃដេរចំនួន១០ ថ្នេរ និងដាច់បំពង់ក ដេរចំនួន ៦ ថ្នេរ ចំណែកម្ដាយរបស់នាង សន្លប់ទើបដឹងខ្លួនវិញ ក្នុងសភាពយ៉ាប់ណាស់ ហើយជាមួយហេតុការណ៍ដ៏អាក្រក់ មិនធ្លាប់កើតមាននេះ កីឡាករ អ៊ូច ធារិទ្ធ ដែលជាកូន និងបងប្រុស បានស្នើសុំដល់បងប្អូនរួមជាតិ ដែលស្រឡាញ់រាប់អានមេត្តាជួយឧបត្ថម្ភដល់ក្រុមគ្រួសារដ៏កម្សត់មួយនេះផង ព្រោះជួបគ្រោះផ្ទួនៗ។
កីឡាករជម្រើសជាតិប្រដាល់សកលកម្ពុជា អ៊ួច ធារិទ្ធ ដែលខំប្រឹងហ្វឹកហាត់ឡើងប្រកួតដើម្បីរកប្រាក់ទ្រទ្រង់ជីវភាព ក្នុងគ្រួសារទាំងមូលនោះ បានប្រាប់បន្ថែមថា៖ «ម្តាយខ្ញុំ ឈ្មោះ ម៉ៃ រ៉ាន់ អាយុ ៦០ ឆ្នាំ និងប្អូនស្រីឈ្មោះ អ៊ូច រាជនី អាយុ ១៦ ឆ្នាំ ត្រូវបានជនដៃដល់ចាប់អារកចង់សម្លាប់ កាលពីយប់ថ្ងៃសុក្រ ខែកក្កដា ឆ្នាំ២០២១ ខណៈជនល្មើស គឺមិនដែលស្គាល់គ្នាពីមុនមកឡើយ គឺគេជាអ្នកជំងឺថ្មី ទើបចូលមកព្យាបាល ហើយមិនដឹងថា បែកថ្នាំញៀន ឬមានបញ្ហាខួរក្បាលនោះទេ ទើបធ្វើសកម្មភាពបែបនេះ»។
ប្អូនស្រីរបស់ អ៊ូច ធារិទ្ធ និងជនដៃដល់ ដែលបានចាប់នាងអាករ ក្នុងបំណងមនុស្សឃាត នៅកន្លែងព្យាបាលជំងឺកូវីដ ១៩។ រូបថត សហការី
ទោះជាយ៉ាងណាកីឡាករ អ៊ួច ធារិទ្ធ បានបញ្ជាក់ថា៖ «ខ្ញុំនៅតែប្រឹងប្រែងហ្វឹកហាត់សម្រាប់ការប្រកួត រកលុយជួយដល់គ្រួសារ ព្រោះមានតែខ្ញុំម្នាក់គត់ ដែលទ្រទ្រង់ជីវភាព នៅក្នុងគ្រួសារទាំងមូល ប៉ុន្តែខ្ញុំមានការព្រួយបារម្ភ ព្រោះបើខ្ញុំធ្លាក់ខ្លួនឈឺ ឬមានរបួសនោះ មិនដឹងថាបានអ្វីសម្រាប់ផ្គត់ផ្គង់ជីវភាពនោះឡើយ»។
ជើងខ្លាំងក្នុងទម្ងន់៦០គីឡូក្រាម អ៊ួច ធារិទ្ធ បញ្ជាក់ថា៖ «ខ្ញុំនៅសល់គម្រោងប្រកួត ដែលបានចុះកិច្ចសន្យាចំនួន៣ គឺការប្រកួតម៉ារ៉ាតុង នៅថ្ងៃអាទិត្យនេះ ជាមួយ ទូច ដេវីដ, ស៊ន រ៉ាគីមនិង ធន់ វណ្ណា បន្ទាប់មកជាប់ប្រកួតដណ្តើមខ្សែក្រវាត់ នៅសង្វៀន PNN នៅថ្ងៃទី ៨ ខែសីហា ជាមួយអ្នកលេងជង្គង់ស្រួច គង់ ហូវ មកពីខេត្តសៀមរាប និងកម្មវិធីប្រកួតម៉ាសហ្វៃមួយប្រកួតទៀត នៅសង្វៀនថោន នាថ្ងៃទី ១៥ ខែសីហា ឆ្នាំ ២០២១ នេះ»។
ចំណែកលោក ធី ណារិទ្ធ ជាគ្រូបង្វឹក បាននិយាយថា៖ «អ៊ួច ធារិទ្ធ គ្នាលំបាកខ្លាំងណាស់! ហាត់ឡើងប្រកួតនេះ ដើម្បីរកប្រាក់ជួយដល់ជីវភាពក្នុងគ្រួសារ ដែលគ្នារ៉ាប់រងទាំងស្រុង។ ចំណែកខាងក្លិប គ្មានលទ្ធភាពជួយទេ បានត្រឹមជួយអាណិត និងជួយអំពាវនាវ សុំឱ្យសប្បុរសជន មេត្តាជួយដល់គាត់ ព្រោះបើការប្រកួតញឹកញាប់ពេក អាចប៉ះពាល់ដល់សុខភាពមិនខាន»។
គ្រូប្រដាល់គុនខ្មែរ លោក ធី ណារិទ្ធ បានប្រាប់ន្ថែមថា៖ «កន្លងមក អ៊ូច ធារិទ្ធ ហាត់ល្អ ប្រកួតល្អ មានអត្តចរិតល្អ មិនខ្វះទីផ្សារប្រកួតទេ ប៉ុន្តែដើម្បីប្រាក់សម្រាប់ជីវភាព ខ្ញុំក៏ព្រួយបារម្ភពីបញ្ហាសុខភាព ឬគ្រោះថ្នាក់ដែរ ព្រោះរូបគេត្រូវប្រកួតសុទ្ធតែជាមួយកំពូលកីឡាករខ្លាំងៗ វាយសម្រុកដូចគ្នា»៕
