.jpg)
អ៊ូច ធារិទ្ធ បានសម្តែងការមិនពេញចិត្ត និងខកចិត្ត នៅពេលអាជ្ញាកណ្តាល បានលើកដៃឱ្យ ទូច ដេវីត ជាអ្នកឈ្នះ។ រូបថត សហការី
ភ្នំពេញ៖ កីឡាករជម្រើសជាតិ អ៊ូច ធារិទ្ធ បានបង្ហាញការមិនពេញចិត្តទៅនឹងការកាត់សេចក្តីរបស់ចៅក្រម នៅក្នុងការប្រកួតផ្តាច់ព្រ័ត្រ ដណ្តើមប្រាក់លាន រវាងរូបគេ និង ទូច ដេវីត នៅលើសង្វៀនថោន កាលពីថ្ងៃអាទិត្យ នោះទេ ដោយ ធារិទ្ធ រំពឹងថា គេនឹងត្រូវប្រកាសឱ្យឈ្នះ ក្នុងជំនឿចិត្ត ១០០ ភាគរយ ប៉ុន្តែបើជាលទ្ធផលជាក់ស្តែងគេប្រកាសឱ្យ ទូច ដេវីត ឈ្នះពិន្ទុមិនឯកច្ឆន្ទ ៤ ទល់ ១ ទៅវិញ។
ការរំពឹងថា ខ្លួនគួរតែទទួលបានជ័យជម្នះ ដើម្បីយកប្រាក់រង្វាន់លេខ ១ ចំនួន ៣,៤ លានរៀលនេះ ដោយសារ អ៊ូច ធារិទ្ធ គិតថាចៅក្រម នឹងដកពិន្ទុ ទូច ដេវីត អស់ពីបទ ទាត់ចំប្រដាប់ការពារ(ពងស្វាស)របស់គេ នៅទឹកទី២ ដែលទង្វើនេះ គណៈកម្មការ បានទុកពេលឱ្យ ធារិទ្ធ សម្រួលការឈឺចាប់ ដល់ ២ នាទី ទើបបន្តការប្រកួតទៀតបាន ហើយ ធារិទ្ធ គិតទៀតថា ការប្រកួតទឹកទី១ រូបគេមានប្រៀប អ៊ីចឹង ទោះបីជារូបគេ វាយដកថយ នៅទឹកទី ៣ ចុងក្រោយ ក៏នៅតែគេឈ្នះពិន្ទុលើ ទូច ដេវីត ដដែល។
អ៊ូច ធារិទ្ធ បាននិយាយថា៖ «ពេលប្រកួតចប់ គឺមុនពេលប្រកាសលទ្ធផល ខ្ញុំជឿជាក់ថា ខ្ញុំឈ្នះ ១០០ ភាគរយ ប៉ុន្តែលទ្ធផលជាក់ស្តែង គឺពិន្ទុ ទូច ដេវីត ឈ្នះខ្ញុំ ដោយពិន្ទុ ៤ ទល់ ១ គួរឱ្យហួសចិត្តទៅវិញ។ ខ្ញុំមិនតវ៉ាអ្វីទេ ប៉ុន្តែហេតុផល ខ្ញុំវ៉ៃមានប្រៀបទឹកទី១ ហើយទឹកទី២ ដេវីត ប្រកួតខុសបច្ចេកទេស (ទាត់ចំប្រដាប់ការពារ) នាំឱ្យខ្ញុំរបួសសម្រាក និងសម្រួលចំនួនពីរនាទី ហើយអាជ្ញាកណ្តាលព្រមានដល់ទៅពីរលើក អ៊ីចឹងគួរតែដកពិន្ទុ ទូច ដេវីត អស់ ហេតុនេះខ្ញុំរំពឹងឈ្នះពីរទឹកដាច់ទៅហើយ។ ចំណែកទឹកទី ៣ ខ្ញុំព្យាយាមដកថយ ការពារជ័យជម្នះ ប៉ុន្តែលទ្ធផលឱ្យខ្ញុំចាញ់ទៅវិញ»។
អ៊ូច ធារិទ្ធ បានបញ្ជាក់ថា៖ «ខ្ញុំជាកីឡាកររងគ្រោះ និងមានរបួស ដោយពងស្វាសខ្ញុំ លិចចូលក្នុងសល់តែមួយគ្រាប់ ហើយការឡើងប្រកួតបន្តសឹងតែមិនកើត ទើបព្យាយាមថយ និងទប់ទល់។ ខ្ញុំមើលប្រដាល់ថៃ បើអាជ្ញាកណ្តាល ព្រមានពីរលើកអ៊ីចឹង កីឡាកររងគ្រោះ ធានាឈ្នះ ១០០ ភាគរយ ប៉ុន្តែគុនខ្មែរ ខ្ញុំមិនសូវយល់ទេ ម្តងឱ្យខាងរងគ្រោះ ម្តងឱ្យខាងកីឡាករល្មើស។ ខ្ញុំមិនប្តឹងតវ៉ាទេ តែសុំប្រកួតសងសឹក វ៉ៃកុំឱ្យខុសបច្ចេកទេសអ៊ីចឹងទៀត គឺធានាឈ្នះ ១០០ ភាគរយ»។
ជុំវិញបញ្ហានេះ លោក ជួប វុត្ថា ជាពិធីករ និងជាអ្នកគ្រប់គ្រងកម្មវិធីប្រដាល់ នៅសង្វៀនថោន បាននិយាយថា៖ «បើប្រដាល់នៅថៃ ទូច ដេវីត មិនអាចឈ្នះ អ៊ូច ធារិទ្ធ បានទេ ប៉ុន្តែគុនខ្មែរ គេមានច្បាប់ប្រកួតដោយឡែកពីគ្នា ហើយខ្ញុំមិនសូវច្បាស់ដែរ»។
លោកបន្ថែមថា៖ «គោលដៅ និងបំណងរបស់សង្វៀនថោន ដែលប្រកួតលក្ខណៈគុនខ្មែរចំនួន ៣ ទឹកនេះ គឺជំរុញ និងលើកទឹកចិត្ត ព្រមទាំងផ្តល់អាទិភាពឱ្យកីឡាករណា ប្រកួតសម្រុកខ្លាំង គឺមិនអាចវាយលំៗ ឬបន្ធូរដៃឱ្យដៃគូនោះទេ ហេតុនេះបើខ្ញុំមើលការផ្តល់ពិន្ទុនេះ អាចទទួលយកបាន ឬបើឱ្យសមភ្នែក តាមការពិន័យដកពិន្ទុ ដេវីត គឺខ្ញុំមិនហ៊ាននិយាយទេ ព្រោះខុសពីតួនាទី គឺទុកឱ្យខាងសហព័ន្ធ ទៅ»។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានប្រាប់ថា៖ «ការផ្តល់ពិន្ទុពេលខ្លះ ក៏មិនមែនសុក្រឹត ១០០ ភាគរយដែរ ប៉ុន្តែសម្រាប់គូផ្តាច់ព្រ័ត្រនេះ គ្មានការប្តឹងតវ៉ាទេ គឺគ្រាន់តែដឹងថា អ៊ូច ធារិទ្ធ រអ៊ូខ្លះក្រៅផ្លូវការតែប៉ុណ្ណោះ»។
លោកបានបន្ថែមថា៖ «ក្នុងការប្រកួតនេះ បើ អ៊ូច ធារិទ្ធ របួសប្រកួតមិនកើត គឺនឹងផ្តល់ជ័យជម្នះ ទោះការវ៉ៃនោះ អចេតនា ឬចេតនាក៏ដោយ ប៉ុន្តែក្នុងករណី អ៊ូច ធារិទ្ធ សម្រាក ២ នាទីហើយ បន្តការប្រកួតបានវិញ យើងត្រូវបូកសរុបពិន្ទុរួមទាំង ៣ ទឹក អ៊ីចឹងឃើញថាកីឡាករ ទូច ដេវីត មានពិន្ទុឈ្នះ គឺសម្រេចតាមលទ្ធផលពីចៅក្រមតែម្តង។ ទោះយ៉ាងណា ក្នុងនាមសហព័ន្ធ យើងនៅតែទទួលការចូលរួមរិះគន់ ដើម្បីស្ថាបនាកែលម្អជានិច្ច»៕
