ភ្នំពេញ៖ នាយបេសកកម្មនៃប្រតិភូកីឡាកម្ពុជា លោក វ៉ាត់ ចំរើន បានប្រាប់ថា ក្រុមអត្តពលិកទាំង ៣ នាក់របស់កម្ពុជា បាននឹងកំពុងត្រៀមខ្លួនយ៉ាងល្អ ទាំងការហ្វឹកហាត់ សុខភាព និងការស្នាក់នៅ ហូបចុក ដើម្បីត្រៀមខ្លួនប្រកួតទៅតាមជំនាញរបស់ពួកគេ ក្នុងព្រឹត្តិការណ៍កីឡាអូឡាំពិក ទីក្រុងតូក្យូ ឆ្នាំ ២០២០ ប៉ុន្តែលោកបានអះអាងថា យើងមិនរំពឹងឡើយ ក្នុងដណ្តើមបានលទ្ធផលល្អ គឺបើអាចត្រឹមបំបែកកំណត់ត្រាចាស់ ឬឯតទគ្គកម្មរបស់ខ្លួនឯង វាល្អពេកទៅហើយ។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងនោះ បានប្រាប់ ភ្នំពេញ ប៉ុស្តិ៍ ពីប្រទេសជប៉ុន មកថា៖ «ស្ថានភាពទូទៅ ព្រមទាំងសុខភាពរបស់ក្រុមយើង ល្អប្រសើរ គឺការស្នាក់នៅ មានផាសុខភាពល្អ ចំណែកអាហារហូបចុកប្រចាំថ្ងៃ មានអាហារគ្រប់ប្រភេទ តាមតម្រូវការ គ្រប់ជាតិសាសន៍ និងបើកទទួល ២៤ ម៉ោងតែម្តង»។
នៅពេលសួរពីក្តីរំពឹងនៃលទ្ធផលការប្រកួតរបស់អត្តពលិកកម្ពុជា ក្នុងព្រឹត្តិការណ៍អូឡាំពិក លើកនេះ លោក វ៉ាត់ ចំរើន បានពន្យល់តាមបច្ចេកទេសក្នុងកីឡាថា៖ «ជាធម្មតាបងប្អូនជនរួមជាតិ ពិតជារង់ចាំ និងចង់ដឹងពីលទ្ធផល ជាមិនខាន ប៉ុន្តែបើផ្អែកទៅលើការពិត លើបច្ចេកទេសក្នុងកីឡា និងកម្រិតសមត្ថភាពរបស់យើង គឺយើងមិនអាចចំណាត់ថ្នាក់ ឬទទួលបានជយលាភីនោះទេ»។
ចំពោះបញ្ហានេះ លោក វ៉ាត់ ចំរើន បានលើកយកទិសដៅ និងគោលបំណង ២ ចំណុច មកពន្យល់។ លោកថា ទី១ ព្រឹត្តិការណ៍កីឡា ក្នុងកម្រិតអូឡាំពិកអន្តរជាតិ ជាបេសកកម្មកាតព្វកិច្ច ដែលយើងខកខានមិនបាន ព្រោះសិទ្ធិនេះ ទទួលពីគណៈកម្មការរៀបចំ ផ្តល់តាមធម្មនុញ្ញអូឡាំពិក បង្កឱ្យបានចូលរួមជាលក្ខណៈការផ្តល់សិទ្ធិអនុគ្រោះ មិនមែនចូលតាមប្រកួតជម្រុះទេ ហេតុនេះការប្រកួត គឺយើងបានដឹងពីលទ្ធផលទៅហើយ។
លោកបន្តថា និយាយឱ្យចំ គឺធ្វើយ៉ាងណាឱ្យទទួលបានភាពល្អប្រសើរជាងមុនប៉ុណ្ណោះ ពោលគឺអាចបំបែកឯតទគ្គកម្មខ្លួនឯង។ ចំណែកទី២ ប្រសិនបើកម្ពុជាបានចូលប្រកួតប្រជែងនូវប្រភេទកីឡាមួយណាក៏ដោយ តាមរយៈការឆ្លងផុតវគ្គប្រកួតជម្រុះតាមតំបន់ ឬទ្វីប នោះទើបយើងមានរំពឹងដណ្តើមយកចំណាត់ថ្នាក់ ឬស្វែងរកមេដាយ។
យ៉ាងណាក៏ដោយ លោក វ៉ាត់ ចំរើន បានបញ្ជាក់ថា៖ «យើងមិនអាចនិយាយអ្វី ដែលជាការបំបាក់ទឹកចិត្តដល់អត្តពលិកយើងនោះឡើយ ព្រោះគោលដៅធំបំផុតរបស់អត្តពលិកយើង គឺបំបែកឯតទគ្គកម្មខ្លួនឯង មិនមែនទៅបំបែកឯតទគ្គកម្ម ជាមួយគេនោះទេ ហេតុនេះយើងមិនអាចដណ្តើមបានមេដាយនោះឡើយ ពីព្រឹត្តិការណ៍កីឡាដ៏ធំនេះ ព្រោះសូម្បីតែជាប់ជាបេក្ខភាពប្រកួតប្រជែងតាមបច្ចេកទេស ក៏មិនបានផង គឺអត្តពលិករបស់យើង ទទួលបានត្រឹមសិទ្ធិអនុគ្រោះប៉ុណ្ណោះ»។
អ្នកជំនាញកីឡារូបនេះ បានបន្ថែមថា៖ «តែទោះបីជាយ៉ាងណា យើងមានផលចំណេញព្រោះយើងបានកំណត់ត្រា និងបទពិសោធ ព្រមទាំងបានដឹងពីរបៀបរៀបចំ យល់ដឹងពីនិតិវិធីព្រមទាំងស្វែងយល់ពីលក្ខណៈរៀបចំមុនប្រកួត ពេលប្រកួត និងក្រោយប្រកួត ក្នុងនាមតំណាងប្រទេសជាតិមួយ ជាសមាជិកពេញសិទ្ធិ បានបំពេញបេសកកម្ម ជាកាតព្វកិច្ច ក្នុងគណៈកម្មាធិការជាតិអូឡាំពិកអន្តរាជាតិ»។
គួរបញ្ជាក់ថា សម្រាប់កម្មវិធីប្រកួតរបស់អត្តពលិកកម្ពុជាទាំង ៣ នាក់ គឺកីឡាហែលទឹក ហែម ប៊ុច និង ឃឿន ប៊ុនពេជ្រមរកត ត្រូវប្រកួតវិញ្ញាសាហែលសេរី ៥០ ម៉ែត្រ ដូចគ្នា នៅមជ្ឈមណ្ឌលកីឡាហែលទឹក Tokyo Aquatics Centre នាម៉ោង ១៩:០០ ថ្ងៃទី ៣០ ខែកក្កដា (ត្រូវនឹងម៉ោង ៥ ល្ងាច នៅកម្ពុជា) ចំណែកកីឡាករអត្តពលកម្ម ប៉ែន សុគង់ នឹងត្រូវប្រកួតរត់ល្បឿន ចម្ងាយ ១០០ ម៉ែត្រ នៅពហុកីឡដ្ឋាន Olympic Stadium វេលាម៉ោង ១១:៣០ នាថ្ងៃទី ៣១ ខែកក្កដានេះ (ត្រូវនឹងព្រឹកម៉ោង ៩:៣០ នៅកម្ពុជា)៕