.jpg)
អណ្ដាតភ្លើងនៃព្រឹត្តិការណ៍កីឡាប៉ារ៉ាឡាំពិក Tokyo Paralympics កំពុងឆេះ ក្នុងកម្មវិធីប្រកាសបើកផ្លូវការ កាលពីថ្ងៃអង្គារ។ AFP
ក្រុងតូក្យូ៖ ព្រះចៅអធិរាជប្រទេសជប៉ុន បានប្រកាសបើកដំណើរការព្រឹត្តិការណ៍កីឡាប៉ារ៉ាឡាំពិក Tokyo Paralympics 2020 នាក្រុងតូក្យូ ជាផ្លូវការក្នុងកីឡដ្ឋានទទេស្អាត (អត់មានទស្សនិកជន) កាលពីថ្ងៃអង្គារ ដោយអត្តពលិកទាំងអស់កំពុងត្រៀមខ្លួន ដើម្បីប្រកួតប្រជែងកីឡាចម្រុះ និងបំបែកកំណត់ត្រា ទោះបីជាត្រូវបានពន្យារពេល ១ ឆ្នាំ ដោយសារវិបត្តិរោគរាតត្បាតក៏ដោយ។
ព្រះចៅអធិរាជ Naruhito ទ្រង់មានព្រះបន្ទូលបើកព្រឹត្តិការណ៍កីឡាជនពិការនេះ ជាមួយនឹងការព័ទ្ធជុំវិញទៅដោយកៅអីទំនេរចម្រុះពណ៌ដ៏ច្រើន នៅឯពហុកីឡដ្ឋាន Olympic ដែលមានចំណុះផ្ទុក ៦៨ ០០០ កៅអី ដោយច្បាប់ទប់ស្កាត់ការឆ្លងវីរុស ហាមឃាត់អ្នកគាំទ្រមិនឱ្យចូលរួមស្ទើរគ្រប់ការប្រកួត។
«ខ្ញុំសូមប្រកាសបើកព្រឹត្តិការណ៍ប៉ារ៉ាឡាំពិកហ្គេម Tokyo Paralympic Games 2020 ជាផ្លូវការ»។ នេះជា ព្រះបន្ទូលប្រកាសបើករបស់ព្រះចៅអធិរាជ Naruhito។
ការប្រារព្ធពិធីបើកនេះ កើតឡើងចំពោះមុខភ្ញៀវ វីអាយភី (VIP) និងមន្ត្រីប្រមាណ ៨០០ នាក់ប៉ុណ្ណោះ តែមានអារម្មណ៍ពិសេស ខណៈដែលក្រុមចំនួន ១៦២ រីករាយនឹងពេលវេលា ដែលពួកគេរង់ចាំយ៉ាងយូរក្នុងការប្រកួតប្រជែងកីឡា ដែលជាទីចាប់អារម្មណ៍លំដាប់ពិភពលោកនេះ។
ការប្រារព្ធនេះ យកពាក្យ «We Have Wings» (យើងមានស្លាបហោះហើរ) ជាពាក្យស្លោក ដោយបានសាងព្រលានយន្តហោះតូចមួយនៅលើវាលស្មៅរបស់កីឡដ្ឋាន និងនិទានរឿងយន្តហោះស្លាបម្ខាងហោះទៅលើមេឃ។
ការដើរក្បួនរបស់អត្តពលិកជនពិការ និងមន្ត្រីពាក់ព័ន្ធប្រមាណជា ៣ ៤០០ នាក់ បានចូលទៅក្នុងពហុកីឡដ្ឋាន ដោយមានពាក់ម៉ាស់ តែបានគ្រវីទង់ និងរាំរែក ក្រោយខកចិត្តដោយសារការពន្យារពេល និងបារម្ភពីការអាចនឹងរំសាយចោលតែម្ដង។
ប្រធានគណៈកម្មាធិការប៉ារ៉ាឡាំពិកអន្តរជាតិ លោក Andrew Parsons បានឱ្យដឹងថា ព្រឹត្តិការណ៍នេះ អាចជាផ្លេតហ្វមនៃការផ្លាស់ប្ដូរ។
លោក Parsons បានថ្លែងថា៖ «មនុស្សជាច្រើនមានចម្ងល់ថា ថ្ងៃនេះនឹងកើតមានឡើងឬ? មនុស្សជាច្រើនគិតថា វាមិនអាចទៅរួចទេ តែដោយសារការខិតខំប្រឹងប្រែងពីមនុស្សជាច្រើន ព្រឹត្តិការណ៍កីឡាដែលផ្លាស់ប្ដូរច្រើនបំផុតនៅលើលោក កំពុងត្រៀមខ្លួនដំណើរការហើយ»។
ហ្គេមដែលរយៈពេល ១៣ ថ្ងៃ និងដែលមានមេដាយមាសសរុប ៥៣៩ ទុកសម្រាប់ឱ្យអត្តពលិកធ្វើការដណ្ដើមគ្នាពី ២២ ប្រភេទកីឡាផ្សេងគ្នានេះ បានលេចឡើង ២ សប្ដាហ៍ ក្រោយកម្មវិធីបិទកីឡាអូឡាំពិក ដែលក៏បានកើតឡើងស្ទើរទាំងស្រុងផងដែរ ជាមួយនឹងការមិនអនុញ្ញាតឱ្យមានអ្នកគាំទ្រលើកទឹកចិត្ត ដោយសារការបារម្ភខ្លាចនៃការឆ្លងវីរុសកូរ៉ូណា៕ AFP/VN
